Friday, February 18, 2011

Central Team ten Council kalphung sawidanglam tul an ti

Tualchhung sorkar-te hnena thuneihna sang zawk pek dan tur ngaihtuahtu Central Team te chuan District Council kalphung sawidanglam an duh. Central Team te hi an Chairman, Dr Hrusikesh Panda, Addl. Secretary chuan a ho a,tualchhung sorkar-te'n chak zawka hna an thawh theih nan State Finance Commission a taka hna thawhtir tur leh, V/C member-ah hmun thuma thena hmun khat chu hmeichhe tana dah tura Mizoram sorkar an ngen. Heng Central Team te hian nimin khan District Council pathum, Lai,Mara leh Chakma District Council pathum aiawh te an kawm a,MDC thlan chu State Election Commission hnuai ah awmse, V.C Term chu MDC Term ang kum nga ni ve an duh thu te, V.C leh MDC ah Seat awm zat atanga hmun thum a then a hmun khat (1/3) chu Hmeichhia te tan hauhsak nise an duh thu te an sawi. LADC aiawh in he Meeting ah hian Pu C.Zoramthanga Executive Secretary a tel. Central Team te chuan Council aiawhtute chu a ranglam in an rawtna chu an Council ah thlen a, ngaihtuah ho turin an ngen nghal bawk a ni.Central team-ah hi Dr Hrikesh bakah, DoNER Joint Secretary, Dr JP Sharma, Ministry of Home Affairs (NE) Jt Secretary Shambu Singh leh National Institute of Urban Affairs-a mi Prof. MP Madhur- te an ni.

ZNP Thalai ten Forest Dept. ah sum chingpen awm in an hria.

Zoram Nationalist Party(ZNP) Gen. Hqrs. Thalai te chuan nimin khan Aizawl Press Club ah thuthar lakhawmtute kawmin Mizoram a Environment & Forest Department ah kangmei ven nan a ahmalakna ah sum tih chingpen a awm ni a an hriat thu an sawi a, 10th Five Years Plan leh 11th Five Years Plan hnuai ah kum sarih chhung a Mizoram a E&F Department a kangmei venna leh hetiang lama hmalakna tur a Ministry of Environment & Forest Department in pawisa a pekchhuah zat chu Cheng Nuai 2858.983 a ni a, hemi chungchang a ZNP Thalai ten RTI Act hmanga an chhuichianna chungchang an sawifiah dan in, Mizoram Sawrkar in kum sarih kalta chhung a Kangmei venna leh helam kaihhnawih a sum a hmanral zat chu Cheng Nuai 2200.88 a ni a, cheng Nuai 658.103 chu a awmna chin hriat a ni lo tih ZNP Thalai te chuan an sawi a, heng sum hmanga Environment & Forest Department in an hnathawh RTI Act hmanga an zawhna an chhanna ah pawh rinhlehawm thei tur a awm niin an sawi a, Watch Tower siam nan Nuai 154 hman ral ni a tarlan pawh Tower sakna hmun sawichian a nilo niin ZNP Thalai te chuan thuthar thehdarhtute chu an hrilh.

Rel kawng sawiho

Nimin khan Mizoram a Rel kawng siam dantur ngaihtuahtu State Level Task Force thukhawm chuan Aizawl atanga Zochachhuah thleng Rel kawng sial tha an ti a, a ranglam in Forest Clearance lak nise an ti a, thing leh mau tihchhiat tur leh ram mamawh te neih dan tur te nimin a meeting ah hian ngaihtuah a ni

Website thar

Immanuel Baptist Church chuan website an hawng thar a, he website tlawh duhte tan http://korbantkpibc.tk ah luh theih a nih thu kan dawng.

Thlah dawn

Vawiin hian Hmangaihvulluaia Aizawl a Pro Pastor BCM a dah chu College Veng a a U ten amah thlahna hun an buatsaih dawn. Pro Pastor hi Kohhran leh Thalai lam chuan thlahna hun an lo hmang tawh. Amah hi Kohhran leh khawtlang a tangkaitak, Lawngtlai Academy of Letter a dinhmun pawimawh tak luah lai a ni.

