Thursday, June 30, 2011

Agriculture Department in NLUP an sem chhunzawm

Mizoram Sawrkar Flagship Programme NLUP chu Lawngtlai District ah Agriculture Department chuan an hnuaia Trade thlangtu te hnen ah a sem chhunzawm zel a,nimin khan Lawngtlai khawpui chhung a chhungkua 38 te hnen ah DAO Office Lawngtlai ah NLUP tanpuina hi Rs.20000/- theuh in semchhuah leh a ni, tihian Lawngtlai East Assembly bial chhunga an Department hnuai a Trade thlangtu chhungkua 208 hnen ah Tanpuina pawisa hi pekchhuah a ni ta a ni. Agriculture Department te hian kumin March thla khan Tuichawng bial chhunga chhungkua 820 hnen ah NLUP tanpuina hi an lo pechhuak tawh a, helai bial a hmalak dan pawh Department a thawkte chuan an enfiah vek tawh a, Tanpuina dawngtuten hma an la tha viau niin an sawi. Pawisa semchhuah a nih hma hian DAO Pu James Vanlalluaia leh H.Lalbiaknia AEO te chuan an hnuai a Trade thlangtu pawisa pekchhuah tur te chu sawrkar in pawisa a pek chhan ang ngei a dik taka hmala theuh turin an chah a, hmala thalo chu tanpuina pawisa pekchhunzawm an nih dawn loh thu an hrilh bak ah NLUP dawngtu lam te pawhin hriatchianloh an neih an zawh te an chhang bawk.

Remna Ni




Vawiin hi India Sawrkar leh MNF ten Remna an ziak Ni Champha vawi 25-na a ni a, Mizoram pum ah he Ni hi Programme,kumdang aia changtlung zawka siamin hman a ni dawn. tarlan tawh angin Lawngtlai ah chuan Zing lam ah CYLA huaihawtna hnuai ah Peace Rally neih a ni ang, chhun lam ah vantlang inkhawm YLA Hall ah buatsaih a ni anga, remna lam hawi thusawi ngaihthlak a ni ang. Sorkar hnathawkte chu he hun a telvek tur hian hriattir an ni.

REMNA LEH MUANNA HNUAIAH HMASAWNNA

Mizoram Remna leh Muanna Champha vawi 25 na kan thleng ta,
He ni lawmawm takah hian Pathian hnenah lawmthu sawi ila,
Ram leh hnamin hmasawnna a dawn zawng zawngte hriain,
Khua leh tui tha ni turin mahni inhlan thar leh ang u.



Remna leh Muanna hnuaiah mi zawng zawng nun a hlim a,
Eizawnna,Sakhaw biak, Khawtlang nun leh Zirna a kal tluang a.
Hmasawnna rahbi thar leh hnam rohlu tinreng bunin a awm ta;
Thang leh thar zel tan malsawmna hlu a ni.



Kan chhehvel hnam leh khawvel zau zawk thlir ila,
Chi leh chi, hnam leh hnam, ram leh ram innghirnghona karah,
Pawi sawilo nunau tawrhna leh in leh lo channa nasatzia hi,
Sawi in a siak lo, a rapthlak mang e.



Hawh u, remna leh muanna hnuaiah pheikhai rualin pen ila,
Hmatliang thlirin zirlaiin zir sela, ram hmasawnnan roreltuin rel se,
Mahni intodelh turin kuthnathawktuin thawk mawlh mawlh se,
Tumah in dip lovin ram kalsiam zai i rel ang hmiang.



Hmasawnna tura sorkar ruahmannate dawngsawng thiam ila,
Mahni leh tu leh fate leh thangthar thleng daih turin,
Taimakna,Thawhrimna,Tih tak takna leh Rinawmna nen,
ZORAM NUAM I SIAM ANG U.

Issued by Directorate of Information & Public Relations,
Government of Mizoram.
I&PRO(L) No.6/2011

Wednesday, June 29, 2011

June 30 Mizoram Remna Ni

DC.Pu Thlamuana hoin MSDP kalpui zel dan tur relin Dist. Level Meeting neih a ni


Nimin khan Pu Thlamuana Lawngtlai DC ho in, DC Conference Hall ah District Level Meeting on Multi Sectoral Development Programme an nei. Pu Beila Khithie Nodal Officer, chuan report pe in Multi Sectoral Development Programme Lawngtlai District a kalpui chhoh mek leh hmachhawp te a sawi. Meeting ah hian Suhas Chakma. Director, Asean Centre for Human Right in Lawngtlai District a MSDP kalpui tum dan thenkhat chu dikhlel deuh awm ni a hriaiin Human Rights Commisssion ah a zualko chungchang a thu kalzel bawhzui dan tur rel a ni a, Pu Suhas Chakma chuan Lawngtlai District a MSDP Project siam thenkhat chu Hnam tenau (Minority) awm lohna hmun ah kalpui tum a nih thu Human Rights Commission a thlen hnu ah Meeting chuan Minority awmloh hmun thenkhat LADC huam chhung a Project te chu he Council huamchhung vek Minority awmna ah sawn chungchang an sawiho. MSDP hi Ministry of Minority Affairs atanga Ram chhung hmun hrang hrang a Hnam hnuaihnung leh tenau zawkte dawmkanna tur a ruahmanna a niin Mizoram ah chuan Lawngtlai leh Mamit District ah te kalpui a ni. Lawngtlai District tan MSDP ah hian Pawisa Cheng Nuai 676.19 Central chuan a pechhuak tawh a, he Programme hnuai ah hian Chenna In neilo tan In 2022 sak tum a ni a, Health Sub Centre-6, Anganwadi Centre-71, Primary leh Middle School tan Additional Classroom 14, School 13 sak thatna tur te, Sangau leh Chawngte a Damdawiin tihchangtlunna tur te chu hmalakna langsar zual a niin, tunah hian Lawngtlai leh Chawngte a Girls Hostel sakna tur leh Khua 14 a tuithianghlim intur lakna tur a ruahman chu hnathawhna tur pawisa Central lamin a la pechhuak lo a, pawisa pekchhuah tawh atangin hna hi thawh chhoh mek a ni. Nimin meeting ah hian member te an tel tha hle a, Pu H.Zothangliana Parliamentary Secretary bak ah LADC leh CADC a CEM te pawh Meeting ah hian an tel.

Addl.Secretary dawnsawn dan tur Council pathum in rel



Nimin khan LADC, CEM Office Chamber ah Pu C.Ngunlianchunga CEM, kaihhruaina hnuai ah July thlatir a Additonal Secretary, Ministry of Panchayatiraj, Dr. Hrusikash Panda-an Mizoram a District Council pathumte a rawn tlawh tur lo dawnsawn dan tur an rel. Additional Secretary hian July Ni 4 ah Lawngtlai a thleng anga, Lawngtlai ah riakin a tuk July Ni 5 ah Lai leh Chakma Council hotute nen an inkawm anga, hemi hnu hian Saiha ah chho in MADC hotute a kawm leh ang. Vawiin a District Council pathum hruaitute Meeting chuan Council dan CCB Rules siam danglam chungchang bak ah mamawh leh harsatna an neih hrang hrang te lo thlen nise an ti. Meeting ah hian CADC a CEM Pu Kali Kumar Tongchangya, Pu S.Khipo MADC a CEM, Pu H.Zothangliana Parliamentary Secretary, bak ah Council pathum a mipawimawh te an tel tha hle

NLUP sem dawn

Vawiin hian Agriculture Dept chuan Lawngtlai khawpui chhung a chhungkua 38 hnen ah NLUP tanpuina Rs.20000/- theuh in an sem dawn.

Hun pawtsei

Higher Secondary zirlaite tana Scholarship dilna thehluh hun chhung 30th June 2011 chu MZP chuan a bichilh deuh ni a hriaiin, Scholarship Board thuneitute hnenah sawn hla tura ngenna a thlen angin 15th July 2011 thleng pawhsei a ni .

