Wednesday, August 31, 2011

Rs.47020 hu Sa tihhlumna leh hruizik halral a ni.

Nimin khan Forest Department ten Dan lo a Ramsa manna leh Hruizik Ngengpui Wildlife Sanctuary atanga an mante chu halral ani.He hun hi Lawngtlai DCF Office ah neih niin,Pu NR.Pradhan DCF(WL) chuan kalkhawm sikul naupangte hnenah a lem nena entirin,mizorama kan ransa neihte leh nungcha kan neihte en tirna aneia,hengte hi humhalh a tulzia a sawi bawk Pu H.Chhuanawma EM i/c Forest LADC chuan thutawi sawiin,kan ramngaw leh a chhunga cheng ramsa te an him loh zia sawiin,a humhalhna kawngah kan tanrual a pawimawhzia a sawi a,kan ramngaw leh a chhunga chengte thlamuang taka kan awmtir theih nan tamchhawl chung pawhin i thawk hram hram angu a ti.Pu K.Hramzama Range Officer,Ngengpui chuan an thil man leh an man dan report a pe bawk.VCP Lawngtlai College Veng pawhin thu tawi a sawi bawk.He huna Forest Deptt in an thil man an tihral te chu:
.Vahui len--61. Sathang--10. Sahdal/Beai--111. Thangchep--72. Hruizik-Tawn 51 kg 105 Heng hi a pawisa chuan Rs 47020/ hu a chhut ani.

Quality Education Seminar Secondary School pathumte pualin neih a ni.

Quality Education chungchanga RMSA hmalakna chu Lawngtlai District chhungah kalpui mek zel ani a,nimin khan Lawngtlai khawpui chhunga Secondary school lian pathum Chanmary,Thingkah leh Govt.Southern Secondary School te chu Southern Secondary Schoolah kalkhawm in Seminar neih ani.Hei hi Lawngtlai khawpui chhunga Seminar neih hnuhnung ber ani . Seminar hi Pu Lalduna chinzah DPC leh DEO ni bawk chuan a kaihruai a,Pu C.Lalrinchhana Dy. DPC RMSA chuan zirtirtu kalkhawmte hnenah thuchah sawiin.Zirlaite chu Pathianin a hmangaih naupangte an ni tih hrereng chunga enkawl turin zirtirtute a ngen a,theihna sang tak tak nei leh talent tha tak tak kawl te an ni,enkawl danin a zirloh avanga mi hman tlak loh an tam tawh zia leh hei hi khawtlang sualna thlentu anihzia a sawi a,Pathian rawngbawlna ani tih hre reng a,zirtirtuten tawngtaina nen zirlai naupang te an enkawl anih ngat chuan kar lovah Lawngtlai District chu Mizoram mai nilovin National Level ah pawh an lang mai dawn aniati..Pu Rina chuan zirna lama kan quality that leh that loh tehfung pakhat chu MPSC leh UPSC candidate kan neih danah leh hlawhtling chhuakte kan neih danah a innghat hle tih sawiin,tun dinhmunah chuan lawngtlai district chu hemi kawngah hian dinhmun hniam takah kan ding mek a,zirtirtu leh zirlai,nu leh pa te nen kan tanrual a tul ani ati.Nl.K.Lalparliani Finance & Account Co-Ordinator pawhin thu sawiinRMSA awmzia leh kalphung tlangpui kalkhawmte hi a hrilhfiah bawk.

RTE ACt Seminar nei


Nimin khan YLA Hall ah SSA buatsaihin Seminar-cum-Training on Right to Education Act 2009 neih a ni a, he hun hi E/M Pu V.Zirsangan a hmanpuiin Zirna lama hmalakna chu tihtakzet a kalpui a ngaih thu a sawi a, Pu LZ Tluanga DPC kaihhruai ah hian V.Lalsiamthara Addl.SPD in kalkhawmte hnen ah Act chungchang chipchiar takin kalkhawmte chu a hrilhfiah.

LIKBK Quiz zofel



June ni 6 atanga tan tawh LIKBK Thalai Pawl Joint Bible Quiz 2011 chu zawhfel ni tawhin Lawngtlai khawpui chhung a unit 14 te an tel a..He inelna ah hian a pumpuia pakhatna chu Electrict veng Unit an ni a,pahnihna-Council veng unit niin pathumna Vengpui Bethel Unit te an ni. Bible Quiz hi main Sponsored chu World Vision CADP te an ni.Lawmman hi 1-na Rs 10000/- leh Citation,pahnihna Rs 7000/- leh citation,pathumna Rs 5000/- leh citation ani a,a tel te hnen ah Rs 500/- hlan theuh an ni.

Governor chhuaktur in uitu a ngah



Mizoram Governor chhuak tur Lt.Gen (Rtd) M.M Lakhera, chu nimin khan a chenna inah pawl hrang hrang ten an thlah a. Heng pawl hrang hrang te chu AMFU, Mizoram University hotute te, Mizoram Kohhran Hruaitute Committee, Mizoram Widow Association, Bharat Scouts & Guides, Sainik Welfare & Resettlement leh Mizoram Ex- Servicemen Leaque te an ni.Chief Minister Pu Lal Thanhawla chuan Governor chhuak tur thlahna zanriah nimin tlai khan Chief Minister chenna inah a buatsaih sak a, hetah hian Speaker, Ministers, Parliamentary Secretary, MLA leh mi pawimawh dangte sawm an ni.

Naktuk ah Governor thar lalut dawn



Mizoram Larsap thar tur Vakkom B.Puru-shothaman chu September ni 2 hian Raj Bhavan -ah Mizoram Larsap atan a laluh dawn nia thu dawn a ni. Kum 83 mi, politician hlun Vakkom B.Purusho-thaman hian Mizoram Lar -sap ni mek MM Lakhera chu a thlak dawn a. Mizoram larsap ni tura rin-awmna thutiam la tur hian September ni 2-ah Aizawl a lo thleng ang a, tlai dar 5-ah Raj Bhavan Circular Lawn-ah lakluh a ni ang. Kum 2006 July ni 25-a Mizoram Larsap ni tan MM?Lakhera chuan September ni 1 hian Lengpui Airport atangin Mizoram a chhuahsan thung dawn a, Lakhera hi Chief Minister, Cabinet Ministers leh sorkar mi pawimawh ten an thlah ang. Tarlan tawh angin Mizoram larsap thar tur Vakkom B.Purushotha-man hi Andaman and Nicobar Islands-ah Governor a lo ni tawh a, kum 1950 atang khan politics luhchilhin minister leh speaker hna pawh a lo chelh tawh a ni.

