Thursday, September 29, 2011

National Disaster Management Day pualin Painting Competition DC in a hmanpui

Nimin khan National Disaster Management Authority Day denchhenin National Disaster Management Authority leh DC Lawngtlai te buatsaihin Gov’t Region Higher Secondary School ah, High School naupang te pualin Painting Compet ition buatsaih a ni, hawnna inkhawm Pu H.Lalrammuana, Sub Deputy Commissioner kaihhruai ah DC Pu B.Lalhmingthanga chuan chhiatrupna lo thleng thin thenkhat te chu a lo thlen loh nan a inven ngaihna awmlo te a awm a, thenkhat erawh chu mihring te fimkhur tawk loh vang a chhiatna kan tawh a awmfo thin a, kangmei ang chi te, leimin engemawzat te hi mipui lam fimkhur tawkloh vanga thleng a awmfo, heng laka fihlim tur hian tanlak a ngai nasa hle a ni a ti a, zirlai kalkhawm te chu midangte hnen a zirtirna pechhawng a, chhiatna lo thleng thin laka invendan tur leh chet lak dan tur sawrkarin a ruahman te ngaihven a, hmala thin turin a fuih. Painting Competition ah hian High School paruk atangin zirlai 59 telin Chhiatrupna lo thleng thei lam hawi lem an inziahsiak a, lawmman pakhatna hi Rs.2000/- leh Certificate pek a ni anga, Pahnihna Certificate leh Rs.1000/- Pathumna Certificate leh Rs.500/- a titha zual mi panga hnen ah Rs.300/- theuh pek a ni bawk dawn a, lawmman te hi Faina Hapta hmanchhungin sem a ni ang.

AH&Vety ten NLUP Sem, Mi 10 dawngzui tlaklo an awm

Nimin khan District AH & Vety Department hnuai a NLUP dawngtu, Lawngtlai khawpui chhung a mi chhungkua 175 te hnen ah a thawhhnih nan tanpuina DVO Office Lawngtlai ah sem chhuah a ni, tanpuina dawngtute hi Arvulh ah chhungkua 66 te hnen ah Rs.15000/- theuh pek an ni a, Vawkvulh thlangtu chhungkua 109 hnen ah Rs.14640/- theuh pek an ni. First Instalment pawisa la tawh chhungkua 10 te chu hma an lak that loh vangin Second Instalment hi pekchhuah an ni ve lo. DVO Dr.Lalthankima chuan an Department hnuai a NLUP tanpuina dawngtute chu dik leh tha tak, rintlak taka hnathawk turin a chah.

CEM lo thleng

Ram leh Hnam tana hna tul pawimawh thawk a zinchhuak Pu C.Ngunlianchunga leh Pu Hmun-Hre Vice Chairman te chuan nimin chawhnu khan lawngtlai an rawn thleng, Heng hruaitu zinchhuak te hi ramri ah ropui taka lo hmuah niin, heng zing ah hian Central YLA hruaitute pawh an tel.

Sipai Hotu Press Club ah

Mizoram awptu 26th Assam Rifles Commandant Col. Gaurav Chaturvedi chuan nimin chawhnu khan Aizawl Press Club a tlawh a, MJA member te nen inkawmna hun tha tak neiin, MJA Library te pawh enpui nghal a ni. Col Chaturvedi hian MJA Library-a hman turin Computer full set a pe a, he computer hi MJA Treasurer Pu Zonunsanga Khiangte-in a kut atangin a dawng a, inkawmna hun hi MJA Vice President Pu Vanlalrema Vantawl-in a ho a. MJA chuan Col Gaurav hi thingpui an inpui nghal a ni

Anti-Tobacco Meeting

Vawiin chawhnu dar 1 hian DC Chamber ah Anti-Tobacco Squad Lawngtlai District ten Meeting an nei dawn.

MLA Lokal

Lawngtlai West bialtu MLA Pu C.Ramhluna chu lawngtlai ah a chammek, nimin khan DC leh sawrkar mipawimawh dang te a kawm, MLA hi a bial fang tur a lo kal a nih thu an Party hotu lam atangin kan dawng.

Faina Hnatlang

October Ni 3 khian Areopagy ah faina Hapta hawn a ni dawn, hapta hman chhungin kumdanga tih thin angin inelna hrang hrang buatsaih a ni leh dawn a,Department lam te Faina Hnatlang nei an awm nual tawh.

PMEGP Task Force thukhawm

Nimin khan DC B.Lalhmingthanga ho in a Office Chamberah PMEGP Task Force, lawngtlai District an thukhawm .PMEGP Loan hi kumin chauh pek anih tawh dawn avangin kumina loan dil tuten harsatna an tawh loh nan he meeting hian bawhzui ngai te bawhzui dan tur sawiho a ni a,PMEGP hnuaia Loan la tawhte harsatna an neih leh neih loh te pawh thlir ho nghal ani.Kumina Loan diltu,loan hmutur a atana recomment te pawh thlir ho niin,line Department ten report an pe a,Loan diltute dilna pawh Bank ah thehluh vek anih tawh thu sawilan ani.Kumin atan hian Loan hi Trade hrang hrang thlangtu mi 23 hnenah pek ani dawn a,State Bank Of India,Mizoram Rural Bank leh Co-Operative Apex Bank kaltlanga loan hi pek an ni dawn ani.

Ruang phawrh

Hmanni deuh a tui tla hlum ni a hriat, amah hriat loh, Elecytric Veng thlanmuala vuiliam tak chu mamte Nu pakhat in a pasal ni thei awm a a hriat vangin thuneitute hriatpuina in nimin tlailam khan phawrh in enfiah a ni a, mamte Nu hian a pasal a nilo tih a enfiah hnu ah a sawi.

Phone thar

District Fisheries Officer Office, Lawngtlai chu Telephone No. 03835 232 ah biak pawh theih a ni.

CEM in thusawi dawn

Vawiin chawhma dar 10 hian CEM Pu C.Ngunlianchunga chuan Lawngtlai Bazar a Lai DCC Office ah zin Report a pe dawn. A duh apiang ngaithla tur in Party hruaitu lam chuan an sawm.

Wednesday, September 28, 2011

Un-Trained Teacher tan a Orientation Training D.C in a hmanpui

Nimin khan SSA Mission Block Resource Centre Hall, Lawngtlai ah SSA hnuai a Zirtirtu Training la neilo te pualin Orientation Training Ni hnih awh tur chu tan a ni a, he hun hi Lawngtlai DC Pu B.Lalhmingthanga'n khuallian niin a hmanpui. He Training Pu Vanlalvuana Deputy District Project Coordinator kaihhruai ah hian Pu B.Lalhmingthanga chuan Lawngtlai District chhungah hian Autonomous District Council pahnih Lai leh Chakma Autonomous District Council awmna a nih a vangin, Administrative dangte nen kan danglamna kawng tam tak a awm a. Elementary Education hi District Council-in a enkawl a. District Council-in a enkawl Elementary Education-ah hian sum a beitham em avangin Council hian Education-ah hma a la chak thei vak lova, Chutiang a nih mek lai chuan vanneihthlak takin, Central Sorkar-in SSA Programme India rampum-ah a lo tichhuak ta a. Kan District huam chhungah pawh SSA Project hnuaiah nasa taka hma lak a niin a hlawhtlinna pawh kan hmu mek a ni a ti. India Sorkar leh Mizoram Sorkar-in Zirna kawnga hmasawnna atan ruahmanna tha tak tak a siam mek a. Mizoram Sorkar pawhin, Education Reforms Commission dinin, Quality Education nei ngei turin hma a la mek a ni . Quality Education nei tur chuan School Infrastructure tha ringawt ni lovin Quality Teacher kan neih a ngai a ni. Chutianga Quality Teacher nei thei tur chuan SSA pawhin kum tinin Training hrang hrang, a lo buatsaih tawh thin a. Heng Training-te hi hmang tangkai a, Classroom-a kan zirtirna-ah pawh hmang tangkai ngei turin ka chah duh che u a ni a ti. Orientation Training ah hian DIET Lunglei atangin Pu Lalzarliana Principal DIET ho in V.Vanlalsangi leh Mary ten Training an pe.

LSA Cup-cum-Cultural Competition BDO in a hawng.

Nimin khan October Ni 1 thleng awh tur LSA Cup - cum- Cultural Competition chu CYLA Playground ah BDO Pu T. Vanlalmalsawmsanga'n a hawng. Thusawiin Zirlaite chu an zirlai ah theihtawp chhuah a hmala tur a chah in, hlawhtlinna chang thei ngei tur a inbuatsaih tur in a chah a, Zirlai ten Infiamna leh Hnam zia rang pholang thei zawng a intihsiakna thianghlim an buatsaih chu lawmawm a tih thu a sawi. LSA Cup hi tum thum neihna niin, LSA Cup ti a hming puah a nih hma pawh in Infiamna hmanga intihsiakna an lo nei fo tawh, kumin ah hian Cultural Item Rawkhathlak hmanga inelna chu telh niin, LSA General Hqrs. hruaitute chuan hetiang ang buatsaih a nihna chhan chu Zirlaite inpumkhatna leh thawhhona tha a awm zel theih na tur a nih thu an sawi. intihsiakna ah hian Branch 15 leh Hqrs. leh Sub Hqrs. pakhat ve ve an tel. Football leh Volleyball ah intihsiakna hi neih a ni.

Auto-Rickshaw khaltute Zirtirna pe

Nimin khan Lawngtlaia Auto Rickshaw khalhtu te tan Lawngtlai Police te chuan Training an buatsaih,he training Pu Lalchangliana O.C kaihhruaiah hian Driver te hriattur pawimawh thil tamtak zirtir an ni a.Pu Lalremsanga Sailo.S.I chuan Signal light hman dan tur chipchiar takin a sawi a.Pu V.H Kilchema,S.I pawhin Dan bawh chhiate hremna awm thei 33 te a hrilhfiah bawk.Pu Phuntlunga Head Constable chuan Traffic Rules chi hrang hrang hrilfiahna a nei bawk.Pu Lalchangliana OC chuan Auto Rickshaw Driverte hi mipui rawngbawltu in ni a,Lawngtlai khawpui tan mi pawimawh tak inni tiin passenger phur chi in ni a,in passenger phurhte an him em?tih in ngaihtuah fo tur ani a ti a,passenger drop dawnin kawng zau lai in thlang hram hram tur ani.Lawngtlaiah motor atam tulh tulh a,in pawimawh tulh tulh ani tiin Driver te nun mawi taka awm dan tur leh Traffic Rules chi hrang hrang sawi zauna a nei bawk.Training ah hian mi 34 an tel a,nimin a tello te pualin Lawngtlai Police te hian Training buatsaih leh an tum.

MJA Hruaituten Power chungchang ah SDO an kawm

Nimin chawhnu khan MJA Lawngtlai District hruaitute chuan Power chungchang ah SDO Pu Ram nath Prasad chu a Office ah an kawm a, MJA te hian Power Supply mumallo thin leh, shut down a zing lutuk chu mipui ten an ngaimawh thu leh, Power shut down a nihna chhan mipui ah puanzar a ni tawklo chu Department lam a thawk ten tan la deuh se an duh thu te, inenchhawk a nih dawn pawhin mipui te hriattir an ni fumfe thin lo chu tan lak ngai an tih thu te SDO hnen ah hian an thlen a, Sawrkar in Accredited Journalist te chu a theih chin chin ah duhsakna a lantir lai a, lawngtlai a Accredited Journalist te tunhma a Connection pahnih pek thin chu thawktuten Dan tlawhchhan a an Connection pakhat an hlih sak hnu ah, midang engemawzat Connection pek kawp an awm tho si chu MJA hruaitute chuan hriatthiam har an tih thu SDO chu an hrilh bawk. Pu Ram Nath Prasad chuan MJA te thil thlen chu a theih ang anga lo enpui a tum thu a sawi a, Lawngtlai District ah thawktu an indaih loh vangin mipui tan hmalakna pawh duh angin an kalchakpui theilo tih SDO chuan sawiin, hnathawktu mamawhzat 49 a nih laiin tuna thawktu awm chu 30 chauh an nih thu leh JE pahnih phei chu Saiha atanga Attach an nih thu a sawi a, Linesmen pathum chu hmundang ah Attached an nih thu a sawi bawk.

