Friday, July 22, 2011

SSA ah tlinglo lak Lawngtlai District ah tamber

Mizoram pum ah SSA leh RMSA a thawktur lak chungchang ah thil feltawklo awm ni a Mizo Students Union an hriat vanga hma an lak hnu ah Sawrkar remtihna a din Verification Committee chuan an hna zofel in, report, sawrkar ah an thehlut tawh tih MSU hruaitute chuan sawiin, SSA ah hnalak 959 ah tlinglo chung a lak, 39 awm RMSA ah hna 268 lak ah tlinglo chung a lak panga an awm tih an hmuchhuak. Heng an thiamna in a phakloh a lak mi 44 zing ah hian Lawngtlai District ah tlinglo chung a lak mi 13 awmin District 8 ah tlinglo chunga lak tamna ber a ni.Aizawl, Mamit leh Lunglei District atangin tlinglo chunga lak mi panga theuh an awm a, Champhai leh Serchhip District ah 4 ve ve awmin, Kolasib District ah 3 an awm.SSA bik ah Art Education Instructor ah Lawngtlai District ah tlinglo lak 4 awmin, Health & Physical Education Instructor ah tlinglo chung a lak 7 awmin, MIS Co-Ordinator ah pahnih Lawngtlai District ah an awm a, Resource Person(CWSN), Data Entry Operator, Accountant ah te Lawngtlai District atangin tlinglo chunga lak an awm lo. MSU ten tlinglo chung a lak RMSA a an hmuhchhuah mi 5 zing ah Lawngtlai District atanga lak an awmlo.

Autorickshaw chesual ah Ramzauva a boral

Nilaini Dar 7 vel khan Lawngtlai a Central YLA Playground panna kawng, Sobji Bazar bul ah Lawngtlai Auto Rickshaw MZ-07/0112 chu a chesual a, a khalhtu A. Lalramzauva kum 47 mi Lawngtlai College Veng chu a hmunah ka pawh chhawn loh in a boral. Rickshaw chu a engine a nun theih mai loh vangin Running Start tum a a beihna ah kawngthlang ah hian tlanliamin, a hnuai a Central YLA Playground, Public Gallery ah a tla thla niin thudawnna chuan a sawi a, a Rickshaw pawh a chhe hneh viau. A.Lalramzauva ruang hi nimin khan Lawngtlai District Hospital ah Postmortem niin, nimin vek khan College Veng thlanmualah vuiliam a ni.

Thingphun dawn

LADC Officers Association te chuan vawiin hian Dokulha Hall leh Chandmary veng in kar kawng kam ah Thing tiak an phun dawn, Officer te hian Kawlchaw leh Thingfal dai a Hording an tar cheithat hna an thawk bawk dawn a, tlailam ah Lawngtlai Circuit House ah zanriah an kilho nghal ang.Member te kimtaka hnatlangurin an in ngen.

Khua 125 ah tui thianghlim intur pek tum

PHE Minsiter Pu S Hiato-a’n kumin chhungin thingtlang khaw 125 tui thianghlim intur pek tum a ni a ti. Dr. R. Lalthangliana zawhna leh zawhbelhna dangte chhangin PHE Minster chuan, Buarpui leh a chhehvel khuaah te, Lui atanga tui lak tur tha a awm loh avangin leihnuai atanga tui pump chhuah sak a ni a, hei hi tun dinhmunah chuan tha tawka hriat a ni a, amaherawhchu bialtu MLA-in tui pump theihna a sawi, Lungphun lui chu enfiah a ni ang a ti.Minister chuan, a chhehvel khuaah te pawh lui atanga tui lak tur tha a awm loh avangin ruahtui tla dawhna siam a ni a ti a, MDF member, Pu PP Thawla zawhna chhangin Tuipang khaw tui lakna tur Siatlai khaw chhaka Tuisihlui Pump turin Rs 9,00,00,000/- hmuh a ni a, Tender pawh hawn a ni tawh a, Contractor thlan mek a ni a, hna tan theih thuai a ni ang a ti.

Thursday, July 21, 2011

Multi Modal Compansation chhui chiangtur din

Nimin chawhnu lam khan LADC Sawrkar a Executive members te chuan Pu C.Ngunlianchunga CEM ho in Executive Meeting CEM Chamber ah an nei a, thupawimawh tak tak an ngaihtuah. An thu ngaihtuah zing ah Multi Modal Transport Project atan a kawngpui laihmek ah Zangnadawmna tur phuttute ah ram Passed belhchiandawllo a awm nual niin Executive Committee chuan a hria a, hemi chhui chiang tur hian Team dian in an Chairman atan Pu H.Vanlalthaliana E/M i/c Revenue an ruat nghal a, hemi chungchang chhuichiangtute hian tunthla chhung hian report an peih hman beisei a ni. An thu ngaihtuah zing ah LADC enkawl Zirna School ah CCE Rules kalpui a nih tak vanga harsatna tawk School leh Zirtirtu an awm nual niin a hriat a, heipawh hi zirchian hmasak nise tiin a zirchiangtur an inruatfel nghal bawk. Nimin a Executive Meeting chuan Village Council Ramri fello awm te pawh a chhuichian tha an ti a, mawhphur tur pawh an in siam fel nghal bawk.Executive Meeting hi chawhnu dar 1 khan tan niin, tlailam thleng in Meeting hi neih a ni.

