Tunkar Ningani (April 14) tlailam khan Minister Pu H.Hiato chuan Lai Autonomous District chhung khawthlang lam Vathuampui MDC Constituency chhung a Chamdurtlang khaw kawng a hawng. Hawnna inkhawm Chamdurtlang a neih, Pu Lalneihkhuma Vathuampui Bialtu MDC kaihhruai ah Minister chuan kawngpui tha tak Chamdurtlang in an nei chu a lawmpui thu a sawi a, PHE Minister chuan khawtlang an Tui thianghlim an mamawh thu an thlen chu a rang lama lo ngaihtuah sorkar in a tum tih a sawi a, Eng an neih loh pawh a theih ang anga lo ngaihtuahzui a tum tih a sawi. Minister chuan Congress sorkar chu hnam tenau zawk te ngaihven tu sorkar a nih thu a sawi a, tuna Mizoram a Chief Minister Pu Lalthanhawla kaihhruai ah pawh hnam tenau zawk ten chanvo tha tak an nei theuh a ni a ti. He hun ah hian Pu H.Zothangliana Parliamentary Secretary leh Pu C.Ngunlianchunga Chief Executive Member LADC te pawhin thu an sawi, kawngpui hawn tak hi Vathuampui khaw luhhma Kilometre 4 vel atangin a peng a Kilometres 7 a thui niin Truck kaltheihna khawp a zau a ni a, sorkar kum kalta a Mizoram Sorkar in LADC Sorkar ah Additional Fund Cheng Nuai 150 a pek atangin Rs. 28,24,500/- seng a LADC, PWD ten an laih a ni. Chamdurtlang khua hi In 106 awmna niin Bru, Pang, Bawm leh Hnam tenau dang te inchenpawlhna khua a ni.
Minister hian khua 11 a tlawh a, a tlawh khua ten an lo lawmin ruai nen an lo hmuak deuh vek a, tlai khat ah hmun li lai a ruai a kil tumte pawh a awm. Minister hian Bungtlang South a amah lo lawmtute hnen ah mipuiin an aiawhtur a an thlanchhuah te chuan an mipuite mamawh tur chu an ngaihven lian ber a nih thu a sawi a, tui lam a harsatna te pawh sutkian a nih theih nan hmalakna chaktaka kalpui a nih thu sawiin an dil hma in Bungtlang south tan tuilakna siam nan Cheng Vaibelchhe 2.27 ruahman fel a nih thu leh Tourist Lodge sak tur a tihfel a nih thu a sawi a, Lawngtlai tuilak nan Vaibelchhe 25, Saiha tuilak nan Vaibelchhe 21 sunction a chhuah tawh thu leh Tender pawh chhuah a nih tawh thu a sawi a, heibak ah hian hmun tamtakah PHE leh Tourism chuan hmalakna a kalpui thu a sawilang bawk.
Minister hi Pu H.Zothangliana Parliamentary Secretary, Pu C.Ngunlianchunga CEM, LADC bak Pu TH Thiabi Mara District Council a Executive Member leh LADC Sorkar a Executive Member paruk leh PHE Department hotute leh Thuthar thehdarhtu ten an tawiawm.