Lo haw dawn

Sorkar tulpawimawh a zinchhuak CEM Pu C.Ngunlianchunga chu vawiin hian a lo haw ang

NGO kokhawm

YLA Hall ah vawiin hian World Vision chuan NGO te nen inkawmhona hun buatsaih an tum.

PMEGP Meeting

Vawiin hian DC hoin PMEGP Task Force chuan DC Chamber ah Meeting an nei dawn.

Enkawli chak

Patiala, Punjab a Women Boxing Championship khelh mek ah Lawngtlai Boxer Lalenkawli chuan nimin khan a tumpui Uttaranchal(?) mi chu 15-1 a hneh in Final a lut, Enkawli hian vawiin ah Semi final a khel ang.

Hmanrua sem

Nimin khan D.R.D.A.Saiha chuan BRGF hnuaiah Saiha District chhunga Carpentry leh Black Smithy a eizawng mi 100 chuang hnenah Rs. 12 Lakh chuang man bungrua a thlawn in an sem chhuak.

Police Training

Rikrum leh buaina hrang hrang chhuah palh nikhua a media te nena inlaichinna tha tak siam dan tur chungchangah Mizoram Police hotu lian te tan training nithum awh tur buatsaih chu Aizawl a I&PR Conference Hall-ah tan a ni a. Training hi DGP Pu Lalrokhuma Pachuau chuan a hawng.Hetiang Training hi tum 22 neihna a ni.

Tuesday, September 27, 2011

Mirethei zual te eizawnna World Vision CADP ten an ngaihtuah sak

Nimin khan Lawngtlai District a Mirethei zual te World Vision chuan an Office ah kokhawmin, eizawnna bul an tan theih dan tur sawipuiin, ruahmanna an siampui. World Vision India, Chhimtuipui Area Development Programme, Manager Pu Maren Nampui in a sawidanin, BPL zing ah rethei zual Poorest of the Poor an thlan chhuahte hnen ah eizawnna nghialnghet an neih theih nan kawng hrang hrang in tanpuina, World Vision hnuaia Programme pakhat Economics Development Assistance atangin chhungkua pakhat tan tum khat ah Rs.30000/- aia tam lo an pek thin a, heng Mirethei zual eizawnna an dap sak te hi kum nga chhung World Vision chuan a enkawl thin a ni. Tun dinhmun ah Lawngtlai District ah Mirethei zual chhungkua 1994 thlanchhuah niin, nimin a kohkhawm te hi chhungkua 69 anni a, heng Mirethei te hian an eizawnna atan a an tihve theih tur eizawnna hrang hrang te World Vision a thawkte nen sawiho in, eizawnna atan a thlak a ngaih te chu World Vision lam hian chhawmdawlna an pe zui dawn a ni. Kum kalta 2010 khan Chhungkua 250 hnen a eizawnna bul an tan nan World Vision hian hma a lakpui tawh a, hetiang ruahmanna hi kum 2003 atang khan kalpui lo ni tawhin, mitamtakin eizawnna bultanna neiin chhungkua an inchawm chho tawh tih World Vision manager chuan a sawi a, heng bul an tansak zing ah hian ranvulh an tam ber thu leh World Vision tum bulpui ber pawh heng mirethei te dawmkan hi a ni a ti.

Tur in hrai

Ngengpuikai VCP hnen atang thudawn danin Inrinni khan Ngengpuikai khawlai a lui luang Dillui chu tur hmanga hrai a ni a, khawtlangan lungawilo hle. Hemi chungchang hi nimin khan Ngengpuikai VC te hian thuneitute hnen ah an thlen a , Dillui hian Ngengpuilui a fin.Tur a hraitute hi Ngengpuikai khaw mi pakhat leh lawngtlai lam mi niin an sawi.

DC ho DCPA Lawngtlai, an thukhawm

Nimin a DC Pu B.Lalhmingthanga ho a, a Office Chamber a District Consumers Protection Association Meeting chuan Telephone(BSNL) chugchang ngaihtuah in,phone Bill pek tawh bill nawn awm thin te,Bill pek tawh dawn nawn leh awm thin te chu Telecom lam chuan an hmalak mek na anih thu a sawilang a,reilo teah a fel theih mai an rin thu a sawi bawk.Tin,Thingfal a Repeater Transformer chu a chhiat tawh thu leh Diesel a heh avanga harsatna tamtak awm chu sawi niin,he transformer tha lo hian Lawngtlaia Phone hmangtute,BSNL Broadband hmang tuteah harsatna a thlen thin avangin,Thingfal ah hian tuna aia Current an neih that theih dan tur thuneitute hnena thlen nise an ti bawk.POL chungchangah Legal Metrology neih that loh em avanga harsatna an tawhte sawi ho ani a,hei hi a rang lama hmalak nise an ti bawk Meetingah hian an hmalak tawhte thlir let in,tuna an kal tawhnaah mipuite thlawpna thatak an dawn avangin lawmawm an tih thu an sawi a,hma lak zel na turah pawh mipuite tawiawm zel turin an ngen bawk. Meeting ah hian ei rawngbawlna Gas chungchang ngaihtuah pawh ngaihtuah niin ,mipuiten rualkhai zawka Gas an chan theih nan thla hnih chhung vawikhat tal chhungkaw tinin la theih se an ti a,a sem hunah pawh Gas Agent te Consumer hruaituten pui thin se an ti bawk. Lawngtlai District Consumer Protection Association Meeting Vawi 2 na Ni 24 a an neih ah chuan Resolution siamin Pu B.Lalhmingthanga MCS Deputy Commissioner,Lawngtlai chungah lawmthu sawiin, hun engemaw chen Consumer affair ngaihthah anih tawh hnu a, a siam thatna hna thawk a,he lama mipuite harsatna min ngaihtuahsak a min ngaihpawimawh sak avangin keini DCPA Lawngtlai chuan lawmthu kan sawi ani tiin Resolution an siam.

Sangau Maxi Cab Chesual

Nimin chawhnu dar 1;10 vel khan Aizawl-Sangau inkar a tlan TMS Maxi Cab MZ-03-2505 chu Serchhip leh Keitum inkarah a chesual a, vanneihthlak takin thi an awmlo . he Maxi Cab ah hian hmeichhia 6 leh mipa 4 an chuang a, Driver hi Lalrinfela a ni in, Motor neitu hi Pu Rothanga Sangau ta ni a sawi ani. Serchhip leh Keitum a mi tlawmngai ten hliam te hi dar 2:50 vel khan an la chhuak kim thei a, hliam zingah hian Suimoii leh Rohmingsangi te chu a nazual deuh an ni. Midang pawh hliam an awm nual. Chetsualna a thlen chhan hi kawng kawiah motor dang nen an inpel chu Sangau Maxi Cab hi a ke lamah chiang kuanglo a awm avangin kual zo lovin a tlanliam ta tih thudawnna chuan a sawi.

LSA Cup-cum-Cultural Competition

LSA chuan vawiin atang hian CYLA Playground ah LSA Cup-cum-Cultural Competition an tan dawn, BDO PuT.Vanlalmalsawm- sanga’n a hawng ang. Inpumkhatna tha leh infuihtharna tur atan a buatsaih niin October Ni 1 ah zawhfel hman an tum.

Training dawn

Vawiin leh naktuk hian SSA Mission Lawngtlai District chuan Orientation Training a buatsaih dawn, D.C Pu B.Lalhmingthang’n khuallian niin a hmanpui ang.

Direct Finance Political Oxygen -H.C Lalmalsawma Zasai

Nimin khan MNF Dist.Hqrs. Saiha President Pu H.C.Lalmalsawma Zasai chuan saiha a thuthar thehdarhtute kawmin MADC election a lo hnai leh ta a. Congress hruaitute hian Oxygen an neih tawh loh avangin an Political Oxygen Cylinder Delhi ah an zu zawng leh a. MADC inthlan a hnai bawk a, An Oxygen lem bur “Direct Finance” hmahruai an rawn hawn leh ngei kan ring a ni a ti. Kum 2009 a Autonomous Dist.Council hruaituten Prime Minister hnena Direct finance an dil ah khan tuna kan Chief Minister leh MP(LS) in an recommend tawh a. Mahse, an ngawi vang vang a, Cabinet Meeting hnuhnung berah Direct Finance an support thu an sawi leh ta a. Keini hnam tlem zawk ten Direct Finance kan tih hi India Constitution tihdanglam ngai, Sixth Schedule siamthat ngai a ni a. Chu chu UT a ni mai dawn a ni a ti a, Rs.Nuai 10 tel a Oxygen bur “Direct Finance” zuk lei an tum leh hi a bur tak ni lovin “A hmahruai” leh “an ngaihtuah mek a, an peih tep” tiin tlang an rawn kawm leh ngei kan beisei a, kan lo sawisak lawk a ni e.Pu HC Lalmalsawma zasai chuan a ti.

Chanchintha thlenni lawm

Nimin kha Mara rama chanchintha thlen ni champha vawi 104 na a nia, ECM kohhran hrang hranga ten hlim tak leh urhsun atakin an hmang.Kum 1907 September 26 nimin angah khan Rev. R.A. Lorrain(Rev. JH. Lorrain nau) te chhung chuan Mara rama chanchintha meichher chhi turin Serkawr khuaah an lut a, Mara ramah hian chanchintha hril hna thawk in, an tuchhuan hnuhnung ber Rev. Violet L. Mark phei chuan vawiin ni thlengin ala awmchilh reng a ni.

Monday, September 26, 2011

National Director in Lawngtlai District a MGNREGS kalpui dan a endik

Sept 23 tlai Dar 4 khan Central Ministry of Rural Development Delhi tirh-a Lawngtlai District a MGNREGA kalpuidan endik tura lokal Dr. Kashawa Metri, National Director, CORD New Delhi chuan Lawngtlai D.C Pu B.Lalhmingthanga chu a Office ah hmu in,NREGS hnathawh chungchang a sawipui.National Director hian Bungtlang 'S' Block huamchhunga hnathawhte endikin, khaw hrang hrangte a tlawh kual a,Lawngtlai lam pana alo chhohna ah khaw hrang hrangte a tlawh nghal bawk.NREGA Lawngtlai Dist. a hnathawhte chu a tha tlangpui niin Pi Kashawa Metri chuan a sawi a,amaherawh chu Plan siam laiin abik takin thingtlang lamah mipuite an chanvo an ti tawk lo nia sawiin,mipui chanvo a tlem deuh nia a lan thu a sawi.Social Audit pawh anih tur angin an kalpui zolo deuh nia a lan thu a sawi chu DC Pu Hmingtea chuan October Ni khat atanga District khawtinah Social Audit neih tan tura hmalak anih thu a hrilh a,Plan siam laia Dan in a phut anga mipuite duhdan ngaih pawimawh anih tur thu a hrilh bawk Dr. Kashawa Metri, hian NREGA hna thawktute harsatna Internet Facilities Block tina an neih theih nan,V-SAT dah te,lirthei chhe lutukte leh harsatna dang te chu thu neitu sang zawk hnena a thlen tur thu a sawi a.Chawngte RD Block bikah Block huam chhung zau lutuk chu thawk tuten harsatna an tawh phah nia a lan avangin, hna tha taka thawhtheih nan Chawngte Block hi pahnih a then emaw.Additional Block dah emaw tul a tih thu a sawi bawk. Dr. Kashawa Metri, National Director, CORD New Delhi hian nikum July thla khan Lawngtlai District a MGNREGS hmalakna a hmun ah kalin a en tawh bawk a ni.

