Tuesday, December 6, 2011

MPTA ten Medium of Instruction chungchang ah Chanchinbumite an kawm

Nimin khan Mizoram Primary Teachers' Assn (MPTA) District Hqrs Lawngtlai chuan LADC hnuai a Primary School a Medium of Instruction atan a Kum 2012 atang a Mizo hman tum chungchang ah Lawngtlai a chanchinbumite Lawngtlai Press Club ah an kawm a. He hunah hian MPTA hruaitute chuan Kum 2003 atangin LADC hnuaia Primary School ah Mizo a zirtirna kalpui thin chu English ah thlak ani an ti a, English a Zirtirna kalpui anih hnu hian zirlai leh zirtirtu ten harsatna nasa tak an tawk tih an sawi a, beidawn vang a School bansan ta naupang engemawzat an awm tawh ani an ti a, CCE (Continuous Comprehensive Evaluation) hman anih atangin Survey, Discussion naupang te neih pui angai thin a, English a inbia a in hrilhfiah tur in zirtirtu leh zirlai ten an tlin loh avangin CCE in a tum an thleng zolo tih an sawi a, hetiang anih avang hian Zirtirna kawng ah Note pe in Teaching method a a chhe ber By-Heart System a kal angai a, hei hian naupang te ah thiamna tak tak a thlen lo tiin, MPTA chuan Kum 2004 leh Kum 2006 a General Conference an neih ah Mizo Medium a let turin Sawrkar ah thlen nise tiin, Resolution an lo passed tawh thu te sawi lang in, tuna sawrkar ding lai hian Kum 2012 atangin Primary ah Medium of Instruction atan Mizo hman an ti ta chu lawmawm an tih thu an sawi. Hetihlai hian Voluntary Retirement Scheme hi hman theih nise chuan thiamlo chung chunga Naupang zirtirna pek ai chuan mithiam zawkte kian a Pension a chhuah pawh zirtirtu te chuan an hreh loh thu an sawi.

December ral hmain Ni 50 thawk hman dawn

MGNREGS hnuai a Job Card neite tan inhlawhfakna kumin December thla ral hmain Ni 50 thawh hman a ni dawn tih thuneitute chuan an sawi a, tunah hian Ni 12 thawhna tur pekchhuah a ni leh tawh a, hei nen hian kumin chhungin Ni 50 thawh hman a ni dawn ta a ni. Tun Sawrkar kum kallai ah Ni 100 thawh hman a nih theih nan buaipui ngaite Office lam chuan an buaipui mek a, thil tul pawimawhte peihfel thawhkhat ni tawh in, vawiin lam hian Aizawl lam ah thawn phei hman beisei a ni a, chatlak lohvin kumthar January thla ah chuan inhlawhfakna tur hi siam leh hmantumin hmalakna kalpui mek a nih thu kan dawng.

Circuit House siamtha mek

Hunreitak Lawngtlai Circuit House siamthat loh a awm tawh chu tunlai hian DC hmalakna hnuai ah siamthat hna thawhmek ani a,Circuit House hi nimin khan Thuthar lakhawmtu thenkhatte cheithat a nih dan a hmun ah an en, a pumpuiin siamthat chhoh mek a ni a, a chungfar thin tihreh nan rangva chih mek niin, VIP Room leh Room dangte pawh chei that mek a niin hmuh a nuam tan viau tawh a ni.

ATM hmantheih

SBI Lawngtlai Branch chuan Pu Ramthianghlima Building ah ATM hmantheih in a peihfel tawh a, nimin lam ah pawh hmangtu an awm nual. heihian State Bank a pawisa lachhuak tur a rei tak tak intlar ngai chu a tihziaawm phah ngei beiseiawm tih thawktute chuan an sawi

Bungtlang ‘S’ Centenary

Bungtlang South khua chuan December Ni 8 hian an khua in Kum 100 a tlin lawmna ropui takin hman an tum, CEM Pu C.Ngunlianchunga chu khuallian tur in an beisei.Bungtlang khawchhuak leh he khua a awm tawh te kim taka telturin an sawm.