Central YLA in Mistiri hlawh a bithliah

Nimin a Central YLA Executive Committee Central YLA Office a, Pu V.Thangzova President ho a thukhawm chuan Mistiri hlawh an bithliah a, he an rate siam hi LADC Executive Committee pawmpui tur a thlen nise an ti. Mistiri rante an bithliah dan chuan Thing Mistiri ah Nikhat hlawh Rs.400/- a ni a, khawl an hman in Rs.500/- a ni dawn a, Lung Mistiri ah Nikhat nhlawh Rs. 400/- niin Cement Mistiri hlawh chu Nikhat ah Rs.330 nise an ti a, heng Mistiri tin te Helper hlawh chu Nikhat ah Rs.200 nise an ti bawk. Nimin a Central YLA Executive Meeting hian kumin November chawlhkar hmasa ber ah YLA General Conference neih nise an ti a, Conference hi Niawhtlang a neih tur a ni. General Conference dang a la tih ngai loh ang in kumin General Conference ah chuan thupui sawitur in Sakhaw Puithiam te sawm nise an ti a, General Conference atan Organising Committee a din nghal a, Chairman atan Pu T.Zakunga, tuna Deputy Chairman hna chelhlai chu ruat a ni. General Conference ah hian Branch YLA tin te intihsiak nan Lengkhawm Zai a inelna siam Committee chuan tha a ti a, intihsiakna atan a tulpawimawh te chu a ranglam in Branch te hnen ah hriattir an la ni dawn a ni.Meeting hian thilpawimawh dang engemawzat an rel bawk.

Alu tha vaklo

Thudawnna in a sawidan in kumin hian Phawngpui tlang chhehvel a Alu chingtute chuan kumdang an pha dawnlo niin a sawi a, heihi a chi an dawn duhthu a sam vak loh vang niin kuthnathawktute chuan an hria.

Duty tha

Bazar atanga Council Veng panna kawngpui a chhiat hrih vangin helai veng pantur lirthei te chuan Vengpui karkawn atangin an pan a ngaia, helai kawng hi a tet vangin lirthei kalvel intawhna hmun a awm fumfe loh vangin Police lam chu kawng peng ah tha takin an Duty a, heivanghian lirthei kalvel ten harsatna an tawk tawh lo.

Thursday, July 7, 2011

Addl.Secretary Dr.Panda leh Lai leh Chakma Council hruaitute an inkawm



uly Ni 5 khan Lawngtlai DC Conference Hall, ah Dr. Hrusikash Panda, Additional Secretary, Ministry of Panchayati Raj leh LADC leh CADC hruaitute an inkawm. He hun hi LADC a Vice Chairman, Planning & Development Pu Hmun Hre-an a kaihruai a, Dr.Panda chuan Panchayati Raj Campaign tur ngawr ngawr a Mizoram chu rawn tlawh a nih loh thu leh North East a District Council te dinhmun zirchiang a, thuneihna tamzawk pek an nih theih nan a Central in Ministerial Team a din a Team Leader a nihna angin District Council te dinhmun chu a rawn en pah tih a sawi a, tunhnai a District Council ten thuneihna sang zawk an neih theih na tur a Dan an siam chu lawmawm a tih thu a sawi bawk. Lai leh Chakma Council hotute chuan khawtin a Village Council Court sak tul an tih thu an lo thlen bak ah District Council ten State kaltlang lova Central atanga pawisa an hmuh theihna tur (Direct Finance) a hmalakpui turin an ngen bawk. Council pahnih hruaitute hian Backward Region Grant Fund Lawngtlai leh Saiha District a hmuh a nih thin dan chu mihring cheng tam dan atanga chhutin siamrem deuh ngai a an hriat thu Addl. Secretary hnen ah hian an lo thlen bawk a, BRGF ah hian Lawngtlai District mipui 117600 awmna ah Nuai 1182 ruahman niin Saiha District, mipui 56000 awmna ah Nuai 1176 ruahman a nih thu pawh an thlen.He inkawmhona ah hian LADC a CEM Pu C.Ngunlianchunga, leh Pu F.Rohnuna Chairman in LADC hruaitute a ho a, CADC lam chu Pu Nirupam Chakma MLA leh Pu Sushil Kumar Chairman ten an ho bawk.

MHIP Day CEM te Nupa in an hmanpui



Nimin MHIP Day Vawi 37 na chu Lawngtlai-III a YLA Hall ah, MHIP Sub-Hqrs. Lawngtlai buatsaih in Sub Hqrs. hnuaia Branch ten a huhoin, awmnikham in ruai nen an hmang. MHIP Day hi LADC a Chief Executive Member Pu C.Ngunlianchunga leh a Nupui Pi K.R.Chhingpuii ten an hmanpui a, Khuallian Pu C.Ngunlianchunga chuan tunlai khawvel ah Hmeichhia te chu dinhmun sang tak tak luahtu thahnemtak an awm tawh a, ram leh hnam hmasawn nan pawh hmeichhia te hian tihtheih tamtak an neiin, an pawimawh hle a ni a ti. Khuallian hian Day tanpui nan Rs. 5000/- a pe. MHIP Day ah hian Member te infuih thar nan te, intihhlim nan te hun hman a nih bak ah MHIP member VC Member mi pathum, Pi Lalsangpuii, Paithar, PiRegionthangi Council Veng, Pi Rothangpuii, Bualpui’Ng’ leh LADC a Nominated Member Pi Lalrinpuii te hnen ah CEM Nupui Pi KR Chhingpuiin Chawimawina a hlan.