Chawngte tlawh tum

Hunremchang hmasa ber ah MJA Lawngtlai District chuan CADC a CEM in an hnathawhte a hmun a entur a sawmna chu tihlawhtin tumin hma an la mek a,Chawngte hi tlawh thuai an tum.

Thursday, February 17, 2011

kau Tlabung leh Tuipanglui PIL High Court in pawm

Prism atanga thudawnin a tarlan danin,Prism in Kau Tlabung leh Tuipanglui Mini Hydel Project-a sum chingpen chhuina sorkarin a tihtawp avanga Gauhati High Court-a PIL an file chu ni 15.2.2011 khan Gauhati High Court chuan a admit ta.Kau Tlabung leh Tuipanglui Mini Hydel Project hnathawhnaah hian sum hman dan rinhlelhawm tak tak a awm ni a hriain chhuichian anih theihnan October 3, 2008 khan Prism chuan Anti-Corruption Bureau hnenah FIR an thehlut a. He FIR hi chhuifiah anih hnuah thil diklo a awm ngei tih ACB chuan chianin Engineer 13 chu he sum chingpenah hian mawhphurtu an ni tih an finfiah a. ACB chhuina bawhzui hian Vigilance Department chuan heng Engineer te laka criminal case ziaklut tur hian ACB chu thu a pe a. Criminal case ziaklut tura inbuatsaih anih laiin July 2, 2010 khan sorkar chuan he criminal case hi titawpin Departmental-a chhui turin thutlukna a siam a. Hei hi Prism chuan thil dik ni theia an ngaih loh avangin Gauhati High Court-ah PIL an file zui ta a ni. He PIL hi October 10, 2010 khan Justice M. Lokur chuan a hnawl sak a. Hemi hnu Prism chuan restoration petition an file leh a. Thawhlehni khan Divisional Bench – Justice T Vaiphei leh Justice Hrishikesh Roy te hmaah ngaihtuah a ni a, admit a ni ta a.Ngaihtuahnaah hian Prism aiawhin Ukil JC Lalnunsanga a ding a, sorkar aiawhin Nelson Sailo a ding thung a ni.

Central Team leh Council aiawhte inkawm dawn

Nimin khan India hmarchhak state a tualchhung inrelbawlna, local body te hnena thuneihna sang zawk pek dan tur chungchang ngaihtuahtu Central Team chuan Tripura chhuahsanin Aizawl an rawn thleng.He team-ah hian Ministry of Panchayat a Addl. Secretary Dr. Hrusikesh Panda, DoNER Jt. Secretary Dr. JP Sharma, Ministry of Home Affairs Jt. Secretary (N.E) Pu Shambu Singh leh National Institute of Urban Affairs a thawk Prof. M.P. Mathur te an tel a.Nimin khan Hmuifang tlang tlawhin Hmuifang leh a chhehvela khawtlang hruaitute nen inkawmna hun an hmang a. Vawiin hian Lai, Mara leh Chakma Autonomous District Council aiawhte bakah Chief Secretary leh sorkar mipawimawh dangte an hmu ang.Zan hnih riaka lo zin Central Team te hian ni 18 hian Aizawl chhuahsanin New Delhi an pan ang.

MLA-te hlawh tihsan hun ti lo

Mizoram Upa Pawl Gen. Hqrs. chuan MLA te hlawh tihsan tum chungchangah, tunhnai -ah chuan an hlawh tihpun hun lo hle-a an hriat thu an sawi. MUP thu-chhuah chuan, Dan siamtu (MLA) la ni ve ngai lote leh engtikah mah ni ve ngai lo tur, khua leh tui dik takten ngaihdan an puanchhuah mek lai chuan MLA tanglai te, MLA ni tawh (FLAM) te, MLA nih tumte chu lo insum rih turin an ngen a. ‘Anmahni chanpual tur sawi an nih avangin mipui an lamah an tan phah lo mai thei. Chuvangin, lo ngawih hi an tan a tha zawk ang,’ an ti.