Remna Ni hmandan tur

Naktuk a Ramna Ni lo thleng tur, lawngtlai a hmandan tur chu tun hnai khan Addl.DC Pu Vanlalngena ho in Remna Ni hman dan tur ngaihtuah ani a,Remna Ni June Ni 30 hi ropui taka lawm nise an ti a,a lawmna pui ber chu chhun dar 11:00 ah Central YLA Hall ah neih tur ani a.Hetah hian Pu Thlamuana District Bawrhsap chuan inkhawm a kaihruai ang a,"Remna hi Pathian thil tum ani"tih thupui hmangin Rev.H.Lalsangliana President Lawngtlai District Kohhran Committee chuan thu a sawi ang a,"Remna hmasawnna kailawn"tih thupui hmangin Pu LH.Mawia Hnialum.Associate Professor in thu a sawi bawk ang.Hall Function neih naah hian Sorkar hnathawk zawng zawngte,Political Party hruaitu zawng zawngte leh NGO hruaitu zawng zawngte kal vek tura beisei an ni.Remna Ni zing karah hian Central YLA bul tumin Peace Rally neih ani ang a,zing dar ruk ah mahni Branch theuh atanga chhuak khawmin,Areopagy ah in tawhkhawm tur ani a. Areopagy ah hian function tawite neih ani ang.He hun ngai pawimawh tur hian YLA member zawng zawngte ngen an ni.

Smoke Free ah Mizoram Puan a ni Dawn



Vawiin hian Mizoram State Tobacco Control Society (MSTCS) buatsaihin Chief Minister Banquet Hall-ah ‘Declaration of Smoke Free Mizoram hman a ni dawn. He hun hi Pu S. Laldingliana, Parliamentary Secretary Chairman na hnuaiah hman a ni ang. He hunah hian Pu Lal Thanhawla, Chief Minister chu khuallian a ni ang a, Pu Lalrinliana Sailo, Health Minister chu khual zahawm a ni bawk ang. MSTCS leh Indian Society on Tobacco and Health (Mizoram Chapter) tangkawpin an buatsaih vaihlo that loh zia lanna short film intihsiakna lawmman semna hun neih a ni bawk ang. He hun buatsaih a nihna chhan chu Mizoram chhunga puipunna hmun hrang hrangte meizuk lohna hmuna puan leh chak zawka puipunna hmuna meizuk khuahkhirhna dan kalpui a, dan bawhchhiate chunga hremna dan lehkawh hi a ni.

Tuesday, June 28, 2011

Chandmary Bial KTP ten thisen Unit 35 an pe



Nimin khan Presbyterian Kohhran Lawngtlai Chandmary Pastor Bial Kristian Thalai Pawl (KTP) te chuan amamawh a piangte hman a tan Thisen Unit 35 an pe, Thisen petute hi Mipa 30 leh Hmeichhia 5 an ni. District Hospital Lawngtlai atangin Dr.Lalrinfela leh a thawhpui ten Chawnhu Kohhran Hall ah kalchilh in thisen hi an laksak. Lawngtlai Chandmary Pastor Bial KTP te hian June 24 atang khan Bial KTP Meet, Chawnhu ah an hmang a, Meet neih chhungin Programme chi hrang hrang hman ani. Meet tiak tuk,nimin khan Palai te haw darh hma in Bial Conference in a lo rel tawh bawhzui nan thisen hi an pe a ni. Thisen pek hma a inkhawm buatsaih ah Dr.Lalrinfela chuan thisen pek chu thil hlauhawm a nih loh thu leh midangte tan a malsawmna an ni tihlanna a nih thu a sawi, Thisen hi Bialtu Pastor J.Lalbiaknia leh Pro Pastor R.Lalthangvunga ten pe hmasa berin hemi hnu hian KTP Member tlawmngai ten thisen hi an pek chhunzawm a ni. Lawngtlai Chandmary Pastor bial ah hian Kohhran 11 an awm

Lawngtlai pawhtu NH-54 chhe lutuk CYLA ten C.E an sawipui


National Highway-54, Lawngtlai pawhtu chhe lutuk chungchang ah tunhnai a Lawngtlai rawn tlawhtu Chief Engineer (Highway) Pu Lianchungnunga chu Central YLA hruaitu ten an kawm a, Er. Lianchungnunga, chuan Lunglei atanga Tuipang thleng kawng hi M/S Bengal Prakalpa Nirman Pvt. Ltd. ten an thawh thu sawiin, Contractor dang chhang tur an awm loh avangin a hna hi pek anih tak mai leh an thawh hunah furte a lo in tan leh tawh bawk nen an thawk chak lo hle tih a sawi a,Central YLA hruaituten an ngenna angin kawngchhe zuallai siam that a nih theih nan Chief Engineer hian contractor hi koh nghal niin, khuar hnawhkhah hna tal chu a rang thei ang bera thawk nghal turin hriattir a ni bawk.Tralna tawh angin Lunglei AOC atanga Lawngtlai inkar kawngpui siam nan hian Cheng Vaibelchhia 8.89 ruahman a ni a, ruahmanna ang chuan kumin May thla kha zawh hun tur a tih a ni.

SERTHLUM HUAN ENKAWLTUTE TAN -B.Lalzarzova




Tui fur a lo tla ta a,Serthlum huan neitute tan harsatna hrang hrang awm thei te leh a venna thenkhat lo tarlang ila.

1. Thlangdar:- Thlangdar mai bak ah rannung tamzawk inthlahpun hun chu fur lai (July-August) hi a nih avangin kan thlai te ven ngun an ngaih lai tak a ni. Thlangdar hi ka (open mouth) neilo, nawn emaw zukna dawt nei a nih avangin damdawi hmanga kahhlum mai a harsa viau a, a zuk ngam loh tura a kung, a rah leh a zungzam, damdawi chak Systemic Insectiside e.g. BHC, DDT,Malathion etc. hmanga kah hi thlai rah ah damdawi chambang a awm thin avangin a tha ziktluak bawk silova, chuvangin a bawm ngam loh tawp tura damdawi chambang reilo chi a kah nam reng ringawt mai tur. Hetiang in, Dichlorvos (Nuvan) 20ml. leh tui 10ltrs. chawhpawlh a, a kung lian rahthei tawh chin chu a hnah hnuai leh chung, a rah leh a zar zawng zawng huh hnap a chawlhkar 2 dan apianga kah tur. Hei hian thlangdar chauh nilo thlai eitu rannung dang lakah a veng thei a ni. Ser kung la te deuh ah chuan he damdawi tho 10ml leh tui 10ltrs. a kah nise.

2. Serthlum zik paw:- A zik no leh hnah no te hi vutbuak in a bawh thin. Vutbuak natna hi hmuar(Fungal disease) a ni a, Sulphur powder emaw, sulfex in emaw kah tur a ni. Hetiangin:- 100gm. Sulfex Powder leh tui 10Ltrs. chawhpawlhin kar khat dan ah vawi thum tal kah tur. He Damdawi hi a ven nan pawh a zikno leh hnah thar kah nan a khat tawk a hman nise. He damdawi neilo tan Copper Sulphate 100gm. leh Chinai 100gm. leh tui 10Ltrs chawhpawlha kah pawh a tha hle.

3. Arah tla:- Thlangdar zuk vangin a rah tam tak a tla thin. A chaw mamawh kim a hmuh loh vang pawhin a tla teuh thin. Thlangdar zuk vang a nih chuan Thlangdar venna kan tarlan tawh ang khian kah nise. Chaw kham loh vang a ni a a lan chuan Multiplex (Multi-Vitamins) a kah vat tur. Hetiangin:- 50gm.Multiplex leh Tui 20Ltrs. pawlh a vawi khat(arah lai chuan) kah mise. A kah tan hun diktak tur zawk chu a par hma daih a ni nghe nghe.