PYD ten thingphun



Nimin khan Lawngtlai South, UPC (North East India) PYD te chuan Lawngtlai leh Mampui inkar ah, N,E India General PYD Conference in environment humhalh tura hmalak nise ti a a lo rel bawhzui nan Kawngpui kam ah Thingtiak 230 an phun, an thing tiak phun te hi LADC Forest Department in an tumsak a, Council Forest Staff te pawhin thingphun hnatlang hi an thawhpui. An thingphun sa te hi a theih chin chin chu an hung nghal a, a enkawl zui zelna ah pawh PYD te chuan an inhuam zau hle tih an sawi.

Central YLA Ground, chawlhsan tum lo

Central YLA Ground siamthat hna thawhmek chu tuna a awm ang hian Sawrkar chuan a chawlhsan dawn lo a ni, He thu hi Private TV Channel pakhat ah sawiin Pu C.Ngunlianchunga chuan a ti a, CEM chuan Sport Minister Pu Zodintluanga hmalakna vangin Lawngtlai mai nilo District chhung hmun hrang hrang ah pawh Infiammite dawmkan nan hmalak a nih thu sawiin, Sawrkar hmalakna ah Lai District aiawhin Sawrkar hnen ah lawmthu a sawi a, CYLA Field chu Sport Minister chuan a hmun ah ngei a tlawh tawh thu a sawi a, Minister hnen ah hian amah ngei pawhin a lo thlen tawh thin thu sawiin, sawrkar hmalakna kalmek chu tawpsan mai a ni dawnlo a ni a ti.

Editor in Nupui nei dawn

Vawiin hian Rauthla Editor Elvis Lalthangzuala leh R.Lalruatkimi,Aizawl Ramhlunte Dan thianghlimin in BGM Biak In Council Veng ah an innei dawn,Elvis a nupui Makimi hi DIET Thingkah a Lecturer thawk lai a ni a, Elvis hi Accredited Journalist a ni.

Sawiho dawn

Prism President Pu Vanlalruata hnen atanga thu kan dawn danin, Prism chuan Zirtawpni hian FW Savidge Hall (Baptist House), Upper Khatla, Aizawl-ah ‘Corruption chi hrang hrang’ tih thupui hmangin sawihona hun a buatsaih dawn a. Hemi chungchanga sawi duh nei, a hmuna kal hman si lo tan mahni hriatna leh ngaihdan email: ruatazopa@gmail.com-ah thawn theih a nih thu kan dawng . Tuna sawihona leh ngaihdan thawh tu te thawhkhawm atang hian Mizorama corruption chi hrang hrang kan hriat chhuah theih Prism chuan a beisei a. August 12, 2011-ah heng corruption chi hrang hrang ven theih dan tur ‘Corruption ven dan tur’ sawihona hun buatsaih leh an tum.

Tuesday, July 5, 2011

Kum 2011 chhungin a inneihrunpui ah Tuak 182 innei Bethel Local Church ten Silver Jubilee an lawmmek


Nimin khan Lairam Isua Krista Baptist Kohhran,Lawngtlai Chanmary Bethel Local Church.chuan an Kohhran Silver Jubilee lawmna chikhat atan an Kohhran chhungkuaa dan anga la innei lo te tan a ruala inneihna hun an Biak In ah an buatsaih a,.Bialtu Pastor Rev.S.L.Lalpuiliana kuta nupa tuak 41 te an innei a, July Ni 2 Inrini khan Rev.S.L.Lalpuiliana vek hian Moria Church ah a rualin Nupa tuak 50 a lo inneih tir tawh bawk. Kumin April 27 khan LIKBK Lawngtlai College Veng ah Bialtu Pastor Rev. Lalhmingsanga', a rualin Nupa tuak 91 te a lo inneih tir tawh bawk a, kum 2011 chhung hian LIKBK Local Church pathum a dan anga la inneilo inneih tir te hi an vaiin Tuak 182 an ni.Bethel Local Church hian July Ni 6 hian kum 25 an tling dawn a,hemi lawm nan hian proggramme hrang hrang an buatsaih a,Ni 25 june khan amamawh apiangte tan mipa 13 leh hmeichhia 3 ten thisen an pe a,nizan khan Jubilee mei det a ni a,vawiin hian thalaite pualin Variety Proggramme an hmang leh ang a,Ni 6 ah hian Jubilee dar vuak leh Jubilee ruai thehin hun an hmang dawn ani.He Kohhran a lo lawi tawhte kimtak a telturin an sawm.Jubilee ah hian Thupui"Puitlin lam pan"Hebrai 6:1 thu chu thusawitu hrang hrangten an sawi bawk dawn ani.