YLA Day Vawi 37-na hmang

September Ni 23 YLA Day vawi 37-na denchhen hian CYLA hruaitute chuan Lawngtlai a Hospital pathum leh Lairam Motherless Home ah te thilpek an hlan. YLA Day hi Branch ten vantlang tana thiltha tih nan leh Member te infuih thar nan leh intihhlim nan te an hmang.Hriat theih chin ah Lawngtlai-III leh AOC Branch te chuan an huamchhunga National Highway-54 chhe zual lai siamtha in hna tlang an nei a, Chandmary Hall ah, Chandmary Branch leh an Branch atanga indang tawh Branch ten a huho in Day hi an hmanga, LADC a E/M Pu H.Chhuanawman a hmanpui. Electrict Veng chuan Branch chhunga chawimawi tlak te an chawimawi bak ah infiamna chi hrang hrang nen Day hi an hmang a, Bazar leh Council Veng Branch ten veng chhung thenfai hna an thawk a, Branch dangte paw’n midang tana thiltha tih nan Day hi an hmang. YLA hi Kum 1974 September Ni 23 khan din niin, tun dinhmun ah Branch 95 nei mek in Member hi sing hnih bawr vel an awm mek.

Sabuk endik

Inrinni zing khan Lawngtlai a sa zawrh te buk a tlin leh tlin loh Lawngtlai District Consumers Protection Association leh Police tangkawp ten an enfiah. Sa zawrhna hmun hrang hrang te an fangkual a, sa zuar ten bukna an hman te ngun taka an endik bak ah Sa lei tawh sa te pawh buk nawn sak an nei nual a, sa buk tling lo leh bukna diklo hmang manchhuah an nei lo. Consumers Association hruaitute chuan Sa zuar ten dik taka an buk chu lawmawm an tih thu sawi.

Gospel camping

Vanlalengmawia Sailo leh a Team Kross Thupuangtu Team ten Council Veng BCM Biak In a Gospel Camping an neih chu Inrinni khan an chhuak a,chhawng Camping hi chhunzawm leh tum niin naktuk tlai hian camping chhawng hnihna neih tan a nih tur thu kan dawng.

Niawhtlang tlawh

YLA General Conference neihna tur Niawhtlang chu Inrinni khan CYLA hruaitute leh Pu Lallura Chinzah E/M LADC ten an tlawh a, Conference neitur a inbuatsaihna kalpui zel dan tur an en.

Wednesday, September 21, 2011

BLO Training Pu B.Lalhmingthanga D.C in a hmanpui

Electoral Roll Summary Revision atana inbuatsaihna kalmek ah nimin Lawngtlai DC Conference Hall ah Lawngtlai District chhunga Booth Level Officers te tan Training thawhhnihna buatsaih a ni. Training hawnna a thusawitu Lawngtlai District Election Officer Pu B.Lalhmingthanga chuan India ram hi inthlang ram kan ni a, chuvangin; sorkar tha leh dik nei tur chuan inthlanna dik leh felfai kan neih angai a, chumi nei tur chuan electoral roll dik leh felfai neih chu thil pawimawh leh tul pawimawh hmasaber a ni a ti a,Inthlanna hmuna mipui leh hnathawktute inkar a harsatna thleng tamber leh dan bawhchhiatna hial lo awm thin te hi a tlangpuiin kan E/Roll diktawk loh vang a ni duh khawp mai a ti a, hetiang harsatna te hi kan District chhunga a awm loh nan Training a lo kalkhawm BLO te chu an mawhphurhna hrechiang tur te, E/Roll buatsaih chungchang a kaihhruaina dan te ngaipawimawh theuh tur leh kum tlinglo leh India khua leh tui dik tak nilote E/Roll a khung an nih loh nan a fimkhur theuh turin a chah. District Election Officer bak ah Pu Thangchem Zathang ERO leh Pu T.Vanlalmalsawmsanga AERO ten thu an sawi bawk. He BLO Training ah hian Muster Treainers mi pariat ten E/Roll buatsaih chungchang a kaihhruaina dan te chipchiar takin zirtirna an pe. Lawngtlai District ah hian BLO 148 an awm a, Tuichawng Constituency ah 50 awmin an ni tan hian tun thla Ni 15 khan Chawngte ah Training buatsaih sak an ni tawh a ni. Tun tum a Training hi Lawngtlai East leh Lawngtlai West Constituency chhung a BLO 98 te tan a buatsaih niin vawiin a Training ah hian BLO 73 an tel a ni.

District PYKKA Sport nimin atang khan tan a ni

Nimin khan Kum 16 hnuailam tan District PYKKA Sport chu Lawngtlai Chandmary Volleyball Court ah SDO (S) Pu Lalhmunsanga Lawtlai chuan a hawng. Sport September Ni 22 thleng awh tur ah hian Lawngtlai District a RD Block pali Lawngtlai, Sangau, Bungtlang South leh Chawngte Block ten intihsiakna an nei dawn a, Infiamna chi hrang hrang Football, Volleyball, Athletics, Boxing, Table Tennis, Batminton leh Hmeichhe tan bik Hockey ah te intihsiakna neih a ni ang. Hawnna inkhawm Pu S.Vanlalkulha Treasurer lawngtlai District Soprt Committee kaihhruai ah Khuallian Pu Hmunsanga chuan Sawrkar laipui hmalakna hnuai ah thingtlang a chengte infiamna lam a hma an sawn theih nan a ruahmanna a siam hi a lawmawm em em a, infiammite chu an theihna te taima taka tipung a, tan la sauh sauh turin a fuih. , District Sport Secretary Pu C.Lalhmakima chuan report a pek hnu ah infiammi te chu Immanuel L.Sathing-an thutiam a neihtir hnu ah intihsiakna hi tan a ni.

Bethel Prayer Mount hnatlang

Nimin khan Sipai tlang ah Non Denominational Prayers Fellowship te buatsaihin Tawngtaina hmun tura Upa L.Cheuluaia te chhung in ram a pek Pathian hnen a hlanna leh Tawngtaina Tlang Bethel Prayers Mount ti a vuah sam fai hnatlang neih a ni. Biak In hrang 21 a lawi mi 90 chuang hnatlang ah hian an chhuak.

LADC Session Hall Building kawngka tichhia

Lai Autonomous District Council, Legislative Secretariat Building, Session hall ti a hriat lar ah nimin piah zan khan mi tu tih hriat loh a lut tih nimin zing a he Building enkawltu Chowkidar ten Office an hawn in an hrechhuak. He thilthleng hi nimin zing vek khan Lawngtlai Police hriattir nghal niin, a hmun ah thilawmdan Police te hian an enfiah nghal a, LADC a Executive Member Pu Lallura Chinzah leh Legislative Secretary Pu H.Lalramenga ten Police te hi thilawmdan an enpui. He Building luhna puiber Kawngkharpui chu tihchhiat niin, Building chhung a Room No 3006, General Establishment Romm kawngka kalhna Tala chu tihchhiat a ni a, tukin a Police leh Council hotu ten an enfiah lai hian thilbo awmang leh misual chetna hnuhma langsar dang an hmu lova, Lawngtlai Police ten he thil thleng hi an chhuizui mek. Misual hi he Building chung(Top Floor) a Canteen ah pawh a lut ni in a hriat a,thilkhawih a neih erawh Canteen nghaktute hian an hrelo. Building chhung a Room dang ah pawh a luhna hnuhma hmuh a nilo.

Sur Sangam ah Mizo 3

Doordarshan Kendra (North East) chuan Sur Sangam Music Reality Show Guwahati a neih mek chu intihsiakna hi Hindi leh Western Music-ah then hran a ni. Western music bikah hian Mizo 3 – Elizabeth Lalbiakhluni Lawngtlai Council Veng , Lalbiakdiki leh TC Vanlalruata te chu top 10-ah an la tling a; nizan khan intihsiakna chhunzawm a ni a, mi 6 thlanchhuah an ni ang. He intihsiaknaah hian Western Music bikah endiktu mi 3 zingah Pi PB Lianthangpuii pawh Mizoram atangin a tel nghe nghe a ni.

Public Information Campaign Thenzawl ah tan a ni.

Nimin khan Chief Minister Pu Lal Thanhawlan Press Information Bureau leh I&B Ministry hnuaia Media Units hrang hrang - DDK, AIR, DAVP, DFP, Song & Drama Division, Mizoram Sawrkar leh MJA te buatsaih Public Information Campaign on Bharat Nirman/ Flagship Programmes Thenzawla Tualvungi Hall-ah a hawng. Hawnna inkhawm hi Pu Mangjangam Touthang, Core Committee Chairman in a kaihruai a ni.Thusawiin Chief Minister chuan UPA sorkar-in thingtlang mite hmasawnna atan programme tam tak a buatsaih a, heng programme leh scheme te hi mipuite hamthatna programme anih angin a kalphung leh a kaihhruaina te chiang taka mipuiin an hriat theihna turin Public Information Campaign hi ruahman a ni a. Chuvangin mipuite pawhin a taka kan chhawr tangkai theih nan heng zirtirna te hi thahnem ngai taka ngaithlaa hriatthiam loh lai te pawh a enkawltu department officer te hnenah zawh nise la, mipuite tana department in duhthusama an enkawl loh pawhin RTI hmangin zawhfiah theih zel a ni, a ti.He PIC ah hian khual zahawm Pu P. Lalchhuanga, Serchhip DC leh Pu L. SailoSerchhip VCP ten thu an sawi a. Lawmthu Pu Lalsiama Fambawl, Dy. Director, I & PR in a sawi bawk.Bharat Nirman/Flagship Programmes hrang hrang - PM’s New 15-Point Programmes for the welfare of Minorities, PMGSY, Minor Irrigation, NRHM, IAY, SSA, RGGVY , Mid-Day Meal, ICDS, JNNURM, RTI , MGNREGS etc. nihphung leh Mizorama tih hlawhtlin a nih dan inhrilhfiahna/ inzirtirna neih a ni a. Mipui tan Campaign hi a tangkai lehzual nan heng thupui atangte hian Zawhna leh Chhanna hun siam a ni bawk. PIC ah hian.KVIC, KVIB, MSACS, IGNOU, etc. ten Exhibition an nei a. Bharat Nirman/Flagship Programmes hrang hrang te tih hlawhtlin a nihna thlalak phochhuah (Photo Exhibition) a ni.

Tuesday, September 20, 2011

State Department hnathawh thenkhat Council a pek tum leh Direct Finance a inzawmlo- F.Rohnuna Chairman

Lai Autonomous District Council a Chairman Pu F.Rohnuna chuan District Council Area a State Sawrkar Department te hnathawh lai engemawzat District Council kut a hlan tumna awm mek chu State kaltlang lova Central atanga sum hmuhtheih nan a Direct Finance buaipui mek nen inzawmna a nei lo a ti a, Nimin a The Lawngtlai Post in a kawmna ah Pu Roa chuan Direct Finance puitlin nan chuan Parliament ah putluh a passed a ngai a ni a ti. Mizoram Gazette Vol-XL, No.388, September Ni 1 a chhuak ah District Council kut a State Sawrkar Department 19 te hmalakna thenkhat District Council kut a hlan tumna awmchhan ber chu hmalakna inthuah a awm loh nan a tih a nih thu sawiin, thlathum chhung a tihfel tur a tih niin, State leh Council lam nen ruahmanna la siam ho tur a ni a ti. Mizoram Gazette a chhuah a nih dan chuan State Department 19 ten District Council Area a hna an thawhmek thenkhat, District Council Sawrkar in hmalakna a kalpui ve tho te chu State Department in kalpui tawhlo in, District Council kut a hlan tur a tih a ni.State Department khawihlai Council kut a hlan tur a ruahman te: Agriculture ah Scheme - 6, AH & vety ah Scheme- 2, Art and Culture ah -4, Cooperation ah - 3,Horticulture ah-8, Industries ah-3, LAD ah-3, Minor Irrigation ah-1, PWD ah-2, Rural Development ah-4, Social Welfare ah 3, Soil and Water Conservation ah 2, Sport and Youth Services ah Scheme zawng zawng, Sericulture ah 2, te niin, UD&PA, Transport leh Fisheries ah te Council hmalakna tur bik ruahman a ni bawk.

