Thursday, March 31, 2011

Nimin Session ah

LADC Budget Session nimin a chhunzawm ah hun hmasa lam chu nidang ang bawkin zawhna leh chhanna hun atan hman a ni a, chawhnu lam ah Official Business pathum, The Lai Autonomous District Council(Group A,B,C&D) Recruitment) Rules 2011, The Lai Autonomous District Council Employees (Performance Appraisal Report) Rules,2011 leh The Lai Autonomous District Council (General Service) Rules, 2011 te chu lungrual tak a passed a ni a, Private Member Resoloution Pu PT Lalchuanglura put luh pawh House chuan a pawmpui bawk.

I FATEN MID DAY MEAL AN DAWNG THA EM

No.G.11011/4/09-DPO/SSA/LTI
OFFICE OF THE DISTRICT PROJECT CO-ORDINATOR
SSA MISSION,LAWNGTLAI DISTRICT


IFATEN MID DAY MEAL AN DAWNG THA EM


Sorkar School-a kal Elementary School naupang ten hriselna tha zawk neia,rilru chak tak nena lehkha an zir theih nan,India Sorkar leh Mizoram Sorkar tangdun chuan: ‘Naupang chhunchaw’ nitin hetiangin a pe thin

1. Primary School naupang tan:

1.2 Buhfai - 100 gram per child per day on all schooling days.
2, Chawhmeh leina (conversion course)-Rs.3.12/-per child per day on all chooling days

2. Middle School naupang tan:

2.1 Buhfai - 150 grams per child per day on all schooling days
2.2 Chawhmeh leina(Conversion Cost)-Rs.4.33/-per child per day on all schooling days

Heng bak ah hian,school tam zawkah Kitchen Shed sak ni tawhin, bungbel hrang hrang pek an ni tawhy bawk a. School tinah naupang mamawh dan a zirin Cook pek vek an ni bawk. Engemaw harsatna thenkhat avangin, Buhfai leh Conversion Cost a khaihlaik thin a. mahse, hemi chhunga harsatna lo chingfela ruahmanna lo siam turin, Headmaster te ngen leh beisei thin an ni a, heihi pawisa thlen ve leh rulh let (re-imbursed) leh vek thin an ni a.Khaihlak awmlo tura ngaih a ni.

Hetianga sorkarin a khua leh tuite tana thil tha a tih mek lai hian mipuiten tih tur (fundamental duties) kan nei ve a ni tih hria ila:

1. I fa ten Mid Day Meal an dawng tha em ?
2. I fate chhunchaw dawn kha a thianghlimin a hrisel tha em ?
3. A chunga tarlan pawisa leh buhfai an dawn turte an dawngkim em ?

Sorkarin sum tamtak a senral laia I faten an dawn tur an dawn si loh chuan I mawhphurhna a ni ve tih hriain, report kimchang tak a hnuaia tarlan Telephone No. ah te hian rawn pe thin ang che. A tul chuan ziakin complained rawn thehlut bawk ang che



Contact No. Sd/- (VANLALVUANA)
9612823764 District Nodal Officer (MDM)
9436148427 SSA Mission, Lawngtlai District

Wednesday, March 30, 2011

Multi Modal Transport Transit Project kawng laihmek ah LADC Forest in Clearance la pelo. April thla laihawl vel atangin Zirtirtu siamrual dawn

LADC Session neih mek nimin a chhunzawm,F.Rohnuna Chiarman kaihhruaiah hun hmasa lam chu nidang ang bawk in zawhna leh chhanna hunah tan hman niin zawhna panga zawt a chhan hman vek a ni, Pu C.Lalsawmzuala Chandmary Bialtu MDC zawhna," Multi Modal Transport Road laih mek hi Forest & Environment Clearance pek ani em tih chu, Pu H.Chhuanawma E.M i/c Forest etc chuan chhangin, Clearance hi pek ala ni lo a ti a, zawh belhna chhangin Pu H.Chhuanawma chuan Forest Clearance LADC in a pek chhuah hma a hna tan anihna chhan chu hna hi thawh zawh thuai duh vang ani ati a, Forest Deppt. hian PWD hnenah Feb. 17,2011 khan in sawi fiah tur a lehkha a pek tawh thu leh an chhanna nghah mek anih thu a sawi a, Forest Clearance atang a LADC in pawisa a hmuh tur hi Rs. Vaibelchhe li maktaduai thum sing ruk sang thum anih tur thu a sawilang bawk. Pu Lalduhsaka zawhna Zirtirtu sem rual an ni tawh em tih chu Lalneihkhuma E.M i/c Primary changtu chuan chhangin, " Zirtirtu Lawngtlai town a tam lutuk leh thingtlang lama a tlem lutuk chu semrual la ni lo a ti a, April thla laihawl vel atang in zirtirtu te hi semrual anni ang ati Chawhnu hunah hian Official Business 2, Discussion of LADC Employees (Performance Appraisal Reports) Rules 2011 leh Discussion of LADC (General Service) Rules 2011 te sawi ho ani

CADC Session ni thum awh tur tan a ni

Nimin khan Chakma Autonomous District Council; Budget Session nithum awh tur chu Chawngte ah CADC Chairman Pu Susil Chakma kaihhruaina in tan a ni Budget Session tan ni hian CEM Pu Kali Kumar Tongchangya chuan CADC Budget 2011-2012 leh Supplimentary Demand for Grant 2010 -2011 a pharh, CADC Budget Estimate atana ruahman zat chu Rs. 2432.18 lakhs niin Supplimentary Demand for grant chu Rs. Nuai 913.20 a ni. Budget ah hian Non Plan ah Cheng Nuai 22.50,dah a ni. Centrall Sponsored Scheme leh 13 Finance Commission atanga hmuhtur a beisei leh Chhiah tling khawm tur cheng Nuai 33.05 beisei te nen Budget hi a pumpuiin Cheng Nuai 3840.38 a ni. Vawiin session nhi Chief Executive Member in Budget a pharh hnu ah zirtawpni a chhunzawm leh turin tihtawp lailawk a ni.

Mi 3 man

Nimin khan Lawngtlai District Anti Tobacco Squad te chu an Chairman Pu Thlamuana DC ho in meizial zuk phallohna hmun a zu an awm leh awmloh vaiin an chhuak a, kar kalta a Squad te an chetchhuah ang bawkin nimin hian Sorkar Office te an tlawh kual a, Office 14 an tlawh kualna ah Meizial zuk phallohna a zu mi pathum an man a, an pawisa chawitir tling khawm chu a vaiin Rs.150/- a ni. Squad Member te chuan meizuk chungchang a dan awm te mipui lam in an hre tan viau a an hrit thu leh heivang hian man fuh tur pawh a hma a an vah chhuah aia an tlem ni a an hriat thu an sawi.

Awareness Campaign

Nimin khan YLA Hall, Lawngtlai-III ah Human Trafficking & Sex Awareness Campaign, Nehemia Local Team, Salvation Army Lawngtlai te buatsaihin neih a ni a, he hun Pu F.Lalsangkima Secretary Nehemia Group kaihhruai ah hian Captain K.Lalrinpuia Commanding Officer in Pathian hnen a inhlanna hun a hman hnu ah Human Traffiking chungchang, Lalzuithangi Social Worker Community Health Action Network(CHAN) zirtirna a pe a, George Zonuntluanga Coordinator CHAN in Sex Education leh HIV/Aids chungchang ah kalkhawmte zirtirna a pe bawk. He Awareness Campaign ah hian Lawngtlai khawpui chhunga Zirna In hrang hrang atangin zirlai thahnem tak an tel

2011-2012 Mizoram Budget Pharh ani

Chief Minister, Finance changtu Pu Lal Thanhawla chuan nimin khan sorkar kumthar 2001-2012 thla 4, April to July chhunga sorkar sum hman tur cheng vaibelchhia 1354.27 leh kum kal mek 2010-2011 chhunga sum mamawh belh cheng vaibelchhia 817.11 chu a pharh.Thusawi ah CM chuan Mizoram Annual Plan sum tih fel tlai anih avanga budget lailawk, Vote on Account a pharh a tul dan tarlang hmasa in budget pumpui chu hun remchang hmasa ah pharh leh a ni ang a ti a. C.M chuan 13th Finance Commission-ah kan chuankai dawn avangin state sorkarin a sum thawhchhuah ve turah tan lak a ngaih thu leh sum renchem pawimawhzia a tarlang a. State sum dinhmun tih ngelngheh nana Finance Commission in GDP rate punna tura a beisei chu 2010-2011 ah chuan 9.7 % leh 2011-2012 ah chuan 10 % a ni tiin hemi thlen tur hian sorkar leh mipui mimir sum veivir tihpun a tul hle dawn a ni a ti C.M chuan revenue leh capital account ah te mamawh a san chak em avangin state in theihpatawpa sum a thawhchhuah ve a tul dan a tarlang bawk a. Chhiah leh thil dang atanga Mizoram in sum a peipun theihna tur rawtna CM hian a chhawp chhuak nghal a. Chungte chu Petrol leh a kaihhnawih atanga sales tax tih pun; VAT uniform floor rate tih pun; tui man tih san; transport department hnuaia chhiah hrang hrang ennawn leh tih pun; inhmun lo ram LSC, periodic patta etc. felfai taka chhinchhiah; labour leh casual a hnathawkte chhin chhiah fel leh sorkar hnathawk nghette hnen atanga an chawi tur ang ang fel zawka chawi tir te an ni.Nimina Vote On Account leh Supplementary Demand pharh takte hi vawiin ah sawihoa House in a pawmpui beisei a ni.

