Tuesday, September 14, 2010

CYLA in ngaimawh

Tunlai hian MDC thlan neih tur a chuhtum mithenkhat hnen ah Tlangval thenkhat in pawisa an dil thin tih Central YLA chuan an hriat thu kan dawng a, hetiang a pawisa dil ching te hi Central YLA chuan an ngaimawh hle a, hetiang a tih chingte manchhuah an nih chuan an chung ah nataka action lak Central YLA chuan an tum thu kan dawng.

Parvon man

Kumpuan Duty ten niminkhan Lalhmangaihi Thingdawl hnen atangin Parvon Capsule 80 an man

AIR Artiste tan

AIR Aizawl chuan AIR Artist te an Website ah kimtaka dan luh an duh a, AIR Aizawl Station a hla khung tawh zawng zawng te chu October 10,2010 ral hmain an chanchin tawi leh an thlalak Passportsize, Station Director, AIR Aizawl hnen ah thehlut turin an ngen, hriatchian duh nei tan Phone No. 9436140462 ah zawhfiah theih a ni.

MIZORAM SORKAR HNATHAWK GROUP THEN DAN

India Danpui Article 309 leh Rule 6, CCS(CCA) dan tlawh chhanin Mizoram Governor chuan Mizoram sorkar hnuaia Civil Posts te chu a hnuaia tarlan ang hian a thliar hrang fel.
1. Pay Band-4(37400-67000) hnuai a Grade Pay 9500,8900,8700 la te leh Pay Band-3 (15600-39100) hnuai a Grade Pay 7600, 7100, 6600, 6100 leh 5400 la te chu Group ‘A’ emaw Class 1 officer an ni.

2. Pay Band-2 (9300-34800) hnuai a Grade Pay 4800,4600, 4400 leh 4200 la te chu Group ‘B’emaw Class -II emaw an ni ang.

3. Pay Band-1(5200-20200) hnuai a Grade Pay 2800, 2400, 2000, 1900 leh 1800 la te chu Group ‘C’ emaw Class-III emaw an ni ang.

4. Pay Band -1S (4440-7440) hnuai a Grade Pay 1650 la te chu Group ‘D’ emaw Class IV emaw an ni ang.

Monday, September 13, 2010

Lawngtlai District PYKKA Sport Central YLA Playground ah neih mek a ni.

September 16 thleng awhtur Lawngtlai District PYKKA Sport chu Central YLA Playfround ah neih mek a ni.Zirtawpni khan Pu Thlamuana DC Lawngtlai PYKKA District Chairman nibawk in a hawng, hawnna inkhawm Pu C.Hrangthianga Vice Chairman Distrcit Sport Committee kaihhruai ah Khuallian Pu Thlamuana chuan infiamnakhawvel ah thingtlang kilkhawr zawka chengte tan pawh a dinchhuah theih a, Mizoram in infiamna lam a mihlawhlting a neih engemawzat te chu thingtlang lam mi an ni a ti a, infiammite chu insumtheihna leh tumruhna nen a fan fan turin a chah. He hun ah hian Pu Vanlaltlamuana Field Assistant Mizoram State Soprt Council pawh in infiammite fuihna thu a sawi. Lawngtlai Dist. a Block pali zing ah Chawngte Block chu he Sport ah hian an tel thei lova, Block dang pathum, Lawngtlai, Bungtlang South leh Sangau Block a infiammi te atangin State PYKKA Sport nrih a Lawngtlai District aiawh tur thlan a ni dawn a ni.Hun hmasa lam chu Athletics ah intihsiakna neih a ni a, vawiin lam ah Sport hi chhunzawm leh a ni ang.