Kawng siam na pawisa NLUP ah hman a nilo.

NLUP Implementing Board (NLUPIB) hotute te thusawi Sawrkar thuchhuah a tarlan a nih dan in, Mizoram Political Pary pakhatin National Highway leh PWD kawng chhiat chhan ah NLUP atan kawng siamna tur sum pawh hek ni a an ngaih thu an ziah chu hriat loh vang a ni an ti. NLUPIB chuan Cabinet Committee on Economic Affairs in 'Comprehensive and Integrated Socio-Economics Development Project, NLUP hnuaia Mizoram sorkarin a hman tur Rs. 2873.13 crore (Rs. 1000.84 crore chu Centrally Sponsored Scheme (CSS) angin, Rs. 1526.14 crore chu Additional Central Assistance (ACA) leh Rs. 346.15 crore chu beneficiary contribution atangin an pawm (approved) angin hman a nih thu sawiin, hemi sanction kimchang chu an website ah a hmuh theih thu an sawi. Heng sum te hi Department of Expenditure, Plan Finance Division, Ministry of Finance sanction order nei thlapin NLUPIB chuan an hmang a, PWD kawng siamna tur an hmang lo tih an sawi a ni.

Martar Day

Mizoram in Zalenna a sual lai a nunna chante hriatreng nan a hman thin Martar Day chu vawiin hian hman a ni dawn a, he Ni hi Lawngtlai ah chuan MNF Office Hnam Run ah hman a ni dawn a, chawhma dar 11 atangin hun hman tan tum a ni a, Martar chhungte atang in thusawi ngaihthlak a nih dawn bak ah MNF District hruaituten thuchah an sawi bawk ang.

Tuitla

Inrinni September ni 17 tlai dar 4 vel khan Pi Zawradi-i kum 55 mi chu Kawlchaw bul Chhimtuipui lui a inbualtur a kal chu a haw mai loh avangin khawtlangin anzawng a, zankhua an zawn hnu Pathianni zing dar 7 vel khan kawlchaw atanga KM 3 vel a hla lengkir feet 30 vel asang hnuai ah a ruang hi an chhar ta ani Pi Zawradi-i ruang hi Pathianni tlai dar 4 khan Kawlchaw East thlanmual ah vuiliam a ni. Amah hi pasal sun tawh niin , fa 4 neiin kawlchaw ah hian afanu pasal nei hnen a khawsa a ni a, tunhmalam chuan Tuipui Ferry khua a lo cheng tawh thin a ni.

PYKKA Sport

Vawiin hian Lawngtlai District Level PYKKA Sport chu chu tan a ni dawn, he Sport a tithate chuan State Level PYYKA Sport ah District ai an awh ang.

Nirman Campaign

PIB leh I&B Ministry hnuaia Media Units hrang hrang leh Mizoram Sawrkar leh MJA tangtlanga an buatsaih Public Information Campaign on Bharat Nirman/ Flagship Programmes, Serchhip District-ah Ni 20 – 23 Sept’ 2011 chhungin neih a ni dawn

Unique Identification (AADHAAR)

Aadhaar tih hi Mizo tawnga a awmzia chu ‘tantu’ emaw ‘bulthutnghet’ tihna a ni a. Unique Identification Authority of India hmalakna hnuaia India ram khua leh tui zawng zawngte tana Identity danglam leh felfai tak neih theih vek tura a duan a ni. Aadhaar hi digit 12 number a ni a. Mimal chhinchhiahna, a chenna kimchang, a taksaa midang laka a danglamna leh a thlalak te chu database hmunpuiah dahkhawm a ni a. Heng chhinchhiahna te hi rang tak leh awlsam takin a en zung zung theih dawn a ni. He number hmang hian sorkar leh mimal sumdawnna a thil felfai lo leh dik lo taka thil tih tumte a vengin a chhui zung zung theih dawn a ni. Aadhaar number hian mimal tinte chu an sakhaw vawnah te, an chenna hmun te, an hnamah te thliar hran a nei lo ang. Aadhaar engtin nge i neih ang : Aadhaar enrollment tih nan pawisa engmawh chawi a ngai lo. India ram hmun hrang hranga Aaadhaar enrollment centre khawiah pawh Identity proof leh Address proof kengin enrollment a tih theih. Identity proof atan heng documnt : Photo ID Card, PAN Card, Govt. ID Card, Voter ID, School leh College in Photo ID card an siam. Driving License, Passport leh a dang. Address proof atan chuan : House number chiang taka lanna document, Passport te, tui bill, telephone bill leh electricity bill thlathum aia upa lo pekna te, Vehicle Registration tihna te, Post Office Passbook, V/C lehkha Address lanchianna leh Postal Department in Address Card an siam. Nangmah emaw, in chhungkua member dangin document hman tur i nei lo anih pawhin enrollment hi a tih theih a. Chhungkua a hotu berin document kimchang a nei a nih chuan chhunkaw member dang tan Introducer angin a tang thei a ni. Chhungkaw hotu in Document a lo la nei lo anih pawhin Enrollment tihna hmuna thawkte kha Introducer ah an la tang thei zel a ni. Enrollment hi vawi khat chauh tih tur a ni. A thatna te : Aadhaar hi Identity chian nana a kimchan em avangin, miin khawi hmunah pawh sorkar leh mimal sumdawnna atana document chi hrang hrang a ken ngai thin te kan a ngai tawh dawn lo a ni. Bank account hawn na ah emaw, Passport dil nan emaw, driving lisence dil naah leh thil dang dangah a tangkai hle dawn a ni. Mirethei leh harsa zawkte tan pawh awlsam zawkin Account hawnte leh sorkar leh pawl hamthatna an chan turte rang takin an ti ve zung zung thei dawn a ni. Bank te leh insurance lamte a huam vek dawn a. Mipuite hamthatna atana sorkar hmalakna dawng vek turin khua leh tuite a pui thei a ni. Mizoram Postal Division hnuaiah hian Postal Department hi Registrar niin a awm a. Tunah hian enrollment hi Aizawl Head Post Office (Phase I Aizawl Dist) ah tih theih reng niin bul tan a ni tawh a. Phase II atan Champhai, Kolasib leh Lunglei Post Office ah Enrollment Centre hawn vat tum a ni. Mipui leh Enrolling Agency te tana enrollment tih a awlsam theih nan zirna in leh veng chhung council ten anmahni huamchhunga enrollment tih an duh chuan Postal Department hotute hnenah hriattir reng theih a ni. Mobile Enrollment Centre nena heng hmun te hi tlawh an ni ang. source : diprmizoram

Monday, September 19, 2011

Consumer ten an chanvo diktak an chan theih nan D.C ho in hmalakdan tur rel a ni

Kar kalta Zirtawpni khan Lawngtlai DC Chamberah District Consumer Protection Assn. chu D.C Pu B.Lalhmingthanga hoin an thukhawm. Meeting hian District Consumer Forum changtlung zawka kalpui nise,District Forum Court hi anihna taka kalpui anih theih nan hmalak nise. Legal Metrology Deptt Sorkarin awm tura atih,tun thlenga la awm mumal lo hi mumal taka a function theih nana hmalak te,mipuite Gas la tur thui tak tak intlar ngai thinte,chanloh awm thinte a bo theih nan a sem dan tih danglam leh gas bur semtir zat tur bituk nise. Gas indaih lohna a san viau laia Black a leitur awm thinte tih tawp dan turte,Connection thar lak a,a thuk in pek luih awm thin te,Cash memo inpek chhuah awm ngailo te leh a rate a dik em tihte en fel ni se,Show Room atanga gas pekchhuah Home Delivery rate ang tho a pek ani tih thu an dawn chu enfiah ni bawk se an ti a,Gas buk tlinglo leh Cap seal himlo enfiah ni bawk se tiin an rel a.Bus leh Maxicap ticketah,Ticket refund theih loh tih an ziak thin chu dan kalh anih thu mipuite hnena hriattir nise an ti a,Tin,Lawngtlaia thil man sang lutuk chu control tura hmalak nise an ti a.Uar zawkin Consumer Right Awareness Campaign kalpui nise an ti bawk. He Meeting hian Gas man chungchang Common Point ah Rs 425/ anih thu leh Show Room ah Rs 399/ anih laia Rate diklo a la an awm anih chuan Consumer Protection hruaitute hnena hriattir vat tura mipuite an ngen thu an sawi lang bawk.

LIKBK ten THLAITHAR KUT an hmang

Inrinni khan LIKBK, Assembly in a ruahman angin LIKBK Local Church hrang hrang te chuan Thlaithar Kut an hmang. Kut ah hian Kohhran ho ten an thlai thar neih ang ang te kengkhawmin, thlai thar nei lo te pawhin pawisa fai an remchan ang tawk te an keng khawm bawk a, heng thlai thar an kenkhawm te hi sum ah chantir in, Assembly ruahmanna angin Tualchhung Kohhran in tul leh tha an tih angin an hmang dawn a ni. Thlaithar kut ah hian Kohhran te chuan Biak In ah inkhawm neiin, Pathian thu leh hla a inpawlhona hun an hmang a, Pathianin buh leh bal a malsawmna a pek vanga lawmthu sawina hun te hman niin, Kohhran thenkhat chuan Kut hi ruai nen an hmang.

Buh thartam kum bawhzui

Sawrkar in Buhthar tam kum a puan bawhzuina kalmek ah Lawngtlai DAO Office a Field Staff te pualin KVK Lawngtlai chuan an Training Hall, Chawnhu ah Buh natna leh a vendan Training an buatsaih a, he hun hi Pu James Vanlalluaia DAO chuan hmanpuia,KVK mihtiam ten zirtirna uluk takin an pe.

Silai man

September Ni 16 khan 40th Assam Rifle leh Lawngtlai Police tangkawp te chuan Lawngtlai Council Veng atangin Silai chhe siamlai pathum leh silai siamchhawp siamlaimek pathum, leh a siamna hmanrua leh a siamtu Sangau khawchhuak ni a insawi Pu Lalnawla Council Veng Lawngtlai a a fate hnen a khawsa mek hnen atangin an man, Heng an man te hi a chhia siamthat tur Point 22 Pistol pakhat leh Point 22 Maniature pakhat bak ah Pistol pathum siamlaimek bak ah a siamna hmanrua leh silai mu pariat an man. Pu Lalnawla hi Lawngtlai Police ten thubuai an siamsak nghal.

Hnatlang ko

Naktuk hian Tawngtaina Tlang tifai turin hnatlang koh a nih thu kan dawng a, hnatlang chhuak tur in helam ngaipawimawhtute an in ngen.

Inrawnkhawmna buatsaih

Zo Indigenous Forum chuan “Consultation on Kaladan Multi Modal Transport Project” kalpui mek chungchang ah inrawnkhawmna chu kar kalta khan Aizawl ah an buatsaih a, Aizawl bakah Lawngtlai-ah pawh hun remchang hmasa berah huaihawt leh an tum thu an sawiin, chung inrawnkhawmna neih hnuah chuan thuneitu te hnenah rawtna mumal tak Zo Indigenous Forum chuan thlen a tum thu an sawi bawk.