Tuesday, March 29, 2011

CEM in LADC Budget Cheng Nuai 6472.96 House ah a pharh

LADC Budget Session nihnihna nimin a chhunzawm, Chairman Pu F.Rohnuna kaihhruai ah hun hmasa lam chu zawhna leh chhanna hun atan hman a ni a, Felfai lo deuh a Opposition lam in an ngaihte pawh felfai tak a chhanna pek zawh vek anni.Hemi rual hian Pu PT.Lalchuanglura MDC in LADC hnuaia MDC zing a nihna chelh lo te pawhin an Private Motor ah MDC tih tar a rem leh rem loh thu a sawi chu Chairman in rem tiin, MDC te chuan an Private Motor ah MDC (Designation) tar chu an duh chuan a theih tiin, tar theih anih tur thu tarlan ani. Pu C.Ngunlianchunga CEM,LADC chuan LADC Budget 2011-2012 tur pharh in, Kum 2011-2012 a LADC Budget tur a ruahman chu:- Annual Plan= Rs. 1540.00 lakh. ani a, Non-Plan ah Rs. 4847.96 lakh. leh Local Revenue ah Rs. 85.00 lakh ani a. a Pumpui in Kum 2011-2012 a LADC Budget atan Rs. 6472.96 lakh ani a. CEM chuan kum 2011-2012 Budget Estimates leh Supplementary Demand for Grants 2010-2011 Rs. 1490.31 lakh chu Member zawng zawng ten Pass pui turin a pharh ani.

Tuichhakah NLUP sem tan dawn

A tum khatna atan, naktuk leh a tukleh hian Tuichhak lam ah Mizoram Sorkar Flagship Programme NLUP sem tan a ni dawn a, Line Department pakhat Industries Department chuan an hnuai a Trade thlangtu te hnen ah hmalakna tur pawisa hi an pechhuak dawn a, naktuk hian Siachangkawn ah sem a ni anga, a tuk leh ah Sangau ah sem a ni zui nghal ang. Tuichhak lam bik ah hian NLUP hnuai a Industry Trade thlangtu chhungkua 46 an awm a, a pumpuiin Lawngtlai East bial ah Industry trade thlang mi 164 an awm a, heng mite tan a sum mamawh tur zat chu7 Rs.30,84,500/- a nih thu SDIO hnen atangin kan dawng. Tuntum a NLUP semchhuah tur hi Industry hnaui a Trade thlang tu ten an Trade thlan thlan a zirin a inang dawn lova, Puanthui thlang te hnen ah Rs.25000/- in sem a ni anga, Blacksmithy thlang te hnen ah Rs. 19300/- in sem a ni anga, a dang ah chuan Rs.20000/- theuh in sem a ni dawn a ni. Karthar ah khian Lawngtlai Vengpui, Bazar, Council Veng leh Lawngtlai-III huamchhung a Industry Trade thlangtu te hnen ah hmalakna tur pawisa hi semchhuah tumin Department lam chuan ruahmanna an nei tawh bawk a ni.

Campaign

Vawiin hian YLA Hall Lawngtlai-III ah Nehemia Local Team & CHAN, The Salvation Army te buatsaih in Human Trafficking leh Sex Education Awareness Campaign neih a ni dawn

Vawiin Session

Vawiin LADC Session nah hun hmasa lam chu zawhna leh chhanna hun atan hman a ni anga, Private Member Resolution pakhat putluh a nih bak ah Official Bill pathum te pass tum a ni bawk ang.

Sipai lakrunpui

April 5 - 24, 2011 chhungin Mizoram pumhuap in Sipai lak runpui neih tum a ni a, hrechiang duh tan Office hunchhungin IPRO Office Lawngtlai ah zawhfiah theih a ni.

Article: A hlamzuih leh angem...???

Dt.10th Feb.2011 a Pu H.Vanlalthaliana, Executive Member i/c Revenue etc. Chamber-a Lawngtlai Town Management Committee din tak in a, Lawngtlai khawpui chhunga In sak, Tuizem, Bungrua, Ran In etc. in a vantlang kawng a nek chep zia chungchanga hma an lakna hi a hlamzuih mai angem...? Lo hlamzuih palh ta se, Lai Autonomous District Council khawpui, Lawngtlai hmabak hi a va thim dawn tak em...!!

Lawngtlai Town Management Committee - Adviser - CEM, Lai Autonomous District Council, DC Lawngtlai, S.P. Lawngtlai te avang chauh pawh hian he hmalakna hi hlamzuih lo se ka va duh tak em. Lawngtlai Town Management Committee Committee Member ten a ni li (4) chhung teh meuh, Thingkah atanga College Veng tawp 71 RCC inkar mimal In sak dan leh thil dang in a vantlang kawngpui a nek chepna zualpui laia, mimal chhungkaw hrang hrang hnena kan ram leh kan hnam tana kawngpui hlat thei ang bera, inhlim chhing tur ngenna kan siam leh kan hrilh nten a, kawngpui tur leh Pavement tur atana In leh lo nghet leh Tuizem Parmanent pui pui pawh chhutchhiat an hreh loh zia ka hmuhin, lawngtlai mipuite hi an va tha em..!! Thuneitu te hian hma an la meuh lo thin zawk a nih dawn hi, tih hi ka thil hmuhchhuah a ni.

Lawngtlai Town Management Committee hmalakna hlawhtling tur hian kan ram hruaituten mawh kan phur nasa hle mai. A bik takin kan Chief Executive member nilai Pu C.Ngunlianchunga leh Pu Thanghluna Ex-Chief Executive Member tena an In step vawthiat a, kawngpui zauh nana an inhlim ngam a nih chuan, harsatna tumahin an siam dawnlo tih hi Lawngtlai Town Management Committee Member te thil hmuh dan a ni e.

Mipuite rilru in hawn lai tak hian thuneitu pawhin, PWD te nawrin kawngpui zauh hna hi thawk ila, Pavement tur te hi duang lawk vek ila ava tha dawn tak em. He hmalakna ah hian Executive Member i/c Revenue chauh ring mai lovin ram hmangaih vanga Politic Field luhchilh a, MDC zawng zawng ten tawiawm thin nise a duhawm hle ang.

-C.Lalhimnakulhpuia
Secretary Central YLA

CCE TRAINING HELD AT KAMALANAGAR

28TH March’ 2011: In effect of the RTE Act 2009, training on Continuous and Comprehensive Evaluation, has been conducted for the first time at Kamalanagar today, under trained resource persons. The initiative for the programme has been undertaken by SSA, Lawngtlai District, CADC Area, in collaboration with the Education & Human Resource Department, CADC.
The occasion has been graced by the Hon’ble Chief Executive Member, Chakma Autonomous District Council, Shri Kali Kumar Tongchangya. The CEM in his speech stated that CCE being a feature, core to the RTE Act 2009, should be taken with outmost interest. It envisages adopting the practice of continuous evaluation of the students through Unit Tests on weekly or fortnightly basis with the abolition of the old system of assessing the students through Terminal Examination. He stated that abolition of Terminal Examination would de-stress the students of the burden they go through at the end of every academic year. Mr. Tonchangya also expressed his concern about the literacy status of the Chakmas, under CADC, being alarmingly poor which has been reflected in the recent census conducted by Govt. of India. Taking note of this concern, the CEM urged the teaching community to take the battle of eradicating illiteracy on war footing. On the other hand he also expressed his delight over the large turnout of trainees/teachers (more than 200) in response to the call to attend the programme, which is evident enough of the interest and dedication the teaching community has for the future of the budding generation.

Monday, March 28, 2011

Council Veng khawtlang in hnatlangin kawng an siam

V/C thar in khawtlang huap hnatlang an koh hmasak ber chu Inrinni khan Council Veng VC te chuan ko in, an veng chhung a inkalpawhna kawng YLA Road ti a vuah, PWD ten siamthat hna an thawh mek chu puiin khawtlang mipui te an hnatlang. Hnatlang ah hian chhuak an tha thawhkhat hle a, helai kawng Kilometre chanve vel a thui hi engemawchen chu Blacktop a nih tawh bak ah, Black top loh chin pawh Boulder phah a ni tawh a, heng Boulder phah te hi leiin a chhilh lai awm nual tawh a, lungnawi phah hnan mai theih a nih loh vangin hnatlang hian helai kawng thenfai hna hi an thawk a, tuihawkluankawr pawh an thianfai nghal bawk. Council Veng VC te chuan an huamchhunga sorkar hmalakna chu lawmawm an tih thu a hmuna tlawhtu The Lawngtlai Post hrilh in, an theih ang ang a sorkar hmalakna puibawm a tawiawm chu an inhuam reng tih an sawi. PWD lam hian Motor pakhat leh Labour engemawzat an thawhchhuah tir a, VC lam chuan mipui bak ah Motor pakhat an thawhchhuah pui bawk. Helai kawng hi kumin chhung chuan Blacktop zawh hman beisei a nih thu kan dawng.

Vawiin LADC Session ah

LADC Sesssion vawiin a chhunzawm tur ah dar 10 tan a ni anga, zawhna leh chhanna hun hman a ni anga, zawhna panga zawt a chhan hman beisei a ni.CEM in Budget a pharh anga,Official Bill pakhat sawiho a nih bakah Private Member Resolution pakhat putluh a ni ang.

LIKBK Assembly Moria Biak In a neih chu a tiak ta

March 23 zan atanga Lawngtlai Chanmary a Morria Biak In a neih tan Lairam Isua Krista Baptist Kohhran Assembly chu nizan khan a tiak ta. Nilaini atanga Inrinni thleng kha rorel nan hun hman a ni a, an thu passed langsar zual zing ah Ramngaw leh nNungcha humhalh kawnga hmalakte, Look East Policy tangkai zawka chhawr a nih theih nan a hmalak chhunzawm te, Kum 2012 November thla ah lairam Gospel Centenary lawm te, 2011-2012 chhung a Missionary Convention neih te,Mizoram State Aids Control Society nen nen thawhhona neih chhunzawm te, Global Chin Christian Fellowsjip leh Council of Chin Baptist Church te nen t5hawhho remtih a nih bak ah, Kum 2011-2012 Budget atan Cheng Vaibelchhe ruk(6) an pawm a, Pay Commission din an remti bawk. LIKBK Assembly hi Kohhran dang an thawhpui Mizoram Synod, Baptist Church of Mizoram ,Evangelical Church of Maraland leh Lamkang Naga Baptist Association ten aiawh tir in an chhim. Nimin chawhnu lam ah Rev Th.Vanlalzauva'n Lalpa zanriah Sacrament a buatsaih a,nizan inkhawm ah Rev.V.Ngunkhara (Chairman kalchhuak) in Kohhran enkawlna a rinawmna tih thupui hmangin Pathian thuchah a sawi.