4. Arah thur leh thawp:- Serthlum hmin, thlum lemlo, thur lo pawh daluap, thawp bawksi a awm thin.Ni hmulo, hmun dam leh lei thur ah a rah a thawp duh a, a thlum mawh bawk.A chinna hmun chu kan sawn thei lo anga, leithur erawh kan that(Neutralise) thei ang. Hetiangin:- Slaked lime 2Kg. hi Serthlum bul cheh phut ah a zau thei ang ber, a buk hlim phak chin ah phul a, lei nen cheh pawlh leh vek tur. Tunlai hi a hun chu a ni e.Hetiang bawk hian a rah hmin hma deuh in (Sept-Oct thla ah) vawi khat pek leh nise duhthusam a ni.
Kan Damdawi sawi thenkhatte hi Horticulture Department Office ah diltheih a ni.

KUM 2011-2013 MPF-Lai Autonomous District Forum Hruaitute

President
Rev.H. Lalsangliana,
Sr.Vice President
Rev. V. Ngunkhara
Vice President
Pu V. Thangzova
Secretary
Rev.J. Lalbiaknia
Joint Secretary
Rev. Lalrinfela Pachuau
Pu V. Vanlianhrin
Treasurer
Pi F. Hranghlunchhungi
Finance Secretary
Pi H. Lalrinkimi

Executive Committee Memberte

A. Legal Adviser
Rev. C. Hrangzuala

B. Prominent Citizen Members :

Upa Dr. R..T. Hnialum,
Upa T. Thangthuama,
Dr.J. Doungel,
Pu Meren Nampui.

C. Constituent Members aiawh :

Rev. Dr. LH. Lalpekhlua,
Upa T. Hranghluta,
Upa F. Sangdawna,
Upa R.Lalchhuana ,
T/Upa T. Lalhmuliana
PuCZ. Thanliana,
Pi H. Vanlalhruaii
Pi Lalengzauvi
PiC.Zathangi,
Pi F. Lalsangvuani,
Upa H. Liantluanga,
Upa H.Lalnunsanga
VLR.Hmachhuana,
K. Thansiama

Monday, June 27, 2011

Agriculture Department in NLUP an sem chhunzawm mek Lawngtlai East ah NLUP dawngtur 209 an awm


Mizoram State Sawrkar Flagship Programme, NLUP chu Lawngtlai District Agriculture Department chuan an hnuai a Trade thlangtute hnen ah an pekchhuah chhunzawm zel a, nimin Zirtawpni (June 24) khan Lawngtlai East huamchhung a khawchhak lam khaw 19 a Agriculture Department hnuaia Trade thlangtu chhungkua 171 hnen ah a tumkhatna atan chhungkua pakhat ah hmalakna hmasaa atan Rs. 20000/- (Singhnih) zel in DAO Office Lawngtlai a thawkte chuan Sangau leh Siachangkawn ah an semchhuak. June 29 karleh Nilaini khian Lawngtlai khawpui chhung a NLUP dawngtur a thlan chhungkua 38 hnen ah tanpuina pawisa hi pekchhuah leh tum a ni. Tuichawng bial a chhungkua 820, Lawngtlai West ah chhungkua 458 leh East ah chhungkua 209 awmin Agriculture hnuai a Trade thlangte hi an vaiin chhungkua 1487 an ni.Lawngtlai West bial ah NLUP tanpuina semchhuak tur hian Department chu an inbuatsaih leh mek bawk

Tawipui’S’ a Education Campaign Pu V.Zirsanga’n a hmanpui




June 24 khan Tawipui South a Minpui, YMA Library Hall ah MZP Sub-Hqrs. Tawipui buatsaihin Education Awareness Campign neih a ni a, Zirlai tithate chawimawina hun hman a ni bawk. Vanlalsiamkima Khiangte President MZP Sub-Hqrs. Tawipui kaihhruai ah hian Khuallian Pu V.Zirsanga School Education changtu,Executive Member LADC chuan hriatna leh thiamna tello chuan hmasawnna hi a famkim tak tak theilo a, Nu leh Pa ten an fate tui zawng an hriat a pawimawh a, tih tak takna nen a zirna kalpui a tul a, chutiang a kalpui tur chuan mahni remhriat ringawt a tawk zo tawh lo a, mithiam ten kaihhruaina an siam te pawh ngaihven peih a tul a ni a ti, zirlai titha chawimawi tak te chu chawimawina an dawn chu an tawppui mai lovin, bultan nan a hmanga chawimawina sang zawk dawng thei tur leh an khawtlang leh ram tana mitangkai ni tur a tumruhna siamtu ah hmangtur in a chah. Education Awareness Campaign ah hian Resource Person Pu H.Lalruatkima Education Officer LADC chuan Zirna pawimawhna leh mitin ten mawhphurhna hrang hrang an neih dan a sawi a, Khualzahawm Pu K.M.Lalhmachhuana Range Officer Tawipui Forest Range leh Special Guest Pu Ramthanpuia Special Officer,Malaria Lunglei te pawhin thu an sawi.

Thisen pe




Inrini khan LIKBK, Bethel Church, Lawngtlai Chandmary chuan an Kohhran kum 25 tlin lawmna chikhat atan an Biak In ah Thisen Unit 16, a mamawhten an hmanturin an pe, thisen petute hi Mipa 13 leh Hmeichhia 3 an ni.District Hospital Lawngtl;ai a thawktute chuan Dr.Lalrinfela ho in Bethel Biak In ah hian kalchilh in thisen hi an laksak, District Hospital Lawngtlai a thawk ten an sawi danin kum 2008 khan Voluntary a thisen pek Unit 412 an dawng a, 2009 ah Unit 305, kum 2010 ah Unit 304 kum 2011 ah Unit 194 an dawng tawh, Chawhrualin Lawngtlai a Damdawiin ten thisen an mamawh zat hi thlatin Unit 40 bawr vel a ni. Lawngtlai District Hospital ah hian Zaipui Major Operation) tithei Surgion an awmloh vangin District dang a thisen mamawh ang zat chu a phalo deuh thin niin an sawi. LIKBK Bethel Kohhran hi kum 1986 a din a ni a, kum 25 an tlin lawmna hi an nei mek a, July 3 khian Kohhran in a phuar mek te Jubilee denchhenin an phelh anga, July 4 ah Kohhran dan a innei lote a huho in inneih that tir an ni anga, zan ah Jubilee mei det a ni anga, July 5 ah Kohhran inkhawm neiin Jubilee lawmna neihchhunzawm a ni anga, July Ni 7 ah Inkhawm bak ah Jubilee ruai an kilho ang.

Saizawh tlawh lo maithei

Multi Modal kawngpui laih mek chuan saizawh East khua chu a tlawh lo maithei.Ruahmanna hmasa ah he khua hi tlawh tur a tih a nih hnu ah Allignment zawn that leh ah khua hi tlawh lo tur a tih a ni a, kar kalta a an khua tlawhtu PWD C.E hnen ah an khua chu kawngin paltlang se an duh thu an lo thlen a,C.E chuan kawngpui hian khua lo se an duhber a nih thu sawiin, kawng a that zawk na a nih chuan Saizawh khua chu a tlawh maithei a, a tlawhlo maithei bawk a ni a ti.

Silai tung

Tunhnai khan Pu N.R.Pradhan, Deputy Conservator of Forest(Wildlife) hnen ah Pu T.Hrangkhuaia,S/O Pu T.Thanliana , Sangau Dinthar chuan Sa pelh nan a a hman thin Ulhbun silai chu Nungchate humhalh a tul zia hria in a tung.

Sunday, June 26, 2011

Gospel Camping ah Mi 2836 lut tawh




Lairam Isua Krista Baptist Kohhran, Lawngtlai Bazar Biak In a Gospel Camping, chhawng riatna chu nimin khan an chhuak a, naktuk Thawhtanni hian Camping hi chhunzawm leh tum a ni a, chhawng kua na a lut tur te tan chhun dar 12 atangin Camp hi an lut tan ang. Thla hmasa May Ni 2 atanga Evangelistic Team, Speaker Pu SR sanglura leh a rawngbawlpui ten Gospel Camping an neih chhawng riatna thleng hian Campers 2836 an awm tawh a, Biak In hmunhma in a zawh tawk ang bak Campers luh tir an ni thei lova, Camping chhawng tin ah hian Campers 350 vel zel awm ang an ni. Hetiang a Gospel camping chhawng riat zet neih zawh a nih tak vang hian Lawngtlai khawpui chhung mai nilo, Lawngtlai District chhung a khaw hrang hrang atangin chhimtu an awm nual a, Lawngtlai khawpui chhung bik ah pawh boruak a ti nuam in, Pathian hming lam ngailo mitam tak an inhuchhuak a, ruihhlo leh sualna chi hrang hranga lut thuk tak tak ten Pathian Chhanchamna an chang chho mek a. Camping puipate chuan Doordarshan leh Cable TV Chanchinthar atanga Camping an nei tih hria a, theihtawp chhuah a lo tawngtaipuitu Zoram chhung leh pawn a mite hnen ah lawmthu an sawi a, nasa zawka lo tawngtaipui zel turin an ngen.