MZP ten zirlaite ngaihpawimawhlohna ah an ngai

MZP gen.Hqrs chuan thuchhuah siamin MBSE in sawifiahna chu zirlaite ngaihpawimawh lohna a an ngaih thu an tarlang a, an thuchhuah chuan MBSE-in Technical Entrance Exam 2011, phuailuai taka a buatsaih chungchangah insawifiahna thuchhuah an siam chu ngun taka MZP in a thlirin, MBSE-in zirlaite dinhmun a ngaih pawimawh lohzia leh, tidiklotu an ni chunga inthiam lohna an neih lohzia tarlanna ah a ngai a, RTI hmanga zirlaite dikna hailan avanga insiamthatna rilru put aia a theih chhung zirlaite chu thil tihtheihna hmanga hrut luih an hreh loh zia tichiangtu ah MZP chuan a ngai bawk a ni. An thil tihsual avanga Biology Group-a Merit List 103na chu 100-a a tawlhchhoh dawrh theih chung changah dik taka merit list hi kalpui nise, hemi hian a hmaa mi 3 aiin a duhna seat a thlang hmasa thei dawn tih hi thil chiang tak a ni. Engineering Group-a merit list 2na mark an pek sual chungchangah a merit list a tidanglam pha MZP-in a ti lova, a theih chhung thudik(an tihsual) an zep ruk kha thudik a nihna angin a phawrh mai zawk a ni. Zirlai 1676 zet exam zinga mi 20 chauhte Answer sheet enfiah ah mi 6 zet te ta an tih dik loh hmuh chhuah a ni a, exam zawng zawngte paper hi ennawn leh vek nise eng zat tak dik lo awm ang maw tih hi MZP zawhna lian tak a ni. Chemistry Question chhanna leh zawhna dik tawklote MZP-in a tarlan zinga Q.25, 78 leh 97 te an tih dikloh in pawm chunga Q.33,39,43, 55, 64, 74, 75&76 te MZP-in a hriatsual palh avanga diklo anga tarlang ah an puh a, hei hi MZP chuan ngun taka endikna a kalpui a nih angin, MBSE tih sual ngei niin a hmuh dan ala ngai reng a ni. Physics-a Q. 47 leh 82te nen MBSE-in ti dikloa a inpawmna pawh Mark 5 zet pu a ni a, hei chauh pawh hian "zirlaite seat pek tawh sa tih danglam ngai pakhat mah a awm lo" an tih chu thudiklo ah a chan tir chiang hle a ni. Hemi avang hian a then mark pek leh pek loh, a then mark paih sak tam tak an awm tih hi sawi hran ngai lova thil chiang sa a ni. An duhthusam anga siamthat remchan tawh loh hnuah thudik puan zar a nih thei tak avang chauhin siamtha tura nawr zui an ni lova. A hun laia he thu dik hi hailan nise, a bo a bang awm lovin MZP chuan thudik hmanga tehna dik kalpui turin MBSE chu a tawp thlengin a nawr ngei ang. Hun, tha leh zung, ngaihtuahna, sum leh pai tam tak senga zirlaiten rilru thianghlim tak pu a he Exam an beih na ah, heti zat tihdikloh hmuhchhuah a nih hnu a inpawmna nen thupha chawi tum aia, Question an set diklote, Answer pek dik lohte leh Mark an chhut dikloh kara "thil pawi tham awmlo leh zirlaite chanvo tihbawrhban awmlo" anga an la sawi duh hi MZP chuan pawi a tiin, tidiklotu chunga hremna pe theitu Mizoram Sawrkarin an nihna ang anga a enliam ngawt a nih chuan Mizo Zirlaiten MBSE lakah hian rinna an nghah ngam loh hun a thlen thuai MZP chuan a hlau hle a ni tiin an thuchhuah ah chuan an tarlang.

Friday, September 16, 2011

Lawngtlai ah mumal zawka Lirthei dah dan tur D.C ho in ngaihtuah a ni.

Nimin khan Lawngtlai DC PU B.Lalhmingthanga kaihhruaiin DC Office Chamber ah Lawngtlai khawchhung a Motor Park dan tur leh Parking fee tur chungchang sawiho ani.He hun ah hian Lawngtlai khawpui chhungah Parking Area siam nise, Parking fee khawn nise, Parking Place fee pawh State Transportt Authority rate hman mai nise an ti bawk. Rate hi Category ‘C’ hman ni se, No Parking Zone leh Parking Zone felfai tak a siam ni se an ti bawk. Driver te harsatna tawh POL chungchang leh Kawngpui dung a bungraw dahte bak ah kawngpui tichep zawng a bungraw dah te pawh enfiah zel nise an ti bawk. Lawngtlai District Transport Officer Pu T.Vanlalmalsawmsanga chuan Aizawl a Parking fee khawn dan leh a rate te sawizauin Mizoram Sarkar in Sum leh pai a chhiah tamzawk a hmuh theihna tur leh a dehchhuahna tur a tan alak thar avang in District tamzawk ah Parking fee khawn tur a ruahman na a awm chu Transport Department hmalakna thar anih thu leh, hemi hmang a State sum dehchhuah na kawng ah engemaw chen a puih ngei a beisei thu sawi . Meeting ah hian MVI, SP, TRaffic O/C, DTO leh District Council a Transport hotu te an tel ani.

Tu tih hriatloh ruang vuiliam

Tunkar Thawhlehni a Mamte khaw ram, Silaitlak Li Kawlchaw khua atang a Km 10 vel a hla a tu tih hriat loh mipa feet 5.1 vel a sang ruang chhar chu, Lawngtlai Police ten Ruang hi an la a, Lawngtlai thlen pui a nih hnu ah Mi thenkhat ten an chhungte anih ring tu ten an endik hnu in Lawngtlai District Hospital Morgue ah dah ani a, amah hretu an awmloh vangin nimin khan Post Mortem niin hemi hnu hian Lawngtlai -III YLA ten Lawngtlai-III Thlanmiual ah an vui liam.

Free Health Check Up

Aizawl Civil Hospital chuan MJA General Hqrs. Aizawl huam chhunga MJA member te, a thlawnin an hriselna endik ‘Free Health chech-up’ chu nimin chawhma dar 11 atang khan neih tan a ni, kumdanga kan tih ang bawkin MJA Office Bearer te en hmasak an ni a,Free Health Check-up hi chawlhkar tin vawi khat tal neih chhoh reng tura ruahman a ni a, Hospital lam an indaih chang chuan vawi hnih neih tum te pawh a awm thei tur a ngaih niin tum khatah MJA member 5 (panga) zel inentir thei tura ngaih a ni a, he check-up hian kumin 2011 chhung zawng hi a awh thei tura ngaih a ni.

CSS kalpuidan thlir

Nimin khan Mizoram State Vigilance & Monitoring Committtee chu an Chairman Rural Development Minister Pu R. Lalzirliana hovin Secretariat Conference Hall-ah an thukhawm a. Mizorama Centrally Sponsored Scheme (CSS) hrang hrang kalpui mek leh hmasawnna te chipchiar takin an sawiho.

Export Commissioner

Ministry of Commerce & Industry, duh dan angin Director, Trade & Commerce Department, Mizoram chu Export Commissioner of Mizoram atan ruat a ni a. Sorkar laipui a Department leh mimal Project thehlut turte chuan Export Commissioner hnenah thlen hmasak zel tur a nih thu sorkar thuchhuah ah tarlan a ni.

MHIP President in sawifiah

MHIP chhungkua a buaina chhuak mek ah MHIP Hqrs. President B Sang-khumi chuan MHIP sum cheng nuai 4 vel chingpen chungchang an hriatchhuahna bul chu, ‘Audit Report atangin a ni,’ a ti a. Audit Report atanga hma an lak zuinaah Hqrs. Executive-in resolution awm miah lova SBI-a MHIP Account 3 khar a ni tih an hmuhchhuah thu leh nimin thleng khan seal lem 54 an hmuhchhuah tawh thu a sawi bawk.

Review Meeting

Chhimtuipui Teenage Solo Competition neih zawh tak thlir letin vawiin hian World Vision Office ah Organising Committee te an thukhawm dawn a, kum thar a hmalak zui dan tur pawh an sawi ho nghal ang.

Vantlang inkhawm ah IAY dawngtur thlang

Kolasib District chhunga mi rethei in sakna IAY Permanent Waitlist 2011-2016 kalpui mek chu Gram Sabha (Vantlang inkhawm) kaltlanga thlan a ni a. Mizoram pumah Kolasib District hi Gram Sabha hmang hmasa bertu a ni. Tunhnaia Bilkhawthlir a IAY dawng tur an thlan tumin khaw pa pakhat chuan Vantlang inkhawmah amah aia nei lo zawka a hriat chu he tanpuina hi alo kian tawh a ni. Kolasib District chhunga Thingdawl Block –ah mi 575 thlan an ni a, Bilkhawthlir Block huam chhungah mi 418 thlan an ni . IAY dawng tur hi tun hma chuan khawtlang hruaituten an thlang mai thin a. Guidelines in a phut angin Vantlang inkhawm kaltlanga thlan a nita a ni.

MJA hnenah Certificate of Appreciation hlan

Association for Voluntary Blood Donation (AVBD), Mizoram chuan Aizawl Press Club-ah Mizoram chanchinbu leh media hrang hrang ten thisen pek chungchang an chhuah that avangin Mizoram-ah a thlawna thisen pek ‘Voluntary Blood Donation’ a pung nia ngaiin Mizoram Journalists’ Association (MJA) Gen. Hqrs. Aizawl hnenah lawmthusawina ‘Certificate of Appreciation’ an hlan. Certificate hi AVBD Vice President Pu Lalhmingthanga kut atangin MJA President Pu H Zosangliana’n a dawng a.

PRISM in Health Minister hnen ah lehkha an thehlut

Prism chuan Health Minister hnenah lehkha thehlutin Mizoram State Aids Control Society-a Assistant Director chu dan diklo a lak a ni tiin ban leh turin an ngen. Minister hnena lehkha an thehluh ah chuan 25th May, 2011 khan Project Director in advertisement a chhuah a, advertisement-ah hian educational qualification siam anih bakah ‘kum 3 tal experience neih ngai’ a nih thu chiang taka tarlan a ni. He hna hi mi 27 in an dil a, dilna atanga enin qualified applicant 13 an awm a. Qualify lo 14 te hi hnawl mai tur ni awm tak anih laiin diltu zawng zawng te hi interview tura koh vek an ni a. Interview-a mark an pekah qualify lo zing ami Lalthakimi Sailo D/o Lalthuamluaia Sailo, B-18, Babutlang, Zarkawt, Aizawl chu mark 76 pek a ni a, lak a ni ta a ni an ti. Prism chuan Interview Board-a awm te pawh an thil diklo tih phu tawka hrem ngei turin an ngen bawk.

Thursday, September 15, 2011

Indo-Bangla Border venhima chungchang D.C ho in thlir ho a ni.