LDFA Press Meet




Nimin khan Lawngtlai District Football Association chuan JH.Lorrain Hall ah Press mite an kawm. Lawngtlai District in Field an hman ber Central YLA Field hman theih loha hun rei tak a awm chu pawi an tih thu sawiin, kumin kum tir lam khan Sports Council atangin siam thatna tur cheng Nuai 4 hmuh ani a, hna hi mimal hnenah pek niin,pawisa in a daih chin siamin,tunah hian chawlhsan a nih thu an sawi a,LDFA tournament neih tur hmachhawp CEM Trophy te,Dr.Bob Pierce Memorial Trophy World Vision nena buatsaih turte,MFA Under 19.Inter District Lawngtlaia nghah turte leh Independence Day Trophy te Khelh theih loha a awm leh pospond hial ngaia a awm hi pawi an tih thu an sawi a,kan Sorkar thuneitu lam ten ngaih ven a,a rang lama siam that sak turin sorkar thu neitute an ngen bawk ani.

MPC Party atangin Original P.C Party ding dawn(?)

Mizoram People’s Conference (MPC) Party chhung inbeihna lian tak awm chu a puak keh mek a, MPC Party atang hian Political Party thar ‘Original People’s Conference’ (OPC) a ding dawn ta a, he party thar hi MPC President hna pawh lo chelh tawh, an Sawrkar laia Finance Minister ni tawh Lalhmingthangan a kaihruai dawn a, vawiin chawhm dar 10:30 hian Lalhmingthanga chuan Aizawl Press Club-ah Press Conference neiin an party thar hi a puang dawn nia hriat a ni. MPC hruaitu inthlanna kumina neihah khan thuang hnihin inbeihna a awm a, Lalhmingthanga chu office Candidate turin MPC Executive ten an thlang tling a, conference palai ten an hruaitu tur an thlanna hmunah Lalhmangaiha Sailo s/o Brig T Sailo chu floor atanga vawrh chhuah a ni a, official candidate lo zawk Lalhmangaiha Sailo hi President atan thlan tlin a ni ta a, hemi hnu hian chhungkaw boruak hi a chhiat belh chho ta zel a ni. President thar Lalhmangaiha Sailo lam hian Lalhmingthanga chu Party duh loh zawnga hmala chho zelah puhin tunhnai khan an party atanga hnawhchhuah anih lohna tura insawifiah turin Show Cause Notice an pe a. Lalhmingthanga hian a chhang nghal nain, Party thar an pian tir nghal dawn nia thu dawn a n

PRISM in rawtna siam

Prism chuan sorkarin buhfai man tihto a tum chu tha an tih loh vangin Finance Minister H Liansailova hnenah buhfai tito lo a, kawng danga sum dinhmun siamthat tum turin an ngen.Buhfai subsidise nana thlatin cheng vaibelchhe 10 vel sen thin tihtlemnan ration card siamthat;special quata/ration tihtawp te; sorkar hnathawk te professional tax chawi sumdawng te institution thawk te ration buhfai pek loh te Prism chuan an rawt.

Addl.Secretary lokal

Mizoram a District Council pathumte tlawh turin Ministry of Panchayati raj a Additional Secretary Dr.Hrusikash Panda chuan vawiin hian Lawngtlai ah Lai leh Chakma Council hotute a kawm dawn.Pu Panda hian MADC hotute pawh Saiha ah a kawng ang.

MIZORAM BOXING ASSOCIATION THUCHHUAH

Mizoram Boxing Association (MIZBA) hotute chuan thu chhuah (Press Release) siamin Boxing hi Mizo fate khawvel hriat an lanchhuah theihna 'in fiamna pawimawh tak' a ni tih hriain Mizoram sorkar chuan Boxing-a thalaite hma kan sawn theih nan nasa takin hma a la mek a. Chief Minister zahawm tak Pu Lal Thanhawla, MIZBA Patron-in kum khat lek kalta a MIZBA-LPS Pro-Fight a a lo sawi tawh angin District tinah Boxing Ring dah a ni ta mek hi MIZBA chuan lawmawm kan ti takzet a ni, a ti.

MIZBA thuchhuah chuan Sports Minister zahawm tak Pu Zodintluanga pawhin Sport policy mumal zawk "Catch them young" chu thahnemngai takin a kalpui mek a. Naupang te te atanga mumal taka kan inzirtir chuan infiammi hlawhtling tak tak hun reilote chhungin Sports Association hran hran te kan neih belh ngei dawn a ni. Kumin April 21 - May 1 chhunga Antalya, Turkey-a World Junior & Youth Women Women Boxing Championship-ah pawh khan Mizo hmeichhe pahnih Lalenkawli (Lawngtlai) leh Lalfakzuali (Thingdawl) te chu India Team ah khel ve in Gold Medal (Lalenkawli) leh Silver Medal (Lalfakzuali) an la nghe nghe a ni, an ti bawk.

Mizo Boxers te National Camp-ah koh kan awm ve reng thin a, India ram pawna kalte pawh kan nei ve ta fo a, heng Boxer te tan hian Mizoram Olympic Association (MOA_ leh Mizoram State Sports Council (MSSC) te chuan Sports Kit Allowance leh Passport te min lo ngaihtuah sak thin a, Boxer tam zawk hi thingtlang lama awm leh chhungkaw harsa ve tak tak kan nih avangin MSSC leh MOA ten min tanpuina te hi a a lawmawm lehzual thin. Sports Department in infiammite tan kum tina ‘Incentive Cash Award’ a pek thinte hi infiammite leh hruaitute tan a tangkai thin em em a ni, a tiin, Mizoram sorkarin Mizo fate infiamna kawng hrang hranga hma kan sawnna tura a hmalakna hi a ropui kan tiin, thalaite tan chinthan thalote kalsana kawng dik hawina tura chona pawimawh tak a ni.