Motor Chhiah ah rawtna then theih

The Mizoram Motor Vehicles Taxation (Amendment) Act, 2011 zir chiang tura Mizoram sorkarin a din Study Committee chuan he dan enthat mek chungchangah mipui ngaihdan zau zawk a khawn nise tha a ti a. Pawl emaw mimal emaw a duh apiang hemi chungchanga ngaihdan leh rawtna nei chuan Committee Chairman /Director of Transport, Govt. of Mizoram hnenah December 30, 2011 ral hma in ziaka thlen theih a ni e.

Monday, December 5, 2011

World Disable Day Inrinni khan Lawngtlai ah hman a ni.

Inrinni December Ni 3 kha World Disable Day anih angin,Lawngtlai ah pawh he hun hi SSA BRC Hall ah hman ani.Nl.Laldawmdingi, Resource Person(CWSN) chuan Proggramme kaihruaiin,Pu LZ.Tluanga,DPC chuan World Disable Day hman alo nih dan a sawi a, he ni hman atang hian naupang,a bikin tanpui ngai(Vohbikte) chu ngaihthah mai lova,hmangaihna nen kan enkawl an tul a,piangsualte,kebaite leh pharte hmangaih taka enkawl chu Lal Isua zirtirna ani tih hria a,he lamah rilru thar kan put a tul ani ati. World Disable Day ah hian Pu V.Zirsanga EM(Education) LADC chu khuallian niin Rualbanlo kan tihte hi nuihzat mai lova, hmangaih taka kan enkawl a,dimdawi taka kan kuangkuah hi an tan damna ani tiin khawvel in he ni hi pianphunga rualbanlo te pual liau liau a a buatsaih niin,thupuiah pawh Equality For All tih a hmang nghe nghe ani.chuvangin mi pangngaiten an neih ang chanvo hi heng Vohbikte tan hian phalsak vek ani.chuvangin rualbanlote hi hrethiam taka hmusit leh endawng mai lova kaihruai turin kalkhawmte a chah ani.He hunah hian Nl.Lalchhuanmawii Asst.Co-Ordinator.IEDC.SSA Mission.Lawngtlai District hnen atangin Report on IEDS ngaihthlak niin kum 2011 chhungin CWSN naupang 541 an neih thu a sawi a,Mi panga hnenah wheelchair an pek tawh thu leh Crutch paruk leh Hearing Aid pariat an pek chhuah tawh thu ngaihthlak ani bawk.Tunah hian Lawngtlai Districtah I.E Volunteer 10 an nei mek bawk ani.

Job Card nei 24324

Job card chungchang a RD Department thuchhuah a tarlan a nih dan in, Lawngtlai District ah Job Card endik hma in 26363 a awm a, endik mek niin 2372 paih a ni tawh a, tun dinhmun ah Job Card nei 24324 an awm mek. Mizoram pum ah endik a nih hma in Job Card nei 170085 an awm a, 7153 paih ni tawh in tun dinhmun ah Job Card nei 163265 an awm mek, RD Department thuchhuah ah chuan Job card dinhmun hi danglam thei reng a nih thu tarlan tel a ni a, Job Card 7153 paih a nih vang hian kum khat chhungin sorkar in mipui sum luangral tur cheng Nuai 537.89 a humhim anga chhut a ni.

Chairman Volleyball Trophy zawhfel a ni.

Kum tina an lo neih thin LADC Chairman Volleyball Running Tournament chu Lawngtlai District Volleyball Association te buatsaih chu Inrinni khan zawhfel ani.Kumin hian he Tournamentah hian Mipa team 13 telin,hmeichhia team 6 an tel a,Saiha atanginhmeichhe team khat an rawn tel bawk. Final khelh hma hian inkhawm buatsaih in Pu H.Vanlalthaliana.EM i/c Revenue chu khuallian niin infiam mite ruihtheihthila fihlim a pawimawh thu leh tihtakzetna a pawimawh thu a sawi.Final Mipa ah-Highlander Red( College veng) leh Paithar Volleyball Club te niin Highlander Red te hi an champion a,Hmeichhe lamah Southern Young,Saiha te chuan DoDo Volleyball Club. chanmari hnehin an champion bawk.Champion team hian Rs 7000+Trophy an dawng ani.