Hruaitu siamrem



LSA Gen Hqrs;Lawngtlai General Executive Committee(GEC) chuan hetiang hian Office Bearer a siamrem thu kan dawng.
President
V.LR.Hmachhuana
Vice President
C.Kapkima
General Secretary
K.Thansiama
Asso General Secretary- Pu Rohlupuia
Finance Secretary
Mc.Lalhuappuia
Treasurer
Israel Thara

Tuesday, August 30, 2011

Direct Finance bawhzui turin ADC pathum aiawhte Delhi ah kal an tum

Mizoram a District Council pathum ten Central sawrkar atanga State kaltlang lova pawisa an hmuh theih nan a hma lakna kalmek chuan hma a sawn chho hret hret tih Direct Finance Demand Committee hruaitu pakhat chuan The Lawngtlai Post a hrilh a, tunhnai a Mizoram sawrkar cabinet meeting in Direct Finance chungchang an ngaihtuah ah, tha an tih thu an tihtluk tak vangin heihian awmzia thuitak a nei tur a ngaih a nih thu thulakna chuan a sawi. Direct Finance chungchang ah hian Lai DCC pawhin thuchhuah siamin Cabinet Meeting thutlukna chu lawmawm an tih thu an lo tarlang tawh bawk a ni. Hetihlai hian tunkar chho hian District Council pathum hruaitute chuan Direct Finance chungchangah Central lam thuneitute dawr turin Delhi kal an tum a, Mara leh Chakma Council atangin an hruaitu mi pali vel ve ve kal tur a ngaih niin, Lai District atangin Chief Executive Member bak ah Direct Finance Demand Committee a Convener Pu Hmun Hre te chu kal tur a ngaih an ni.

District 3 a BLO te Training petur ten Training an nei mek



Nimin khan Lunglei DC’s Conference Hall ah Lunglei, Lawngtlai leh Saiha district chhunga Booth Level Officer te training petu tur trainers ten training an tan. Training hi Jt.Electoral officer Pu H.Lalengmawia’n hawngin Election Commission of India Observer Santosh Kumar pawh in a rawn telpui a ni. training hi ni 31st August ah zawh a ni ang.District pathum tan a training rawn endiktu Santosh Kumar, ECI official chuan trainers te chu an thil zirah ram tana thawk tih in hriain an rilru zawng zawng pe se tha atih thu a sawi a, an hna pawimawh tak fel fai taka thawk tur chuan dan hriat, taimak leh election kalphung hriat a ngai a ni a ti. Training hawngtu Pu H.Lalengmawia Jt.CEO chuan Election chungchang khawihtu leh Election department in mawhphurhna a pek te chu ECI hnuai a thawk an nih avangin an hna a pawimawh a - dan felfai tak awmsa zawmin fimkhur taka an mawhphurhna an hlen a ngai a ni a ti.CEO PuK.Riachho, IAS kaihhruaina hnuai ah Mizoram chu EPIC chauh hmang state 6 zing ah a tel tawh thu a sawi a, tunah hian Election chungchang a hrasatna leh hriat chian duh nei te tan darkar 24 chhung man chawi lova biak pawh theih phone number 1950 chu ECI duhdan in peih fel a ni tawh a, he phone number hi biak pawh theih reng ani tawh ani a ti.

Result puang dawn


Chhimtuipui Teenage Solo Competition, World Vision leh Friend Club tangkawpte buatsaih chu tluang takin zawhfel a ni tawh a, zanin hian Result puan a ni dawn. He hun ah hian CEM chu khuallian tur a beisei a ni.

C.S hoin Meeting dawn


Vawiin hian Chief Secretary ho in Chhimtuipui khuap tur a hmalakna kalmek te, Lawngtlai atanga Myanmar pawh tur a kawngpui laih mek te thlirin Meeting pawimawh neih a ni dawn.

Memorumdun PM ah thehlut




Assam Tribune in a tarlan danin Minority Youths & Students Federation inti te chuan tunhnai khan Prime Minister,hnenah Karimganj DC kaltlangin memorandum thehlutin, Mizorama hnamdang sumdawng dap mek chu titawp turin an ngen.MYSF te chuan heti ang boruak a thlen vanga rilru leh taksa lama hremna tawk mekte thil tawn chu enchiang turin PM hi an ngen nia hriat a ni a,MYSF hian hnamdang tihbuai chu tihtawp a nih loh chuan rel leh kawng te danchah a nih tur thu sawiin, Barak Valley-ah Mizo kaltlang an khap dawn niin an sawi a. thutlukna hi pawl hrang hrangten tunhnai Silchar Press Club-a meeting an neihah an siam niin an tarlang.

Quiz Final



MZP Inter High School Quiz 2011 chu zanin dar 8:00 hian final round neih a ni dawn Final round ah hian Govt. Mizo High School, St. Pauls Higher Secondary School leh Home Missions School te’n inelna an nei ang. He hunah hian Pu Lalrinliana Sailo, Health & Family Welfare Minister chu khuallian a ni ang. He Quiz-a pakhat na hian lawmman Rs. 30000/- + Citation + Lehkhabu an dawng ang.

Larsap thar tur Vakkom B.Purushothaman



Mizoram Larsap 18-na atan kum kum 83 mi, minister hlui, ukil leh kum thum zet Larsap hna lo chelh tawh Vakkom B. Purushothaman chu ruat a ni.Vakkom B. Purushotha-man hi Congress hruaitu hlun leh Advocate a ni a, April ni 12, 1928 khan a piang a. Kerala Minister hlui a ni a, Andaman and Nicobar Islands-ah kum thum chhung Lt Governor a ni tawh bawk. Kum 1946 khan Congress zirlai pawl-ah a inhmang tan a, nihna hrang hrang - member of Vakkom Panchayat, President, DCC, Thiruvananthapuram, General Secretary, KPCC leh Vice – President, KPCC bakah AICC-ah kum 25 member a ni. Kerala Legislative Assembly-ah kum 1970, 1977, 1980 leh 1982-ah thlan tlin a ni, Agri- culture, Labour, Health & Tou-rism minister a lo ni tawh a ni. Committee on Public Undertakings and Committee on Subordinate Legislation of Parliament-ah chiarman a nih tawh bakah Consultative Committee of Experts to the CIDP of Inter Parliamentary Union-ah kum 5 chhung chairman nihna a chelh bawk. Kerala CM awm loh laiin CM charge te pawh a lo la tawh bawk a ni. A nupui Dr. Lilly Purushothaman nen fapa pahnih leh fanu pakhat an nei a ni.