A good leader is one who knows the way, goes the way and shows the way tiin an lawmthu MIZBA chuan an sawi a ni.

Monday, July 4, 2011

Lawngtlai D.C thar Pu Hmingtea’n Chanchinbumite thingpui a inpui

Lawngtlai District, Deputy Commissioner tharPu B.Lalhmingthanga chuan Zirtawpni khan a Office a luah tan a, Office a luah ni hian Staff te nen inhmelhriattawnna an neih hnu ah chawhnu lam ah Lawngtlai a thuthar thehdarhtute nen inkawmhona leh inhmelhriattawnna a buatsaih a, Pu Hmingtea chuan Chanchinbumite chu khawi hmunah pawh mitangkai an nih thu leh Sawrkar nen rual taka ke an pen chuan awmzia thuitak a nei thin a ni a ti a, Chanchinbumi te chuan Lawngtlai DC thar Pu Hmingtea’n an mahni ngaipawimawh a inkawmhona a ruahman chu lawmawm an tih thu leh hetiang tihna chang hria awmchhun a la nih thu an sawi a, District a hmasawnna kalpui mek te leh thil chi hrang hrang a duhkhawploh an neih te an sawiho a, DC chuan Chanchinbumite thusawi chu lo zirchian a bawhzui ngaite lo bawhzui a tum thu a sawi. DC thar hi Pu Vanlalngena Addl.DC leh Pu Beila Khithie Election Officer ten an trawiawm a, Chanchinbumite hi Pu V.Lallianzuala Vice President, District MJA in a ho a ni. Pu Hmingtea hi Lawngtlai District in D.C a neih sawmpakhatna a ni.

Founders’ Day ah Kum 60 a Upa in midang tan Thisen a pe

Inrinni khan Lawngtlai Corps, salvation Army Youth te chuan Founders Day denchhenin, Lawngtlai bazar a an biak in ah, a mamawh apiang ten an hmanturin thisen Unit 14 an pe a, thisen petute hi Mipa 12 leh Hmeichhia 2 an ni.Thisen petu zing ah Corps Surgion Major Pu Tialchunga Kum 60 a upa chu a upaber niin, Kum 57 mi Pu Vanmawia pawh in a tumhnih nan thisen hi a pe bawk. District Hospital a Blood Bank Officer Dr.Lalrinfela ho in thisen hi an laksak.

Moria Church ah Nupa Tuak 50 innei

July 2 Inrinni khan Lawngtlai Chandmary, Lairam Isua Krista Baptist Kohhran, Moria Biak In ah an kohhran chhung a Kohhran dan anga innei lo te tan Inneih runpui buatsaih a ni a, he hun ah hian Rev.S.L.Lalpuiliana'n Nupa tuak 50 te a inneih that tir. Inneihtirtu Pastor chuan Pathian duhdan anga inneih ngaipawimawh a Nupa tuak 50 zet ten inneih that an duh chu lawmawm a tih thu sawiin, an damchhunga nupa kawpchawi tha tak, Pathian leh Kohhran tana a mitangkai nitur in a chah. Nimin a innei tha zing ah hian kum tam tak Nupa a lo awm tawh, tu leh fa te pawh nei tawh, kum upa lam te pawh an awm nual.

Camping tawp ta

May Ni 2 atanga tan LIKBK Bazar Biakin a Evangelistic Team ten Gospel Camping an neih chu, chhawng kua thleng a neih a nih hnu tihtawp a ni ta a, Nimin atang khan Follow-up Programme hmanzui niin tunkar chhung a awh ang. Kohhran lam chuan Zirtawpni khian Camper leh a chhimduh apiangte tan Pathian Chawimawi nan Ruai buatsaih an tum. Camping neih chhung zawnga kawng hrang hrang a tanpuina petu leh tawngtaisaktu zawng zawng chungah lawmthu an sawi.

Jubilee lawm dawn

LIKBK Lawngtlai Chandmary Bethel Kohhran chuan an Kohhran Silver Jubilee lawmna puiber chu vawiin atang hian an tan dawn a, nithum chhung a awh ang. vawiin hian Kohhran inkhawm neih a ni anga, Kohhran chhunga Dan anga la inneilo te tan a ruala inneihna hun buatsaih a ni ang.

KALADAN MULTI MODAL TRANSPORT PROJECT By : Er. Zosangliana Zote,EE, PWD, Multi Modal Project Division.