Exam mek

Mizoram Board of School Education (MBSE) hnuaia High School Leaving Certificate (HSLC) leh Higher Secondary School Leaving Certificate (HSSLC) Exam chu neih mek a ni a,HSLC hi Centre 82-ah candidate 11,254 an awm a, HSSLC-ah hian centre 50-ah exam hi neih a ni a, candidate 9,506 an awm a ni. HSLC exam hi thla thar ni 3-ah an zo ang a, HSSLC hi thla thar ni 9-ah an zo fel ang. Lawngtlai District ah pawh Exam Centre hrang hrang ah Exam hi Zirlai ten an nei mek a, Exam hmachhawn a an inbuatsaih ngawrh zual lai a ni chho mek a ni.

Wednesday, February 16, 2011

M.P Pu C.L.Ruala hoin Meeting neih a ni MGNREGA hnuai ah Ni 84 inhlawh a ni tawh

Nimin khan Lawngtlai District Level Vigilance and Monitoring Committee chu an Chairman Lok Sabha MP Pu C.L.Ruala ho in DC’s Conference Hall,Lawngtlai ah an thukhawm Meeting ah hian Ministry of Rural Development hnuai a Scheme hrang hrang hnuai a kum 2010-2011 chhunga hmalakna te thlirlet a nih bak ah hmalak zui dantur sawiho a ni a. Meeting ah hian MGNREGA bik ah Lawngtlai District chhung ah kum kalmek ah Ni 84 inhlawhna siam a ni tawh a, tun dinhmun ah Lawngtlai District chhung ah Job Card nei 24388 an awm thu te sawilan niin MGNREGA hnuaia inhlawhfakna Central sawrkar atanga hmuh thin chu Meeting chuan lawmawm a tih em em rualin, mipui hruai diklo tu a nih theih thu te, hnathawktur a kaltlai leh ban hma te bak ah a theih hram chuan Khawl rawih loh nise an ti, Vawiin a Lawngtlai District Level Vigilance and Monitoring Committee thutkhawm na ah hian Pu Thlamuana DC, Pu C.Ngunlianchunga CEM, Lai Autonomous District Council, Pu Kali Kumar Tongchongya CEM, Chakma Autonomous District Council, Pu C.Ramhluna Lawngtlai West bialtu MLA bak Tlawmngaipawl aiawh leh Department hrang hrang aiawh te an tel tha hle.Nimin Meeting neih zawh hian DRDA Governing Body Meeting neih zui nghal a ni bawk.

CADC ah Circle thar

Chawngte atanga thudawnin a tarlan danin tunthla Ni 12 khan CEM Pu K.K.Tongchangya chuan Longpuighat ah Circle Education Office a hawng a, heihi February thla chhung a Education Circle thar hawn pahnihna niin hemi hmalam hian Boropansury ah Education Circle chu CEM hian a lo hawng tawh a ni. Tihian CADC ah Education Circle pathum awmin Circle thar pahnih hawn belh tak bak ah hian Kamalanagar Circle a awm bawk a ni. CEM Pu Kali Kumar chuan zirna chu sorkar in a ngaipawimawh hle tih sawiin Right to Education Act hnuai ah zirna chu chaktaka kalpui mek ani a ti.