Friday, June 24, 2011




Mizoram Sorkar, Information & Public Relations ruahmanna in, nimin (June 23) khan MJA Gen Hqs.Aizawl a Member panga ten Lawngtlai atanga Myanmar ramri pawhtur kawngpui, Multi Modal Transport Project hnuai a laihmek te an en. Chanchibumite hi Pu David Thangliana Deputy Director I&PR in a ho a, he kawngpui laihmek enkawltu PWD atangin Chief Engineer Pu Lianchungnunga leh Officer ten Chanchinbumite hi an hruai. Lawngtlai atanga KM 38 a hla a, RDS Project Limited Camp ah PWD hotute chuan helai kawngpui laih mek chungchang Chanchinbumite chu hrilh in, Lawngtlai atanga Myanmar ramri, Zochalui thleng Mizoram PWD enkawlna hnuai ah RDS Project Ltd. leh ARSS Infrastructure Ltd ten chan in insem in an lai mek a, kawngpui thui zawng hi Kilometres 99.830 tur a ruahman a ni an ti a, kawngpui chu nitin Motor lian rit phur 1000 pawhin an zawh pawh a dawlzo tur, Highway Grade sang taka siam tum a ni an ti a, kawng chhuat zau zawng chu Metres 12 tur niin, Blacktop chin zau zawng tur chu Metres 7 a ni an ti. Kawng hi kum 4 chhung a hmantheih a peihfel hman tur a tih an nih thu te, tuna senso zat tur a ruahman chu cheng Vaibelchhia 4800 chuang a nih thu te Chanchinbumite chu an hrilh. Tun dinhmun ah he lai kawngpui laih mek hi hmun thum atangin laih a ni a, Lawngtlai atanga KM 38 inkar chu RDS Project Limetd ten KM 38 atangin Lawngtlai lam hawiin an lai mek a, Lawngtlai lam atanga laih tan mai a nihloh na chhan chu a enkawltu E.E Pu Zosangliana Zote chuan Thlanmual sutchhiat tur a awm vang leh mimal thenkhat zangnadawmna pek tawh, lungawilo an awm vang a ni a ti. KM 38 atanga KM 71 in kar chu KM 38 atangin ARSS Infrastructure Ltd ten Myanmar lam panin an laimek a, KM 71 atangin RDS Project Limited ten Myanmar lam hawiin an laimek bawk a ni. Chanchinbumite hi nizan khan Lawngtlai ah riakin vawiin hian Serchhip tlangdung kawngpui dinhmun te en pahin Aizawl an pan.

Thursday, June 23, 2011

Seminar on Land Reforms & Ceiling, CEM in a hmanpui




Nimin khan Lawngtlai-III a YLA Hall ah, Mizoram Synod Social front Aizawl leh Social Mission Department, Lairam Isua Krista Baptist Kohhran, Lawngtlai tangdun buatsaih in Seminar on Land Reforms and Land Ceiling neih a ni. Hunhmasa lam Rev.H.Lalsangliana Associate General Secretary, Lairam Isua Krista Baptist Kohhran, kaihhruai ah LADC a CEM Pu C.Ngunlianchunga'n Seminar chu hawngin, Ram leilung humhalhna a hmalakna kalchho mek chu lawmawm a tih thu a sawi a, Land Reform a hlawhtlin theih nan mipuiten sorkar hmalakna an pawmthiam a tul a ni a ti a, mipui lam ah ram neih duham tak tak an awm thluah tih sawiin, sorkar in passed a pek zat aia zau daih ram hauhlui tlat te, ram pek an nihna anga hmangtangkai silote hian ram leilung venhimna ah hmalakna tithuanawptu an ni a ti a, LADC sorkar chuan ram venhim nan dan leh hrai hmanlai tha tak tak a nei mek a, duh anga a hlawhltin loh chuan a enkawltu sorkar lam pawh an inenfiahve a ngai a ni a ti. LADC sorkar in Land Record siam nan Central sorkar puihna in cheng Nuai 74 a hmu tawh a, heng pawisa te hi tangkai zawka hman a nih loh vangin Council chuan Land Record felfaitak a nei lova, tuna sorkar kallai mek chuan bultan that tumin hmalak tan nan Cheng Nuai 5 a ruahman a ni a ti.Nimin Seminar ah hian Synod Social Front lam atangin Pu Lalthanzara leh Dr.Robert Halliday ten Paper an Present a, seminar a senso te hi Synod Social Front lam ten an tumvek a ni. Nimin seminar ah hian Kohhran hruaitute, Ram hruaitu nimek leh loni tawh te Tlawmngaipawl lam aiawhte leh helam ngaihven tute an tel.

World Vision Naupang hriselna endik



Nimin zing kar khan Lawngtlai Vengpuiah World Vision ten an enkawl( Sponsored) naupangte pualin Health Check up neih ani.Tunlai hian World Vision India Chhimtuipui Area Development Proggrammee hnuaiah Sponsored naupangte pualin Annual Health Appraisal Proggramme kalpui mek ani a,Lawngtlai Cluster hnuaia khaw hrang hrangah te he proggramme hi kalpui mek ani.Sponsored naupang awmna khua zawng zawngah Health check up hi kalpui tum ani a.Tunkar Inrinni a zawh hman tum ani.He Proggramme kalpui mekah hian Dr.LH.Thanga Singson leh a teamte Bethesda Hospital Aizawl te chu rawih an ni.World Vision naupangte hian an sponsored naupangte hriselna hi an ngai pawimawh hle a.Hetiang a health checkup hi kum tin vawi hnih an neihsak thin a,harsatna nei zualpui te chu an in nkawlna an tumsak vek thin ani.Hetianga an fate ngaihsaktu world vision chungah naupang nu leh pate an lawm hle ani

Samson Thanruma Website

Book of The Year 2010 Beiseina Mittui ziaktu Samson Thanruma chuan a kutchhuak te awlsam zawka miten an chhiar zau theih nan website siamin a khung khawm mek a, http://www.samsonthanruma .blogspot.com ah luh theih a ni e.

NH- 54 Hna zo hmanlo

Thulakna in a tarlan danin Lunglei leh Lawngtlai inkar kawng NH 54 siam hna chu Bengal Prakarpa Nirman Pvt.Ltd Kolkata ten an thawk a, cheng Vaibelchhe 8.89 ruahman a ni.NH 54 kawng siamtu contractor-te hian hna an thawk muang hle a, Lawngtlai kawng chu May, 2011-a zawh tur a ni a, hetih lai hian contractor chuan hna pumpui atanga chhutin 15-20% vel chauh an la thawk a . Company hian an hna thawh hunchhung pawhsei sak tur hian PWD-ah an dil mek nia thu dawn a ni bawk. Serchhip leh Hrang -chalkawn inkar chu an thawh zawh tawh zat percent hriat chiah loh mahse, an la thawk tlem hle niin thudawnna chuan a sawi bawk a ni.