Nimin khan Lawngtlai DC Pu B.Lalhmingthanga ho in, D.C Office Chamber ah India leh Bangladesh ramri venhimna a hmalakdan tur leh Ramri hung chungchang ngaihtuahin Meeting neih a ni. He Meeting ah hian Out Post sawm leh pakua a Compensation pek tur assessment siam zawh tawh a nih thu leh sawrkar ah Bill pawh thlenmek a nih thu report a ni a. Border Out Post siam zat tur a ruahman 22 ah 19 siam tawh a ni a, out post 3 siambelhna tur atan sorkar ah dil mek a nih thu Meeting ah hian sawilan a ni. Border Fencing chungchang pawh thlir ho niin, siamzawh tawh hi Kilometres 12.5 a ni a, a enkawl hna hi BSF kut ah pek fel a ni tawh a ni. Border Fencing a Compensation chungchang a buaina neuh neuh awm chingfel tur in DC kaihhruaina hnuai ah Verification Team din a ni a, Verificaion Team te hian a hmalam a buaina awmte enfel tur a tih an ni. He Meeting ah hian Chakma Autonomous District Council atangin Revenue Officer, 96th Batallion BSF Deputy Commandent te leh Fencing hnathawktu NPCC atangin Senior Manager leh Asst.Manager te an tel.

Ruang pahnih chhar

Nimin piah khan Hruitezawl bul ah leh Mamte ram ah ruang chhar a ni, Mamte ram a ruang chhar hi a hmun ah Lawngtlai Police te nimin khan kal nghalin, ruang hi an hlawm a, nimin tlai khan Lawngtlai thlenpui a ni a, chanchin lakkhawm lai hian ruang hi tunge a nih finfiah a la nilo a, amah hi Mipa feet 5 bawr vel niin, a ruang hi a chhe viau tawh ni a sawi a ni a, Police te hian Chhimtuipui dung ah lawng in ruang hi Kawlchaw an panpui a, hetatang hian Lawngtlai luhpui a ni. Hruitezawl bul a ruang chhar pawh hi Mipa bawk niin, ruang hi a chhe viau tawh ni a sawi a ni a, ataksa a Tatoo in chhu atangin Myanmar lam mi ni a rin a nih thu kan dawng a, nimin khan Hruitezawl khawtlang chuan an vuiliam tih thulakna chuan a sawi.

Hna thawk mek

Lawngtlai District a Hnam tenau zawkte dawm kan nan a Sawrkar laipui hnuai a hmalakna Multi Sectoral Development Programme (MSDP) atanga pawisa hmuh atangin tunlai hian hmun hrang hrang ah hnathawh tur a ruahman te thawh chhoh mek a ni a, hnathawk tur a thlan te zing ah thawk zo tawh pawh an awm nual tawh.

Council tilian dawn

Thudawn dan in Mizoram a District Council te chu thuneihna lian zawk pek turin ruahmanna siam a ni mek a, State Sawrkar hnuai a Department, Council huamchhunga awm te chu District Council thuneihna hnuai ah dah tum niin, Health Department leh Power Department tih loh a dang zawng chu Council enkawlna hnuai a dah tumin hmalakna kalpui a nih thu kan dawng.

Hmeichhe Doctor

Christian Hospital Lawngtlai ah Hmeichhe lam Doctor thiam tak rawntheih in a awm mek a, nimin lam ah pawh rawn tu engemaw zat an awm thu dawn a ni.

E.E thar

Er.Ngurtluanga chu PHE, EE atan dah thar a ni a, Pu Ngurtluanga hian Greater Lawngtlai Water Supply Scheme a enkawl dawn a, a ni ho hian Lawngtlai khawpui tuilak hna kalpui mek chu thawh chhoh a ni dawn a ni.

Faina Thuchah Sawi dawn

Faina Hapta October Ni 3 atanga hman tur ah District mipuite hnen ah D.C leh Executive Member i/c Sanitation LADC te chuan thuchah an sawi dawn a, Cable TV kaltlangin Faina thuchah hi an sawi ang.

Chhawkhlei.com

Sangau atanga Chanchinbu chhuak Chhawkhlei Times chu www.chhawkhlei.com ah chhiar theih a dah a ni.

Tuesday, September 13, 2011

District Consultative Committee, District Bawrhsap in nimin khan an thukhawm.

District Consultative Committee(DCC) Meeting chu nimin chhun dar 11:00 khan Lawngtlai DC Chamberah Pu B.Lalhmingthanga D.C ho in neih a ni,he hunah hian Dilip S.Watwani, Manager NABARD, K.P Pandep Cheif Manager,Lead Bank leh Lawngtlai District chhunga Bank Manager te bakah Sorkar kaltlanga mipuite hnenah Subsidy pe thin Department hotute an tel. PMEGP te,SGSY te leh Agriculture Loan pek chhuah chengchangte rel niin, Bank lam hmalakna te sawiho ani bawk. Meetingah hian Bank kaltlanga mipuite hamthatna turte sawi ho niin,heng an thurel te hi mipuite hriata la puan zar thuai tum ani.Hman ni lawka Rural Bank hawn thar Bungtlang 'S' ah Venmhimna lam thawk tur la dah loh chungchang pawh sawilan niin, Lawngtlai S.P kaltlanga hmalak nise,a rang lama dah tum nise an ti bawk.He hunah hian Meetinga kal tur a ruat te an kal tha hle.

Chandmary YLA ten Zu siamna hmun an tichhia

Nimin khan Chanmary YLA Kumpuan Sub-Committee chuan an thudawn bawh zuiin,Saiha Kawng Nalkawn ah Zu Factory an ti chhia.Zu Factory an tihchhiat naah hian helaia zu thlawka chhawr mi pahnih man an ni a,Zu Factory neitu Zakapa, Zachhinga fapa ni a in sawi,Champhai khua,tuna Lawngtlai Vengpui a khawsa nia in sawi pawh man tel ani. Factory ah hian Zu Bilh lai zem Li tihchhiat niin,zu siam na hmanrua Belpui pahnih,Bel lai Pali, Plastic Gallon bur Li man niin,an tihchhiat zawng zawng leh bel an man te hi tualchhung rate a chhutin Rs 50000/-( Singnga) man hu ni a chhut ani.

Award dawng

Pu V.Vanlianhrin tuna Central YLA Gen.Secretary ni lai leh LADC Art & Culture Officer ani bawk chu August Ni 29 khan New Delhi ah Bhartiya Vikas Ratan Award hlan ani.He Award hi Global Society For Health and Educational Growth leh All India Business Development Association te siam niin Pu Vantea rual hian Dr. Lalhriatpuii,Aizawl chu hetiang Award hi hlan a ni bawk.

Ram pe

Upa L.Cheuluaia Lawngtlai chanmary te chhungkua chuan sipai tlang a an ram chu mitin tana tawngtaina hmun ni turin Non-Denominational prayer fellowship te kutah an pe.he hmun hi a hmingah Bethel Prayer Mount an ti.

Doctor panpui

World Vision Chhimtuipui ADP chuan an enkawlna hnuai a awm Sponsored naupang 23 te chu Doctor thiam hnen ah Medical checkup nei turin Aizawl lamah an champui mek.

MZP President in TEC Exam ah thilfello a sawi.

MZP President Pu VL Krosshnehzova chuan kumin 2011 TEC Exam, Mizoram Board of School Education in a buatsaih ah Exam beitu zirlai 20 ten lungawilohna an neih chu MZP in a buaipui nghal a, a theih ang anga kan chhui hnuah Chemistry group ‘A’ ah chhanna (answer key) diklo 10 leh Physics ‘A’ ah 2 a awm a, Biology leh Maths ah chuan a awm kan hrelo a ni a ti. MZP President chuan henga diklote avang hian zirlaiten an mark 13 zet an hmuh loh phah thei mai nilo in, an mark hmuh ngei ngei tur atangin mark 3.25 zet paih sak an nih phah thei a ni. Inspection neih leh document dilchhuah belh atanga hmuh chhuah belhkhawm atang hian zirlaite chanvo nasa taka tihbawrhban a ni tih a hriat a, rilru thianghlim taka he Exam beitute hi a buatsaih dan fel tawkloh avangin chi ai takin an awm phah ngei dawn a, a tlai hma ngeia heng thilte hi hmuh chhuah nise zirlai tam tak rilru a dam ngei ang. Hengte avang hi a ni em document thup theih chhung thup duh a nihna chhan? tih hi MZP zawhna lian tak a ni a, thudik tarlan a nih loh avanga MBSE leh Sawrkar-a rinna nghattu leh nghatlotute dinhmun pawh hei hian a tihchian ngei kan beisei a ni a ti.

Zirtirtu sawnkual MCTA ten hrethiamlo

Mizoram College Teachers Association chuan tunhnaia Mizoram sorkar Manpower Assessment Committee-in college thenkhata zirtirtute indaih viaua ngaia sawn kualna thupek a chhuah chu an hrethiam lo tih an sawi. Nimina thuchhuah an siamah MCTA chuan tun dinhmunah college zirtirtute chu an indaih lohna a nasat avangin sorkar-ah regular part time zirtirtu an dil belh mek zawk tih an sawi a. Manpower Assessment Committee thuchhuak an pawm theih loh chhan hrang hrang zingah semester system-a college zirtirna kalpui anih tak avanga an indaih loh zual thute; UGC Norms ang chuan subject thenkhatah phei chuan minimum requirement (Hon/Gen. subject-ah 4, language-ah 5) pawh an la phak loh laia thenkhat sawn chhuah tur anga lang te; UGC Norms an zawm lo anih chuan University-in an affilaition a tihtawp mai theih tute an sawi a. Hei bakah hian Manpower Assessment report chu dik tawk lo leh heng report siamtute hian Higher Education kalphung an hre tawk lo nia an ngaih thu an sawiin, "Hei vang hian sorkara thuneitute hian ennawn leh ngei kan duh a; heti chung pawha an kalpui zel anih chuan theihtawp chhuaha hmalak kan tum a ni" an ti bawk.

Monday, September 12, 2011

LADC enkawl School a Zirna kalphung zirchian chhoh mek a ni.

LADC sorkar enkawl Zirna School a zirna kalphung chu zirchian chhoh mek a ni a, kum riat vel English Medium a kalpui lo ni tawh chu kalphung hmasa angin thlak leh mai a tha lawm ni ti a rawtna awmfo thin chu sorkar chuan zirchiang chho mekin Sept Ni 9 khan SSA, Block Resource Centre Hall ah, Education Medium of Instruction, Consultative Meeting, LADC a Primary School Education enkawltu Executive Member Pu C.Lalneihkhuma ho in an thukhawm a, he hun ah hian member 26 kalkhawm te chuan LADC hnuai a zirna School te Zirtir chhunzawm zel dan tur an sawi ho a, mi 26 zing a mi panga(5) in tuna zirna kalpui dan English Medium chu Mizo Medium a thlak tha an tih thu an sawi a, a tamzawk mi 21 te chuan tuna zirna kalphung pangngai LADC in a hmanmek Medium of Instruction a English hman chu tha an ti niin thudawnna chuan a sawi. He hun ah hian LADC hnuai a Middle School leh Primary School a thawk ten English Medium a kalpui chungchang ah Zirtirtute ah Survey an neih Education Officer ten Report pe in, an report a sawilan a nih dan chuan a tam zawkin English Medium chu Mizo Medium a thlak an duh tih an sawi.

DC ho in DEC an thukhawm

Zirtawpni chhun khan District Education Commitee, SSA Mission, Lawngtlai District chuan Lawngtlai DC Pu B.Lalhmingthanga, Chairman DEC (SSA) ho in a Office Chamber ah an thukhawm.DC Pu B.Lalhmingthanga chuan kaihruaiin, District Education Committee Member Secretary Pu LZ Tluanga DPC, SSA Mission Lawngtlai chuan Lawngtlai District ah Autonomous District Council panhih Lai leh Chakma Autonomous District Council a awm avangin, SSA Project hnuai a hnathawh leh hmalaknaah District dang aia hrasatna hrang hrang a awmtheih thu a sawi a, chutihlaiin, D.C, ram hmasawnna tak tak duhmi Chairman an neih avanga an thlamuan thu a sawi. DEC Meeting ah hian, Residencial Special Training Centre, khaw panga, Sangau, Lungpher South, Bethel Chandmary-II Lawngtlai, Vaseikai leh Kamalanagar ah te hawn tha an ti a, Girls Hostel Lawngtlai chu , naupang 50 tal awmtheihna tur a tihlen nise an ti bawk.