Tuesday, February 15, 2011

CEM in karkhat thangin Tuithlang lam a tlawh

Kar kalta Thawhtanni atang a Inrinni thleng khan CEM Pu C.Ngunlianchunga chuan LADC huamchhunga khawthlang lam tlawhin mipui ten harsatna an neih te an khua ah ngei enfiahin a ngaithla a, hetianga CEM in an khua ah ngei an harsatna te an thlen theih nan a tlawh chu a tlawh khua te chuan lawmawm an tih thu an sawi, Pu C.Ngunlianchunga chuan Lai District khawthlang lam chu mi harsa zawkte chenna hmun a nih thu sawiin, dawmkan an nih theih nan Sorkar chuan theihtawp a chhuah thu a sawi a, Mizoram Sorkar Flagship Programme NLUP chungchang sawiin reilote ah Lai District ah NLUP chu ataka kalpui a nih tur thu leh a hlawhtlinna leh hlawhchhamna chu a dawngtu mipuite ah a innghat a, hlawhtling tak a kalpui a nih theih nan te, tunhun atan mai nilo, tuchhuan thleng a eizawnna nghialnghet nei tur a bultan nan a NLUP chu hman a pawimawh thu te, Sorkar chuan pawisa sem ringawt chu a thiltum a nih loh thu leh mipui ten eizawnna nghialnghet an neih theih nan a rahbi tuksak chu a tumber a nih thu sawiin, dikna leh rinawmna nen sorkar thawhpui turin mipui te chu a sawm a.Chief Minister Pu Lalthanhawla leh a thawhpuite inpekna vangin hmasawnna chu chaktakin kalpui chhoh mek a ni a ti. CEM hi EM leh MDC thahnem tak bak ah Council Sorkar a Official pawimawh ten an tawiawm a, a tlawh khua ten ropui taka lo hmuakin hmun tamtakah CEM leh a thawhpuite hi ruai nen lo hmuah a ni, CEM hian Lawngtlai pana a haw kawng ah Kaladan Multi Modal Transport Project hna kalmek ah Lawngtlai leh Zorinpui Land Custom Station inkar kawngpui laihhna ARSS Insfrastucture Limited leh RDS Company ten Rulkual leh Saizawh in kara an thawhmek pawh a tlawh nghal bawk.

VC thlanhun sawn

Nimin a LADC Executive thukhawm chuan Village Council inthlan hun tur a lo ruahmansa chu sawn hla in, March thla chawlhkar khatna ah neih nise an ti a, a hun leh ni chu LAD lamin an siamfel ang. Inthlanhun sawn a nihna chhan hi Pu F.Rohnuna Chairman hnen atanga kan dawn danin VC inthlanna dan thar hman a nih dawn vangin Ballot paper pakhat hman a ni dawn a, inthlan hun tura ruat hmasak chu Ballot paper buatsaih nan hun a chep deuh vang in inthlan hun hi sawnhlat a nita a ni.

Velentines Day tumdang aia tangkai zawka hman a ni.

Nimin Feb.14 kha Valentines Day a ni a, khawvel hmun hrang hrang ah Hmangaihte tan duhsakna inhlan tawnna ni ah hman a ni, Lawngtlai ah pawh tumdang zawng aia uar in he Ni hi hman a ni a, Hmangaihte tan duhsakna inhlan in thilpek in pek tawn nan a bikin Thalai ten an hmang nasa hle a, Nu leh Pa, kum upa lam thleng in he Ni denchhen a an hmangaihte tan a thilpek hlan hrittur an awm nual bawk. Tumdang a la tih ngailoh midangte tana inpekna Ni ah Association for Voluntary Bood Dopnation Lawngtlai te chuan midangte tan Thisen pe duh tan pekna hmun tur JH Lorrain Hall ah an siam a, District Hospital a thawkten a hmun ah kalin Thisen hi an laksak a, thisen petute hi Mipa 29 leh Hmeichhia 26 niin an vaiin mi 55 in Valentines Day chu midangte tana thiltha tih nan a hmangin an thisen an pe, thisen petu te chuan a mamawhten an hmantur a an thisen an pe chu V-Day apiangin chhunzawm zel nise an duh tih uar takin an sawi.

