Tuesday, August 3, 2010

Lalpa Pawl nan

Mi tha chuan LALPA duhsakna a hlawh ang a,Suahsualna rilru pu mi erawh chu thiam loh a chantir ang.
Thufingte 12 : 2

editorial

LADC LEH LDMA INBE LEH SE
Lawngtlai Dist. Merchant Association te chuan sumdawnna ah chimral a awm hlau in hma an la a, an hmalakna kalmek ah Council lam nen inep theihna tur ang chi Order a chhuak niin an sawi a, Order erawh an hmuh ve loh thu an sawi tel thung a, a hmutur diktakin lehkha an hmulo chung a,mita la a, thupuitlingah pawm a, Dawr hial khar a hmalakdan tur an ngaihtuah kha chimral hmauhna vang liau liau niin a hriat a, Council a SRO in Order a tihchhuah ni a sawi pawh hi Sorkar in mipuite hamthatna a zawnna kawng a hmalakna tho niin a hriat a, a hmutur diktakin an hmuhloh chhan erawh chhuichian atan thiltha tak a nih a rinawm a, hetihrual hian, Dawr hial khar a hmalak a ni chho ta hian inepna thalo a pawchhuak tih a hlauhthawn awm a, Council lam leh LDMA te hian E/M ho meuh in thawhhona tha neih an tum thu an lo sawi tawh a, heihi tinung zelin inbiakna nei leh thuai se a duhawm ngawt mai.Tute mahin inchimralna hi an duh lo a, duhlo ve ve ten rual taka hma an lakho theih dan tur hi inpawh tlang taka an ngaihtuah nawn a tulin a hriat a ni.

Merchant Association ten Council Sorkar chu August thla chhunga an thu sut tura ngen tha an ti

>Lawngtlai August 03:Nimin zing dar 5 atang khan Lawngtlai khawpui chhung ah Dawr khar a ni a, Dawr hi vawiin nilengin khar a ni. Hetianga Dawr khar a nihna chhan hi Vawiin a JH Lorrain Hall Lawngtlai Bazar a Lawngtlai District Merchant Association General Meeting neih ah sawilan niin, Association hruaitute chuan- Lai Autonomous District Council nen Sumdawnna lam a inchimralna thleng tur ven kawng ah hmalakhona thatak neih a nih mek laiin, Merchant Association ten Dan lova sumdawng te dapchhuah hna an thawhthin chu Senior Revenue Officer LADC chuan titawhlo tur a hriattirna a siam a, chu lehkha Merchant Association President/ Secretary Address a siam chu Association lam chuan an dawn loh laiin, Inrinni khan Lawngtlai bazar a Council Staff Duty te a tangin lehkha tihchhuah a ni tih an hriat ve chauh thu sawiin, sumdawnna kawng ah inrahbehna thlen thlentur dang tur a Association hmalakna chu hmala theilo tur a tih an nih vanga Dawr chu khar an nih thu an sawi a, Meeting ah hian hmalak zui dan tur ngaihtuahin, Council Sorkar chuan Order a chhuah tawh chu August thla chhunga sut tur a ngen tha an ti. He Meeting an pawl President Pu H.Remmawia kaihhruai ah hian July 21, 2010 a LADC a Executive Member, Revenue enkawltu ho a Joint Meeting an neih ah Council leh Association chuan lungrual taka hmalak ho tha an tih lai a, Association lam te kut phuar thei zawng a Order tihchhuah a ni leh, chu Order chu Bazar Inspector lam ten a Copy an neih theih lai a, Merchant Association lam ten an hmu ve silo chu hriatthiam har an tih thu an sawilang tel bawk.

DC in sawipui dawn

Vawiin hian Multi Model Transport kawngpui sial tur chungchang ah Pu Thlamuana DC chuan Lawngtlai-III Branch YLA leh VC te leh Central YLA hruaitute a titi pui dawn

NLUP Campaign

August 5&6 hian Lawngtlai ah NLUP Awareness campaign neih tur a ruahman a ni

Monday, August 2, 2010

Sorkar leh Chanchinbumite an tanrual chuan ram in hmel mawi leh rimtuitak a nei ang

Lawngtlai August 02 :Kar kalta Zirtawpni khan MJA Lawngtlai District Office Bearers te chuan hunrei tak atanga an Adviser lo ni tawh leh nilaimek, tunhnai a Lai Autonomous District Council Sorkar in Executive Secretary atan a ruat thar Pu C.Zoramthanga chu a Office ah lawmpuina hun an hmang a, Pu C.Zoramthanga chuan ram changkang apiang ah chanchinbu chu dah san a ni thin a, Lawngtlai District ah hian mipui lam chu sawiloh, Sorkar Officer zing ah pawh chanchinbu pawimawhna man phalo engemawzat an la awm tih sawiin, chanchinbu pawimawhna vawnghim tur in chanchinbumiten tan an lak a, thubelhchiandawl chauh chhuah thin turin MJA te chu a chah a, Lai District siamtha turin Sorkar leh Chanchinbumiten tanrualna tha an neih a pawimawh a, thawhhona thatak hnuai atangin LADC chuan hmel mawitak rimtui tak a nei thei dawn a ni a ti a, MJA MJA hruaitu lam pawhin an Adviser nilai in LADC a dinhmun pawimawh tak a luah chu thinlung taka an lawmpui thu sawiin, Council Sorkar in Chanchinbumite tana hamthatna a siam te an duhkhawp loh lai leh rawtna hrang hrang te an thlen a, Executive Secretary chuan a theih ang ang a lo bawhzui a tum thu MJA te chu a hrilh. LADC ah hian 29 April 1972 atangin Executive Secretary an thutan a, vawiin thleng in a mihring zawnga chhutin Executive Secretary mi pasarih awm tawhinPu C.Zoramthanga hi E/S 10 na a ni.