School kallo kokhawm

World Vision, Chhimtuipui Area Development Programme (CADP) lawngtlai chuan an Conference Hall ah an Target Area chhung aNaupang kum 18 hnuailam school kal tawh lote kokhawmin Programme Manager Pu Maren Nampui chuan School kalloh thatloh zia te hmalam hun a thim zia te sawiin school kal chhunzawm leh duh te chu World Vision chuan theihtawp chhuahpui an inhuam thu a sawi a, school kalchhunzawm duh tawh lo, thiamna bik hrang hrang neite tan pawh eizawnna bul an tan theih nan World Vision chu a inhawng zau hle ani a ti a, naupang engemawzat an enkawl mek thu a sawilang tel bawk.

Mock Registration

Kumin October atanga Electoral Roll, Special Summary Revision neih tur ah, E/Roll dik leh felfai tak neiha nih theih nan a Lawngtlai District chhunga hmalakna chu kalchhoh pui mek a ni a, September Ni 9 khan Goverment Lawngtlai College leh South Heat Academy Lawngtlai ah te Mock Registration neih niin, he hun hi Election Officer Pu Beila Khithie bak ah Booth Level Officer ten an telpui. Pu Beila Khithie chuan thusawiin Election Commission chuan / Roll dik leh felfai tak neih a nih theih nan ruahmanna chi hrang hrang a siam a, E/Roll a awmthei diktak te chauh thun an nih theih nan Zirlaite chuan tangkaitakin hna an thawk thei a ni a ti.

Friday, September 2, 2011

Kum 5 chhungin Mizoram a MLA te hausakna a pung nasa

Academy of Integrated Christian Studies (AICS) buatsaih, ‘Hlemhletna leh Mizo Kristiante’ tih thupui hmanga seminar ah, MLA te thil neih hlut zawng punna zirchianna Dr. Lalthakima, paper ah tarlan a nih dan chuan kum 2008 inthlan dawna Prism-in ‘lepsena’ lehkhabu an buatsaih atang in.Kum 2003 leh 2008 MLA inthlana MLA dingnawn, an affidavit hriat theih chin 20 te zirchianna-ah chuan, kum 5 chhunga MLA te thil neih hlut zawng chu chawhrualin 790.48 percent-in a pung hman a. A pung tam ber MLA phei chuan 2003 inthlannah Rs. 50,000 chauh neiin, 2008 inthlanah chuan Rs. 65,61,038 (nuai 65) hu zet a nei hman a, a punna hi13022.08 percent zet a tling a ni. Hetih lai hian a pung tlem ber pawh kum 5 chhungin 5.84 percent-in a pung hman a ni.He seminar-a ‘Hlemhletna leh Mizoram Economy’ tih sawitu Dr. JV Nunchunga, chuan, kum 2010-2011 chhunga sorkar hnathawk, office awmthatloh avanga sum hloh chu cheng vbc 290.459 a tling niin a sawi a, kum kal mekah phei chuan cheng vbc 400 vel tling tura ngaih a nih thu a sawi bawk.Tunah hian sorkar atanga hlawh la mi 58,035 an awm. Kum 2008-09 ah vbc 907.6068, 2009-10-ah vbc 1023.8498, 2010-11-ah vbc 1420. 0116 (Non plan – vbc 1216.9008 leh Plan sum vbc 881.8046) te hlawh atana hman a ni a. Kum 2011-12 hian vbc 1447.72 dah a ni a, sixth pay revision a nih avangin vbc. 2000 vel mamawh tur nia ngaih a nih thu a sawi.

LSA Sport



LSA General Conference thurel bawhzuiin LSA Gen.Hqrs. chuan LSA Sport nei turin hmalakna a kalpui mek a, ruahman lawk ang chuan tunthla Ni 27 khian Sport hi neih tan tum a ni a, Sport Minister pawh he hun hmanpui tur hian beisei a ni mek.

Gorkhali te OBC a dah tuma hmalakna MZP in tha an tilo

Nimin a MZP Gen.Hqrs. Execuitve Committee,neih ah Mizoram a Gorkhali ten Other Backward Classes (OBC) Status an dil chungchang leh hemi chungchanga sorkar thuneitute’n hma an lak mekna an thlir ho a. Mizoram sorkar an ngenna bawhzui a permanent Body/Committee-in Mizoram sorkar hnen a rawtna a thlen chungchang ah Gorkhali ten OBC Status an hmuh theihna tura rawtna kal mek chu MZP chuan thinlung takin a dem tih thu The Lawngtlai Post chuan a dawng, rawtna hi a hlawhtlin lohna turin theih MZP chuan hma lak an tum bak ah Mizoram sorkar pawh Gorkhali ten OBC Status an dilna hi ti hlawhtling lo turin MZP chuan a ngen thu dawn a ni.

IMPCC Meeting



IMPCC meeting Pu Zosangzuala, AIR Director ho a neih ah August thla thupui’ bawhzui dan AIR, DDK leh State sorkar department hrang hrangin an bawhzui dan report a ni a Health & Family Welfare in nausen thi tam lutuk titlem tura hma a lakna a hlawhtlin chuan sorkar laipuiin Rs. 2,000./- crores zet lawmman min pek theih tur thu te report a ni. District tina Damdawi In leh thawktute chhawr tangkai turin nausen piang zawng zawng an dam khaw chhuahna tura nu hriselna ngaih pawimawh tulzia an sawi.September thla thupui atan ‘Thing leh mau humhalh an thlang.

Chhunzawm dawn



Hun engemaw chen sawrkar in a chawlhsan lailawk, Tripura Camp atanga Bru raltlan intite Mizoram-a hruai chhoh hna chu September ni 15, 2011 atang hian chhunzawm leh tumin hmalak mek a ni.

MNF Party ah lawmlut

Nilaini khan MNF President, Pu Zoramthanga chuan Serlui Constituency khaw hrang hrang atanga MNF zawm thar Voters 809 bak ah kum 2008 MLA Election-a helai biala Independent Candidate, Pu Vanlalhmuaka (Vote 1300 chuang zet lo hmu tawh) te chu Vairengte Community Hall-ah ropui takin MNF-ah a lawmlut.

Mizoram PWD kuta Natianal Highway awmchhan -M.C. Lalrinthanga


National Highway, a lamtawia NH hi India ram State hrang hrang inkalpawhna, State khawpui theuhte zawmtu leh State pakhat chhungah pawh hmun pawimawh zawmtu atana duan a ni. Heng NH -te hi India Sorkar-in NH ni tura a puan dan indawta number pek vek an ni. NH Lamliante hi Sorkar laipui ta, a sialna leh enkawlna pawisa zawng zawng pawh Central Sorkar tum vek a ni. Kawng pawimawh dan a zirin Single Lane, Double Lane, Four Lane etc. a sial an ni. Tunah chuan NH zawng zawng chu a nilo berah Double Lane ni vek tura ruahman a ni.
Mizorama kan NH neih hmasak ber chu NH - 54: Silchar - Aizawl - Serchhip - Lunglei - Tuipang Road hi a ni. NH a nih tirhte kum 30 vel kalta atang khan Border Roads Organisation (BRO) kutah India Sorkar-in a dah a, an enkawlzui a, Double Lane-a sial tura tih kum tam tak hnuah pawh Double Lane-a sial chu a la tlem hle a ni. India Sorkar-in BRO enkawl hi tha a tih loh avangin kum 8 vel kalta atang khan Mizorama NH awm thar NH-150: Seling - Tipaimuk te, NH-44 A : Sairang - Mamit - Tripura, NH - 154 : Bairabi - Bilkhawthlir- te chu BRO kuta pe lovin Mizoram PWD kutah a pe ta a. Heng kawngte hi NH-a puan tirhte atanga tun thlengin Mizoram PWD chuan a enkawl ta a ni.
BRO hi ram dang nena inrina hrul, border area-a lamlian sial tura din a ni a. India leh China kum 1960-a an indo hnu lawk khan border area-a kawng laihthat tul zia hriaa BRO hi din a ni. BRO hian Project hming hran hran neiin, project tin chu Chief Engineer -in a ho zel a. Mizoram, Manipur, Nagaland, Arunachal Pradesh, Maghalaya, Assam, Tripura, Sikkim, Jammu & Kasmir leh Himachal Pradesh -ah Project hming hran theuh neiin an awm a. Mizorama awm chu Project Pushpak tih a ni. An hmunpui Delhi a ni a, Defence Ministry hnuaia awmin, Lt. General chu Director General vuahin an hotu ber a ni.
Kum 15 liamta atang khan NH enkawltu Ministry of Road Transport & Highways chuan BRO hi NH enkawl tur hian an duh lo a, kum 10 kaltaa Silchar - Bagha kawng a chhiat lai pawh khan Mizoram PWD Chief Engineer hnenah NH enkawl tura dilna ziak turin an lo rawn tawh thin a, mahse an dil duh ngai lova. Hun a lo kal zel a, China ramri hrul vela lamlian dinhmun India Sorkar-in an thlirkir chuan duhthu a sam lo chauh pawh ni lovin, China an tluk lo hle tih an hmu ta a. BRO hian a din chhan thawk mumal lovin NH lamah a inhmang nasa hle tih an hmuchhuak a. BRO hotute chuan an mawhphurhna thawk chak tur chuan NH lam an tinsan a tulin an hria a, chubakah Transport Ministry pawhin BRO chu an hna a tha lovin an senso a tam bawk avangin NH enkawl turin an lo duh lo ve hle bawk si a. Hengte avang hian India Sorkar laipui chuan State PWD nei tha apiang hnenah an State chhunga NH enkawl mawhphurhna pe vek turin thutlukna a siam ta a ni. Manipur rambuai vanga State PWD -in a zuam loh avanga pek loh tih loh chu State tam zawk hnenah NH chu pek a ni ta a ni.
NH - 54 pawh hi Mizoram Sorkar leh PWD lamin an dil vang ni hauh lovin India Sorkar-in a policy a thlak avang zawkin Mizoram PWD kuta hlan a ni. State Sorkar leh a changtu tur PWD pawh zawt hmasa lovin NH thar an enkawl danah a dang pawh enkawl theia ngaiin Mizoram PWD kutah he kawng hi pe turin Ministry of Road & Highways chuan May 2008 khan hriattirna a chhuah ringawt a ni zawk. Chutianga order awmhnuah BRO lamin pek mai an tum loh avangin Mizoram Sorkar-a mawhphurtu ten an nawrzui ve ta chauh a ni. India Sorkar policy anga an hotu lamin PWD kuta hlan tura thutlukna awm hnuah Mizoram Pushpak (BRO) hotute hian an ui avangin Mizoram PWD kutah rei tak hlan duh lovin, an kuta awmzui turin dilna Sorkar laipuiah an thehlut ve hnuhnawh a, chumi chhung chuan a hma atanga repair ngai tawh kha repair lovin an dah zui reng avangin kawng hi chhe ta em em a ni. National Highway thar 3 bakah Silchar - Aizawl - Lunglei kawngpui PWD kuta a awm tak avang hian a enkawl turin Chief Engineer leh a hnuaiah Circle SE bial 2 leh Division EE bial 4 siam a lo nita a ni.
Project Pushpak (BRO) hotu ten NH-54 an kuta pekir leh tura kum 2009-a an dilna Central Sorkar-in a phal tak loh avang leh an kawng chhe lutuk avanga Lunglei lama lirthei neitute nen buaina an tawh tak fo avangin April 2010 khan Mizoram PWD kutah an hlan ta chauh zawk a ni. PWD -in a enkawl hian kawng siamna estimate atanga 9 % zel hi State Sorkar hnenah Agency charge atan Central-in a pe thin a, estimate hi vaibelchhe tel anih zel avangin agency charge ngawt pawh hi State pachhe tan chuan tha tham tak a ni.
Heng thuziak tlemte atang hian, NH enkawl tur hian MNF Sorkar-in emaw, tuna Congress Sorkar-in emaw an dil vanga Mizoram PWD kuta hlan ni lovin, India Sorkar Policy avang zawka Mizoram PWD hian enkawl a ni tih kan hrechiang thei awm e. Chuvangin, Mizoram-in kawng tha kan neih theihna turin Mizoram PWD hi thuam chaka, hneh taka enkawl thei turin thawktute tihpun a tul hle a ni.