Wednesday, June 22, 2011

D.C hoin Green Mizoram Day ah Thing tiak 200 chuang phun a ni





Mizoram hmundang ang bawkin nimin khan Lawngtlai ah District Bawrhsap Pu Thlamuana hoin Green Mizoram Day hman a ni. Zing dar 10 ah DC Office tual ah Day pual inkhawm tawite, Pu Thathluna Chinzah Secretary Lawngtlai Officers Club kaihhruai ah Pu Thlamuana DC chuan thingphun pawimawh zia hria a Sorkar Department hrang hrang a thingphun beihpui thlak tur chhuak khawm te chu lawmthu hrilh in, nasa zawka hmalak chhunzawmzel a tul a ni a ti. Hemi hnu hian 71 RCC Camp leh Chawnhu inkar kawngpui kam ah thingtiak, LADC Forest Department ten an tum chu phunin, hung nghal a ni. Day puala thingphun beihpui thlak ah hian State sorkar hnuaia Officer leh Staff te, LADC Sorkar Officers te an tel tha hle a, Pu Thlamuana DC, District Level Green Mizoram Chairman pawh in thing hi a phun a ni. Thing tiak 200 chuang phun a ni a, report a sawilan a nih dan in nikum lam a Sorkar Department hrang hrang ten thingtiak an phun 800 zing ah 40% vel chu a nung tha a ni.

YLA Hall ah RCH zirho



Nimin khan Lawngtlai-III a YLA Hall ah Reproductive & Child Health, Government of Mizoram buatsaihin Nu leh Naute ten hriselna tha zawk an neih theih dan tur zirhona leh inrawnkhawmna Dr.R.B Dey Chief Medical Officer, Lawngtlai kaihhruaina hnuai ah neih a ni a, khuallian Pu Vanlalngena Addl.DC Lawngtlai chuan India chuan ram hmasawn nih tum in hma a la mek a, hemi tihhlawhtlin a nih theih nan hian Nu leh Naute in hriselna tha an neih a pawimawh hle a ni a ti, Dr. R.Lalthanga SPO (RCH) chuan hriselna lam a hmalakna ah hmanrua changkang tak tak awmlohna hmun ah pawh kan neih ang ang hmantangkai thiam a pawimawh a, hmanrua tha leh manto tak tak hmanga enkawl ngailo natna tam tak a awm a ni a ti, thusawitu dang Dr.Zochhuanawmi i/c RCH Lawngtlai chuan Lawngtlai District chu inkalpawhna lam harsatna vangin duh angin hriselna lam a hmalakna a chak hlei thei lo a, thawktuten mawhphurhna an nei lian hle a ni a ti. Nimin a Awareness Programme for Reproductive & Child Health buatsaih hi Lawngtlai District pum tan a tih niin hmun hrang hrang a Doctor leh Healh Worker leh ASHA te bak ah Lawngtlai khawpui chhung a Tlawmngaipawl ai awh leh Thuthar thehdarhtuten an telpui a. he hun a teltur a beisei te chu an tel tha thawkhat viau in kan hria.

Eco-Club Seminer

Nimin khan Eco-Club Lawngtlai te chuan Green Mizoram denchhenin Seminar Gov't Region High Schoolah an nei,High School 11 an tel.Samson Thanruma ACF LADC leh Laltlannii Pachuau ten paper an present a,nungchate leh thing leh maute humhalh a tul dan te,Pollution chungchang leh a pawimawina te sawiin, kalkhawm zirlaite hnenah zirtirna an pe ani.He hu n hi Pu Lalduna Chinzah, DEO Lawngtlai in a kaihruai .

Thing humhalh

College Veng a LIKBK ram ah Green Mizoram denchhen in Lawngtlai College Veng Pastor Bial LIKBKTP te chuan nimin khan thing te humhalh leh venhim nan hnatlang ko in an samfai a, Thalai member 50 vel an thawk chhuak

Kawng en dawn

I&PR Dept huaihawtin MJA Hqrs. mi thenkhat ten naktuk hian Multi Model Trade Route, Lawngtlai - Saizawh - South Bungtlang an en dawn a, ni 24.6.2011 ah Lawngtlai chhuahsanin Hnahthial atangin NH 54 Aizawl thleng Serchhip lam kawngah an rawn en phei leh dawn a ni.MJA Member te leh anmahni hruaitute hian vawiin ah Lawngtlai an rawn thleng ang.

Lunglei ah Chhimlam tan Exhibition

Nihnih awh tur Mizoram Chhim lam District pathum te tana buatsaih Inspire Award 2010 District Level Science Exibition chu nimin khan HPC Vice Chairman Pu Joseph Lalhimpuia'n Lunglei ah a hawng.Chhim lampang District pathum te tana Science Exhibiton Gov't High School Lunglei a neihah hian Lunglei, Lawngtlai leh Saiha District atanga school 85 atanga naupang kalkhawm te chuan thil chi hrang hrang 171 an entir a, heta titha mi 5 te chu State Level June ni 27-29 ah Aizawl ah neih tah an tel ang.

Green Mizoram Day ah lawmman C.M in hlan

Nimin a Aizawl a Green Mizoram Day hmanna ah Fire Prevention Award 2011 chu Chief Minister hian hlanin, Lunglei District chu ti tha berin, lawmman Trophy, certificate leh Rs. 20,000 an dawng a; Aizawl District chu 2-na niin certificate leh Rs. 15,000 dawng bawkin, Serchhip District chu 3-na niin, certificate leh Rs. 10,000 an dawng a ni. Heng bakah hian district tina khaw 3 ti tha zualte hnenah lawmman, certificate leh pawisa fai Rs. 10,000, Rs. 7000 leh Rs. 5000 theuha hlan an ni bawk. Kum 2009a thingtiak 25 zel phuna 100 % tipuitling Social Welfare department, KVI, MJA, LPS Cable leh Zonet te hnenah Thing phun enkawl that lawmman pek a ni bawk a, 92 % hlawhtling department 3, 88 % department 7, 84 % department 2 leh 80 % department 2 te hnenah lawmman pek an ni bawk. Green Mizoram Day hman tan kum 1998 atanga kum 2009 thleng khan thing tiak 16,50,855 phun a ni tawh.

MZP ten Sorkar hmalakna hrethiamlo

MZP chuan nimin thuchhuah hetiang hian an siam.Kumin kumtir lama SSA leh RMSA hnalak felfailo chungchanga thil dik tawklo nia a hmuhchhuah zawng zawngte siamtha tura Sorkar-ah thlenin Verification Committee ten siamtha mai tura a ngaih laiin May 2011 ral hma a Verification Committee-in a hna a thawh zawh hman loh avanga June 20 thleng a dil belh chu a lo ral ta a, hemi hun chhung hian siamthat hna a thawh thu MZP chuan a hre lova. Thil diklo thup tumna leh siamthat tum tak takna a awm lo a nih chuan MZP chuan thudik a Lal ngeina turin hma a la zel dawn a, Mizoram Sorkar chu he hnalak chungchang a thil diklote chingfel thuai turin a ngen nawn leh a ni.

Zirlai tan ruahmanna thar

Entrance leh competitive exams abikin engineering entrance tana zirlai in buatsaih tanpui tura ruahmanna thar ‘Innovative Teaching Practices’, North Eastern Council (NEC) in a duan chu vawiin khan Shillong-ah NEC Secretary U K Sangma in a hawng a. A enchin nan Meghalaya a zirlai 100 te hnena a tlawnin he course hi kalpui a ni dawn a. He course hi online course niin AASANKA Mumbai a mi ten an pe ang a. A that dana zirin Hmarchhak state danga kalpui anih tur thu NEC Secretary chuan a sawi a ni. He course a ti tha pathumte hnenah laptop pek anih tur thu a puang bawk a ni.