LATKP Meet Vawi 4 na zawhfel a ni ta

March 25 zan atanga tan Lawngtlai Area Thalai Kristian Pawl Meet vawi 4 na, Salem Biak In, Lawngtlai-III a neih chu nizan khan a tiak ta , Meet neih chhungin Thalai ten rawngbawlna hrang hrang ah chak zawka ke an pen theih nan kawng hrang hrang in inzirtirna hun hman a ni a, Pathian thuchah ngaihthlak a nih bak ah HIV/Aids chungchang te, Ramngaw leh Nungcha humhalhna lam hawi te mihtiam ten an sawi. He Meet hi Baptist Church of Mizoram, Chairman Elect Rev.Raltawnga leh BCM Puipaten an hmanpui bak ah MTKP hruaituten an President Rev.R.Zohmingliana ho in an hmanpui bawk.Riak a Meet a tel mi 400 zet an awm. Area Meet hi MTKP Khawmpui neih loh kumin neih thin a ni a, MTKP khawmpuiin, khawmpui leh khawmpui inkar ah kum hnih a tla tur a ni ti a an rel tak vangin Meet neih leh dan tur chu a thar in L:awngtlai Area TKP te hian an la ngaihtuah leh ang.

Saturday, March 26, 2011

LADC Session tan a ni ta

Ni ruk (6) awh tur Lai Autonomous District Council Budget Session chu nimin khan LADC Session Hall, lawngtlai ah Chairman Pu F.Rohnuna kaihhruaina in tan a ni. Session hun hmasa lam chu MDC lo ni tawh chatuanram panta mi pahnih Pu Rualneihkhuma leh Pu T.mangnuaia te sun nan hun hman a ni a, hemi hnu hian zawhna leh chhan hun hman niin vawiin session ah hian House a chhantur zawhna lut zawng zawng 19 zing a zawhna panga zawt a chhan hman a ni. Eptu Member Pu Lalduhsaka zawhna chhangin Chief Executive member Pu C.Ngunlianchunga chuan LADC huamchhunga Village Council inthlan ah Model Code of Conduct hman a ni lo a ti a, zawhbelhna chhangin CEM chuan LADC in VC inthlanna dan a neih ah Model Code of Conduct chungchang a tel loh vangin hman a ni lo a ni a ti.Independent member, lawngtlai Chandmary veng Bialtu MDC Pu C.lalsawmzauala'n Primary School Education changtu in a chhantur a a zawhna, Bungtlang South Bialtu MDC Pu Thanglawma zawhbelhna chhangin Exsecutive member Pu C.Lalneihkhuma chuan Bungtlang South khua a Primary School-II leh Private English Medium School pakhat ten Combine Class an nei thin tih Sorkar in a hriat tawh thu leh Sorkar chuan a la ngaihtuah tur thu a sawi. Vawiin Session ah hian Official Bill pathum The Lai Autonomous District Council (Group A,B,C & D Posts) Recruitment Rules, 2011, The Lai Autonomous District Council Employees (Perfomance Appraisal Report) Rules 2011 leh The Lai Autonomous District Council(General Service) Rules, 2011 te chu CEM Pu C.Ngunlianchunga'n House a ngaihtuah turin a pulut. Tuntum LADC Buget Session ah hian karleh Thawhtanni khian CEM in Budget a pharh ang. Session ah hian Zawhna House a chhantur 19 lut a awm a, Official Business 10 awmin Private Member Resolution pakhat a awm bawk.

NLUP Tuichawng ah sem mek ani.

Mizoram Sorkar Flagship Programme NLUP pawisa chu atumkhatna atan Lawngtlai District chhunga Tuichawng Assembly Constituency ah nimin Zirtawpni leh vawiin Inrinni (March 26) hian Agriculture Department chuan an sem. Lawngtlai District Agriculture Office atangin NLUP sem tur te chuan Ningani khan Lawngtlai chhuahsanin Chawngte an pan a, Pawl hnih a insiam in, pawl khat chuan Chawngte leh Boropansury bial a khua 28 a chhungkua 465 ah tanpuina hi chhungkaw khat tan Rs.20000/- singhnih zelin an sem a, pawl khatna hi H.lalbiakni AEO in a ho a, Damdep leh Longpuighat bial a chhungkua 417 hnen ah Pu S.Chinzah AEO ho in sem chhuah a ni bawk a ni.Tuichawng Constituency huamchhung ah hian NLUP dawng thei tur a thlan chhungkua 2694 an awm. Kumin January 14 khan Chawngte ah Pu Nihar kanti Chakma Minister of State ho in NLUP hawnna hun hman alo ni tawh a ni. Hetihlai hian Lawngtlai West leh East Constituency ah chuan NLUP hi semchhuah a la ni lo a, a dawngtutur a thlan te enfel mek a ni.

Vaihhlo chungchang Workshop neih a ni

Nimin khan Lawngtlai DC Conference Hall ah Pu Thlamuana DC Lawngtlai kaihhruaina hnuai Mizoram State Tobacco Control Society leh The International Union Against Tuberculosis and Lung Disease te tangkawp buatsaih Workshop for Different Target Group lawngtlai District neih a ni a, he tah hian Pi lalriliani President Indian Society on Tobacco & Health chuan meizuk vanga mihring ten natna tam tak an tawh thin thu leh mi tamtakin an thihphah mek thu te sawilangin , meizial zu ve lo te pawhin a zu te vangin natna chi hrang hrang an kaiin an thihphah hial thei a ni a ti a, Meizuk khu in a tihbawlhhlawh loh boruak thianghlim kan neih theih nan tan lak a pawimawh hle a ni a ti a, "Ringtu nih leh taimak te, hrisel te, inrenchem thiamte hi a inhmeh em em bik a, Nitina kan ei in te hi pathian malsawm tlak a ni em tia ngaihtuah chungin hriselna lam kawng ah hmasawn i tum ang u a ti. Nimin Workshop ah hian Pu ZD Vawra Hmar Coordinator Mizoram State Tobacco Control Society South Mizoram leh Dr. Zothanpari Medical Officer District Hospital Lawngtlai te pawh in Vaihlo leh a kaihhnawih laka fihlim a pawimawh thu an sawi. Vawiin Workshop ah hian tel an thahnem hle a, zawhna leh chhana hun hlawk taka hman a ni bawk a ni.

Friday, March 25, 2011

Lalpa Pawl Nan

Pathian hmaa i thutiam avâng chuan lal thupêk pawisa tûrin ka ti a che.
Thuhriltu 8 : 2

LIKBK Assembly Vawi-12na Moria Biak In ah neih mek a ni.

Nilaini zan atang khan LIKBK rorelna sang Assembly vawi 12 na chu Lawngtlai Chandmary, Moria Biak In ah neih a ni a, Nimin chawhma dar 10 atanga tlai dar 4 thleng rorel niin, rorel hian naktuk Inrinni thleng a awh ang. LIKBK inchhiarna hnuhnung ber ah chuan Tualchhung Kohhran 87 awmin Preaching Station 5 an awm a, he kohhran ah hian chhungkua 4523 awmin Pastor bial 15 leh Administrative Area 3 a awm a, Kohhran Member hi an vaiin 24795 an ni. Tuntum Assembly ah hian rorel palai 277 an tel thei Kum(2011-2012 Budget atan Rs. 6,00,00,000/- pawm a ni a, kum kalta Budget aiin Rs. 30,00,000/-(5%) in a pung a ni. Nimin a rorel tan dawn in Chairman kalchhuak tur Rev. V.Ngunkhara'n Chairman Elect, Upa Zahranga hnen ah mawhphurhna hlanin Chairman thar kaihhruaina hnuai ah hian rorel inkhawm neih nghal a ni a, Chairman elect atan Rev E.F.Sangchem chu thlan a ni. Tuntum Assembly ah hian thupui atan Rinawmna tih hman a ni a, nakum 2012 Assembly chu Shalom Biak In, Thingkah ah ngha niin Thupui atan Chanchintha hrilh tih thlan a ni. Assembly hi Kohhran dang an thawhpui Mizoram Presbyterian Kohhran Synod, Evangelical Church of maraland, ten an aiawh an tirh bak ah Synod Choir leh ECM Choir ten an hmanpui bak ah, Lamkang Naga Baptist Association atangin Palai an tir bawk. LIKBK te hian kum 2012 November thla khian Lairam Gospel Centenary lawm turin an inbuatsaih mek bawk.

Forest R.O ngenna in BSF ten Fre Clinic an buatsaih

Nilaini khan Lawngtlai khawthlang lam a Ngengpui Wildlife sunctuary bul a Ngengpui Forest Rest House ah R,O Pu K.Hramzama ngenna angin Dhirendra Singh Sindhu Commandant 96 Battallion BSF ho in BSF Medical Team ten a thlawna inentirna an buatsaih, Ngengpui leh khawmawi khua atangin damlo 200 chuang en hman niin, heng khaw pahnih a mipui ten an hlut hle a ni. Damlo an en zing ah natna khirh khan vei hmuh chhuah a ni lo a, damlo te chu a thlawnin damdawi pek zel an ni, Pu K.Hramzama Forest Range Officer chuan an ngenna ngaipawimawh a Free Clinic BSF ten an buatsaih sak chu lawmawm a tih thu a sawi . BSF te hian damlo an en bak ah khawtlang a thalai te nen Volleyball hmangin infiamna an nei ho a, tlai lam ah Khawmawi VC ten zanriah an buatsaih sak.

Session tan dawn

Vawiin atang hian LADC Budget Session chu Council Session hall ah tan a ni dawn, Session hian karleh Zirtawpni April 1, 2011 thleng a awh ang. tarlan tawh angin tun tum session hi tun a sorkar dinglai in Budget Session a hmachhawn hmasak ber tur a ni.

