October Ni 21 khan DC Conference Hall Lawngtlai ah Lawngtlai District Level Vigilance & Monitoring Committee te chu an Chairman Pu Lalhmingliana MP ho in an thukhawm. Meeting ah hian Ministry of Rural Development hnuai atanga Lawngtlai District chhunga hmasawnna hna thawh hrang hrang a hmalakna kalmek te an thlir ho bak ah hmalak zui dan turte an sawiho a, Centrally Sponsored Scheme hrang hrang kalpuitu Department ten hmalakna an kalpui leh hmachhawp an neihte chipchiar takin an sawi . Vawiin Meeting ah hian Central Sawrkar hnuai a hnathawh hrang hrang an sawiho zing ah MGNREGS, IAY, IWMP leh NRHM te pawh a tel. Pu Lalhmingliana MP chuan MGNREGS ah ni 55 inhlawhfakna hmuh tawh chu thlaphanna tur a awmloh thu leh mamawh anga dilbelh zel theih a nih thu sawiin, Department lam ten Guideline in a phut anga an tihtur an tih fel zung zung a pawimawh a, hmunkilkhawr, Internet hman theihlohna a mite pawhin Internet kaltlanga thawhtur an neihte chu Internet hmantheihna hmun ah an thawh zung zung a tul a ni a ti a, MP chuan IAY thlandan ah Gram Sabha ten IAY dawngtur Lawngtlai District a an la thlang lo chu Gram Sabha ten an thlan theih nan hmalak a tul thu sawiin, meeting a telte chuan Gram Sabha ten IAY dawngtur an thlan theih na turin ruahmanna tlangpui an siam nghal bawk. Meeting ah hian Lawngtlai DC Pu B.Lalhmingthanga bak ah MLA pahnih Pu H.Zothangliana leh Pu C.Ramhluna, CEM pahnih Pu C.Ngunlianchunga LADC leh Pu Kali Kumar Tongchongya CADC, Pu Thangchem Zathang Project Director DRDA bak ah Line Department hotute leh NGO aiawh te an tel tha hle.