Wednesday, February 2, 2011

Kaladan Multi Modal Transport kawngpui laih hna tan a ni ta

Khawchhak ram te nen a insumdawn tawnna tur atan a Central Sawrkarin ruahmanna a neih zing a mi Kaladan Multi Modal Transport Project hna chu tan a ni ta a, he hna hi a takin nimin piah atang khan tan a ni. Nimin khan Rulkual leh Saizawh inrina lai ah ARSS Infrastructure Project Limited ten kawng an laih hna chu an tan a , he hun hi Pu C.Ngunlianchunga CEM bak ah Pu F.Hranglura E/M, Pu Lalneihkhuma E/M, Pu ST Laldailova MDC, Pu PT Lalchuanglura MDC Pu Hmun Hre Vice Chairman Planning & Development, Pu V.Thangzova CYLA President Pu A.Malsawma Vice President CYLA bak ah PWD hotute te pawhin an hmanpui.ARSS te hian KM 38 atanga 71 inkar an lai dawn a, nimin a an laih tanna hi KM 38 na a ni a, KM 1 atanga 38 leh KM 71 atanga KM 100 inkar chu RDS Company ten an lai thung dawn a, RDS Company pawh hian nimin piah atang khan hna hi an tan tawh a ni, heng hna te hi Kum li chhung a zo hman tur a beisei niin kawngpui zau zawng hi Blacktop chin ringawt pawh Metres 7 a zau tur a ni. Pu C.Ngunlianchunga chuan Pi leh Pu leh Politician hmasa te hmathlir a taka tihpuitlin hna tan chhoh a ni ta chu lawmawm a tih thu a sawi a, Lawngtlai District chu Zoram kawtchhuah a la ni ngei dawn a, Pastor Chhawna’n Chhim a enga a lo tih chu a takin a eng chho dawn ta a ni a ti a, ram mipuite pawh hmasawnna rawn luangluttur dolet tur a hmathar la turin a chah bawk. CEM chuan kawnglaitu Company te chu harsatna an neih chuan a hnen ah thlen tur a hrilh in theihtawp chhuah a Sawrkar in a tawiawm tur thu a hrilh.Nimin a kawnglaih hna tanna a tel te leh Kawnglaitu Company hotute chuan Liapha bul a lung lakna tur pawh a hmun ah an en nghal a, Company te chuan Chhimtuipui lui a lung tam tak awmte chu lungtha tak tak a nih vangin lakchhuah tumin ruahmanna an siam thu an sawi

Symbol siambelh

LADC Sorkar chian Village Council inthlanna neih tur atan Election Symbol a hman tur 25 a siambelh, heng symbol siam belh te hi symbol tur a neihsa nen VC Candidate ten an hmang thei dawn a ni.

Minister lokal dawn

Karleh khian Health Minister Pu Lalrinliana Sailo chuan Lawngtlai District rawnn tlawh a tum a, Tuithlang lam fangin Ramri a insumdawn tawnna tur pawh a hmun ah a tlawh rin a ni.

Tuesday, February 1, 2011

Kum 8 hmangtan
Vawiin atang hian The Lawngtlai Post chuan a kum 8 na a hmang tan ta, min hlutsak tu
zawng zawng te vang liau liau a ni tih
kan hria a,
lawmthu Editorial Board chuan a sawi e.

LADC ah V/C Inthlan thawh thum a neih turin ruahmanna siam fel a ni.

Lai Autonomus District Council hnuai a Village Council 86 te tan Inthlan pui neih hun tur leh neihdan tur kimchang chu ruahman fel a ni tawh a, inthlanna hi thawh thum a neih a ni dawn a, a thawh khatna chu tunthlan Ni.21 ah neih a ni anga, hetah hian Village Council 20 ah inthlanna neih a ni anga, a thawh hnih atan February 23 ah Vote thlak a ni anga, VC 20 ah inthlanna hi neih a ni ang. Inthlan thawh hnuhnungber chu February Ni 25 ah Village Council 46 ah neih a ni dawn a ni. LAD lam chuan inthlanna a Duty tur te pawh a ruatfel vek tawh niin kan hria. Inthlan thawhkhatna a inthlang tur te hi Lawngtlai khawpui chhung VC 9,bak ah Chawnhu, Thingkah,Mampui, Saikah U&L, paithar, Saizawh East, Rulkual, R.Vanhne, Chawntlangpui, Sihtlangpui leh Kawlchaw West te an ni a, inthlan thawhhnihna hian Tuichhak lam a huam anga, thawthumna chuan Tuithlanglam a Village Council te a huam thung dawn a ni. Inthlang tur a Sorkar lam a inbuatsaih rualin Political Party te pawh inthlanna hmachhawn tur hian an inbuatsaih tan mek bawk.