Workshop

Vawiin hian DC Conference Hall ah Mizotam Tobacco Control Society bultumin Sensitisation Workshop neih a ni dawn a, Pi Lal Riliani President Indian Society of Tobacco & Health Mizoram in a hmanpui ang.

Vbc.82.61 nei mek

Finance changtu CM Pu Hawla chuan nimin Session ah tun dinhmun ah Mizoram in RBI a pawisa a neih zat chu cheng Vaibelchhia 82.61 a ni a ti a, nimin piah atang khan Traesury tin te pawisa pekchhuah theih zat pawh tihpun a ni a ti. Pawisa pek chhuah theih zat tihpun a nih hnu hian Lawngtlai Treasury Office in nikhat a pawisa a pekchhuah theih zat chu cheng Nuai 80 a ni. Pu hawla chuan Mizoram sum dinhmun chu a that lutuk loh vangin fimkhur taka kal a ngai a ni a ti a,Central atangin engemawzat hmuh beisei a la ni a ti.

Revenue Dept. chui dawn

CM Pu Lal Thanhawla chuan Land Revenue & Settlement Department buarchuar lutuk chu Anti-Corruption Bureau (ACB) emaw Central Bureau of Investigation (CBI)?chhuitir a tum tih Assembly House a hrilh.House leader ni bawk Lal Thanhawla chuan, ram hralh kawngah surveyor te chu an inrawlh nasa hle nia a hriat thu a sawi a. thenawm khawveng innghirnghona an siam nasat phah hle a ni,’ tiin Session ah a CM hian a sawi.

WORLD TB DAY HMAN A NI

Nimin khan khawvel puma TB dona ni ‘World TB Day’ a ni a, Mizoramah chuan Health Minister Pu Lalrinliana Sailo hovin Aizawl ah hman a ni a. Kumina World TB Day thupui chu - “On the move against Tuberculosis - Innovate to accelerate” (TB natna do turin kan mawhphurhna theuhah chak takin hma i la ang u) tih a ni.Health Minister Mizoramah TB dona kawngah Health Department hmalakna a fak a; kum 2009-ah TB hrikpai mi 2539 hmuhchhuah a ni a, kum 2010-ah 1701-ah a tlahniam a, hei hi Department thawktute thawhrimna vang a ni a, a lawmawm hle a ni, a ti. India ramah TB hi, nitin mi 5000 velin an kai leh TB vangin ni khatah mi 100 an thi anga chhut a ni a, Mizoramah kum khat chhungin TB vei leh TB vanga thi an tlahniam thei chu NTCP chak taka kalpui vang a ni, a ti. TB natna hi HIV/AIDS nena inkaihhnawih zel a nih vangin, AIDS kan dona kawngah pawh TB tihrem turin tan lak a pawimawh a. Department leh thawktute chauh ni lovin mipui pawh hemi kawnga tan la turin a chah. Sorkar chuan Health Department pawh tihchangtlun leh thuamthat chho zel ang a, hriselna kawngah rampumah Mizoram chu pakhatna a ni thei turin tha tharin tan i la zel ang u, a ti. Khuallian hian RNTCP Performance Book (2006-2009) leh RNTCP Mizoram website thar tbmizoram.org tlangzarhna a nei nghal bawk a ni.Dr.C.Lalthanmawia, Director of Health Services pawhin thusawiin kum 2003 atanga Mizoramah TB vei hmuhchhuah zat chu mi 15584 an ni a, an zinga 4765 chu an khaka TB hrik hmuh ngei an ni a, khaka TB hrik hmuh enkawl zinga mi 3707 (90%) chu enkawl dam tawh an ni, a ti.

TOLIC Aizawl in lawmman dawng

Nimin khan Gangtok, Sikkim-ah Town Official Language Implementation Committee (TOLIC) Aizawl hnenah hmarchhak biala TOLIC hnathawk tha ber lawmman hlan a ni.2009 - 2010 atana TOLIC lawmman pakhatna hi Sikkim Governor Pu V.P. Singh-an TOLIC Chairman leh AIR & DD (NER) DDG Pu C. Lalrosanga hnenah a hlan a ni. Khuallian chuan TOLIC Aizawl Secretary Nl. Jennie Laldingliani hnenah citation a hlan bawk. He lawmman semna inkhawmah hian Official Language Department Secretary Pi Veena Upadhyay-in hmarchhak bialah TOLIC 40 a awm thu sawiin, Mizoram-in lawmman a dawng hi tha a tih zia a sawi. TOLIC Aizawl-ah hian Central sorkar department, office, bank, undertaking, pushpak, Assam Rifles, CRPF, BSF te tiamin department 50 vel an tel a. Mizorama TOLIC in Hindi zir leh hman uar kawnga hmaa lakna hi state dang amite pawhin entawntlak an tiin an lawmpui hle a ni.

Ngaithiam dawn

Martyr Family Association chuan Central sorkarin Mizoram mi, sipaia tang duhte tan thiamna leh san zawngah ngaihhnathiamna a pe niin an sawi. Hemi chungchanga nimina thuchhuah an siamah Martyr Family Association chuan hemi chungchangah hian tun thla ni 18 khan Governor, Lt. Gen. MM Lakhera an hmu a, Governor chuan a hnena thu an thlen chu President leh Prime Minister hnenah a thlen tawh thu te, sipai tang thei chin tana thiamna pawl 10 chin tih chu pawl 8 chin a ngaihhnathiamna pek an remtih thu leh san zawngah pawh centimetre 160 chin pawm theih a ni dawn niin Governor chuan a sawi niin an tarlang a n

Thursday, March 24, 2011

Mei zuk phallohna hmun zu mi 11 Lawngtlai District Anti Tobacco Squad ten an man

Nimin khan a tumkhatna atan Lawngtlai District Anti Tobacco Squad te chuan Lawngtlai khawpui chhung a Sorkar Office hrang hrang fang kualin Meizuk phallohna hmun a mei zu te an vai, Pu H.Laizika Project Director DRDA, Vice Chairman District Anti Tobacco Squad ho a vak chhuak te hian Office 11 fangin meizuk phallohna hmun a meizu mi 24 an man a, heng an mante hi pawisa an chawitir bak ah meizuk that lohna leh nghawng a neih theih te an hrilh nghal a, vawiin a an mante atanga pawisa an chawitir zat hi a vaiin Rs. 1070/- a ni.Vawiin a Office an tlawhkual zing ah hian District Bawrhsap Officce leh LADC Office te pawh a tel. Nimin a Office fan kualna ah hian ZD Vawra Hmar Coordinator Mizoram Tobacco Control Society South Mizoram, Dr.Zothanpari Chhakchuak bak ah Squad members dang te an tel. Office engemaw zat chuan zial zuk phal a nih loh thu ziakin an tar bak ah khauh takin an kengkawh a, heng mite chung ah hian Anti Tobacco Squad te chuan lawmthu sawiin, Office thenkhat zialzuk phal a nih lohna thuziak la tarlohna leh tar belh ngai te hnen ah thuziak tar tur an pe bawk., ZD Vawra Hmar Coordinator Mizoram Tobacco Control Society chuan Lawngtlai District chhung ah Meizial zuk chungchang ah Awareness Campaign nasa zawk a neih tul a tih thu a sawi.

NLUP sem dawn

Mizoram Sorkar Flagship Programme NLUP chu Tuichawng Assembly Constituency huamchhung ah sem chhunzawm a ni dawn a, Line Department pakhat Agriculture Department a thawktute chuan NLUP sem tur hian tukin hian Lawngtlai chhuahsan in Chawngte an pan anga, Group hrang hrang ah in thenin NLUP hi an sem dawn, pawisa semchhuah hna hi naktuk lam chuan an tan hman a rinawm.

MJA Day Lawngtlai ah

Nimin March Ni 23(Nilaini) Mizoram Journalist Association Day kha MJA Lawngtlai District te chuan an President Pu ZD Dengngura ho in Lawngtlai Press Club ah an hmang a, MJA Member te infuih thar nan an hman bak ah an Member Chatuanram panta Pu Saidingliana Sailo Editor Virthlileng leh Pu R.Zathang Joint Editor The Lawngtlai Post te sunna hun an hmang a, Day hmanga kalkhawm MJA Members te chuan Resolution siamin, tunhnai a Lawngtlai District Jail hawn a ni ta chu lawmawm an tih thu leh he Jail hi a taka kalpui thuai a nih theih nan sorkarin chaktakin hma la se an duh thu leh Lawngtlai a Information & Public Relations Office sak zawh tawh chu hawn thuai an duh thu te an passed.

SOSA khinglet

SOSA-in Mizoram PWD hnuaia PMGSY hnuaia kawng laihnaa thil dik lo a awm nia an hriat avanga CBI chhuitir tura Gauhati High Court-a an ngenna an thehluh chungchangah, Mizoram sorkar chuan SOSA hi Supreme Court-ah an khing lêt.SOSA lam chuan khin an nih chhan tak an zir chian hnuah hmalak dan tur an rel tur thu an sawi.Gauhati HC hian July 20, 2010 khan SOSA-in PIL a thehluh angin, kum 2001-2005 chhunga Mizoram PWD hnuaia kawngpui laih danah thil fel lo a awm leh awm lo chhui turin CBI chu a ti a; SOSA hi Mizoram sorkarin a khin lêt tak avangin Supreme Court chuan Gauhati HC order hi a tikhawmuang ta a niniin thulakna chuan a tarlang

IMPCC MEETING A.I.R. CONFERENCE HALL-AH

Nimin khan IMPCC Meeting pawimawh tak AIR Conference Hall-ah neih a ni. Member te an kal tha hle. Meeting hi Chairman Pu Mangjagam Touthang, Dy Director, PIB leh News Editor, DDK-in a kaihruai a. Tun thla 3 chhunga Mizoram puma kangmei laka fimkhur tulzia thupuia hman thlirhona neiin, AIR leh DDK te, Print Media-ah te vawi tam tak tarlan a nih thu sawi a ni a. Mizoam khawtin VC leh mipuite ram tikang lo tura fuihna tam tak tarlan chu a sawt thawkhat hle nia hriat a ni.
Department hrang hrang, AH&Vety, Environment & Forest, Health & Family Welfare, KVIB &C, I&PR etc ten hma an lak dan tlangpui report a ni bawk.Khadi & Village Industries Commission chuan Rs. 3.38 crore margin money tanpuina mi 264 hnenah pein, Khadi & Village Industries Board in eizawnna ngelnghet neih theihna tur hawi zawngin training an pek sawilan a ni bawk.Bharat Nirman Information Campaign Saiha District khaw 3-Zawngling, New Colony Saiha leh Niawhtlang ah te Department te tawiawm avanga hlawhtling taka neih a nih thu leh National Rural Health Mission te buatsaih Health Camp pawh thingtlang khaw mipuiten an hlutsakzia te pawh sawilan a ni bawk.April thla chhung thupui atan Hriselna- Mitin tan (Health for All) tih chu thlan a ni.

