Nimin khan CBR Partners, Mizoram huaihawtin Aijal Club-ah “State Level Network on Disability and Advocacy, Mizoram” neih a ni a. He workshop hawnnaah hian Social Welfare Minister Pu PC Lalthanliana chu Khuallian niin.Pu PC Lalthanliana chuan rualbanlote tana rawngbawltute hnathawh chu ropui a tih thu a sawi a. Sorkar pawhin rualbanlote a ngaihsak a; kawng hrang hrangin hma a laksak tih a sawi. Mizoram Sorkar chuan rualbanlote tan bik Commissioner Office thar a hawng dawn a, thawktu tur Assistant Commissioner leh staff dang 10 lakna turin phalna lak a ni tawh tih a sawi. Persons with Disability Act, 1995 (sec 33) in a phut angin Mizoram Sorkar hna lakna hrang hrangah 3% chu pianphunga rualbanlote tan hauh a ni a ti bawk.Pianphunga rualbanloten mahnia eizawnna an dapna turin National Handicapped Finance Development Corporation (NHFDC) hnuaiah Mizoram Sorkar chuan Mizoram Rural Bank (MRB) chu State Channelising Agency atan a ruat a.Social Welfare Department leh MRB hian February, 2010 atang khan hma lain loan la tur mi 122 a thlang chhuak tawh a ni. Sorkar laipui hnuaia ADIP scheme atangin kut lem, ke lem etc leina tur dawn niin NGO leh DDRC te nena tangkawpin hetiang mamawhte chu a thlawnin pek an ni thin bawk. Piansual avanga khumbet mi 200 hnenah Disability Pension thlatin Rs. 250 pek thin a ni a; pianphunga rualban loten intodelhna hna an thawhna atan Economic Rehabilitation to Handicapped Persons scheme atangin kum 2008-2009 chhung khan mi 262 hnenah tanpuina pek a ni.Pu PC Lalthanliana chuan lehkhathiam zinga pianphunga rualbanlote tan bik Educated Unemployment Allowances siam niin Employment Exchange-a an in register atanga kum 3 chhunga hna an hmuh loh chuan thlatin stipend pek an ni a, he scheme hnuaia stipend dawng mek mi 25 an awm a ti a. Kum 2008-2009 khan naupang 850 hnenah Handicapped Student Stipend pek niin Rs. 3,78,900/- sem a ni a; kum 2009-2010 ah chuan naupang 813 hnenah Rs. 2,01,000/- sem a ni a ti bawk. National Programme for Rehabilitation of Persons with Disabilities (NPRPD) scheme hnuaiah Mizoram Sorkar chuan State Referral Hospital atan Presbyterian Hospital, Durtlang a ruat a, State Referral Center (Mentally Retarded) atan Spastic Society of Mizoram leh District Referral Center atan Indian Red Cross Society, Mizoram State Branch te ruat a ni tih a sawi bawk.
source:diprmizoram.gov.in
source:diprmizoram.gov.in