LWA ten Pangpar lem siam an zir zo

July 27 atanga tan Lai Women Association Hqrs. Lawngtlai, Ferendo Peace Home Durtlang leh NABARD Mizoram Regional Office Aizawl tangkawp te buatsaih, Lawngtlai Vengpui a Skill Development Training on Artificial Flowers Making chu Inrinni khan zawhfel a ni. He Training ah hian Lawngtlai khawpui chhunga LWA Branch hrang hrang leh LWA Hqrs. hruaitute atanga mi thlanbik 25 ten Pangpar lem siam hi an zir a, zirlaite chuan hlawk an tih thu an sawi uar hle. LWA Hqrs. President Pi H.Vanlalhruaii chuan pangpar lem siam chu LWA Member engemawzat in sum hailuh nan a hmang mek tih The Lawngtlai Post hrilh in hmeichhe dinhmun chawikan nan a hmalakna tha tak a ni a ti. Tun tum hi hetiang Training an neih tum thumna a ni a,

Bial thar lawm dawn

Vawiin hian Lawngtlai Bazar Veng Congress Unit leh VC te chuan MDC Constituency thar VCP Pu C.Sangchhunga In ah ruai nen lawm an tum. Bialtu MDC Pu C.Ngunlianchunga CEM leh Pu F.Rohnuna President Lai DCC ten he hun hi an hmanpui ang. Kar kalta lam khan Vengpui bial thar pawh lawm a lo ni tawh

LDMA Meeting

Vawiin hian Lawngtlai Dist. Merchants Association chuan JH Lorrain Hall ah General Meeting an ko a, hmalakze;l dan tur ngaihtuah an tum, Meeting an neih chhungin Dawr an khar dawn niin kan hria.

MPF Campaign

August 6 khian Areopagy ah MPF chuan vantlang inkhawm koin Campaign neih an tum, MPF hruaituten hmalakna leh hmalakna tur bak ah mipuite zirtiorna an pe ang.

Aug. 11 ah sawn

Officer Club tuaithar tur a inhmuhkhawm hun chu August 11 ah sawn a ni.

DAMDAWIIN NGEIA NAU NEIH THEIHNA TURA SORKAR HMALAKNA

Heihi Backward District pathum (3)- Mamit, Saiha leh Lawngtlai District ah hman tur a ni. Khua atanga Nau neih theihna hnaiber thleng chauh bill theih a ni ang. Nu nau nei tur chu a zawnin emaw a kalna tur Motor an ngaihtuah sakin emaw a hnuaia mi ang hian NGO ten lawmman an dawng / bill thei ang.

1. Motor kal theih lohna hmun atanga Nu naupai zawn man ah Rs.150/- per KM.

2. Motor kal theihna, mahse reqular service awmlohna leh motor hire tur awmlohna hmun atanga Nu naupai zawn man ah Rs. 150/- per KM.

3. Motor kal theihna, mahse reqular service awmlohna leh Motor hire tur awmna hmunah Motor hire manah Rs.100/- per KM.

4. Motor reqular service awmna leh a paltlang khuaah chuan Rs. 50/- per KM Bill theih a ni ang. Mahse NGO ten Nu naupai 1 leh ASHA Motor chuanman an Bill atangin an tumsak anga, hei hian Nu naunei hawlam fare a huamtel ang. Tin, Ticket lak leh Motor lo chanpui te pawh NGO ten an buaipui vek tur a ni.

5. Serial No. 1,2,3 leh 4 khuaah hian NGO pakhat zel identify an ni ang.

6. NGO te leh Official te hian he cheme tan hian inremna (Agreement) ziah tur a ni.

7. NGO ten Nu nau nei tur an zawn dawnin raipuar an zawn tur leh a pasal / enkawltu phalna emaw remtihna lehkha (Format awmsa) lak hmasak phawt a, chumi chu bill ah pawh thil tel tur a ni.

8. He lehkha (Format awmsa) hmang vek hian Nau neih theihna hmuna SN/HW/Doctor ten an hnen thleng an zawn ngei a ni tih an lo Certify ang.

9. He lehkha (Format awmsa) hmang vek hian fill-up tur leh Signature lak ngaite an lakfel vek hnu ah Nu in nau a neihna hmun PHC/CHC/DH atangin Bill an la chhuak thei ang.

10. Kilometre zat / khaw inkar hlat zawng hi District/ CMO Office ah neihsa a ni.


NB: 1) Nu naupai zawn / hruai tur chu a nau neih inrin hun hma ni thum (3) aia tlai lovah kalpui thin nise

2) He scheme hian Private Hospital pawh a huam ang.

3) He scheme ah hian NGO ten an kallam (Oneway) chauh an bill thei.

4) Nu nau nei tur khua atanga Nau neihna hmun hnaiber thleng chauh bill theih a ni.

5) He scheme hian Nau neih theihna khua i.e. PHC/CHC/DH chu a huam lovang

ISSUED BY CHIEF MEDICAL OFFICER, LAWNGTLAI DISTRICT:
RCH/NRHM SECTION