Monday, June 20, 2011

Saisihchhuah Pu Hmun Hre-an a tlawh. India leh Myanmar inkalpawhna remchang tak a ni mek



Sangau tlangdung tlawh a zin Pu Hmun Hre, Lai Autonomous District Council a Vice Chairman Planning & Development chuan Inrinni khan Lawngtlai a rawn thleng. India leh Myanmar inrina lai, Pangkhua ram a Saisihchhuah a tlawh a, Myanmar nen inkalpawhna thazawk neih a nih theih nan a sawrkar hmalakna kalmek te a en a, ramri a lui, Tuipui ah mihring kalkaina tur lei cheng Nuai 20 a dawhna tur hmun pawh a ennghal bawk, Pu Hmun Hre leh a mah tawiawmtute hian Mizoram chhung a khualzin mite chawlhna tur Rest House , cheng Nuai 10 seng a RD Department lam in an sak pawh a tlawh a, India leh Myanmar ram te inkalpawhna leh insumdawntawnna thatak awm turin Saisihchhuah chu hmun remchang tak a nih thu Pu Hmun Hre chuan sawiin, tunhma atangin helai kaltlang hian vawiin thlengin inkalpawh nan tangkaitakin hman a ni a ti.Pangkhua atanga Saisihchhuah thleng hian BADP sum hmangin kawng laih a ni tawh a , tun ah hian Myanmar ram chhung lam ah Saisihchhuah pawh tur hian BADP sum cheng Nuai 30 hmangin Thau khua thleng turin kawng hi laihmek niin Kilometres 18 vel chu laihzawh a ni tawh tih Pu Hmun Hre chuan a sawi. Pu Hmun Hre hian a tlawh khua ah te LADC hnuaia thawkte nen inkawmhona buatsaih in Council hmasawnna kalmek chak leh zuala a kaltheih dan tur te an sawiho.

AOC Veng in NH-54 an siamtha


Inrinni khan YLA AOC Branch chuan hnatlang ko in an veng huamchhunga national Highway 54 chhelai te an siamtha. Hnatlang hmantur hian Bialtu MDC Pu H.Vantlalthaliana chuan Motor pahnih a thawh a, Pu C.Ngunlianchunga CEM chuan thingpuilum nan Rs.1000/- a pek bak ah PWD Multi Model Division ten lung (Boulder) an tum sak bak ah mimal thahnem ngai ten pawisafai an thawh nual bawk. hnatlang ah hian mi 120 chuang an thawk chhuak a, Bialtu MDC bak ah VC lam ten an uap bawk. Hnatlang te hi veng chhung kawngpui dungah insemdarhin, kawng khuar nasa zuallai te chu lung leh lungnawi hmangin an hnawh a, hnatlang an kohna chhan hi Branch YLA hruiaitute chuan Natioanl Highway chhe lutuk tawh chu siamthat mai a nih loh vangin an huamchhung ah a theih ang anga a chhe zuallai lo siam chu an tihmai ngai a an hriat vang niin an sawi.

Thingphun




Inrinni khan Lairam Isua Krista Baptist Kohhran, Thalai Pawl, Lawngtlai Vengpui Pastor Bial te chuan Lawngtlai College Veng a LIKBK Assembly ram ah Thingtiak an phun, hnatlang chhuak hi an vaiin mi 80 chuang an ni a, thingtiak 100 phunin an thing tiak phun te hi LADC, Forest Department in a tumsak a ni

Malaria leh Typhoid a hluar

Tunlai hian Lawngtlai leh a chhevel ah Malaria leh Typhoid natna a tam viau a,Lairam Christian Medical Centre ah kumin April atanga khan OPD a damlo en mi 9995 an awm tawh a, Malaria test 1283 an awm tawh a,Malaria vei hmuhchhuah tawh mi 110 awmin, Malaria vanga thi pathum an awm tawh a,Typhoids test mi 526 awmin Typhoid vei hmuh chhuah mi 187 a ni tawh tih LCMC hotute chuan vawiina he Damdawiin tlawhtu kan Palai an hrilh a, kumdang aiin kumin ah hian Malaria do kawng a State sorkar hmalakna chu a tlahniam deuh ni a an hriat thu leh heivang hian Malaria natna pawh a hluar phah nia a an hriat thu an sawi.

Malaria Do dan tur sawiho

June 17 chhun Dar 12 khan khan LCMC, Medical Superintendent Dr.K.Beichhua-a Office ah Christian Medical Association of India hotute leh LIKBK hotute leh LIKBK hnuai a Hospital hotuten Malaria do kawnga hmalak ho dan tur an sawiho a, Pu Joshi Tuisum, Regional Project Manager Christian Medical Assoction of India chuan Mizoram pum ah Malaria do kawng ah Kohhran te nen tanghoin hmalakna kalpui mek a nih thu a sawi a, hmalakna chu Lawngtlai District ah pawh LIKBK te nen tanghoin July thla khian tan tum a ni a ti, inkawmhona hi Baptist Church of Mizoram hotute pawhin telpuiin,Ram pum huapa Malaria hluarna District Lawngtlai District a Malaria natna chak zawka do a nih theih nan Kohhran ho te hmalakna chuan nasa takin kawngro a sut ngei Meeting a telte chuan an beisei thu an sawi.

Friday, June 17, 2011

World Vision India, CADP Lawngtlai bultumin Farmers Training neih a ni


Nimin khan Lawngtlai atanga Kilometres 30 vel a hla Sihtlangpui khawbul, Huan a World Vision Training Centre ah World Vision India Chhimtuipui Area Development Programme, Lawngtlai hnuai a kuthnathawktu thlanchhuah bik ten Ni khat awh huansiam leh ranvulh chung chang Training neih an nei . He hun ah hian World Vision hnuai a Cluster pathum Sihtlangpui, R.Vanhne leh Thingfal Cluster a kuthnathawktu 40 an tel a, huan siam leh ran vulh lam a mithiam sawmbik ten zirtirna an pek bak ah kuthnathawktuten an hnathawh a hriatthiamloh an neih leh tanpui an ngaihna lai te an sawichhuak bawk. World Vision,India Chhimtuipui Area Development Programme hnuai ah hian kuthnathawktu thlanchhuah bik te tan ranvulh leh huansiam ah eizawnna nghialnghet an neih theih nan kawng hrang hrangin hmalakpui a ni a, thlai chi tha an pek bak ah hlawhfa ruaiin an huan te an thlawhfai sak a, tuilak ngaihna hmun ah tui an lak sak a, a theih chin chin ah kawngpui te pawh an laihsak a ni. World Vision ten kuthnathawktu an tanpui te hnen a Training an pek reng reng in, a lo/huan lam ah kalchilh in a tul angin zirtirna an pechhuak thin a ni. Huan neituten leitihthatna an neih fumfe loh vangin World Vision leh Cloverorganic te chuan inremna ziakin leitihthatna leh ran chaw siamna Natural Vel bur khat Rs.355/- man chu kuthnathawktute hnen ah Rs.50/- zelin an pechhuak bawk a ni. Training hi Pu Maren Nampui Programme Manager World Vision leh a thawhpui te bak ahTraining pe tur a sawmbik leh Lawngtlai a Thuthar thehdarhtu thenkhat ten an telpui a, tlailam ah zanriah an kilho nghal.

MIZORAM POLICE-TEN RUKBO CHHANCHHUAK

Mizoram Sorkar-in theihtawp chhuaha a beih hnuah ABCI hnathawk pahnih Pu Premlal Dhiman leh Pu Bajrang Lal Bhugri te chu Police ten an chhanchhuak ta. He thu hi Pu Lalzirliana, Home Minister chuan thuthar lakhawmtute hnenah nimin khan a hrilh. Pu Zira sawi danin, heng mi rukbote hi a rubotu United Democratic Liberation Army tia invuah, Assam state chhung amite chuan Mizoram khaw hrang hrang atangin Assam khaw chhung Banglabasha (Hailakandi District) khaw daiah leilet thlam chhungah an hruai tih hriat thu dawn anih in Police uisathiam te chuan an umzui tak thu a sawi.Hel pawl (UDLA) te hian silai tha tak tak an nei tih hriat a ni a, chuvangin fimkhur takin Mizoram Police te chuan an veh laiin, hel lam hian an lo hmu a, silaiin an rawn kap hmasa a, police lam hian an chhanchhuah tumte kah palh an hlauh avangin mi tangte chu bawk turin an au a, chutah kah palh hlau takin an kap zui ve ta tih Home Minister chuan a sawi bawk.Darkar chanve lai an inkah hnuah helte hian thlam chu an tlanchhiat san ta a, mi tang pakhat Premlal Dhiman chu tlan chhiat pahin a dul ah an kap a, vanneihthlak takin a thi lova, tunah police te hian damdawi thiamte enkawlna nen an rawn zawn hawng mek tih thu Pu Zira chuan a sawi bawk.Mi tangte chhan tura police te huaisenna leh remhriatna zawng zawngah Home Minister chuan lawmthu sawiin, kan ram ralmuang ti buai tura helte an rawn che chu a runthlak thu leh ABCI hotuten amah an dawrin, sorkar-in sum sengin helte duh dan kalpui an tum loh thu leh a rang thei ang bera chhanchhuah hna erawh nasa taka thawh anih tur thu a hrilh tih a sawi a, hel dangte pawhin Mizoram an rawn ti buai anih chuan sorkar-in dim a tum loh thu a sawi bawk.Nimin a Press Conference ah hian Home Minister hi Parliamentary Secretary (Home) Pu Lalrinmawia Ralte; DGP Pu Lalrokhuma Pachuau; IGP Pu L. Hrangnawna; SP (CID) Pu C. Laldinliana leh I & PR Dy. Director Pu David L. Thangliana ten an tawiawm a chanchinbu mite an kal tha hle.