Monday, August 29, 2011

Ngurnunsangi English School hnen ah SBI Lawngtlai ten Chawimawina an hlan

Kar kalta Zirtawpni Lawngtlai-a English Medium awm hmasa ber Ngurnunsangi English School(NES) hnenah State Bank Of India(SBI) chuan thilpek an hlan.He thilpek hi State Bank Of India hian Community Service Banking atangin hetiang chawimawina proggramme hi an kalpui thin a,Lawngtlai Districtah hian NES hi a dawng awmchhun an la ni hrih ani.He hun ah hian SBI aiawhin Chief Manager Pu Sunirmal Das chuan thilpek hlanna leh thutawi sawina hun a hmang.Ngurnunsangi English School hi kum 1983 khan Lawngtlaia English Medium School hmasa ber niin a ding tan a,Kum 2002 khan CYLA chuan HSLC a an tih that em avangin'Certificate of Felicitation' an hlan a,kum 2005 khan A.R.Kohli Governor of Mizoram chuan Governor Trophy leh Commendation Certificate 2004/2005 result that avangin a hlan bawk a.Kum 2009 atanga 2011 khan NES hian HSLC result 100% an nei ani.He School neitu leh Principal ni bawk Pi Ngurnunsangi Chinzah hian kum 1996 khan Best Teacher award alo dawng tawh bawk ani.School din tirh atanga tun hun thlenga an school Achievement that avangin SBI te hian chawimawina thilpek hi an hlan ani.SBI te hian Ceiling Fan 10 an pe ani.

Lai DCC ten hmalakna tur engemawzat an rel

Aug 26 khan Lai District Congress Committee chu Pu V.Lungmuana President.Lai District Congress Committee chuan a kaihruai ani.LDCC meetingin a rel te chu GRHSS Academic session thar atangin Science leh Mathematics zirna awm turin ruahmanna neih ni rawh se.LADC Area bikah Work Distribution din nise,heng Work Distribution te hian cheng Nuainga chin chunglam chu a thawk tur a ngaihtuah thin ang. Mizoram Sorkarin Mizoram Polytechnic Lawngtlaia dah turah Civil Engineer te awm tura thlen ni rawh se. LADC Area aCongress Block pathum te October thla chhungin inthlanna neih ni rawh se. Gov't Region Higher Secondary School a Mathematics zirtirtu hmun danga an dah,a aiawhtu tur an la dah siloh hi dah kir leh tura ngen ni se. Lawngtlai Collegea Lecturer paruk hmundanga sawn te,an aiawh dah a nih loh avangin sorkarah thlen ni bawk se an ti a.He meetingah hian Lawngtlai Town Upgradation Nuai Zali Sawmruk Panga chu Central Sorkarin Mizoram Sorkar kuta a pek tawh thu CEM Pu C.Ngunlianchunga chuan a sawi bawk.He meetingah hian LaiDCC Executive memberte an kal tha hle ani.

World Vision ten LSTD Programme an hmang


Tun hnai khan World Vision CADP chuan LSTD proggrame an area chhunga khaw hrang hrangah an hmang.World Vision India Chhimtuipui Area Development Proggramme,Lawngtlai chuan Kohhran leh School hrang hrang te nen tangkawp in,Life School For Transformational Development(LSTD) proggramme chu bial chhung khaw hrang hrang Sihtlangpui,Khawmawi,Lawngtlai Vengpui leh Thingfalah te an buatsaih a.Naupang 1600 chuang he proggramme ah hian telin,infiamna leh intihsiakna thianghlim te neihpui an nih bakah thu tha tak tak zirin,hun hlimawm takin an hmang ho ani.He Proggramme hian a tum ber chu naupangte hmakhua ngai a,an thanhlen zelna turah kawng hrang hranga hma an sawn theihna tur atan a buatsaih ani a.Nitin nunphung,faina leh hriselna chungchang te,Pathian rinna kawngah pawh thang lian zel tur an nihna te,Zirna an phak ang tawk a ngaih pawimawh alo nih theihna tur leh an dikna chanvo leh zalenna hman thiam a pawimawi zia te zirtirniin,World Vision staff mi thiam tak takte mai bakah mi thiam sawm bik te Dr.Zochhuanawmi,District Hospital Lawngtlai,Lalnunfeli leh Zonunmawii,Lecturer DIET ten he zirtirna hun hi an hmang ani

DC Zin



Pu B.Lalhmingthanga DC chu Sawrkar hnatul thawkin Aizawl ah a cham mek, tunkar hian Lawngtlai a rawn let leh hman beisei a ni.

PD thar tul tifel



Hun engemawchen DRDA Lawngtlai ah Project Director a awm loh hnu ah Mizoram Sawrkar chuan Pu Thangchem Zathang Addl. DC saiha chu Project Director DRDA Lawngtlai hna chelh turin a tifel.

PYKKA Sport neimek


Aug 23 atang khan CYLA playgroundah Lawngtlai RD Block PYKKASports chu Lawngtlai DC Pu B.Lalhmingthanga chuan a hawng.Lawngtlai RD Block chhung a Khua/veng 42 awm atangin khaw 28 te hi tun inelnaah hian an tel thei ani.Sport hi neih mek niin vawiin lam hian zawhfel hman beisei a ni.

Friday, August 19, 2011

Lawngtlai RD Block a V/C te pual MGNREGS Seminar Pu B.Lalhmingthanga DC in a hmanpui

Nimin khan Lawngtlai a BNRGSK Conference Hall ah Lawngtlai RD Block huamchhung a Village Council te tan MGNREGS Seminar, Pu T.Vanlalmalsawmsanga BDO kaihhruaina in neih a ni. He hun hmanpuitu Lawngtlai DC Pu B.Lalhmingthanga chuan MGNREGS a nawlpui a kalpui a nihdan ah, a thiltum hi VC leh mipuite pawhin an la chiang tawklo ni a a hriatthu a sawi a,, Mirethei tan, thiamthil tello a hnathawh tur kumkhat ah Ni 100 siamsak a ni a, heihi diktaka kalpui a nih chuan thawk lova hlawhlak te, Khawl hmante leh he Scheme in a tum ang nilova her hret ang chite hi a tlem in a rinawm a ni a ti a, tuna he Scheme kalpui a nihdan hi chuan mipuite work culture leh Moral a tichhe mek a, tunah hian a diktaka kalpui a nih chuan siamthat theih a la beiseiawm a, VC te chuan theihtawpa tan an lak chuan a hlawhtlin ngei a beiseiawm a ni a ti. VC te hi an lawmman a beitham hle a, hei hi Sawrkar chuan a hriat vangin Administrative Cost ah an tan pawisa a dah thin a, diktaka hman a nih chuan harsatna em em tawk lovin an awmthei tur a ngaih a ni a ti a, Job Card lem hmang leh thildang hmanga lo inhaivur ve tum hi a fello hle a ni a ti a, MGNREGS ah kawnglaih uar a ni lutuk chu DC chuan pawi a tih thu leh he Scheme a hnathawhtur a siam pariat zing ah kawnglaih hi a pariatna a ni a ti a,irethei ten an chhawrtangkai tur hnathawhtur dang zawn thiam a tul a ni a ti bawk. VC lam ten Lawngtlai a DC leh BDO te an dawr chang a an hahchawlhna tur leh khawtlang tan a thil tul pawimawh an thawh ve na hmun tur Room an dil chu DC chuan lo ngaihtuah sak a tum thu a sawi. Vawiin Seminar ah hian Lawngtlai RD Block huamchhung a VC 42 atangin VC 35 an tel thei.