Wednesday, March 23, 2011

editorial

ENDIKTU HLAUHAWM KAN MAMAWH

Hmasawnna hna thawhmek a ni a, Lawngtlai District hmelhmang pawh a danglam chho mek, hna tamtak chu tha tak tak awm bawk mahse, hna thalo tamtak a awm thin hi a ngaimawh awm takzet a, thuneitu lam ten theihtawp in tan an la a,awmzia pawh nei deuh tur ah ngai ila, hemi piah lam ah hian hlawkna um lo a, ram tana Ke pen a, heng hmasawnna hna thawh hrang hrang te endik tu mamawhna pawh a lian viau tawh in a hriat a, endiktute chu thiltha titute tan Thiantha, hna thawk thalo te tana Endiktu Hlauhawm annih pawh a tul in a hriat.Neitu rilru pu a hnathawktur a infuihna tawngkam te chu a riring mawh hle a, tun a Sorkar thar hian helam hawi hian chak takin hma lak dan kawng han dap thei se a duhawm a, NGO lam pawh helam hawi a thanharh a hun viau tawh niin a hriat, hmalakna helam hawia chaktaka kalpui a nih loh chuan sum tam tak hi a nihtur ang niphalo in a luangral mai mai ang tih a hlauhthawnawm hle ani.

Mizoram Legislative Assembly Budget Session ah Governor in Mizoram dinhmun tlangpui a sawi.

March ni 30 thleng awhtur 6th Mizoram Legislative Assembly Budget Session chu niminkhan tan a ni a,Session tan ni ah hian Governor Lt.Gen.(Rtd) M.M.Lakhera chuan thusawiin Mizoram sorkar hmalakna leh hlawhtlinna hrang hrangte a tarlang a, Mizoramah remna leh muanna boruak hnuaiah sorkar fel fai leh dik kenkawh tlat tum a ni, a ti. Mirethei leh mi harsa zualte chawikan nan sorkarin NLUP tanpuina sem hna a tan tawh a, Mizoram sum leh pai dinhmun pawh nasa takin a than tir ngei a beisei thu a sawi. buh leh thlai, ran vulh leh Industry hnuaiah sumdawnna tenau chi hrang hrangte ngai pawimawhin sorkar chuan heng lama eizawnna nghet siam duh te tan awlsam leh tha zawka an thawh zel theih nan ruahmanna a siam chho zel a ni, a ti bawk. Zirna leh kawng hrang hranga thalaite hamsawnna tur te, kawlphetha hnianghnar zawka neih dan tur te, kawngpui leh inbiakpawhna te, state puma tui thianghlim hnianghnar zawka sem theih dan tur te, ei leh barah pawh intodelh zawka state pum siam thei turin sorkarin chak takin hma a la mek zel a. Chhiah khawnna lamah pawh kum 2010-2011 chhungin 22.9%-in chhiah lakkhawm a pung a ni, a ti. Sorkar Laipuiin thingtlang mite tan scheme hrang hrang a neih te chu tha takin kalpui mek zel a ni a, mipuite hriselna lam pawh ngai pawimawha damdawi in leh a kaihhnawih hrang hrang tih changtlun lamah sorkarin nasa takin hma a la mek ani a ti. Mizoram leilung, thing leh mau chereu mek te venghima thingphun belh leh ram humhalh a, zinmite hip thei turin hmalak mek zel a ni, a ti bawk.Pu John Siamkunga’n Motion of Thanks pulutin, lungrual takin pawm a nia,vawiin ah sawiho ani ang.

Vantlang mamawh tihchhiat tumna C.S hoin thlir ho

Nimin khan Chief Secretary Pu Vanhela Pachuau hovin a office chamber-ah tun hnaia Electric Transformer hrui leh ban te bomb hmanga tih chhiat tumna awm chungchang thlirhona neih a ni. Hetah hian DGP, DIGP (NR), SP Aizawl, DC Aizawl, E-in-C (P&E) leh E-in-C (PHED) te an tel.Electric transformer, a hrui leh ban bomb chhiat tumna awm chu vanneihthlak takin thil pawi lutuk thleng lovin Police, PHED leh P & E Department ho hmalakna a zarah chinfel theih a ni a, Police te hmalakna zarah heng thil tih chhiat tumna hi chhuichhuah niin, ngawrh zawka chhui zel tum anih thu an sawi.Kalkhawmte chuan vantlang mamawh ngawih ngawih tih chhiat tumna hi an dem a, ramdangah pawh vantlang mamawh tih chhiat hi thil awm ngai lo tluk a ni a, hetianga kan ramah tih ching an awm chu mak tiin tha lo an ti a, mipui pawhin tui leh electric khawl tih chhiat tumna venhimna atan nasa zawka sorkar tanlak pui turin an ngen a ni.

Inter District Under-19

MFA leh Serchhip District Football Association (SDFA) tangkawpin an buatsaih Inter-District Under-19 Football Championship, 2011 chu nimin khan Serchhip-ah tan a ni a, he hun hi Serchhip DC Pu H.Darzika chuan khuallian ni a hmanpui in
infiamna engpawh hi eizawnna tling anih avangin tihtakzeta tih na thinlung leh tumruhna nen chuan a hlawhtlin theih a ni tih sawiin District paruk ten infiammi an tir a, Saiha leh Lawngtlai District atangin an tel thei lo..

Assembly tan dawn

Pathianni thleng awh tur LIKBK rorelna sang Assembly chu vawiin atang hian Moria Biak In ah tan a ni dawn, Assembly palai khualkhua atanga lo kalte chuan nimin khan Lawngtlai an rawn thleng. Assembly neih chhungin Rorel bak ah thu leh hla lam a inpawlhona te pawh neih a ni ang.

AIR LIVE PHONE-IN

Tun Inrinni March 26, 2011 All India Radio, Aizawl Live Phone-in hunah chuan ‘Naupang natna’ chungchang zawhna a zawh theih dawn a, zawt duhte tan telephone No. 2322515 leh 2323148 ah te chawhnu dar 1:05 leh dar 2:00 inkarah zawh theih a ni ang. In zawhnate chu dr. Lalrochhuanga (Marova) Child & New Born Specialist, Civil Hospital Aizawl a miin a rawn chhang ang.

WORLD WATER DAY 2011 PUALA MINISTER THUCHAH

A hmasain ‘Khawvel Puma Tui Pawimawhna Ni’ (World Water Day) pualin Mizoram mipuite duhsakna chibai ka buk a che u.
Kum 1992 -a Brazil khawpui Rio-de-Janeiro a United Nations Conference on Environment & Development (UNCED) chuan tui thianghlim pawimawh zia leh mihringten phang lova tui tlan tur kan neih theih reng a tul zia an sawi hova. Hemi denchhen hian tui pawimawhna ‘Ni Bik’ neih hial an duh thu an rel a ni. He an thurel hi a pawimawh em avangin UN General Assembly chuan bawhzui nghalin kum 1993, March 22 khan World Water Day hmasa ber chu a lo hmang tan ta a. Ram hrang hrangte chu an remchan anga he ni hi kum tin serha hmang turin UN chuan a ngen a. Tichuan, kum 1993 atang khan kum tin he Ni hi khawvel pum huapin hman a lo ni ta ziah a ni.
Kum 2011 World Water Day thupui atan chuan ‘Water for Cities : responding to the Urban Challenge’ tih a ni a. Hei hi Mizo tawng chuan ‘Khawpuia tui mamawh phuhru tura tan lak’ tihna a ni thei mai awm e. Kumin World Water Day -in a tum ber chu - khawpuia mihring lo pung chak lutuk te, thilsiam chhuahna lo pung zel te, sik leh sa inthlak danglamin mirhing a nghawng dan te, innghirnghona leh chhiatna rapthlak lo thleng thin ten kan tui tlante a khawih thin dan mipuite hriattir hi a ni. He Ni hian sorkar, tlawmngai pawl, vantlang leh mitinten kan tui tlan tur chungchangah mawhphurhna la ve a, thawkho tur kan nihzia hriat thar tir tura beisei a ni.
Khawpuiah hian mihring an pung chak bik hle a, hei hian khawpui tui mamawhna a tizualkai nasa bik hle thin a ni. Tin, mihring kan changkan zawh poh leh kan tui hman pawh a lo tam zel a. Chuvang chuan kan thli pawh a lo tam phah zel bawk a ni. Kan changkan zawh poh leh kan bawlhhlawhte pawh kan hriselna atan a hlauhawm tual tual thin bawk a ni. Hetianga changkanna kawng kan zawh mek lai hian kan tui chhia, thli leh hnawmte mumal taka kan sawngbawl loh chuan chhiatna kan hmachhawn reng a ni tih hi kan hriat a tul tak zet a ni.
Tui hian tam lam a pan si lo, mithiamte chhut dan chuan kum 2025 a lo thlen meuh chuan khawvel ram hmun thuma thena hmun hnihte chuan tui harsatna namen lo kan tawk dawn niin an chhut. Chuvang chuan tui hna ti tlem zawnga chetlak loh leh kan neih sate renchem leh awmze neia hman kan zir zel a pawimawh hle a ni. Tin, ruahtuitlak tamna ram kan nih hre rengin ruahtui khawl hi thar thawh leh atan a va duhawm tak em ! A man a tlawm a, a enkawl a hautak si lo.
Ei leh in lama kan mamawh piah lamah tui thianghlim hi hriselna leh ram hmasawnna bul a ni a; chutih rual chuan tui bawlhhlawh erawh chuan tawrhna leh tlakranna min thlen thin a ni tih pawh hre thar leh ila a tha hle awm e.
Kumin World Water Day pual hian Zoram mipuiten kan tui tlan laite uluk taka enkawl a, kan tu leh fate thlenga hnianghnara kan neih theihna tura tan la a, thawhhona boruak tha siam zel turin ka sawm tak meuh che u a ni e.
Ka lawm e.

