PWD-in Kawngpui siam nan nuai 5493 hmu; Nuai 1170 hmang tawh

Mizoram chhunga National Highway paruk siamthatna atan Mizoram PWD chuan kum 2010-2011 chhung khan central sorkar atangin cheng nuai 5493 a hmu a, kawng siam nan cheng nuai 1170.977 hmang tawhin, nuai 4322.023 chu hman lohin a la awm.National Highway paruk - NH 44A, NH-150, NH 54, NH-154, NH-54(A) leh NH-54(B) te thuamthatna atan hian Ministry of Roard Transport & Highway chuan 2010-2011 chhung khan Periodical Renewal atan cheng nuai 2300, Special repair atan cheng nuai 201, Ordinary repair atan nuai 1353, Flood damage repair (chhunzawmna) atan nuai 139, Flood damage repair (a thar) atan nuai 1500; a vaiin cheng nuai 5493 chu Mizoram PWD in a hmu niin Mizoram Road Transport Union (MRTU) chuan an sawi.Heng sum an hmuh atang hian February 2011 thleng khan Mizoram PWD chuan ordinary repair atan nuai 455.919, Flood damage repair (a thar) atan nuai 267.55837, Periodical renewal atan nuai 304, Special repair atan nuai 143.50 te an seng tawh a ni.MRTU-in RTI Act hmanga an zawhna, department-in a chhan dan chuan National Highway 54 bik atan Ministry of Road Transport & Highways chuan cheng vaibelchhe 50.08 chu State PWD hnenah a pe tawh bawk a ni. Hetiang zat sum dawng chunga, sum tam tak hmanloha a la awm chu mipuite chanvo kawngtha neihna tura hmalakna chuan ngaihthah a hlawhzia a tilang hle niin MRTU chuan an sawi.NH 54, Hrangchalkawn leh Lawngtlai inkar contractor atan Bengal Prakalpa Nirman Pvt. Ltd, Salt Lake, Kolakata chu October ni 22, 2009 khan work order pek a ni a. Mahse, he company hian hna an thawh theih loh avangin Mizoram sorkar chuan suspend mai se an duh thu MRTU chuan an sawi a. National Highawy No. 44A hnathawktu atana thlan, M/s Gyatri Project Ltd., Hyderabad leh M/s Tantia Construction Ltd. Kolkata, M/s GP projects, Silchar te pawhin an hna chu tha takin thawk se an duh thu MRTU chuan thuchhuah siamin an sawi bawk.