LADC Session Ni hnihna Chanchin tlangpui



Lai Autonomous District Council Monsoon Session a ni hnihna chu nimin Zinglam Dar 10:30 khan LADC Chairman Pu F.Rohnuna kaihhruaiin neih chhunzawm ani a, Vawiin a zawhna 4 te chu hetiang hian chhan anni. Pu Thanglawma zawhna, " Local Bodies Fund Kum 2011 kha Final Bill pek anni tawh em tih chu Pu T.Lalbiakmuana E.M LAD changtu chuan," V/C tinah pek deuh vek anni tawh a, Hnathawh thalo te erawh chu Security Deposit hren sak anni tiin, Hna te hi a hmunah enfiah a, tha tak a hmalak chhunzawm tum ani ati.

Pu C.Lalsawmzuala zawhna," BADP Fund Direct a District Council a lut tur tih kha enge chanchin ni ta zel,LADC hmalakna enge? tih chu CEM PU C.Ngunlianchunga chuan," Central Guidelines angin kalpui mek ani a, 2011-2012 atan State ah Central in Pawisa a pe tawh a,Council a lut turin District Council Pathumte Joint meeting chuan thu a lo passed tawh chu bawhzui mek anih thu leh Direct a BADP sum pek theihna dan mumal a lo awm lova, chu chu buaipui mek anih thu a sawi.

Pu .N.Zangura zawhna," Kum 2011 V/C Election Petition kha khaw engzat nge submit? Engtia hmalak zel nge anih tih chu Pu Lalbiakmuana E.M LAD changtu chuan, " Petition fee pelote action lak anih loh thu leh,Tribunal dan angin thutlukna siam sak annih thu leh chu chu Executive ah thehluh mek ani ati.

Pu Tuturu Singh zawhna," SSA zirtirtu a lak te kha Session hma a intiamna ang khan sem rual anni tawh em? tih chu Pu V.Zirsanga E.M M/S changtu chuan chhangin," SSA Teachers mahni POst a awm turin Executive in a rel tawh a,Order tihchhuah hma a mahni post a awm lo te chu inhrilh nise, a tul ang in hmalak a ni ang ati.

Nimin Session ah Comptroller and Auditor General of India Report Kum 2006 March ni 31 chu sawiho ani a, Official inthlahdah avang in chhan fel mai theih tur chhan fel loh a a awm thu sawilan ani a, hei hi Voucher leh Bill CAG a a tul anga Submit leh mai nise tih ani a, Chawhnu hun ah hian Official Business Pakhat, " The Lai Autonomous District Council(Salaries , Allowances and Pension of Member)( Second Amendment) Rules 2011 chu sawiho ani a, Rules hi vawiin lam ah passed tum a ni.

Zirna lama hmalakna chungchang sawiho a ni

Quality Education Target Achievement chungchangah Lawngtlai District High school leh Higher Secondary pualin hma lak tan ani ta.He hmalakna bul tan nan nimin khan Pu C.Lalrinchhana Deputy DPC.RMSA leh Pu H.Sangthanga ADEO Lawngtlai te chuan Lairam Govt High Schoool ah Meeting cum Seminar an neihpui,Pu C.Lalrinchhana Deputy DPC.RMSA chuan he hmalakna hi District pumpuiah a remchan dan ang zela bawhzui anih tur thu sawiin,Lawngtlai District chu zirna kawngah Mizorama District thang duang ber ni tura hmalak an tum tlat thu a sawi.He Meeting an neihna Lairam Govt High School hian SCERT atanga an dawn Computer set chu zirlaite in zirnan tangkai taka an hman thu School hotute chuan an sawi.

I-Day Review



DC Pu B.Lalhming- thanga hoin nimin khan Independence Day thlirletna hun neih a ni a, Day hman na a duhkhawploh awm leh belh ngai awm te sawilan niin sawiho nghal a ni.Day a sum hmanral kimchang takin ziakin sem a ni a, Rs.126000/- hmuh a ni a,Rs.237650/- hmanral niin ba Rs.110650 a awm.

Communal Harmony



Vawiin chawhma dar 11 hian Lawngtlai DC leh Staff te chuan Communal harmony pual in hun an hmang dawn a, inpumkhatna lam hawi thutiam an nei ang.

Hawng dawn



Vawiin hian LIKBK Assembly Office thar, Lawngtlai-IV ami chu hawn a ni dawn.

PYKKA SPORT

Aug 23 atang hian Lawngtlai RD Block PYKKA Sport tan a ni dawn August 26 thleng a awh ang.

MEETING:

Vawiin chawhma dar 11 hian Election chungchang ah District Level Meeting DC hoin neih a ni ang.

Model BNRGSK Building


VC House ti a sawi mai thin BNRGSK hnuai a Knowledge Centre sak tur ah DC chuan ruahmanna ang takin midangte entawn turin Thingkah ah sak tum a hmalak mek a nih thu VC te hma ah a sawi.

Thursday, August 18, 2011

Ni thum awhtur LADC Fur Thutkhawm chu nimin khan tan a ni.

Ni thum awhtur LADC Fur thutkhawm chu nimin khan Chairman Pu F,Rohnuna kaihhruaina in ah tan a ni a, hun hmasa lam chu zawhna leh chhanna atan hman niin, Vengpui bial MDC, Pu VL Dawma zawhna chhangin Executive Member, Revenue changtu Pu H.Vanlalthaliana chuan Tunhnai ah Non-Tribal hnen ah Trade License pekchhuah a ni lo a ti a, Trade license chu Non-Tribal hnen ah hawhtir phal a nilo a ti bawk. Pu N.Zangura zawhna chhangin Primary School Education changtu Executive Member Pu C.Lalneihkhuma chuan Saibawh khua chu tum nga a tlawh tawh thu leh Zirlai naupang pahnih chauh an awm vangin he school a thawk zirtirtute chu sawnchhuah an nih thu leh zirlai naupang an awm dawn phawt chuan zirtirtu sawnchhuahte chu dah let leh lam ah harsatna a awmloh thu in a chhang a Chandmary bialtu MDC Pu C.Lalsawmzuala zawhna kum 2010-2011 a Additional Fund Cheng Nuai 200 hmanral dan chu Executive Member Agriculture changtu Pu F. Hranglura chuan Additional fund hman a nihdan chipchiar takin a sawi a, Additional Fund hi House ah sawi zui a ni a, eptu lam chuan thlaichi supply chungchang leh supplier thlanchhuah ah leh a semchhuah thlengin thilfel tawklo tamtak a inzep niin an sawi. Chawhnu lam session hi Deputy Chairman Pu T.Zakunga'n kaihruaiin Private Member Resolution pahnih Pu V.L.Dawma Resolution leh Pu PT Lalchuanglura Resolution te House ah pulutin sawiho a ni. Tuntum session ah hian zawhna House a chhan chi 8 a lut a, ziak a chhan chi Unstarred Question 4 a lut a, Official Bill 3 leh Private Member Resolution 2 a lut bawk.Nimin session chawhma hun ah Official bill pathum Chief Executive Member Pu C.Ngunlianchungan House ah a pharh a chungte chu,mipui thlantlin roreltu nimek leh nitawhlote hlawh leh Pension siamthatna tur Bill a putluh bak ah Kum 2006 March ni 31 thleng a Comptroller and Auditor General of India Report sawiho a ni bawk.