Thursday, September 1, 2011

Lawngtlai RD Block PYKKA Sport zofel. A pumpuia Lawngtlai Chandmary Veng Pakhatna

Ni 23 Aug atanga tan tawh Lawngtlai RD Block level PYKKA sport chu nimin khan kharna hun leh lawmman semna neih ani.Lawngtlai RD Block hnuaiah hian khua/veng 42 awmin,tun tum PYKKA sports ah hian khua/veng 30 an tel thei a,hetiang an buatsaih tawh a tel an tam ber kum anih thu buatsaihtu ten kan palai an hrilh.Sport kharna hun hi i Electric veng Hall ah neih ani a,Boxing final hmuhnawm takin he sport hi khar ani.Pu C.Ngunlianchunga CEM LADC chuan he hun hi hman puiin,lawmman semna te anei bawk.Kharna hunah hian Organising Chairman Pu T.Vanlalmalsawmsanga BDO chuan he sports an neiha lotel zawng zawngte chungah lawmthu sawiin,kum danga tih leh hunah hei aia tam tel tum turin a chah,Khuallian Pu C .Ngunlianchunga CEM chuan thu sawiin,Sports item chi hrang hranga Lawngtlai District te hmasawnna hmuhtheiha awm chu lawmawm atih thu sawiin,infiam zel duhte chu engkawngah pawh insum turin a chah. PYKKA sport kharna hunah hian Sports lama mawhphurtu hrang hrang leh Officer te an kal tha hle a,LADC EM Pu Lallura Chinzah pawhin a hmanpui bawk.A pumpuia pakhatna chu Lawngtlai chanmary veng an ni a,pahnihna chu Lawngtlai Vengpui niin,Pathumna chu Paithar khua te an ni.

Teenage Solo Competition ah Ruth Lalchhantluangi pakhatna

August Ni 30 zan khan Chhimtuipui Teenage Solo Competition chu zawh fel ani ta.He Solo Competition World Vision CADP leh Friends Club Lawngtlai te tang kawpin an buatsaih ah hian ,Chhimtuipui Area a khaw hrang hrang atangin zaithiam kum 13-19 inkar mi 90 ten in elna hi an hmachhawn ani. Result puanna hun hi LADC a CEM Pu C Ngunlianchunga chuan hman puiin, pakhatna result hi a puang ani.Lawmman pakhatna latu hi Ruth Lalchhantluangi Thingfal niin,Rs 30000+Momento a dawng a,pahnihna KC.Remruatpuia Lawngtlai Chanmary II niin Rs 20000+Momento a dawng a,pathumna T.Lalruatdiki Diltlang niin Rs 10000+Momento a dawng bawk.Chhimtuipui Teenage Solo Competition hi Kum 2012 ah pawh chhunzawm tum a nih thu World Vision Manager Pu Meren Nampui chuan kan palai a hrilh.

LSA Gen. Hqrs. in lawmawm an ti



GRHSS lawngtlai a Science Stream hawn thuai tumna a awm tih Education Minister in Lai DCC hotute hnen ah a sawi tih rameng Chanchinbu a lang chu LSA Gen.Hqrs. chuan lawmawm an tih thu The Lawngtlai Post an hrilh a, LSA Gen.Conference Vawi 23-na a an Resolution niin a LSA chuan a bawhzuiin tum hnih Aizawl ah an hruaitute an kal tawh thu an sawi a, hlawhtling mai thei tur a Chanchinbu a lang chu an lawm hle a ni, dilna pawh tumhnih thehluh a ni tawh a, tun aia chak zawkin ram nu leh pa te chuan bawhzui se an duh thu te, a tul chuan hnam ang pawh a tangrual tlat turin an ngen tih thudawn chuan a tarlang. LSA Gen.Hqrs. O.B kimlo pawh GEC Meeting chuan heng mite hi a thlang fel Vice President ah C.Kapkima, Asso.G/S ah Rohlupuia te an thlang.

LSA Gen. Hqrs. in lawmawm an ti


GRHSS lawngtlai a Science Stream hawn thuai tumna a awm tih Education Minister in Lai DCC hotute hnen ah a sawi tih rameng Chanchinbu a lang chu LSA Gen.Hqrs. chuan lawmawm an tih thu The Lawngtlai Post an hrilh a, LSA Gen.Conference Vawi 23-na a an Resolution niin a LSA chuan a bawhzuiin tum hnih Aizawl ah an hruaitute an kal tawh thu an sawi a, hlawhtling mai thei tur a Chanchinbu a lang chu an lawm hle a ni, dilna pawh tumhnih thehluh a ni tawh a, tun aia chak zawkin ram nu leh pa te chuan bawhzui se an duh thu te, a tul chuan hnam ang pawh a tangrual tlat turin an ngen tih thudawn chuan a tarlang. LSA Gen.Hqrs. O.B kimlo pawh GEC Meeting chuan heng mite hi a thlang fel Vice President ah C.Kapkima, Asso.G/S ah Rohlupuia te an thlang.

Road Tax tipung dawn



Mizoram sorkar, chuan vawiin atang hian lirthei atanga chhiah lak (road tax) chu a tipung dawn a. Transport Vehicle tan 20% vela tihpun niin, Non-Transport Vehicle atan 50% vela tihpun a ni. July thlaa Assembly in ‘The Mizoram Motor Vehicles Taxation (Amendment) Act, 2011’ a pass tak denchhenin chhiah thar hi lak a ni dawn a.Transport Secretary H.Darzika chuan kum nga danah chhiah lak chu ennawn thin a nih thu a sawi.

St.Paul’s HSS Pakhatna

MZP Inter High School Quiz 2011 ah, St. Paul’s HSS chuan point 130 hmuin Pakhatna an ni a, Home Missions School chu pahnihna niin point 125 an hmu a, Gov’t Mizo High School chuan point 120 hmuin pathumna an ni.

PWD E-in-C thar



PWD Engineer-in-Chief leh Secretary Liansanga chu September ni 1 hian pension-in a chhuak dawn a,PWD Engineer-in-Chief atan hian Lianchungnunga dah a ni a, Secretary hna lo hmui tur hian Lalramthanga (IFS) Principal Secretary to C.M chu ruat a ni.Chief Engineer (Highways)-ah VL Duhsaka, Chief Engineer (Planning)-ah K.Lalsawmvela dah a ni.Thu dawn danin PWD secretary hna hi Technical miin a chelh tur a nih laia, service dang chelh -tir a ni hi Mizoram Engineering Service Association chuan an ngaithiam lo hle a, tun thla thar ah hian hmalak dan tur an ngaihtuah dawn.

LARSAP LT.GEN (RETD) M M LAKHERA’N MIZORAM MIPUI TE HNENA A THUCHAH


Thian Duhtakte U, Zaninah hian rilru khingbai takin in hmaah thu ka sawi a lo ngai ta. A chhan chu Mizorama ka hun hman theih chin a lo zo dawn ta a, ka awfis chhuahsanin September ni 1, 2011 hian Mizoram ka chhuahsan alo ngai dawn ta a ni.
Mizoram ka rawn thlen tirh phat khan nuam ka ti in ka tlangnel nghal hle mai a Khawtual mi ang chiahin ka in ngai nghal a ni. Uttarakhand tlangram a piang leh seilian ka nih avangin Mizoram pawh hi ka tan chuan a danglam vak bik lova, ka in pahnihna ah ka ngai hmin nghal hmiah mai a ni. Mizoram chhung district hrang hrang pariat te hi ka tlawh kim vek tawh a, Mizo mipuite ngainatawmna leh rilru thatnate, mikhual chunga in ngilneihzia te leh min duhsak ziate hi ka dam chhungin ka theihnghilh tawh ngai lovang.
Mizoram hian hmasawn turin hamthatna tak a nei a, heng theihna leh hamthatnate hi in haichhuah a chak taka hmasawnna atana in hman ngei ka ring nghet tlat a ni. Pathianin Mizoram hi a duhsak a, hmalam hun eng tak in neih theih nan ram zau tak, , sik leh sa nuam tak, duhthusam a tha a pe che u a. In chakna chu hmun dangah nilovin he in ramah ngei hian a awm a. Sik leh sa dinhmunin a zir em avangin ram ngaw leh thlai behchhanin industry chi hrang hrangte hmanga eizawnna leh hnathawh tur tam tak a siam belh dawn a ni.
Mizo thalaite u, tu hnuaiah mah in awm bik lo ani tih ka hrilh duh che u a, hlawhtlinna sang ber ber tawng pha turin theihna leh chakna in nei. Mahni inringtawk ula, intheihna kha ring tawk bawk ang che u, hlawhtlin tumna rilru nghet pu ula, taimakna leh thawhrimna, tawrhchhelna leh inpumpekna dik nena in tih phawt chuan in hlawhchham ngai lovang tih ka tiam a che u. Hriatna zau zawk leh thiamna sang zawk nei turin Mizoram pawna chhuah hreh suh ula, Mizoram chhungah inkhung bo lovin khawvel zau zawk hi dai dar ula, khawvel ngamtu nih tum ang che u. Infiamna bikah phei chuan India ram mai nilo, khawvel huap pawhin Mizo thalaiten hmelhriat an hlawh tan mek a, in theihna te tipung zelin kawng tinrengah Mizoram tihmingthatu ni ang che u.
Mizo mipuite u, in thinlunga remna thu in ziah kha chhawm nung zelin tihlu zel rawh u, remna leh muanna zar zotu dik tak in nihzia hi India ram mai nilo, khawvelin rawn hmu in entawn che u rawh se. Zonun zemawi “Tlawmngaihna”, mahni inphata midangte tana malsawmna thlentu nihna, hi chhawm nung zel ang che u.
Mizo mipuite tawiawmna leh thlawpna tha tel lo chuan Mizorama ka hun kha ka hmang tluan thei dawn lo tih hi ka hre chiang em em a. In mi tawiawmna leh thawhpuina tha tak avangin ka thinlung tak takin in chungah lawmthu ka sawi a ni. September 2008, a ka nupui thluaka bawk awm zai anih tum leh kumin February thla a ka lung zai (by-pass graft surgery) anih tum a Mizo mipuite min tawngtaisakna, hmangaihna, duhsakna leh min ngaihtuahna zawng zawng te avang khan lawmthu ka sawi a, in mi duhsakna leh thlamuanna zawng zawngte kha kan nupa leh kan chhungkaw tan chakna min petu, hun harsa leh khirh pawh huaisen taka min pal tlang tir tu an ni. Lawmthu sawisen loh Mizo mipuite chungah kan ba a ni.
A tawp berah chuan Mizorama ka awm chhunga hun nuam leh hlimawm tak min hmantir avangin in zavaiin lawmthu ka hrilh nawn leh che u a ni. In zavaiin hmalam hun hlimawm leh nuam tak nei theuh turin duhsakna ka hlan a che u.
Dam takin, Mangtha vek u le.