Tuesday, March 22, 2011

Ni thum awh tur V/C te pual Training neih mek a ni.

imin khan Lawngtlai Press Club ah, State Institute of Rural Development(SIRD) Kolasib bultumin Lawngtlai khawpui chhung a Village Council members te pual in nithum(3) awh tur Training on Enhancing Peoples Participation in Development Programme chu tan a ni. VC Members he Training a tel hi Backward Region Grant Fund hnuai a District Resource Person F.Laldinliana, MC Ngurthanliana leh B.Rorelliana bak ah Helpline Staff PC.Lallenpuia ten khawtlang hmasawnna hna thawhna ah Village Council leh mipui te inkar ah thawhhona tha a awmtheih nan a hmalakna tur te, khawtlang mamawh harng hrang a Plan felfai tak a siam a nih theih nan a VC te tihtur te, rintlak a hnathawh a tulna leh thawh a nih theih nan a VC te mawhphurhna leh an tihtur te an zirtir dawn a ni.Traning hi Lawngtlai District a RD Block pali ah te neih vek tumin ruahmanna siam a ni.

MPF Palai

MTU, JAC ten chawnghei an chhunzawm zel a, pathum Damdawiin ah dahluh an ni tawh a, an nawrhna chu MPF te Palai na vangin nimin tlai dar 6 khan titawpin,vawiin a kawngzawh an tum pawh an thulh.

Session

Tunkar Zirtawpni atang khian LADC Budget Session tan a ni dawn, tun tum session neih turin tuna sorkar dinglai in Budget Session a hmachhawn hmasak ber tur a ni, rorel lai lam te chu Session neih tur hian an inbuatsaih ngawrh viau a, CLP Meeting pawh CEM ho in an nei tawh. Mizoram Assembly Budget session chu vawiib atang hian tan a ni thung ang.

Bru Refugee Camp kanga thizat 17 an tling tawh.

Inrinni March Ni 19 chhuna Tripura ram chhung, Nai-singpara-a Bru Refugee Camp-a kangmei nasa tak chhuak avanga thi zat chu mi 17 an tling tawh a, an zingah hian naupang 3 an tel a, hliam 25 vel an awm mek bawk.Naisingpara hi Bru Refugee awmkhawmna khua lian ber a ni a, In 3,500 vel zet awmin heng zing a 2,000 vel zet chu luah tlak awm tawh lovin a kangral vek tih thudawnna chuan a sawi.Tripura police-te sawi dan chuan kangmei hi choka pakhat atanga chhuak tan nia hriat a ni a, hei hian a bul vela di In te chu mankai nghalin thelhmih rual lohin a kang zui ta a ni, an ti a. Bru hruaitute nen hmalak zui dan tur an ngaihtuah nghal a ni.Camp-ah hian In a bit hle a, In tam zawk chu rap In a ni a, khua a ro em avangin kangmei hi a darh chak hle ni a sawi a ni. Naisingpara Camp leh a bulhnaiah hian tui a harsat avangin kangmei chhuak hi thelh a harsa zual a, kangthelh motorte pawhin an tui phurh sa an hman zawh tawh chuan hla taka tui chawi tura an kal leh phawt a tul thin a, hei hian kang thelh a ti hautak zual niin Tripura Fire Service DG, Amitabha Kar chuan a sawi.Kangmei tuarte hi Tripura CM, Manik Sarkar leh DGP ten an tlawh.

BADP sum nuai 424 hmuh belh

Mizoram sorkar Rural Development Deptt. chuan kum kal mekah Border Area Development Programme hnuaia hna a thawh that avangin cheng nuai 424 a hmuh belh a. BADP sum hi sorkar laipui Home Ministry atanga hmuh thin a ni a. Tun kum kal mek (2010-2011) ah hian Mizoram chuan ramri bul khuaa chengten kawng hrang hranga hma an sawnna tura hnanthawh nan cheng nuai 2506 a hmu a, sum dang a pek belh nen cheng nuai 2930 a tling ta a ni.Home Ministry hian BADP hmanga hnathawh hi sum tul zawng zawng (100%) a tum vek a, state sorkarin engmah a tum ve a awm loh avangin hna-thawh pawh a kalchak a, thawktute pawh an phurin, hetianga lawmman hial an dawng thei chu lawmawm an tih thu an sawi.Mizoram hian Myanmar leh Bangladesh nen ramri thui tak a neih avang -in ramri hrula chengte lungmuang tak, hrisel tak leh zirna changtlung zawk an neih theih nan nasa takin BADP sum hmang hian sorkar laipui chuan hma a la a. Hriselna, zirna, tui leh kawng hrang hrang -ah ramri depa awmte rilru beta an awm theihna tur chu a thiltum pawimawh tak a ni.BADP sum hi a hmang tha lo leh hmang chak lote chu an fund hmuh tura ruahman atangin Home Ministry chuan sum a sawhhek -sak thin a, hei hi a hmang thate hnenah lawmman atan a pe thin niin thulakna chuan a tarlang.

Saturday, March 12, 2011

PUBLIC INFORMATION CAMPAIGN SAIHA DISTRICT-A BUATSAIH ZO FEL

Bharat Nirman PIC Saiha district-a ni 3 chhung buatsaih chu nimin khan zawhfel a ni ta a. Tun tum atana Campaign ni hnuhnung ber nimina Niawhtlanga neih hmanpuiin, MADC Chief Executive Member Pu S. Khipo chuan mipuite tana duan scheme leh programme tam tak mipuite hnen thleng lo a thamral engemaw zat a awm thin a, Deptt. thuneitu thenkhat leh khawtlang hruaitute a ruka insiamremin mipui chanai an hui fai vek changte pawh a awm a, hetianga thil diklo tak tih chingte hi ram hmelma an ni tih mipuiten kan hriat a hun tawh a ni a ti.
Campaign hi All India Radio Assistant Station Director Pu Zosangzuala'n a kaihruai a, khualzahawm Niawhtlang VC-I leh VC-II VCP te Pu N. Sangchema leh Pu N. Tumsanga te bakah PIC Core Committee Chairman Pu Mangjangam Touthang te pawhin campaign hawnna inkhawmah hian thu an sawi.

Technical Session hman chhunzawmah Central Sorkar scheme leh programme chi hrang hrang NRHM, SSA, PMGSY, IAY leh a dangte chu a kalpuitu Department-a mithiamten an sawifiah a, mipui pungkhawmte nen zawhna leh chhanna hun huamzau taka hman a ni bawk.

Public Information Campaign hi thawhlehni khan Zawnglingah tanin, Ningani khan Saiha New Colony MTP Hall ah chhunzawm a ni a, Niawhtlangah hian zawhfel a ni ta a ni.

Nimina Niawhtlanga Public Information Campaign neih rual hian National Rural Health Mission (NRHM) hnuaiah a thlawna inentirna buatsaih nghal a ni a, he Free Clinic ah hian Saiha atanga thawk chhuak Doctor rual 4 leh thawktu dangte chuan damlo natna chi hrang hrang nei 140 zet an en a, an damdawi mamawhte pawh a thlawnin an sem nghal zel a ni.

Inentirnaah hian MMU te pawh tangkai taka hman a ni a, X-Ray, Ultrasound, thisen, zun leh ek endikna hmanrua chhawpchhuahte chu hmunpui pan ve thei lo te tan a tangkai lehzual a ni. - source:diprmizoram

V/C thlan mek ah V/C 40 result hriatkim a ni tawh

Lai Autonomous District Council huamchhunga Village Council inthlan thawhhnihna, Eastern Zone, Sangau Tlangdung a march 10 a neih a vote tla te chu chhiar zawh a ni tawh a, hriattheih chin ah VC 20 ah inthlanna neih niin, VC 19 result hriattheih a ni a, VC Member pasarih awmna Vawmbuk a vote tlate chu chhiar mek a ni. Esatern Zone VC 20 ah Congress chuan seat 60 la in VC 14 ah hnehna an chang a, Independent candidate ten seat 31 la in VC 5 ah sorkarna an siamthei a, MNF chuan seat 2 an la.Esatern Zone ah hian VC Seat 100 awmin Candidate 230 an awm a, Vote neithei mi 11653 an awm. Tihian Inthlan thawhkhatna Lawngtlai leh a chhehvel Central zone a neih tawh nen LADC a VC awm zawng zawng 86 ah VC 40 ah inthlanna zawhfel a ni tawh a, VC 39 result hriat tawh niin Congress chuan Seat 117 la in VC 24 ah sorkarna an siam thei a, Independent Candidate ten seat 66 la in Independent Candidate tlin tam zawkna VC 12 a awm a, MNF candidate ten seat 16 la in VC-1 ah sorkarna an siamthei a, MPC in Seat 1 an la bawk. Inthlan thawh thumna leh a hnuhnung ber tur chu March 14 khian Lai District khawthlang lam Bungtlang South leh a chhehvel khua ah te neih a ni anga, helai bial ah hian VC 46 awm in V/C Member 3 awmna :- Sakeilui - II, Saikhawthlir, .T.Dumzau, Chamdur P-II, leh Member 5 awmna Bolisora ah te chuhtu awmlovin Congress Candidate te chu tling ah puan an ni a, inthlan thawh thumna ah hian VC 46 ah VC 41 ah inthlanna hi neih a ni dawn a ni.Tlaikhaw hnu a thudawn danin vawmbuk khua VC Seat 7 awmna ah Congress chuan Seat 4 changin sorkarna an siam thei dawn a, Independent ten seat 3 an chang

Friday, March 11, 2011

MSDP ah Lawngtlai District a hnathawh nan Rs. Vbc. 24.30 ruahman fel a ni.

