Nimin khan Home Minister Pu R. Lalzirliana chuan I&PR Auditorium-ah kum 2011 Chhiarpuia Mizoram dinhmun lailawk tarlanna “Paper -I of 2011 Census (Provisional Population Totals)” a tlangzarh. Pu Lalhmingthanga, Dy. Director, Census Operations, Mizoram chuan 2011 Chhiarpui hna thawh a nih dan report tawi a sawi .Minister chuan , Chhiarpui hi India ram inrelbawlna dana hlawhtling ber a ni tih a sawi a. 2011 Chhiarpuia Mizoram dinhmunte sawi langin sex ratio a lo pung ta chu lawmawm a tih thu a sawi a. Ziak leh chhiar thiam tam lamah 3-na ni mah ila 2001 Chhiarpui atanga chhutin 2.78% zetin ziak leh chhiar thiam kan pung hian kan hma lakna a pho lang a, thil ropui leh lawmawm tak a ni a ti bawk.2011 Chhiarpui hi Mizoram state nih hnu-a vawi 3-na a ni a, Mizoram Directorate of Census Operations in a hranga Chhiarpui a buaipui vawi 4-na a ni thung. 2011 Chhiarpui atan hian Charge Officer 64, Supervisor 491 leh Enumerator 2370 chhawr an ni a. He Chhiarpuia a lan dan chuan Mizoramah mihring 10,91,014 awmin mihring punna hi 22.78% a ni a. Khua 830 awmin heng zinga 23 chu town a ni a; mihring chenna khua 719 awmin mihring luah loh khaw hming nei si 111 a awm bawk. Paper -I of 2011 Census hi dinhmun lailawk tarlanna chauh a la ni.