Literacy a hniamna chhan hnufual vang

Chhiarpui hnuhnungber ah Mizoram District 8 ah Lawngtlai District chu ziak leh chhiar thiam tehna ah a hniam ber a ni a, hemi chungchang ah hian The Lawngtlai Post chuan Pu H.Lalruatkima Education Officer Middle School chu bepawp in, Pu Ruatkima chuan Literacy Percentage a hniamna chhan ber chu kan la hnufual vang ni a sawiin, abikin District khawthlang a cheng hnam hnufual zawk te chuan Literacy Percentage hi a pawthniam deuh ni a a hriat thu a sawi.The Lawngtlai Post in mirintlak deuh tur a ngaih a biak rawnte chuan Literacy percentage a hniamna chhanber chu kan la hnufual vang leh inkalpawhna thattawk loh vangte, awmhmun nghet nei lova pemkual ngai thenkhat la awm vang te leh sawrkar hmalakna chu heng mite tuamzo tur a la chak tawk lo deuh a an hriat thu te The Lawngtlai Post chu an hrilh.Lawngtlai District a ziak leh chhiar thiam hi 66.4% a ni.

Session ah Resolution pakhat passed pakhat hnawl



LADC Session tan ni nimin chawhnu lam ah Private Member Resolution pahnih lut te House ah sawiho a ni a, Pu P.T.Lalchuanglura Resolution Pu C.Ngunlianchunga CEM, LADC leh a thawhpuite, kan ram leh hnam tana an hmalak leh an hnathawk hi a lawmawmin fak leh chawimawi an phu a, lawmthu sawi nise LADC in a ti tih chu Passed a ni a, Resolution dang Pu V.L.Dawma putluh LADC hian thil man to zel tur ven nan hlawhfa man, thil man bithliah turin hma rawh se,LADC in a ti tih chu hnawl a ni.

Thisen Unit 22 pe



Nimin khan Gov’t Lawngtlai College a NSS Unit leh Red Ribbon Club te chuan an College Raising Day vawiin a lo thleng tur pual in a mamawh apiangte hman tur in Thisen Unit 22 an pe. Thisen petute hi Mipa-14 leh Hmeichhia - 8 anni NSS leh Red Ribbon Club te hian Kum tin Thisen pek hi an lo neih tawh thin . NSS leh Red Ribbon Club Lawngtlai College te hian Kum 2009 ah khan Thisen Unit 21 leh Kum 2010 khan Unit-17 leh Kuminah Unit 22 an lo pe tawh a ni.

Rinhlelh man



Lungtian khua a Nu pakhat boral chungchang ah Police lam chuan mi panga thuzawhfiah turin an kawl mek a, heng mite hi Lawngtlai Police kut ah an awmmek a, nimin lam kha chuan chanchin kimchang engmah hriattheih a la ni fumfe lo a.Media lam te pawh in an la hmutheilo.

Hung mek



Lawngtlai District a Playground tha ber CYLA Playground chu a panna kawng, chu ground ko ah DC hmalakna hnuai ah a hunghna thawh mek niin zawhfel thawkhat a ni tawh mipuite himna atan tangkaitak tur a ngaih a ni.

Training


Nimin khan Lawngtlai CMO Conference Hall ah Health Worker Training neih a ni a, Hriselna lam a mipuiten hma an sawn theih nan inzirtir tharna hi neih a ni.

Wednesday, August 17, 2011

Census Vol-I Paper-II tlangzarh a ni Mizoram a Mihring awmzat 10,91,014

Nimin khan India ram chhiarpui result, Volume 1 Paper II chu Chief Secretary Pu Vanhela Pachuau-in a tlangzarh.Kum 2011 chhiarpui ah Mizoram a mihring awm zat chu 1,091,014, mipa - 552,339 leh hmeichhia - 538,675 a ni a; mipa 1000 zelah hmeichhia 975 an awm a ni. Aizawl district chu mihring tamna ber niin 404,054 an awm a, mihring tlemna ber Saiha district ah 56,366 an cheng a ni.Kum 2001 atanga Mizorama mihring punna hi 22.78% a ni a. Sq km 1-ah mihring 52 zel cheng ang a ni. Mipa naupang 1000 zelah hmeichhe naupang 971 awm ang a ni.Tun chhiarpui ah hian ziak leh chhiar thiam 91.6% niin India ram pumah Mizoram chu Pathumna a ni . Serchhip district chu ziak leh chhiar thiam tamna ber niin 98.8% in ziak leh chhiar an thiam a. a hniamna ber, Lawngtlai district ah ziak leh chhiar thiam 66.4% an awm.C.S chuan Mizoram ah naupang kum 6 hnuai lam sex ratio thlirin Mizoram-ah hmeichhe fa duh loh vanga nau paih a awm lo chu thil chhuanawm tak a ni a ti Kum 1872 khan India ram chhiarpui hmasa ber chu neih a ni a. Chuta tang chuan kum 10 danah neih ziah a ni a , tun tum chhiarpui hi Independence hnua chhiarpui vawi 7-na a ni tih a sawi.

