Krismas vuakvet ah Halpuah lam chi Khap a ni leh dawn, Thalaite intihhlimna siam dawn

Kar kalta khan Parliamentary Secretary for Home Pu Lalrinmawia Ralte hovin Department hotu hrang hrangten kumin 2011-2012 Krismas leh Kumthar vuakveta halpuah, halmawi, halzit etc. khapna kenkawh chungchang an sawiho a. Nikum leh kum hmasa lama sawrkarin hlawhtling taka a lo khap tawh angin kuminah pawh hian khap leh nise an ti.He Committee hian Mizoram mipui zawng zawngte hnenah Krismas leh Kumthar vuakveta heng sawrkar ina a khap halpuah, halmawi leh halzit etc. te hi hralha lei lo turin a ngen a. Dawrkai leh sumdawngte pawh uluk takin thupek kengkawhtuten an thlithlai reng dawn a, man an nih chuan Dan anga nataka hrem an ni dawn a ni. Krismas leh Kumthar vuakvet hun remchangah Aizawl leh District khawpui zawng zawngah thalaite intihhlimna YMA te nen tanghova siamtum a ni a. Aizawl khawpui chhungah hmun 5 ah siam a ni anga, Lunglei-ah hmun 2 ah siam a ni bawk anga, District Headquarters dang zawngah hmun 1 theuhah siam tum a ni. Aizawl tih loh District Headquarters hmun dang ah chuan DC leh Tlawmngai pawlte nena tanghova hun hman dan tur ruahman a ni ang.Pu Lalrinmawia Ralte chuan mawhphurtute tanrualna zarah kuminah pawh boruak muanawm tak hnuaiah Krismas leh Kumthar hlimawm tak kan hman theih ngei a beisei thu sawiin Mizoram mipui zawng zawngte he ruahmanna hi lo tawiawm theuh turin a sawm a ni.