Hun rei tak atang tawh khan India hmarchhak a state te kan kilkhawrzia( India ram pumpui ngaihtuahin) leh kan changkan lohzia hi mi tamtakin an lo vei em em tawh thin a. A chhan leh vang tamtak zingah han sawi theih langsar zual chu : tlangram deuh vek anih vanga inkalpawhna kawng kan neih that tawk loh vang leh lawngchawlhna hmun lian ( major seaport ) kan hlat luattuk vang hi ani ber awm e. Kolkata lawngchawlhna hmun lah chu ( a biktakin Mizoram tan) a boruakah hnai angin lang mahse Siliguri lama kal kual a ngai a, a hnai thei ang zawnga kal tur chuan Bangladesh kaltlang a ngaih avangin a thei si lova. Boruaka mel a inhnaih ringawt hi chu Aizawl atanga Kolkata thlawhna a zintur tan chuan awlsam phah viau mahse thlawhna kawng ringawt chu bungraw phurhnan a hman tak tak theih si lo. India hmarchhak state ten motor kawngpui / relkawng/ tuikawng emaw a lawngchawlhna hmun lian tham deuh hlek an pawh theihna tur kawng hi chu mithiamten an lo dap fo tawh ani.
Vanneihthlaktakin Mizoram a luipui pakhat Kaladan ( Chhimtuipui) lui hian Myanmar ( tunhma a Burma) rama Sittwe ( a hming hlui Akyab) ah Bay of Bengal tuipui a lo pawh hlauh mai a..Kaladan lui chu Mizoram hian a hnar lam kan chang a , Myanmarin a mawnglam an chang tihna ani.Chhimtuipui ( Kaladan) luidung zawhin Sittwe kan pawh thei dawn tihna a lo ni reng mai a.Sittwe pawh hi a pawimawh em em nachhan chu lawngchawlhna hmun lian khawpui ani a, Mizoram leh India hmarchhak state dangte hian lawngchawlhna hmun hnaivai pawh hi kan mamawh hle bawk si a. Luidung chu thui deuh hlek mahse man tlawm zawk a bungrua a tawlh zung zung theih dawn tho chuan enchian leh belhchian a ngai ta ani.
Sittwe chu Myanmar ram mah nihse India sawrkarin tun hnaiah ramri hrula kawngpui siamsak , kawlphetha siam leh thil chi hrang hranga Myanmar sawrkar a lo puih tawh thin avangin Myanmar sawrkar biak leh dawr chu thil harsa vak tur niin alang lo. A kawng chhawrtu tur hi India mite an nih deuh ber dawn avangin uluk taka endik ( survey & investigation) nan India sawrkarin pawisa a phal hle ani.
Team hrang hrangin uluktaka an endik hnua an thil hmuhchhuah chu :
(a) Vanduaithlaktakin, Chhimtuipui lui hnar lam Mizoram chhung leh Myanmar ram chin Kaletwa ( Setpyitpyin) thleng hi suar chhia a tam avangin a siam man a to hle dawn a, lawng kalkawng tura han ruahman chu thil awlai niin alang lo ( non – navigable).
(b) Chhimtuipui lui mawng lam, Myanmar ram chhung, Kaletwa atanga Sittwe thleng ( km 200 vel ) hi a chhe lai siam tha zeuh zeuhvin luikawng a hman theih tur ani a (navigable), lawng lian deuh hlek pawh kal thei tura ngaih ani.
Mithiamten an endikna zul zui hian India leh Myanmar sawrkarte chuan inremna fel tak an lo siam thei ta a. An inremna point pawimawh deuh deuh te ( a inziak ang diat diat ani lo) chu
(a) He ruahmanna atana pawisa sen tul zawng zawng hi India sawrkarin a tum ang.
(b) Myanmar sawrkarin a kawng chhawrtu, ram dang mi te atangin chhiah a la ang.
(c) Sittwe lawngchawlhna hmun chu chei that tur ani ang.
d) Sittwe atanga Kaletwa thleng Kaladan luidung ( km 200 vel) hi lawng kal thei tura siam that ani ang.
e) Kaletwa, Myanmar atanga Lawngtlai, Mizoram chu motor kawngpui lian a thlun zawm ani ang.Motor kawngpui hi hmun hniha then ani ang a.(i) Myanmar ram chhung,Kaletwa atanga Mizoram ramri Zochalui thleng ( km 62 vel) hi BRTF( India) / eng Agency ber emaw ten an thawh tur ani ang. (ii) India ram chin, Mizoram ramri , Zochalui atanga Lawngtlai thleng ( km 100 vel ) hi Mizoram PWD thawh tura tihfel ani tawh.
He ruahmanna hian luidung lawng kawng leh motor kawng te a hmankawp dawn avangin inkalpawhna chi ( modes of transportation) hrang hrang alo ni ta a, ‘ Multi Modal Transport Route ’ ti hming hi alo piang ta ani.
(a) Kawngpui hi peih fel anih hunah Kolkata – Sittwe – Kaletwa – Lawngtlai – Aizawl hi tuna kan hman mek kawng Kolkata – Siliguri – Guwahati – Silchar – Aizawl ai hian mel za tamtak in a tawi zawk.
(b) Kawngpui chhawr zual bik tur te chu : Mizoram, Tripura, Manipur leh Assam chhimlam ( Barak valley) an ni ang.
(c) Mizoram leh he kawngpui chhawrtu state dang tan chuan India ram khawpui lian viz. Kolkata, Chennai bakah Singapore leh khawchhak lam khawpui lian te nen sumdawnna kawng a inhawng dawn tihna ani.
Mizoram chin :- Mizoram chin kawngpui, Lawngtlai atanga Zochalui thleng ( km 110 vel), hi double- lane highway ( kawng zau zawng metre 12.00) tura ruahman ani a. ( Mizoram chhungah double – lane kawng pawh hi kan la nei mumal meuh lova, Meghalaya state a Jowai leh Shillong inkar ang khu a anpui hnai ber ani). A blacktop zau zawng hi metre 7.00 tura ruahman ani bawk. A kawng hi MOSRT& H specification zulzuia siam tura ruahman ani.
Lawngtlai atangin chhimlam panin India leh Myanmar inrina Zochaluiah Myanmar ram alut ang.Kawng laih bakah Retaining Wall, Culvert tam tak siam a ngai dawn a. Leihlawn te deuh ( minor bridge) 40 / 50 vel bakah leihlawn lian ( major bridge ) hi 6/7 vel awm tura ruahman ani.Metre 7.00 a zauva tihdum (blacktop) bakah a sir tawn tawn a tihdum ( paved shoulder) tel bawk tura ruahman ani. Kum 3 /kum 4 vel chhunga thawh zawh tur a ruahman ani. Tunah detailed project report (DPR) buatsaih mek niin senso tur hi cheng vaibelchhia 700 chuang ani ang. Senso zawng zawng hi Central sawrkarin a tum ang.
A thawktu tur hian Mizoram PWD hnuaiah Multi Modal Project Circle ( SE, PWD, Office tihna) chu Lawngtlaia inbun nghet turin siam (create) ani a. Hemi rual hian, Lawngtlaia awm tur bawkin, Multi Modal Project Division ( EE, PWD Office tihna) pahnih leh Multi Modal Project Sub – Division pali siam nghal ani bawk. Tunah hian kawnglaih hna chu tan ni tawhin hnathawk tur a rawih Contractor ten an lai mup mup tawh a ni.