MNF Office ah M.P

Naktuk hian MNF District Office Lawngtlai Bazar ah Pu lalhmingliana MP (Rajya Sabha) chuan thu a sawi dawn, thusawi ngaithla turin mipuite MNF Party chuan an sawm

Khawlum zel tihziaawm nan Zirtirtuten Seminar neiin hmalakna tur an duang

September 10 khan YLA Hall Lawngtlai ah DIET Lawngtlai leh World Vision India Chhimtuipui Area Development Programme tangkawp te buatsaih in District Level Seminar on Teachers Responsibility in Global Warming tih chu neih a ni. Prof. H.Lalramnghinglova Mizoram University leh Pu Laltlanhlua Zathang DFO Lawngtlai te thuziak zirho a ni. Khawvel lum chho zel ven nan leh tihziaawm a nih theih nan Seminar a telte chuan hmalakna tur ruahman in Resolution paruk an passed a, chungzing ah chuan Mahni School theuh Green School a siam tur a hmalak te, Green Teacher ni tur a thing pathum tal phun te, Carbon Monoxide pe chhuak thei khawl te niklhat ah darkar khat tal Off te a tel a ni.

BDO in sem dawn

World Vision leh Friends Club, leh Cable TV tangkawpte buatsaih Kum 18 hnuailam tana Solo Competition neih mek ah zanin hian Top-5 a tling mi pasarih ten intihsiakna an nei anga, naktuk zan ah Result puan a ni ang, Result puan zan hian Pu T. Van lalmalsawmsanga BDO chu khuallian atan beisei a ni a, BDO hian lawmman a sem nghal ang.

Bike MZ 03 C/1341 in Lalnunpuii a su

Nimin chawhnu dar 1:15 vel khan College Veng a mi Lalnunpuii (13) Pu Lalchhuanmawia fanu chu an kawt a a awmlai Bike in a su a, Lalnunpuii hi a khingkhang ruh a tliah bak ah hliam dang pawh a lu leh hmundang ah tuar nual bawk,LCMC ah enkawl mek a ni. Police te chuan thubuai an ziaklut nghal; BIke hi Number Registration Plate a ziak a nih dan chuan MZ 03 C-1341 a ni a,MZ 03 hian C a la kai lo niin a hria ten an sawi.Bike khalhtu Lalrenga Council Veng chu Police ten an kawl.

Thursday, September 9, 2010

LADC Session ni hnih awh tur chu nimin khan tan a ni

LADC. thlasik thutkhawm, ni hnih awhtur chu nimin khan LADC Session Hall thar ah, Council Chairman Pu F.Manghnuna kaihhruaina hnuai ah tan a ni, Chairman chuan rorelna tluang taka kalpui a nih theih nan Member te chu thahnemngai taka rorel turin a chah a, Session hall thar ah LADC Sorkar Term kallai a Session Hnuhnungber ah House chu inhnialbuaina In nilova dik taka rorelna In a nihtheih nan Member tinte tanla turin a chah a, nimin Session ah hian MNF Member pahnih Pu B.Thanchunga leh Pu Thangchemsanga ten zawhna pahnih ve ve an zawh bak ah Pu Manghmunga Chinzah in zawhna pakhat a zawt bawk. Pangkhua bialtu MDC, MNF Member Pu Thangchemsanga zawhna chhangin Pu C.Ngunlianchunga Chief Executive Member chuan Chamdur leh Mautlang inkar Medium Truck Road laih nan Council chuan Cheng Nuai 30 a hmang a, heibak ah hian BRGF atangin Cheng Nuai 10 dah a ni a ti a, kawng hi laihtlang niiin, thal lai chuan TATA 407 pawh buhfai phurin a lut a, zawhna zawttu in kawng chhe lutuk anga a sawi chu kawng thar reng reng chu leimin a tam a, thenfai fo a ngaihthin vangin he kawng pawh hi leimin in a hnawh tih a sawi a, kawngpui dang pawh leiminin a hnawh hi sawitur a tam a ni a ti bawk. Pu B.Thanchunga zawhna chhangin CEM chuan LADC Session Hall hawn tak chu a Building leh Side Preparation ah a vaia pawisa pek chhuah tawh chu Rs. Nuai 240.88 a ni a, tunah hian Final bill siamfel a la nilo a ti. Pu B.Thanchunga zawhna SSA atanga zirtirtu lak mi 38 ban chungchang chu Pu V.Zirsanga Executive Member Middle Education chuan chhangin heng zirtirtu ban tak te hi an hna an thawh that loh vang a ban ni a tarlan a ni a, ban zingah hian mifel tak tak tamtak an awm a, lak leh an nih theih nan hmalakna kalpui mek a ni a ti. Sixth pay LADC a hman a nih ve dawn leh dawn loh chungchang zawhna chhangin Pu C.Ngunlianchunga CEM chuan hman anih ve theih nan LADC Executive chuan thutlukna a siamfel tawh a, State Sorkar ah Sunction dil mek a ni a ti.Chawhnu lam session ah Chawngte bialtu MDC Pu Lalduhsaka Resolution LADC Forest Deparetment in Saikhawthlir, Buhvum leh Dilkhan ram Reserved Forest chu Wildlife Sunctuary ah puan ni rawh se tih a pu lut a, sawiho a ni. Session hi vawin ah chhunzawm leh a ni ang, tuntum session ah hian zawhna House a chhan tur pakua (9) a lut a, Private Member Resolution pahnih a awm bawk.