Nilaini khan Lawngtlai District Level Committee on Muti Sectoral Development Programme chu Additional DC Pu Vanlalngena kaihhruaina hnuai ah neih a ni a, he hun ah hian Pu Beila Khithie Nodal Officer, Election Officer nilai chuan report pe in, MSDP kalpui a nih dan leh sawrkar in ruahmanna a siam te a sawilang. Multi Sectoral Development Programme hi Ministry of Minority Affairs hnuai a Programme pakhat, hnam hnufual zawkte dawmkan nan a ruahman niin, Mizoram ah chuan he Programme hi Lawngtlai leh mamit District ah kalpui a ni a, Programme hi kum 2008 atanga 2012 inkar a kalpui tur a ruahman niin, hun tam zawk chu hnathawh tur ruahman nan leh Programme hi tha taka kalpui a nih theih nan hmalak a ni a, tunah hian hnathawhna tur pawisa Central Sorkar chuan Lawngtlai District tan Cheng Vaibelchhia 24.30 a ruahmanfel tawh a, Lawngtlai District ah pawh engmawzat chu pawisa a thleng tawh a ni. Programme hnuai ah hian mirethei chenna In 2022 sak a ni anga, Anganwadi Centre 71 sakna tur te, Primary leh Middle School Building 13 sakna tur te, School 14 ah Additional Classroom sakna tur te, Lawngtlai leh Chawngte ah Girls Hostel sakna tur te, Health Sub Centre building 6 sakna tur te Chawngte leh Sangau Damdawiin tihlen na tur te Approved a ni tawh a, a thuphungin khaw 14 ah tuilakna siam leh Chawngte ah ITI Building sakna tur te pawm a ni tawh bawk. Nimin Meeting ah hian MSDP chu mipui ten a nihna ang taka an chhawr tangkai theih na turin fimkhur takin kalpui nise an ti a, meeting ah hian Lawngtlai East MLA Pu H.Zothangliana, Lawngtlai West MLA Pu C.Ramhluna, bak ah Lai leh Chakma Council aiawh te leh Line Department aiawh te an tel.

C.S hoin Meeting

Nimin khan Chief Secretary Pu Vanhela Pachuau, hovin Muster Roll hnathawkte nawrhna avanga mipui harsatna awm theite sutkian dan tur Department hotute nen an sawi hoM.R a hnathawktute nawrhna avanga mipui nghawng nghal mai bik Department hrang hranga harsatna thleng theite an sawi hova; harsatna thleng lova engkim a pang ngai a a kal theih nan a tul dan a zirinV.C/ leh YMA te tanpuina ngen nise. Hemi rual hian venhimna lam pawh uluk taka kalpui nise tih an rel.

PWD in Sawifiah

Mizoram PWD chuan NH – 54, 4-Lane a an siam mek chu State danga double lane tiat chauh ni a sawi chu thil hriatsual palh ni a an hriat thu an tarlang a.MPWD chuan NH – 54 hi 4-Lane a siam a ni lo a, Silchar leh Aizawl inkar hi engemaw chen double lane a awm a, a bak chu single lane an nih thu leh double lane turin laih that mek a ni thu an sawi. Aizawl – Lunglei – Tuipang chu Single lane niin double lane a awm loh thu an tarlang a. NH – 54 PWD chu 4-Lane tur a laih double lane tiat chauh tur a awm loh thu an sawi bawk a ni.

PWD in Sawifiah

Mizoram PWD chuan NH – 54, 4-Lane a an siam mek chu State danga double lane tiat chauh ni a sawi chu thil hriatsual palh ni a an hriat thu an tarlang a.MPWD chuan NH – 54 hi 4-Lane a siam a ni lo a, Silchar leh Aizawl inkar hi engemaw chen double lane a awm a, a bak chu single lane an nih thu leh double lane turin laih that mek a ni thu an sawi. Aizawl – Lunglei – Tuipang chu Single lane niin double lane a awm loh thu an tarlang a. NH – 54 PWD chu 4-Lane tur a laih double lane tiat chauh tur a awm loh thu an sawi bawk a ni.

H R I A T T I R N A

No.B.11026/23/2008-NREGA(LTI): MGNREGA hnuaia hna hrang hrang lak tur ah a hnuai a mi ang hian written test leh interview neih tur a ni.

1. 12th March 2011 - (a) Work Manager (English + GK + Engineering + MGNREGA topic)
(b) Account Manager(English +GK+Accountancy + MGNREGA topic)
(c) Programme Assistant(English+GK+MGNREGA topic)
(d) Account Asst.for block level (General English+Accountancy+MGNREGA topic)
(e) Technical Assistant for block level (Engineering + MGNREGA topic)
(f) VLA(MGNREGA topic+simple arithmetic+General English + GK)

2. 14th March 2011 - (a) LDC(MGNREGA topic + General English +GK)
(b) Data Entry Operator (MGNREGA topic+Computer + General English + GK)

Written Test hi Gov’t Region Higher Secondary School ah zing dar 9 am ah neih tur a ni. Interview hi 15th March 2011 hian Account Assistant, Technical Assistant leh VLA te tan DC Office Chamber ah neih tur a ni.

Chawngte RD Block tan VLA te 12th March 2011 ah Chawngte ah written test neih tur a ni a, interview chu 18th March 2011 a neih tur a ni ang.

Exam paper chungchang hrechiang duh tan DRDA Office ah entheih a ni.

Sd/- (THLAMUANA)
Deputy Commissioner
&
District Programme Coordinator (MGNREGA)
Lawngtlai District: Lawngtlai
--------------------------------------------------------------------------------------------------------------

H R I A T T I R N A

Taxation Department in Lawngtlai Zone Office atan In, RCC Structure luahtur, Lawngtlai khawpui chhung kawngpui an leh Motor Park theihna tur a mamawh a, hetiang In nei chuan a hnuai a tarlan ah hian he lehkha tarchhuah atanga Ni 30 (sawmthum) ral hmain In len zawng, awmna hmun leh thla khat a luahman zat chiangtaka tarlangin thehluh tur a ni e


IPR No. 520
(3 - 1)
Issued by Commissioner of Taxes Mizoram Aizawl

Thursday, March 10, 2011

Lawngtlai ah Mit Nautepaw Cataract zai a ni

Nimin khan Lawngtlai District Blindness Control Society bultumin Mit Nautepaw (Cataract), District Hospital Lawngtlai ah zai a ni a, zai ngai tur a tih mi 12 te chu Civil Hospital Aizawl a thawk ten hlawhtling takin an zai. Sawrkar hmalakna kalmek ah Civil Hospital Aizawl leh Presbyterian Hospital Durtlang te chuan Damdawiin, Eye Specialist ten an thutchilh loh na hmun ah kalchhuakin Mit nautepawh zai hna hi an thawk mek a, Dr. Lalhuthangi Hmar, Eye Specialist, Civil Hospital Aizawl chuan, mitin ten hetiang enkawlna hi awlsam taka an dawn theih nan Sawrkar chuan hmalakna chaktakin a kalpui mek a ni a ti. Mit nautepawh(Cataract zai te hi tunhmalam a Tarmit chhah pui pui vuah tir thin kha titawpin Lens vuah sak vek zel an nih thu Dr.Lalhuthangi hian a hmun a tlawhtu The Lawngtlai Post chu a hrilh a, Mit nautepaw zai chu thil hlauhawm a nih loh thu a sawi.Nimin a mit zai te hi a tam zawk chu kum upa lam,kum 50 chung lam an ni.

MLA 2 chammek

Lawngtlai Esat bialtu MLA Pu H.Zothangliana leh West bialtu Pu C.Ramhluna te chu Lawngtlai ah an chammek a,Pu H.Zothangliana hian Inrinni khian Aizawl a pan ang.

Wednesday, March 9, 2011

Central Zone VC, Cong-10, MNF-1 Independent 7, Inhnehtawkna 2

Lai Autonomous District Council huamchhung a Village Council inthlan thawhkhatna neih a Vote tla te chu boruak muanawm tak hnuai ah chhiar zawhfel a ni a,Inthlanna hmanrua Ballot box leh thildang te chu Inthlan buaipuituten LADC a Local Adiministrative Department ah an thehlut mek. Veng tin ah Vote hi chhiar niin, zan lam a chhiar zo nghal an awm laiin, nimin chawhnu lam thleng a chhiar te pawh an awm. Inthlan thawhkhatna Lawngtlai leh a chhehvel Central zone Village Council 20 awmna ah Saikah khua ah chuhtu awm lovin Independent Candidate pathumte chu tling ah puan an lo ni tawh a ni. Tihian Central Zone VC 20 ah Congress chuan Seat 57 la in VC 10 ah sorkarna an siam thei a, MNF chuan Seat 14 la in, VC pakhat, Lawngtlai-III ah Sorkarna an siam thei a, Independent Candidate ten seat 35 la in VC 7 ah sorkarna an siam thei a,Member panga awmna Lawngtlai Chandmary-II ah chuan Congress leh Independent ten seat hnih ve ve changin MNF in seat khat an chang.Lawngtlai Council Veng ah MNF leh MPC tangkawp leh Congress chuan Seat 3 ve ve la in Independent in seat khat an chang.Congress chuan Kawlchaw West, Chawntlangpui, R.Vanhne, Lawngtlai AOC, College Veng, Paithar, Sihtlangpui, Chawnhu Rulkual,Bazar ah te hnehna an chang a, MNF chuan Lawngtlai-III chang in Independent ten Thingkah, Chandmary,Saizawh ‘E’, mampui, Lawngtlai Vengpui, Saikah leh VC pek thar Electric Veng ah te hnehna an chang.