Friday, July 1, 2011

Remna Ni 2011





















Kum 1966 ah Mizoram chu Rambuai ah puan a ni a, Pu Laldenga kaihhruaina hnuai ah Hnam Sipai te chu Zalenna sualin an rammu a, Rambuai vangin Nunna, In leh Lo, Sum leh Pai tam tak Mizoram Mipui ten an chan a, hmasawnna a awm hleithei lova, Sipai awpna hnuai ah hun khirh tak hnuai ah kum 20 chhung zet an awm hnu ah, Kohhran hote tawngtaina vangte, Ram mipui leh Sawrkar ruahmanna vang te in June 30, 1986 khan Rermna Ziak a ni a, Mizoram leh India Sawrkar in Remna an ziak hi khawvela Remna ziak tawh zingah a hlawhtling ber te zing a mi a ni hial awm e. Remna hnuai ah Ram in kal a siam a, chumi hnuai ah chuan Mipui ten Rambuai hrehawm hnuchhawn in, ralmuang takin hmathar an la a, Remna hnuai ah Mizoram a awm chu Kum 25 zet a tling chho ta. Remna tibawrhbang a, tihmelhemtu nih tum lovin, mitin te a vawnghimtu nih a tul takzet a, a tihmelhemtu an awm a nih chuan Ram mipuite zing ah chhiar tlak a ni lo mai nilovin, an thiltih chu Ram mipuite hian an ngaidam thei lovang. Ram mipuite hian Zalenna sual a hun hrehawm tak hnuai a Ke lo pen tute, Remna a awm theih na tur a hmalatu zawng zawng te i hre reng angu. A pawimawh ber ah chuan, Nimin a he Ni Lawmna Lawngtlai a neih ah Pu Thlamuana Deputy Commissioner chuan "REMNA NI KAN LAWMNA AH HIAN KAN KHUALLIAN CHU REMNA MIN PETU KAN PATHIAN A NI" a tih Remna kan neih vanga Pathian hnen ah Lawmthu min sawinawn tir tu nise a duhawm hle mai. Editor

Mizoram hmundang rualin Lawngtlai ah Remna Ni urhsun tak in nimin khan hman a ni.

Mizoram Remna Ni Champha lawmna nimin a Mizoram pum ah neih a nih rual in Lawngtlai ah nimin zing khan khawchhe hnuai ah Central YLA huaihawtna hnuai ah Peace Rally neih a ni a, Lawngtlai khawpui chhung a Branch YLA hrang hrang te chuan mahni Branch theuh atangin Kawng zawhin Remna leh Muanna vawnhim a tul thu te, Remna leh muanna hlut zia leh remna lam hawi thuziak te keng in ruahsur hnuai kawng zawhin Lawngtlai Bazar a Areopagy an pankhawm a, Areopagy ah hian inkhawm tawite Pu C.Z Thanliana Central YLA Treasurer kaihhruai a neih ah Central YLA President Pu V.Thangzova chuan YLA Member kalkhawmte chu remna Ni Chibai bukin, Remna kan neih theih nan a sul losutu te, an nunna hlutak lo hlan tute zahna chibai YLA chuan a buk tih sawiin Remna leh Muanna vawnhim chu ram mipui te tihtur a ni a ti.Areopagy ainkhawm hi Pu Vanlalngena Addl.DC Lawngtlai pawhin a hmanpui a, Rally a tel Branch YLA te hnen ah lawmman pawisa fai pek theuh an ni.Remna Ni Silver Jubilee hi chhun lam ah Lawngtlai DC Pu Thlamuana ho in YLA Hall, Lawngtlai-III ah hman a ni a, Inkhawm kaihruaitu Pu Thlamuana chuan Remna Ni a khuallian chu Remna min petu kan Pathian nise, Khualzahawm atan Remna a awm theih nan a sulsutu zawng zawngte an ni a ti a, Rev.Lalbiaksanga Secretary, LDKHC in hunserh a hman hnu ah, Rev .H.Lalsangliana ,President Lawngtlai Dist.Kohhran Hruaitu Committee chuan MKHC ten Remna a awm theih nan a Kohhran te hmalakna tlangpui a chhiar chhuah hnu ah, Remna hi Pathian thiltum a ni, tih thupui hmangin thu a sawi a, Pu L.H.Mawia Hnialum Associate Proffesor in Remna hmasawnna kailawn tih thupui hmanga a thusawi ngaihthlak a ni bawk. Remna Ni hmanna ah hian Sawrkar hnathawk, Political Partty lam leh NGO te leh he Ni ngaipawmawhtute an tel.

