MPCC in MNF President chu ngaihdam dil turin an phut

Mizoram Pradesh Congress Committee chuan MNF President, Pu Zoramthanga’n MNF-in “Tual kan that lo, ral kan that a ni” tia a sawi chungchangah mipuite hnena ngaihdam dil turin MNF President an phut. Hemi chungchanga MPCC ten Aizawla thuchhuah an siamah , tun thla ni 3-a Kolasib-a Remna champha vawi 25-na lawmnaa MNF President, Pu Zoramthanga thu sawiah “MNF ten zalenna kan sual lai khan India sipaiten min kapin min that a, tual kan that an ti ngai lo, MNF-ten min beitute kan do letna-a anmahni leh an kut tichaktute an thahin tual that min ti thin, tual kan that lo, ral kan that a ni,” tia a sawi chu tarlangin Congress chuan, MNF President-in “Ral an ni a, kan that,” tia sawi chu India sipaite leh Mizoram mi an thahte nia sawiin Mizoram mi an thahte zingah “kawktu nia puh” te, itsikna vanga hek an nih vanga thah, pawi sawi lo tam tak an awm nia sawiin, heng mite ral anga sawi chu tha lo an tih thu an sawi a, pawi sawi lo an thah chhungte hnenah leh zalenna sual tura an bum chhuah, ram tana nunna hlantu, Martar chhungte hnenah ngaihdam dil turin Congress party chuan MNF President, Pu Zoramthanga chu a phut a ni.