JNV hawng dawn

Vawiin tlai lam hian Pu C.L.Ruala MP chuan Sihtlangpui khua a JNV School chu a hawng dawn, nimin khan MP hian Lunglei District a JNV School chu a lo hawng tawh bawk.

Release dawn
Dr.J.Doungel ziak Evolution of District Council Autonomy in Mizoram chu Pu F.manghnuna’n Sept.14 khian a release dawn.

MLA in Press Club a tlawh Computer set a pe

Lawngtlai a chamek, Lawngtlai East bialtu MLA, Pu H.Zothangliana Parliamentary Secretary chuan nimin chawhnu khan Lawngtlai Press Club a tlawh a, MLA hi MJA Vice President Pu V.Lal Lianzuala leh hruaitu dang ten an lo dawngsawng. Press Club, President Room a inkhawm tawite buatsaih ah Pu Zothangliana chuan Chanchinbu mite chu mipuite kawng tha kawh hmuh a fuih thar fo turin a chah a,MUlti Sectoral Development Fund chu reilote ah Lawngtlai Dist. ah hman a beiseiawm a ti. MLA hian MJA Press Club a dah turin Computer Set a pe a, MJA lam chuan hunreitak atanga an lo awh em em, thuneitute pawh an lo dil fo tawh, an hlawhchham hnu ah MLA in a pe chu lawmawm an tih thu uar takin an sawi.

Wednesday, September 8, 2010

MLA in hmasawnnatur sawi

Nimin a LADC Session Hall tharna hawnna inkhawm ah Pu H. Zothangliana, Parliamentary Secretary leh bialtu MLA ni bawk chuan Mizoram Sorkar hmalakna avanga Minor Irrigation Sub Division Lawngtlaia dah a nih tur thu te, UD&PA hnuaia Social Infrastructure Lawngtlai tan Rs. 778,88,000 tihfel a nih thu te, Greater Lawngtlai Water Supply Scheme thawh tan thuai a nih dawn thu te a sawi a. Mitinin an chanpual tur diktak an chan theih hun – khawvar hun a lo her chhuah theihnan rorelna dik a pawimawh tih sawiin LADC Session Hall atang hian rorelna dik chu luipui angin luang chhuak se a duh tih a sawi a. Mipuiin roreltu tha an duh a, chutiang bawk chuan roreltute pawhin mipui tha an duh a ni tiin that inlawm tawn chuan rah tha a chhuah dawn a ni a ti bawk.