Children Club Training nei.

Nimin khan World Vision India,CADP chuan Lawngtlai a an Office ah Lawngtlai leh Saiha District a Children Club te tan Nikhat awh Training an buatsaih. He Training, Israel Malsawmsanga Sporsorship Coordinator kaihhruaiah hian Programme Manager Maren Nampui chuan World Vision chuan Naupangte a ngaipawimawh hle a, khawen an hmuh a, mahni intodelh a, midangte tan a malsawmna nithei tur a chherchhuah tumin Kohhran lam nen tangho in khawtin ah Children Club din vek a tum a, hma a la mek a ni a ti a, tun dinhmun ah Kohhran tin te nen thawhhona an la ziah theihlohna chhan chu hmalakna chu bultan chhoh a ni chauh a, Kohhran tinte nen tangho a Children Club thatak, World Vision in Chhimtuipui Area an chhuahsan hun ah pawh tha taka kalzui zel thei tur din vek tum a ni a ti. Tun dinhmun ah World Vision hnuaia inziaklut Children Club 33 an awm mek

Parvon Spas man

Nimin khan AOC Branch YLA Duty te chuan Lawngtlai leh Lunglei inkar a Maxi cab Service thin pakhat atangin Damdawi ruihhlo a hman chi, Parvon Spas Capsule 560 leh a neitute an man a, YLA ten ruihhlo an man hlut zawng hi Lawngtlai a hralhchhuahna anga chhutin Rs.28000/- man hu vel a chhut a ni.Damdawi neitute chuan Lunglei Rahsi Veng atanga an lak niin an sawi.

LSA Gen.Hqrs. GEC Meeting nei.

Nimin khan Lai Students Association General Hqrs. Lawngtlai chuan kumj 2011-2013 Term a General Committee hmasa ber Lawngtlai Bazar a an Office ah an nei a, Town Branch aiawhte leh Committee Member te an kal tha hle. Nimin committee hian Date 19-20 May 2011 a General Conference an neih zawh taka an Resolution bawhzui dan tur leh thu pawimawh tam tak hmalakna tur an rel. LSA Gen. Hqrs. chuan Mizoram in Remna Ni vawi 25na kan thleng thei hi lawmawm a ti a, remna hlut zia hi thangthar te leh zirlai ten nhrechiang theuh turin leh Pathian hnena lawmthu sawina chang hre theuh turin Lairam mipui te a ngen a ni, General Execvutive Committee hi Israel Thara, Treasurer in a kaihruai a, K.Thansiama Gen. Secretary in report leh tunhnaia an hmalakna thenkhat te a sawi.

Science Exhibition khar Henry V.LMalsawma DES chu a titha zingah a tel

Ni hnih awh Inspire Awards Scheme 2010-2011 hnuaia 1st State Level Science Exhibition chu Govt. Comprehensive Model School, Mission Veng-a neih chu Education Minister Pu Lalsawta'n a khar. State Level Science Exhibition a a titha zual thlan chhuah te a lawmpui thu sawiin a tling zo ta lo te pawh beidawng lova tang sauh sauh turin a fuih a ni.District hrang hranga Science Exhibition buatsaih a nih hnuah a titha zual zirlai 78 thlang chhuakin heng zinga 71 te hian June ni 28 leh 29 hian inelna an nei leh a. Rampum huapa inelna National Science Exhibition 14th-16th August, 2011 chhunga New Delhi-a Prime Minister hawn tura Mizoram ai awh turin a titha zual zirlai 5 thlan an ni a, Certificate leh Rs. 2,000/- pek theuh an ni. Chungte chu Henry VL Malsawma, Downtown English School, Lawngtlai (Powerless food storage box), Eddie Zoremsanga, Hmarveng H/S Kolasib (Diversified Farming), C.Lalmuanpuia, St. Paul's HSS, Tlangnuam (Rain Water Harvesting), Sneha Sudha, Mary Mount School, Tlangnuam (Automatic Room Power Controller) leh C. Lalremruata, DIET Practising School, Lunglei (Solar Water Purification Method) te an ni. He rampum huap inelna a kal tur zirlaite leh anmahni kaihruaitu tur zirtirtute kal man leh senso zawng zawng hi sorkar laipuiin a tumsak vek dawn a ni.