Kum 1901 atang Mizoram mihring pun chhoh dan hetiang
hi a ni :

1901 - 82,434
1911 - 91,204
1921 - 98,406
1931 - 1,24,404
1941 - 1,52,786
1951 - 1,96,202
1961 - 2,66,063
1971 - 3,32,390
1981 - 4,93,757
1991 - 6,89,756
2001 - 8,88,573
2011 - 10,91,014

12 Five Years Plan a Priority list atan Sector 9 thlangfel

Mizoram sorkar chuan Five Year Plan 12-na lo awm tura bawhzui tur, hmasawnna hna-thawh tur a ngaihpawi-mawh zual sector 9 a thlang fel.Planning Department-in Five Year Plan 12-na lo awm tur atana sorkar hotute inbuatsaihna a huaihawtah sector ngaihpawimawh tur te hi tarlan a ni a, sorkar chuan Agriculture leh a kaihhnawih ngaihpawimawha, Mizoram ei leh bar tharchhuah 4% a tihpun a tum a, Tuialhthei leh gas lachhuak tura ruahmanna kalpui kawngah hlawkna tam zawk tel tura fimkhur taka kalpui a, Kum 5-7 lo awm tur chhungin ramchhung State dang zinga mahni hman khawp bak kawl-phetha nei zinga tel pha tura hmalak,Mipui hriselna dinhmun tha zawk hlankai , zirna tha zawka kalpui tura NIT, IIM, IIIT, Sainik welfare leh Medical College te din, kawng hrang hranga hman tlak tura mipui chher chhuah leh Eduction Reforms Comission rawtna anga zirna siamthatte, mau leh Agro Based Industries tih-changtlun leh thingtlang lama eizawnna tam zawk siam te a tel bawk.

Session tan dawn



Vawiin hian LADC Session chu tan a ni dawn a, Session nei tur hian ruahmanna engkim peihfel a ni vek tawh a, tun tum Session hian nithum chhung a awh dawn a, Zirtawpni khian zawhfel hman tum a ni.

MJA Member thar atan mi 12 pawm an ni


Mizoram Journalists’ Association (MJA) General Headquarters (Hqrs.) chuan tunhnai khan, MJA member thar dilna 19 lut zing a mi 12 chu MJA member atan pawm an ni a.
MJA member thar atana pawm te hi Aizawl-a thawk lai 7, Lunglei District a mi 2 leh Mamit District a mi 3 an ni a. Heng mi 12 te nen hian Mizoram pumah MJA member 227 an awm mek a ni. MJA member atana pawm thar te chu-

Aizawl District
1.)Lalbiakkima Pautu Editor Teenageworld Monthly
2)K Lallawmsanga News Editor Newslink Daily
3)Ricky H VanlalnghakaJt Editor Mizo Aw
4)Khiangthuami Editor Inleng Weekly
5)Lalnuntawma Fanai News Editor Zozam
6)Biakchungnunga News Editor The Aizawl Post
7)Isaac Laldinthara Ralte ReporterThe Zozam Times

Lunglei District
1)Rodingluaia Editor Huichhuk, Daily Hnahthial
2)C Lalzarzova EditorDASAC Cable Network, Hnahthial

Mamit District
1)P Lalchunglura Stringer DDK, Mamit
2)Lalremruata Khiangte Editor Kawrthah Post
3)PC Rokhuma Editor Phaileng Times (Weekly)


Circuit House cheitha



Lawngtlai Circuit House cheithat loh a hun engemawchen a awm hnu ah Pu B.Lalhmingthanga DC hmalakna in tunlai hian cheithat hna thawh mek a ni .

Tuesday, August 16, 2011

Independence Day ropui takin Pu Lalsawta Minister ho in hman a ni

British rorelna atanga India ramin zalenna a hmuh champha vawi 64-na ram pumah ropui taka lawm a nih rualin Lawngtlai District-ah pawh Education Minister Pu Lalsawta hovin nimin dar 10:00 khan CYLA Playground ah lawmna hun hman a ni a. Pu Lalsawta hian Independence Day parade contingent 22 ten Hnam Puanzar chibai an buk a chhanglet a, .Pu Lalsawta chuan zalenna a hmuh atanga kum 64 chhungin khawvel ram ropui zingah India a tel hman tih sawiin kan hmasawnna zinga langsar ber pakhat chu mi hausa leh mi rethei kar a lo zim ta leh zirna lama kan lo sang ta hi a ni a ti a. Kawng tinrenga hmasawnnaah khawthlang lam chauh ni lovin khawchhak lam hi khawvelin a lo thlir tan ta a, India pawh hi khawvel hian entawn leh thlirah a hmang tan der tawh a ni a ti bawk.India sorkar “Look East Policy” avangin Mizoram hi khawchhak lehzual panna kawng a ni thuai dawn a, Lawngtlai khua pawh hi Multi Modal Transport Project vangin Mizoram chhim lam kawtchhuah lun tak a ni tawh dawn tiin hmasawnna lo dawngsawng turin Lawngtlai mipuite an lo inbuatsaih a ngai tih a sawi a. Hmasawnna avanga thil tha tamtak a thlen rualin kan beisei loh leh duh loh thil tha lo tam tak pawh a lo chhawm lut dawn a, heng hmachhawn tur hian Kohhran leh NGO te pawhin ngaihtuahna lo hman lawk a tul a ti bawk.Mizoram sorkarin zirna te, infiamna te, kawlphetha siam chhuah belh leh retheite khai chhuah kawngah te nasa takin tan a la a. Heng hlawhtlinna hi mipui kutah a awm a ni ati.Independence Day champha vawi 64-na lawmnaah hian Lawngtlai District chhunga Sorkar hnathawk te, zirlai naupangte leh mipui an kal tha hle a.Parade Contingents 22 zingah Jehova-Jireh English School (Girls) te 1-na niin Govt. Region HSS te 2-na an ni a, 3-na chu Jehova-Jireh English School (Boys) te an ni bawk. Independence Day puala Football Tournament Senior ah leh Under-14 ah Lawngtlai - III champion .Independence Day pual hian Lawngtlai khaw chhunga Hospital pathum leh Motherless Home te tanpuina Rs.2000/- theuh pek an ni a; tanpuina pe hian CDPO, CYLA, LWA, MHIP, MUP leh MJA te an kal a ni.

Vety Minister in Mampui a tlawh

Inrinni khan AH &Vety Minister Pu Nihar Kanti Chakma chuan Mampui a AH&Vety Farm a tlawh.Minister chuan ran vulh chungchanga nasa taka mipui inzirtirna an neih tawh thu leh kalphung ngai renga kal lova kalphung thar leh changtlung zawk ngaihtuah a tul thu a sawi a.Vety farm te enkawlna leh thawktute hlawhah sum tam tak a kalral a, chuvang chuan a sum thawk chhuak lam zawng, kal a tul tawh a ni, a ti a. Mampuiah hian AH &Vety hian Hectare 10 vela zau ram an nei a. Ar vulhna, Bawng vulhna leh Vawk vulhna tha tawk tak an nei a. Tunah hian vawkpui 8, ar 622 leh bawngpui 5 an vulh mek a ni.Pu Nihar Kanti Chakma hi LADC Chairman Pu F Rohnuna, bakah LADC a mipawimawh leh State sorkar hotulian te bak ah Media lammi thenkhat ten an tawiawm.