LADC Session Hall Minister in a hawng

Nimin khan Pu R. Lalzirliana RD Minister chuan LADC Complex, ah LADC Session Hall leh Lawngtlai District Library Building a hawng. Minister hi Parliamentary Secretary pahnih, Pu H. Zothangliana leh Pu Lalrinmawia Ralte ten an tawiawm.Pu Zira chuan dar 10:30am khan Lawngtlai District Library Building hawngin hnathawhna reng rengah hna uluk leh zawh that a pawimawh a tih thu a sawi a. Library leh Archive te hi thangthar zel ten an lo la zir tur leh an lo en zel tur a nih bakah competitive exam hrang hrang beituten an hman tangkai fo tur a ni tiin chutiang atan chuan duhsakna a hlan a ni.Hawnna inkhawm hi Lawngtlai BDO T. Vanlalmalsawmsanga MCS in a kaihruai a. Library hi BADP Scheme Cheng nuai 20 senga sak niin a dung 45 ft, a vang 28 ft a ni a. LADC in a enkawl dawn a ni.Hemi hnu dar 11:00am ah Pu R. Lalzirliana Minister District Council Affairs etc hian LADC Session Hall a hawng a, a chhung a fang nghal bawk. Minister chuan thu sawiin building tha neih a hlut rualin mipui kaihruaitu tak tak zawk chu kan thu Minister chuan Sorkar hmalakna hrang hrangte sawi langin kan thawhrimna te hi LALPA tel lo chuan a thlawn mai a ni a ti a. Kan ramah power leh leilung hausakna te kan haichhuah tak tak hunah chuan kan ram hausakna leh thing leh mau ringa kan chhehvela thilsiamna hmun tam takte hi kan luahlan thei dawn a ni a ti bawk. Politics ah te, zirna ah te, eizawnna leh hna hrang hrangah te hian rinawmna hi a pawimawh a, rinawmna hian lallukhum a keng tel a ni tiin kan rinawm chuan Pathianin a hunah min chawisang mai thin a ni a ti bawk. Minister chuan LADC Session Hall chu dikna kenkawhna hmun ni sela, rorelna dik humhalhna hmun niin Mizorama hnam zia rang mawi tak takte a nihna anga a lo parchhuahna hmun ni bawk se tiin duhsakna a hlan a ni.Session Hall hawnnaah hian Pu C. Ngunlianchunga Chief Executive Member, LADC chuan Mizoram Sorkar duhsakna changa LADC fund (Plan & Non-plan) a pung chu lawmawm a tih thu a sawi a. LADC chhunga hmasawnna hrang hrang te, hmasawnna hrang hrang thawh tur leh thawh mek atana Sorkarin Additional Fund a pek avangin lawmthu a sawi bawk. CEM chuan Session Hall hi a rang thei angbera luah a nih theihna tura a hmalakna te sawiin Session Hall ah hian rorelna dikin hmun chang se, midang lo luah zelturte pawhin mi rethei leh chanhaite tana chanvo an siamna hmun ni zel se a duh tih a sawi a ni.LADC Session Hall hi 12 Dec, 1997 atanga sak tan niin kum 14 chhungin sak zawh a ni a, 10000 sq. ft (929 Sq. m) a zau a ni a, chhawng 3 a sang a ni. Site preparation-ah Rs. 28,25,000/- hman ral niin a building sak nan hian Rs. 212,63,000/- hman a ni bawk.Session Hall hawnna programme hi Pu F. Manghnuna, Chairman LADC in a kaihruai a, Rev. C. Hrangzuala, General Secretary, Lairam Isua Krista Baptist Kohhran, Lawngtlai in hunserh a hmang. Er. V. Boiliana, EE (PWD), LADC chuan Technical Report a pe a, Nl. Lalrochhingpuii, LDC, LADC leh CYLA Choir ten zaiin mipui an awi a. Pu C. Zoramthanga, Executive Secretary, LADC chuan Vote of Thanks a sawi bawk a ni.