Eipawlh loh tur

Mizoram Sawrkar thuchhuah ah tarlan a nih dan in, Deputy Food Safety Commissioner chuan mipuite hnenah hriattirna siamin kum 2010 khan Council of Scientific and Industrial Research a thawk official pakhat chu um ei tui (juice) leh changkha tui (juice) chawhpawlh a in avangin a thi a. Hei vang hian mipuite um ei leh changkha ei/ chawhpawlh lo turin a hriattir.

Release hnai

World Vision ten Lawngtlai District a zaithiam thlanbik te Music Video a siamsak chu release a ni hnai tawh a, tun ah hian Editing la zawhfelloh leh chulman ngai tlem a la awm a, heihi zawh hnaih a nih tawh thu kan dawng.

Bru Tawngin

MGNREG Act chu Bru tawng a letling turin Lawngtlai BDO chuan ruahmanna a siam mek a, thuneitu sang zawk ah Bru tawng a he Act hi lehlin a nih theih nan a thlen mek. Lawngtlai District a cheng zing ah Bru Hnam tawng hmang hi thahnem tak an awm mek.

Thursday, June 16, 2011

LAL buatsaihin Book of The Year 2010 lawmna hun hlawk takin hman a ni


Nimin khan Lawngtlai Circuit Housr, Lounge ah Book of The Year 2010 Lawmna hun Lawngtlai Academy of Letter buatsaihin hlawk taka hman a ni a, hun hmasa, chawhma lam hun chu Pu K.Hre Kung President Lawngtlai Academy of Letter in kaihruaiin he hun ah hian Book of the Year 2010 Beiseina Mittui tih chu Siamhmingthanga Chhangte in review na hun a hman bak ah lawmna hun Uaptu Pu T.Thangthuama Principal Gov.t Lawngtlai College chuan thusawiin daipawn a awm mai mai a ngaih Sihal au a te te teng tung thin Pu Samson Thanruma lehkhabu ziak Beiseina Mittui in Book of the Year Chawimawina a dawng pha mai chu mak a tih thu a sawi a, chhimlam ziakmiten hetiang chawimawina Nopui an dawm ta chu ziakmi te tan entawn tlak leh inzirna tlak ni a a hriat thu a sawi. Chawhma lam hun ah hian Book of The Year ziaktu Pu Samson Thanruma leh Book of The Year Top-10 a a lehkhabu ziak langphak Siamhmingthanga Chhangte te hnen ah LAL chuan lawmpuina an hlan. Chawhnu lam hun Pu H.C.Lalnunthara kaihhruai ah Beiseina Mittui lehjkhabu chinpawrna hun hman a ni a, hlawk takin he hun hi hman a ani a, tlailam ah kalkhawmte chuan zanriah an kilho nghal bawk.Thu leh Hla lama tuimite an tel tha hle

EPIC 100 %

Election lam a thawktute leh mipui te tanrualna vangin Lawngtlai District ah Elector Photo ID card chu za ah za (100%) pekchhuah a nih tawh thu Election Officer Pu Beila chuan The Lawngtlai Post a hrilh a, hetiang a hlawhltinna chhuanawm tak Lawngtlai District in a neih theihna chhan chu Vote nei tu mipui ten inpekna vang liau liau a ni Pu Beila chuan a ti.

Tuichhak fang mek

LADC a Vice Chairman Planing & Development Pu Hmun Hre chuan Tuichhak lam a fangmek a, nimin zing khan Siachangkawn lut in, he khua a Council hnuaia thawktute hma ah thusawiin Pu Hmun Hre chuan ram leh hnam tan thahnemngai taka an hna thawk tur in a chah. A paltlang khua ah te Vice Chairman hi ropui takin lo hmuah a nih thu kan dawng a, nimin tlai khan Sangau a lut a, Sangau ah hian Thuthar lakhawmtute nen inkawmhona buatsaih a ni a, vawiin hian Pangkhua atanga Tiau lui panna saisihchhuah panna kawngpui chu a zawh dawn a ni.

Friday, June 10, 2011

BRGF a pawisa hmuh thin tihpun a ni.

Nimin khan Chief Secretary Pu Vanhela Pachuau kaihhruaiin High Powered Committee on BRGF chu an thukhawm.Lawngtlai leh Saiha District a Panchayati Raj Ministry in kaihruaina dan a siam zul zuiin hmalak dan tur Annual Action Plan 2011-2012 an siam chu sawiho a pawmpui turin meeting-ah hian an pharh a. District pahnih te tana BRGF sum a dah hi a tipung a, Lawngtlai District tana cheng nuai 1151.00 a dah thin chu cheng nuai 1182.00 ah tipungin Saiha District tana sum dah cheng nuai 1147.00 a dah thin chu cheng nuai 1176.00 ah a tipung bawk a ni. Hei bakah hian he meeting hian Panchayati Raj Ministry in ngaihtuah tur Agenda hrang hrang a thawnte rel zui nghal a ni a. Chung zingah chuan BRGF hmanga hmasawnna hnathawh kalpui dan endiktu monitoring system siam chungchangte, District level review committee din te, social audit chungchangte, e-Panchayat Mission Mode Project chungchang te a tel a ni.

Thursday, June 9, 2011

Red Oil Palm tiak semchhuak


Nimin khan Ngengpui lui kam a Ruchi Soya Industry Limited Nursery atangin Lawngtlai District a chin tur Red Oil Palm tiak sem chhuah a ni. Oil Palm tiak sem chhuah tur te hi Pu F.Manghnuna Chairman, Red Oil Palm Zonal Committee in a vailiam a, he hun ah hian Pu James Vanlalluaia District Agriculture Officer, Pu K.Thanglinga Chairman Red Oil Palm Grower Association leh Ruchi Soya Industry Limted leh Red Oil Plam lama a tuimite an tel. Oil Palm hi TATA 407 trip 4 semchhuah a ni a, nimin a pekchhuah te hi Mualbu Kawnpui (M.Kawnpui) huamchhunga chhungkua 52 te chin tur a ni. Lawngtlai District ah hian kumin chhungin Hactare 500 a chin tur Oil Palm tiak hi pekchhuah hman an tum thu DAO Pu James Vanlalluaia chuan kan Palai a hrilh a, Oil Plam tiak pakhat chu Rs. 85/- zel in Ruchi Soya Industry te hnen atangin an lei a, Rs.85/- ah hian Rs.50 chu Mizoram Sawrkar in a tum a, a bang Rs.35/- chu kuthnathawktuten an tum thung a ni. Lai District chhung ah hian Red Oil Palm chin ve a nih theih nan Malaysia Company Palm Tech te chuan a hmunhma te kum 2005 khan an lo enfel tawh a, chinna tlak a ni tih an hriat hnu ah LADC chuan Mizoram Sawrkar in Oil Palm chin phalna dan a siam ah District Council te a huam ve loh vangin kum 2006 khan Council Sawrkar chuan Council Area chhung a chin ve a nih theih nan Dan an siam ta a ni , tun dinhmun a Lawngtlai District Oil Palm Association hnuai ah hian Member 400 chuang an awm mek.