Zirtirtu te an Training tan

Nithum awhtur Continuous & Comprehensive Evaluation (CCE) Middle leh Primary School zirtirtu Lawngtlai khawchhung te tan nimin khan tan ani.Training hmanpuitu Pu Lalneihkhuma E.M i/c Primary chuan thusawiin, ‘zirtirtute chu ram siamtu an nih angin, Sawrkarin School naupangte zirna kawngah hmathar a rawn chhawpchhuah sak hi naupangte hnen ah thiamtak leh sawrkar duh ang a zirlaite zirtir a, kaihhruaitu ni thei tur a he CTE Training hi hlawkpui thei ngei tur a inbuatsaih theuh turin zirtirtute a chah rualin Training hi a hawng nghal. Rignt to Education hman a lo nih tak avangin kumin Academic Session atang hian LADC hnuai a School ah pawh hman tan a ni a, tunhma a Zirlaite Bye-heart System a kalpui anni thin chu tihtawp a, an nitin zirlai te an thiam leh thiamloh a taka hmuhchhuah nghal a nih theih na tur a, zirlaite an lehkha zirlai zirtirtuten an vilna kawng ah enthlithlai reng a, naupang in an nitin zir chu an thiam chian leh chian loh te zirtirtuten an hriat theihna tur kawng hrang hrang te, zirtirna an pek hun a naupang in rilru zawng zawng nen an an zir nge zirlo tih hriat theihna tur hrang hrang te he Training a tel Zirtirtute hi zirtir an ni.Ni thum awhtur Zirtirtu Training hi School pathum ah neih a ni a, Mini DIET a Lecturer ten Training hi an pe. karleh khian Lawngtlai khawpui chhehvel a thawk zirtirtute tan Training hi buatsaih leh a ni anga, February thla chhung hian LADC Area tuamchhuah hman tum a ni.

NLUP hnai

LADC huamchhung ah NLUP ataka kalpui a nih thuai theih nan hmalakna chak taka kalpui mek a ni a, reilote ah semchhuah beisei mek a ni, nimin khan Lawngtlai leh Aizawl a NLUP buaipuitu ten Video Conferencing neiin hmalakna kalmek te an sawiho

Joint Meeting

Feb.5 Inrinni khian Lai,Mara leh Chakma Council hruaituten Direct Finance chungchang ah Lawngtlai ah Joint Meeting an nei dawn.

Lai tan dawn

Vawiin hian Multi Modal Transport Kawngpui laih tan a ni dawn a, he hun hi Saizawh ah hman tum niin, Central YLA hruaitute atangin President Pu V.Thangzova leh Vice President Pu A.Malsawma te chuan he hun hi an hmanpui ang, ruai nen he hun hi hman tum a ni.

CYLA Kawm dawn

Deputy Chief Whip Pu Lallawmsanga Apetow chuan vawiin hian Central YLA hruaitute chu a Chamber ah Thingpui a inpui dawn a, a bial chhunga Thingtlang khua tam lutuk chuan hmasawnna hna thawh na ah than a ti thuanawp thin ni a hria in, Grouping chungchang Pu Lawmsanga hian CYLA hruaitute hi sawipui a tum ni a hriat a ni.

Plan Fund pawm

Mizoram Sawrkar chuan LADC Plan Fund Cheng Nuai 253 chu nimin khan a pechhuak fel a, Plan hnuaia thawk ten 6th Pay angin hlawh leh Arrear an la ve thei dawn ta.

SMS Pack ngai dawnlo

Telecom dan thar angin Pre Paid Mobile hmangtu zawng zawng te hnen ah February Ni 1 atang hian 100 SMS nitin pek ziah a ni tawh dawn, heihian SMS Pack thun fo ngai chu a tihtawp ngei a rinawm

Silver Jubilee

Vawiin leh naktuk hian Lawngtlai bazar Presbyterian Kohhran chuan an Kohhran kum 25 Silver Jubilee lawmna an nei dawn, he kohhran a lo lawi tawh zawng zawng te tel turin an sawm.