Accredited Journalist tello


Kumtin a Hnam Ni pawimawh bik a VIP ten At Home an buatsaih ah Lawngtlai a Accredited Journalist te chu teltur a sawm an ni thin a, Nimin a Zalenna Ni Champha hmanna ah Accredited Journalist te chuan sawmna an hmuh loh vangin an tello.Accredited Journalist te hi Mizoram Sawrkar ina theih chin ah Group ‘A’ Officer tlukpuiah a dah thin te an ni.

Website hawng



Independence denchhenin nimin chawhnu khan KVK Lawngtlai chuan ATMA hmalakpuina in Official Website thar an hawng a, www.kvklawngtlai.nic.in ah tlawhtheih a ni ta. Hemirual hian Training nan a tangkaitak Agriculture Department leh a kaihhnawih ten an hman tur CD 25 tlangzarh a ni nghal bawk a, he hun ah hian tel an tha viau tih thudawnna chuan a sawi.

I- Day Football ah Lawngtlai-III Champion



LDFA huaihawtna hnuai a Independence Day Football Tournament khelh ah Senior leh Under-14 ah Lawngtlai-III chu an Champion, Nimin a Under-14 Final khelh chu DC Pu B.Lalhmingthanga’n a hmun ah a telpui a, inkhelh tanhmain thutawi sawiin DC chuan infiamna chu sual do letna tha tak a nih thu a sawi. Nimin a Under-14 Final ah hun hmasa lam ah Goal awmlovin an indraw ah, Second Half tawp lam ah Lawngtlai-III chuan Goal khat thun in, hei hian Champion dinhmun hlutak ah a hlangkai ta a ni.

LSA Gen.Hqrs.Hruaituten thilpawimawh Sawrkar hotute hnen ah an thlen

Lai Students Association, General Hqrs. hruaitute chuan General Conference an neih a an thu passed te tih hlawhtlin a nih theih nan tunthlan tir lam khan Aizawl ah kalin Sawrkar thuneitu liante an dawr a, an thilthlente hi a hlawhtlin ngei an beisei tih LSA hruaitute hnen atangin kan dawng a, an thuthlen zing ah Thingkah a Polytechnic dintur chungchang, Gov’t Lawngtlai College Bus chungchang leh he College a faculty dah kim an duh thu te, GRHSS a Science zirna hawn an duh thu te, GRHSS High School Section ah Mathematics leh Science Zirtirtu dah an duh thu te, Lawngtlai a Gas Agenet dah belh an duh thu te, Lawngtlai Greater Water Supply Scheme thawh tan thuai an duh thu te a tel a ni. Tarlan tawh angin LSA General Headquarters hruaitute hian Pu H.Zothangliana Parliamentary Secretary in Zirlaite hmakhua ngaia hma a lakna ah lawmthu an sawi.

Enfiah

MGNREGS hnuaia mipui inhlawhfakna tur pawisa pek chhuah hmangin Khawl ruai an awm leh awmloh ngun takin thawktu lam ten an enfiah mek tih thu kan dawng.

Zirtirtute fuih



Nimin chawhnu khan YLA Hall ah Education Minister Pu Lalsawta chuan lawngtlai a Zirtirtute hma ah thusawiin, an hna chu mihring, mipuitling a chherchhuak tu an nih vangin theihtawp chhuah a tanla turin a fuih a, Zirna kalphung thar hmanmek ah pawh Zirtirtute chuan dinhmun pawimawhtak an nei tih a sawi.

I-Day hmanna dang


Bualpui NG ah Bialtu MDC Pu PT Lalchuanglura ho in Independence Day champha vawi-64 na hman a ni a, Bungtlang South ah BDO Pi Zikpuii ho in hman a niin kan hria, Sangau ah AH&Vety Minister Pu Nihar Kanti Chakma hoin hman a ni a, Lawngtlai East bialtu MLA Pu H.Zothangliana chuan Tuipang ah he Ni hi a hmang.

Thursday, August 11, 2011

Executive Secretary in LADC Annual Plan Budget 2011-2012 a sawifiah

Lai Autonomous District Council a Executive Secretary Pu C.Zoramthanga chuan LADC Annual Plan Budget 2011 - 2012 ah hnathawktute hlawh leh Sawrkar inrelbawl nan Budget pumpui atanga chhutin 75.13% hman tur a nih thu nimin a a Office Chamber a Lawngtlai a thuthar thehdarhtute thingpui a inpuina ah a sawi a, Pu C.Zoramthanga chuan Plan Budget chu a pumpuiin Cheng Nuai 2216 niin Hlawh bik ah Cheng Nuai 1240 za zel a (55.96%) hman tur a ni a ti a, 2011 - 2012 Budget atangin Arrear ah Nuai 252 ruahman a ni a ti a, Wages ah Nuai 27.20 Office Expense ah Nuai 20.30 Travelling Expense ah Nuai 25.85 Training Expense Nuai 9.80 Contingencies ah Nuai 3 Rent ah Nuai 18 Medical reimbursement ah Nuai 9.40 Purchase / Maintenence of Vehicle ah Nuai 59.30, Work Component / Minor Works (Including Rs.175 lakhs Thirteen Finance Commission) ah Nuai 551.15 ruahman a ni a ti. Budget Nuai 2216 hi State Sawrkar chuan kum laklawh ah a la rawn tihpun an beisei tih sawiin, kum hmasa ah pawh Additional Sunction cheng Nuai 550 State atangin LADC chuan a hmu tih a sawi bawk. LADC Sawrkar hnuai ah hian Plan Staff Regular 431 awmin Muster Roll a chhawr 7 an awm bawk. Executive Secretary chuan Pu C.Ngunlianchunga kaihhruai sawrkar chu sawrkar chaktak ti a hriat a hlawhna chhan ber chu Sawrkar na an chelh atangin LADC Budget chu nasa tak a a pun chhoh vang a ni a ti a, 2008-2009 a Plan Budget chu Nuai 995 niin, Pu C.Ngunlianchunga kaihhruai Congress Sawrkar a lo piang a, 2209-2010 ah chuan Plan Budget chu Nuai 1557 a kai chho a, 2010-2011 ah phei chuan Nuai 2327 a kai a ni a ti.