BRGF Meeting, D.C ho in nimin khan neih a ni.

Nimin khan Lawngtlai DC Conference Hall ah Pu Thlamuana Lawngtlai DC kaihhruaina hnuai ah District Planing & Implementation Committee, Backward Region Grant Fund(BRGF) chu an thukhawm a, hetah hian BRGF Cell hnuai a thawk Staff te hlawh ennawn a ni a, VC ten BRGF Annual Action Plan 2011-2012 an siam te thlir ho a nih bak ah BRGF hnuai a hmalakna leh hmalak zui dan tur te sawi ho a ni. Ministry of Panchayati Raj atangin District hnufual dawmkanna BRGF hi Lawngtlai District ah tangkai takin kalpui mek a ni a, Meeting ah hian Lawngtlai Esat MLA Pu H.Zothangliana, Lawngtlai West MLA Pu H.Ramhluna, LADC a CEM Pu C.Ngunlianchunga, Chakma Autonomous District Council a CEM Pu Kali Kumar Tongchongya bak ah Members dang te an tel tha hle. Nimin Meeting ah hian kum 2011-2012 atan a BRGF a sum ruahman cheng Nuai 1151, Lawngtlai District chhung a Block pali a semdarh chu an thlir ho a, thuneitu sang lam ah pawmpui tur a thawn tha an ti.

VC ah Thalai

Tuntum VC thlan ah thalai lam tling zing ah Council Veng atanga MPC Ticket a thlantlin MJA Accredited Journalist Elvis Lalthangzuala, Lawngtlai Vengpui atanga Independent a thlantlin Kum 25 leh Ni.102 a upa N.Rosangliana leh Lawngtlai Bazar atanga Congress Ticket a thlantlin C.Lalthangpuia te chu a langsar zual an ni awm e.

Bank Meeting

Nimin khan Pu Vanlalngena Addl. DC Office ho in District Consertative Meeting neih a ni a, Meeting ah hian Lawngtlai District chhung a Bank hrang hrang te hmalakna te thlir ho a ni a, Centrally Sponsored Scheme, Bank kaltlang a kalpui ngai ho, PMEGP, SGSY leh scheme dang te kalpui a nih dan sawiho a niin, chak zawk a kalpui a nih theih dan tur te an ngaihtuah ho. Meeting ah hian Pu Thaneshwar Sharma, Asst.Manager RBI Guwahati, Pu K.T.Pande Chief Manager Lead Bank Office Lunglei bak ah Lawngtlai a Bank hrang hrang leh Line Department aiawh te an tel.

Lawmpuina:

Chanchinbu khawvel a kan thawhpui Elvis Lalthangzuala Editor Rauthla, Khawtlang rawngbawlna zau zawk thawk tur a VC a thlantlin i ni hi kan chhuang che in kan lawmpui a che - The Lawngtlai Post Daily

Tuesday, March 8, 2011

Central Zone ah tluang takin VC thlan a ni .

Nimin khan LADC huamchhung a Village Council inthlanna atan mipui ten zing dar 7 atang in Vote an thlak . inthlan hi thawh thum a neih tur niin nimin khan Lawngtlai leh a chhehvel, Central Zone a VC 19 ah inthlanna hi neih a ni dawn a , Central Zone VC 19 ah hian Candidate 253 te chuan VC Seat 105 an inchuh ani,Central Zone ah hian Vote neithei 14293 an awm. Central Zone ah hian VC 20 awmin Saikah khua , VC Member pathum awmna ah Independent Candidate te chu chuhtu awm lova tling ah puan a nih vangin inthlanna hi VC 19 ah neih a ni. Nimin a Vote thlakna hmun hrang hrang The Lawngtlai Post in a tlawh kual laiin boruak a muanawm a, Vote tla pawh a tha viau in a hriat a ni. Vote thlaktu zing ah AOC Veng a mi Pi Iangdawii kum 102 chu a upa ber a nih a rinawm. Vote tla te hi nimin tlai lam atang khan R.O te kaihhruaina hnuai ah chhiar nghal a ni a, tukin lam chuan result hi hriatkim theih beisei a ni. Vote tla hi a tha thawkhat viau in a hriat a, a tlangpuia chhut in 75% chu a tlak phak a rinawm. LADC ah hian V/C 86 awmin V/C Member 3 awmna :- 1. Sakeilui-II, 2.Saikhawthlir, 3.T.Dumzau, 4. Chamdur P-II, leh Member 5 awmna Bolisora ahte chuan Congress Candidate te chuhtu awm lova tling a puan anni a, Inthlan thawhhnihna chu March 10 khian VC 20 ah neih a ni anga, inthlan thawhthumna chu March 14 khian VC 46 ah neih a ni ang. Khawi hmun atang mahin buaina thlen thu dawn a ni lova, Candidate leh mipui lam pawh tumdang aiin an tang nasa in ahriat a ni.Nimin kha LADC chuan hnathawktuten thataka vote an thlak theih nan chawlh ah a puang.

V/C Election

Tuntum VC inthlan ah hian VC awm zawng zawng 86 atangin inthlan ngailo va, chuhtu awm lova candidate te tling a puanna VC 6 awmin inthlanna neihna tur VC 80 niin heng VC 80 ah hian Seat awm zawng zawng 854 niin Candidate 854 an awm.LADC huamchhung a VC E/Roll a a landanin Voters 41471 an awm.Central Zone leh Eastern Zone ah VC 20 ve ve awmin Tuithlanglam Western Zone ah VC 46 an awm,Central zone ah Voters 14293 awmin Eastern Zone ah 11653 an awm

Power supply awmlo

Nimin thimhlim atanga zan dar 9 thleng Power Supply a awm loh vangin VC inthlana Vote tla chhiar ah harsatna a thlen deuh na a,Vote hi Khawnvar eng hnuai ah chhiar tho a ni.

editorial

INTHLAN DAN THAR HI

LADC huamchhungah VC inthlan chu Dan thar angin neih chhoh mek a ni a, inthlanna neih tawh chin ah inthlan dan hlui hmanga inthlan lai a awlsam taka vote lei leh hralh awmthei thin chu a bo duak in a hriat a, chu chuan inthlan boruak pawh a tithianghlim viau in a hriat a, a lawmawm in Democracy ram ah inthlanna felfai zawk a awmtheih nan a Dan siamtu ten Dan an siam a, hman a ni hi a lawmawm in, Dan siamtur a mipuiin an aiawh a an thlante an awm mai mai lo tih a langfiah viauin a hriat a ni.Inthlan hi tumkhat a neih zawh mai tur a ruahman a ni lova, Vote tla te erawh chhiar nghal a ni thung si hian inthlan leh hun ah ruahmanna siamtute tan ngaihtuahna thar a siam tir theiin a rinawm a, hmanzui tlak hmanzui a, hmanzuitlak loh a lo awm palh a nih chuan paih ngam hi a fuh a, dan chu mipuite tan a himthei ang ber a duan chhoh zel a tulna chin a awm a,chutiang titur chuan thuneitute hi an rintlak em em a ni.

SSA Advertisement

No.A.11011/4/09-DPO/SSA-LTI
OFFICE OF THE DISTRICT PROJECT CO-ORDINATOR
SSA MISSION, LAWNGTLAI DISTRICT
Dated Lawngtlai, the 28th Feb, 2011


H R I A T T I R N A

SSA Mission, Lawngtlai District hnuaiah heng a hnuai a Post hrang hrang atan hian Contract a thawktur lak a ni dawn a, chungte chu:

Sl/No Name of Post Required Qualification

1. Parttime Instructor
a) Art Edn.Instructor HSSLC with specific knowledge
of Art Education
b)Health & Physical HSSLC with Certificate in
Education Instructor Physical Education / ANM or
Health Worker
2. Block Resource Centre
a) RP at BRC for Graduate & Above with B.Ed
Subject Specified or equivalent and CCA
b) RP at BRC for CWSN(BRC) Graduate & Above with B.Ed/
Diploma Certificate in Spl.Edn
/FC, CCA
c) MIS Coordinator(BRC) Graduate with 1 year Dip.In
Comp.Application, Proficiency
in Oracle, VB, etc.
d) Data Entry Operator HSLC with 6 months Diploma
in Computer Application
Dilduh chuan a hnuai a mi hi hriattur a ni.
1. Dilna form hi a thlawnin District Project Office, SSA Mission, Lawngtlai District ah laktheih a ni. Dilna form fillup sa te chu Dt.7th March 2011 aia tlai lovah, District Project Office ah thehluh tur a ni.
2. Mi pakhatin post pakhat aia tam a dil theih loh
3. Post dil theihte hi District Project Office-ah en theih a ni ang.
4. Post dil hming chu dilna form-ah chiang taka ziah lan tur a ni
5. HSLC leh a chunglam Marksheet leh Certificate attested copy dilna form-ah thil tel tur a ni.
6. Dt.9th-11thMarch,2011 -ah District Project Office-ah interview tur a ni ang.
7. Interview ni-ah original document (Certificate & Marksheet)ken tel vek tur a ni ang.Kenglo te chuan interview an hmachhawn thei lovang.
8. Interview ni-ah District Project Office atanga pekchhuah Identity Card kentur a ni.
9. Diltu chu kum 35 aia upa lo tur a ni a, ST tan kum 5 thleng ngaihhnathiam theih a ni ang.
Hrechiangduh chuan District Project Office, SSA Mission, Lawngtlai District ah zawhfiah theih a ni.

Sd/- L.Z.Tluanga
District Project Co-ordinator
(2-2) SSA Mission, Lawngtlai District

Friday, March 4, 2011

Keimahni

Kan Broadband Connection a that fumfe theih loh vangin Blog kan update hlei thei lova, kar thar atang chuan a pangngaiin kan update thei tawh tur ah kan ngai. Min hlutsak a, tlawh thintute hriatthiamna kan ngen e.