Areopagy nawrthluk a ni

Areopagy building thar saktuma hmalakna kalmek a, Zirtawpni zan khan Building awmsa chu JCB pahnih hmangin nawrthluk a ni a, building hmanrua chhia vel senghawiin zanlai thlengin hna thawh a ni a, Areopagy nawrthluk a nih lai hian mipui thahnem takin an thlir a, zanrei thlengin awmchilhtu an awm reng a, hmanrua senghawi zawhloh la awmte senghawi chhoh mek a ni.

Lalhmingsanga pakhatna

Lai Hla Solo Competition zawhfel tak ah Lalhmingsanga Lu ngzarhtum khua chu Pakhatna a ni, Pu C.Ngunlianchunga CEM in lawmman leh Certificate a hlan. Top 5 a tling miparuk te DC Pu Hmingtea’n Rs.1000 theuh a pek bak ah Pi KR Chhingpuii’n Rs.1000 theuh a hlan bawk a ni.

Sipai pawl Khawmpui

Nimin Pathianni hmang khan Sipai Pawl lawngtlai Corp khawmpui vawili na Lawngtlai ah neih a ni a, thupui atan ‘I din ang u’ tih hman niin, thupui hi then sawm ni.

Calender leitheih dawn

Kumtin in Information & Public Relations Department, Mizoram in Calender a siam thin chu kum 2012 ami tur siamzawhfel a ni tawh a, Nilaini atang khian a duh tan DIPRO Office Lawngtlai ah pakhat Rs.40 in a lei theih ang.

Bharat Nirman Campaign Secretary in a khar

Inrinni chawhma dar 10 khan PIC/Bharat Nirman vawi 18 na chu Lengpui Community Hall ah Pu Van Hela Pachuau, Chief Secretary chuan khuallian niin kharna hun a hmang. PIC kharna inkhawmah hian Pu Hela chuan thusawiin sorkar laipuiin, Mizoramah hmachhawp a neih hrang hrangte hrilhfiahna hun PIB kaltlanga a nei chu lawmawm tiin, mipuite hi sorkar hmachhawp hmang tangkai tur leh a neitu dik tak an nih thu a sawi a. Sorkar hnathawkte chu sorkar in hlawh neia a rawih an nih mai thu a sawi. India ram chu hnam hnufualte ngaihtuah thintu anih avangin a vanneihthlak zia hre thar leh turin Pu Hela chuan kalkhawmte a chah a. Ramdangah chuan hnam hnufualte chu rahbehin an awm mai a, India erawh chuan chawikan tumin nasa takin scheme chi hrang hrang a duang thin a ni, a ti. Hetianga PIC hi tangkai hi State Information & Public Relations department hmangin neih thin nise a that a rin thu a sawi bawk. Pu K. Chawngdailova, VCP Lengpui, he inkhawma khual zahawm chuan he hun pawimawh tak hi khawtlang mipuiten hmang tangkai a, an khua leh velah sorkar hmachhawp dik taka thawh anih theih nan tanla thar turin kalkhawmte a chah. Pu H. Zosangliana, President, MJA Hqrs., he huna khual zahawm dang pawhin sorkar hmalakna chu anih thu ang taka huaisen tak leh rinawm taka an kal theih nan hmachhawp chu mipuiin an hriatchian a ngaih thu a sawi bawk. Tun tum PIC/Bharat Nirman vawi 18 na hi Kanghmun ah, 1.12.2011 ah Rawpuichhiap ah, 2.12.2011 ah leh ni 3.12.2011 ah Lengpui khuaah hman niin kharna inkhawmah hian Pu David L. Thangliana, Deputy Director, IPR chuan lawmthu a sawi a, PIB, DAVP, DDK, Songs Drama Division, Field Publicity, AIR, MJA te tang ho buatsaih hi IPR in theih tawpin a tawiawm bawk a, media te kaltlangin inkhawm chungchang a puangdarh thin a ni tiin, Developmental department hrang hrangte inpekna ah lawmthu a sawi bawk. Inkhawm zawh hian CS leh official te chuan free clinic Health &Family Welfare buatsaih fanna an nei a, he hunah hian dam lo thahnem tak an in entir a ni. Chawhnu technical session ah Pu C. Lalduhawma, Secy. MJA leh Executive Member Pu C. Lalhmachhuana te hovin Resource Person Department hrang hrang amite leh mipui kalkhawm ten an nei bawk.