Tuesday, June 7, 2011

Bru Hel ni a rin ten ABCI Company hotu pahnih an rubo

Mizoram hmasawnna tura hnathawka, kawng siamtu (Bairabi Road, MeidumCamp)-a ABCI Company hnuaia hnathawk Project Manager leh Site Incharge-te chu Pathianni zan dar 2:00 vel khan Tuikuk Hel nia hriatten an an ru bo a, thulakna in a tarlan danin heng misual te hi an vaiin mi sawm chung zet an ni a, AK 47 leh Pistol an keng a, Camp a Mizo awm te chu Mizotawng in an bia a, ABCI Company hotute chu Bengali tawng in an bia a, an mahni an inbiak chuan Bru tawng an hmang tih Camp a awm te chuan an sawi a, ABCI hotute Room hi an suasam hneh hle a ni. He thil thlenna hmun hi chanchin hriat a nih ve leh Kolasib District thuneitute leh Police lam ten an tlawh nghal a, misual zawn hna hi thawh nghal a ni. He thil thleng chung chang ah hian MZP Kolasib chuan hetiang hian thuchhuah an siam- MZP leh NGO, Sawrkarten Tuikukraltlan te kan buaipui lai mek a, kan ram hmasawnna turahnathawktute chunga harsatna an siam hi MZP Hqrs Kolasib chuanMizoram mipuite zah lohnaah kan ngai a, kan dem tak zet a ni. Hmannilawka Tuikuk hel Bairabi Jail atanga an tlanchhuah hnulawka, kan ram chhunga Tuikuk-ten buaina an siam ngam hi kan Sawrkar hianngawihbo pui mai lova, venhimna kawnga kan Police-te hei aia thuam thaturin leh a rang thei ang bera thil tisualtute man chhuak turin MZPHqrs. Kolasib chuan a phut tlat a ni.

Governor in Muster Roll te hlawh bi thar a bithliah

Minimum Wages Act, 148 (Act No. XI of 1948) dan tlawh chhanin Mizoram Larsap chuan Mizoram sorkar, Semi government, private undertaking leh contract basis a thawk mek Muster Roll te hlawhbi thar a bithliah.Hemi chungchanga Labour, Employment & Industrial Training Department Secretary thuchhuah tarlan dan chuan MR hnathawkte nitin hlawhbi rate chu a hnuai ami ang hi a ni tawh ang. Unskilled - Rs. 170/-; Semi Skilled/Unskilled Supervisory - Rs. 190/-; Skilled Grade II - Rs. 240/- leh Skilled Grade I - Rs. 300/- a ni.MR hnathawkte hi ni khatah darkar 8 chhung thawk tura beisei an nih laiin non-technical, clerical leh peon te chu anmahni ruaitute bituk ang zel a thawk tur a tih an ni.Clerical/Peon tih loh thawktu dangte chu Pisa chawlhni leh Pathianni ah te hlawh neia chawlh phal sak an ni ang a karkhat chhunga ni 6 chhung an thawh tluan phawt chuan. Muster Roll hnathawktu office chhunga rawihte chuan office hun pangngai an zawm tur a ni ang. Muster Roll thawktute zingah hian hmeichhia leh pianphunga rualbanlote hlawh chungchangah thliar hranna a awm lo.

Camping

May 2 atanga neih tan LIKBK Lawngtlai bazar a Gospel Camping neih chu chhunzawm zel a ni a, nimin tlai khan Camp chhawng ruk na chhunzawm leh a ni. Camping neih tawh a lut te Pathian ah an inhmuchhuak nasa hle a, heihian Lawngtlai khawpui chhung boruak pawh a chhiah hneh viau tawh a ni.

Chhawkhlei

LADC Sorkar chuan LADC Area chhung a Kohhran hrang hrang Pastor te thlen nan Lai House ah Room thar Chhawkhlei a siam thar.

Sangau Bus tlan tan

No.D-26011/4/2010-DTO(LTI)
OFFICE OF THE DISTRICT TRANSPORT OFFICER
LAWNGTLAI DISTRICT, LAWNGTLAI
Dated, Lawngtlai, the 2nd June,2011


O F F I C E O R D E R


Mipui mamawhna a vang leh Director of Transport remtih puina in Dt.7.6.2011 (Thawhlehni) atangin thu leh awm hma zawng, Lawngtlai to Sangau MST Bus a hnuai a Schedule siam ang hian Service tir a ni ang.

Ticket : Rs. 140/- Mi pakhat tan

Sl/No Route Kalni tur Chhuah hun

1 Lawngtlai - Sangau Thawhlehni,Nilaithawhtan leh Inrinni Dar 6:30AM

2 Sangau - Lawngtlai Thawhtanni,Nilaini leh Zirtawpni Dar 6:30AM


Sd/- (T.VANLALMALSAWMSANGA)
District Transport Officer
Lawngtlai District, Lawngtlai
--------------------------------------------------------------------------------------------

Monday, June 6, 2011

Boxing Hall thar D.C in a hawng

Inrinni June Ni 4 khan Lawngtlai Electric Veng ah Pu Thlamuana Lawngtlai DC, Chairman Lawngtlai District Sport Committee chuan Boxing Hall a hawng. Hawnna inkhawm Pu C.Hrangthianga Vice Chairman District Sport Committee kaihhruai ah Khuallian Pu Thlamuana chuan Sport hmasawnna a hmalakna pakhat Boxing Ring tha tak leh a dahna Hall thar tha tak kan nei thei hi a lawmawm hle a, hmanni lawk ah Boxer Lalenkawlin khawvel huap a inelna ah Gold Medal a rawn hawn a, hmanraw tha nei hauh lo chung pawh a khatiang dinhmun a thlerng kha a fakawm hle a ni. A mah enkawlzuina ah sawrkar in tihtheih kan nei tamlo erawh hi chu a pawi hle a ni, a ti a, Boxing Ring a lei a lei dawn chuan tihngaihna awm hauh lo Sawrkar thatna zar zo a Lawngtlai District in kan nei ta hi a lawmawm takzet a ni a ti, Infiammite tlakchhiatna pakhat chu insumtheihna an neilo lutuk hi a ni a, Infiammi te chuan tihtak takna nen Insumtheihna an neih a pawimawh hle a ni a ti. Pu C.Lalhmangaihkima Secretary District Sport Committee report a tarlan a nih dan in Hall thar hawn tak hi State Sport Council atanga Cheng Nuai 18 seng a sak a ni a, a dung feet 69 a vang feet 56 a ni. Hall thar hawnna inkhawm ah hian Lawngtlai District Boxing Association President Pu Lalvula bak ah Sport lam a tuimi te leh Hall awmna veng Electrict Veng hruaituten thu an sawi a, hemi hnu hian Boxing zirlai ten Exhibition Match hmuhnawm tak an khel nghal

Insat

Inrinni zing dar 7 vel khan Lawngtlai III ah Bimola chuan Biakmawia a lu ah a sat.Bimola hi Silchar Vai,Chakma nupuiah neiin Lawngtlai III ah miin luahin an khawsa mek a,tuna a sah Suresh Kumar a mizo hming Biakmawia hi a nupui nau ani.Biakmawia hi tunah Vaseikaiah a khawsa mek a,a u te hnenah hian a rawn zin lawk ani. thu hote ah inhnialin Bimola hian chempui a chuh ta mai niin kan thu dawnna chuan a sawi a,Biakmawia hi Civil Hospital panpui niin,admit nghal ani a,a lu hmun hnih ah 10cm leh 8cm a thuiin hliam a tuar ani.Amah hi ngaihtuahawm em em anih loh thu Duty Doctor chuan kan palai a hrilh.A sattu Bimola hi he thu buatsaih anih lai hian a tlanbo a, a awmna chin hriat ani lo.Bimola hian tunhma pawhin mi alo sat tawh niin an sawi bawk.