PMEGP Loan diltu Journalist a lungawilo

PMEGP loan diltu zing ami Sangau a Journalist pakhat chuan a lungawiloh thu a sawi a, Loan a dil dawn in Sangau a Mizoram Rural Bank Manager a biakrawn thu leh Bank Manager chuan thilawmdan KVI hotute a zawhfiah hnu ah loan chu dilve a nih thu a sawi a, a dilna pawh pawm niin, tunkar Thawhlehni khan Lawngtlai ah Interview hmachhawn tur a koh a ni a, Interview na ah Loan laktheihna tur atan a a thlan Sangau Rural Bank ah PMEGP Loan pekchhuah theih a nih loh thu an lo hrilh tih sawiin, State Bank ah chuan Lawngtlai leh Chawngte ah Loan diltheih a nih lai a District pakhat huamchhunga Mizoram Rural Bank te a huamkim lo chu hriatthiam har a tih thu The Lawngtlai Post a hrilh a, a sawizel danin Sangau a Rural Bank chu thlan a nilo a nih chuan a dilna chu dilna pawmtlakloh a ni tih hrereng chung a Interview tur a koh a ni tho chu mak a tih thu a sawi a, thingtlang mite huamkim thei deuh zawng a kalpuidan awmthei se a duh thu a sawi bawk.

LSA lawm


August Ni 9 khan LSA Gen Hqrs;Lawngtlai hruaitute chuan Pu H.Zothangliana Parliamentary chu a office ah an hmu a, mamawh an thlen te tha taka alo dawnsawn avangin an lawm hle.Lai Hostel,Aizawl mamawh a pek avangin lawmthu an sawi a, Lawngtlai Greater water Supply Scheme rei tak hnathawh tan lova awm chu,a hmalakna avangin thawh tan ani ta chu lawmawm antih thu an hrilh a.Lai District khua hrang hrang a ahnathawh te Industries & PHE Department a hna thawh ah te LSA chu an lawmhle.

CYLA Ground en



Nimin khan Kumin a Independence Day hmanna tur CYLA Playground chu Sawrkar thuneitute leh CYLA Hruaituten a hmun ah an enfiah a, Ground hi cheithat lai a nih vangin a diak hle a, Vengpui Field pawh a diak ve tho vangin Central YLA Playground hi Independence Day hman nan a pumpui a hmanloh mai rawt tha an ti niin kan hria.

Savun khap



District Information & Public Relations Office Lawngtlai atanga thudawnin a tarlan danin Mizoram State Pollution Control Board chuan Savun sawngbawl nan a Chi hman te hian lui leh ram a tichhe mek a, Savun sawngbawl nan a chi hman 90% chu paihna mumal lova paih a nih vangin hriselna atan pawh a pawithein a, heivang hian Mizoram State Pollution Control Board chuan Chi hmanga Savun sawngabawl, chi hmang a sawngbawl tawh hnu hman leh hmundang a phurh sawn te, Mizoram pawn atanga lakluh te a khap.

Solo LIVE dawn



Chhimtuipui Teenage Solo Competition neih mek chu zanin atangin YLA Hall ah chhunzawm a ni dawn a, Lawngtlai a Cable TV pahnih ten Live in an pechhuak ang. Zan in atang in Competiton leh Result puan te Live a pekchhuah vek tum a ni.

Wednesday, August 10, 2011

Pek tlak a Loan diltute leh a petu lam te an inbuatsiah a tul DC in a ti

Lawngtlai DC Pu B.Lalhmingthanga chuan Loan pektlak a Loan diltute an inbuatsaih a tul a, Loan latur thlang tute pawhin fimkhur takin, hlawhtlinpui thei ngei tur thlanchhuah a tul a ni a ti a, hethu hi nimin a Lawngtlai District a Prime Minister’s Emplyment Generation Programme (PMEGP) hnuai a Loan diltu te Interview neih hma a Loan Board thukhawm hma ah sawiin DC Pu B.Lalhmingthanga DC chuan Loan latute pawhin a rulh leh lam an ngaihpawimawh tul a tih thu a sawi. PMEGP hnuai ah hian Lawngtlai District ah Loan diltu 191 awmin Mizoram Co Operative Apex Bank hnuai a diltu 42, Mizoram Rural Bank hnuai ah 80, State Bank of India Lawngtlai ah 41 SBI Chawngte ah diltu 28 an awm.Lawngtlai District tan Mergin Money Nuai 19 ruahman a ni a, PMEGP hnuai a loan latute loan lak hi Sawrkar chuan an loan lak atanga za a 30 (30%) chu a rulh sak thin a ni.

Governor ho in Chhimtuipui khuahtur sawiho


Kolodyne II HEP 460MW kawlphetha hnukchhuak thei tur chungchang chu nimin chhun khan Mizoram Larsap Lt. Gen (Rtd.) MM Lakhera hovin Raj Bhavan ah sawiho a ni a. Chief Minister Pu Lal Thanhawla; Planning Board Vice Chairman Pu Lalkhama leh Ex-officio Principal Secretary Pu P.L. Thanga bakah MADC leh LADC hruaitu lu te, Mizoram sorkar mi pawimawh zual engemaw zat an tel.Kolodyne II HEP hmalakna turah hian December 22, 2008 khan Mizoram sorkar leh NTPC Ltd. ten thawhhona thuthlung an lo ziak fel tawh a. Sawihona ah hian NTPC atanga lokal Executive Director (Hydro) Pu MS Soin chuan project chungchang report a pe a. Project pumpui sum mamawh tur te, thawhhona thuthlung ennawna siamthat ngai lai ni a hriatte sawiho in, zangnadawmna pek tul chungchang leh ram mamawh lak dan tur te huamzau takin sawiho a ni.Sawihona ah hian Mizoram Governor chuan he project chungchang ah hian District Council hruaitute nen thu inhmu tak chunga sawiho pui zel a tum dan te, NTPC te nen pawha inbiak tawn reng a pawimawh thu a tarlang a ni. Chief Minister pawhin he project ruahman mek hi tluang taka a kal zel a beisei thu leh a kaihhnawih department hrang hrangte nen thil tul chak taka bawhzui turin Chief Secretary pawh a hriattir tur thu a sawi.

Camp nei mek


BCM Lawngtlai Bazar Biak In ah Pathian Hnathawhpuitu Team te chuan Gospel Camping an nei mek a, Upa leh Rawngbawltu te pualin Zan khat riakin Camping hi buatsaih a ni tawh a, nizan khan Kohhran a mawhphurhna dang nei te tan Camping hi tan leh niin, Zirtawpni khian an chhuak ang. Speaker Upa K.Lalenga leh a rawngbawlpui ten Pathian thuchah an sawi thin a, tuna Camping neih mek an chhuah hnu ah karleh lam khian mipui pualin Camping hi chhunzawm leh tum a ni.

Bank hawng dawn



Zirtawpni khian Mizoram Rural Bank, Branch thar, Bungtlang South ah Pu B.Lalhmingthanga DC in a hawng dawn.

MSDP hna chhuak



Multi Sectoral Development Programme hnuai a Hnam hnufualte dawmkan na tur a hna ruahmante chu tunhnai khan a thawktutur te tihfel a ni a, hnathawktur a thlante hian bul an tanna tur pawisa DC Office a helam khawihtute hnen atangin an lachhuak mek.