Friday, December 2, 2011

LADC thlasik thutkhawm Nikhat awh chu nimin khan neih a ni

LADC Thlasik thutkhawm nikhat awh chu nimin khan Chairman Pu F.Rohnuna kaihhruaina hnuai ah neih a ni, hun hmasa lam ah November Ni 3 a boral Ex-MDC Pu F.Lalramliana sunna hun neih a ni a, Pu F.Lalramliana hi kum 1982 khan Lawngtlai-III bial atangin thlantlin niin, Executive Member niin Education Department a enkawl, Pu F.Lalramliana hi MLA ah pawh tum hnih thlantlin a ni tawh nghe nghe a ni. Session ah hian zawhna paruk a lut a, heng zing a zawhna Pahnih chu a zawt tu Pu JH Lallianngura a awm loh vang leh a aiawha zawt tur a ruat loh vangin session ah hian zawhna pali zawt a chhan a ni a, Official Bill Reports of the Comptroller and Auditor General of India for the year ended 31st March 2007 chu House ah CEM in a pulut a, chawhnu lam ah sawiho a ni.Pu N.Zangura zawhna chhangin Middle School enkawltu E/M Pu V.Zirsanga chuan LADC Area ah SSA Block Resource Centre pathum a awm thu te, Staff Lawngtlai ah 13, Bungtlang South leh Sangau ah 8 ve ve an awm thu leh an awmna tur hmun niloa Headquarters a dah an awm lo a ti.Pu Lalduhsaka zawhna chhangin CEM chuan LADC Plan Fund sem chungchang ah Equal share tihtawp a ni ang ti a Lai District Congress Committee in Manifesto a dah chu Manifesto a a dah angin kalpui a ni a ti.Pu Tuturu Singh zawhna chhangin CEM chuan LADC Member Salary and Pension chu Aizawl ah thawn a nih tawh thu leh tunah Finance lam in an enmek tih a sawi.Pu V.L Dawma zawhna chhangin Revenue changtu Pu H.Vanlalthaliana chuan LADC Area a Mobilephone Service Provider ten signal tower an bunna ah Council ah phalna an dilloh thu leh chhiah pawh an chawi loh thu a sawi a, zawhbelhna chhangin chhiah an chawi theih leh theih loh leh tuldangte chu lo enzui a ni ang a ti.

Hunpui lo thleng tur hlim taka an hman theih dan tur ngaihtuah a ni

Kumin a Krismas leh kumthar lo thleng tur Lawngtlai ah thlamuang takin hlim taka hman a nih theih dan tur ngaihtuah in nimin khan District Bawrhsap Pu B.Lalhmingthanga ho in a Office Chamber ah Lawngtlai a Department hotute, Tlawmngaipawl leh Village Council aiawh te an thukhawm. Mipui ten thlamuanga hunpui an hmantheih nan theihtawp chhuah in tanho nise an ti a, Lawngtlai khawpui bik ah Magistrate leh Police lam te, YLA leh VC ten thil duhawmlo thleng thei vengin ngawrh takin duty nise an ti a, Halpuah lam chi leh naupang silailem midang tana pawi khawih thei ang chi te, Dawrkai te hnen ah zuarlo tur leh hralh lo turin ngen nise an ti a, Police leh Magistrate duty te bak ah an mahni puibawm tur YLA member te chu vengtin ah insem darh in duty na tur Area insiam tha an ti a, Lawngtlai Bazar ah Information Centre siamin, heta tang hian a tul anga hmalak ngaite bawhzui zung zung nise an tih bak ah December Ni 24,25,26, 30 leh 31 zan bak ah January Ni 1 leh Ni 2 zan ah te tlaivar in duty nise an ti a, December thla chhung in lirthei laka chetsualna laka inven nan Zero Tolerance Week neih tha an ti a, khawpui chhunga Traffic kalphung pawh a tul anga siamrem a, mipuite an him zawk nan ruahmanna awmsa te pawh bawhzui nise an ti. Lawngtlai District Magistrate Pu B.Lalhmingthanga chuan November thla khan Halpuah leh puak thei lam chi te, Silai lem te zawrh leh hralhchhuah leh hman a lo khap tawh a, hemi bawhzui hian Inspection Team ten ngawrh takin hetiang zuar leh hmang an awm leh awmloh enfiah thin nise an ti bawk. Meeting ah hian tel tur a sawmte an telkim tha hle a ni.

World Aids Day hman a ni

Nimin Dec 1 World Aids Day chu Lawngtlai ah World Vision CADP.Gilead Drop in Centre leh District Aids Prevention and Control Committee te tangkawp buatsaihin hman ani.He hun hi Two Wheeler Rally leh Street Play proggramme hman ani,Tlai dar 3 ah Areopagy ah Function neih niin Dr.HC.Thangkima CMO,Lawngtlaichuan kaihruaiin, khuallian Pu B.Lalhmingthanga,DC chuan Mizoram atanga HIV/Aids umbo tur hian mi zawng zawng kan pawimawh vek a,mitin himna hi mitin te kan mawhphurhna ani tih kan hriat a hun takzet ani tiin sorkarin HIV umbo anih theih nan theihtawp in tan ala mek a.Hetih lai hian,HIV Positive kan ni nge nilo tih te pawh hi inhre ngam ila, HIV/AIDS dona kawnga hmasawnna pawimawh tak ani ngei ang ati.Dr.Lalrinfela'n report pe in Lawngtlai Districtah Thisen Test mi 8407 an awm tawh thu leh HIV+ve 79 an awm thu sawiin,kumin 2011 chhung hian Thisen test 1374 awm tawhin,HIV pai 13 hmuh chhuah niin mi 2 te chu Nu Raipuar an nih thu a sawi bawk.

Press Confererence

Vawiin hian LADC a Executive member Pu V.Zirsanga chuan lawngtlai a thuthar thehdarhtute a Office a thingpui inpui pahin a kawm dawn a, Primary School a zirna kalpui Mizo Medium a Sawrkar in thlak a tum chungchang Chanchinbumite hi a sawipui ang. He hun ah hian Thuthar thehdarhtute chu kimtaka tel tur in sawm an ni.

World Disable Day hmang dawn

Inrinni hian SSA BRC Hall ah World Disable Day hman a ni dawn, kumtin in December Ni 3 hi Khawvel pum ah Pianphunga rualbanlote Ni atan a hman thin a ni.

Zanin ah Result

Lai Hla Solo Competition neih mek chu intihsiakna zawhfel a ni tawh a, zanin hian SSA, BRC Hall ah Result puan a ni dawn, he hun hi a hmun a hmanpui turin Organising Committee chuan sawmbik a neih nual vangin, mipui nawlpui tan Hall ah hmun a awm dawnlo tih an sawi.

LSA GEC thukhawm dawn

Vawiin Dar.12:30 hian LSA ,Gen Hqrs.;Lawngtlai chuan an Office,Lawngtlai Bazar ah General Executive Committee annei dawn.He Committee anneih tura an Thu ngaihtuah tur langsar deuh deuh te chu LSA hmalakna chak zawk a kalpui anih theihna turin Special Task Force kalpui dan tur an rel dawn a, Trade Licence enfiah dan tur an rel dawn bakah Tunhnaia LADC Executive Committee in Medium of Instructuion,Mizo Medium-a aleh chungchang , hmalak zel dan tur an rel dawn bak ah LADC Area-a Non-Tribal Mistiri leh helper Work Permit neilo ten Work Permit an siam em tih enfiah dan tur an rel dawn ani.

MZP ten dan tum

MZP Gen. Hqrs chuan P.Chakraborty, Principal Legal Adviser (Principal Secretary tlukpui ) atana rawih nawn leh chungchang nimin khan an ngaihtuah a, Sorkarin kum khat a rawih nawn tawh hnu a thla ruk dang atana rawih nawn a ni leh chu MZP chuan pawi a ti a. Mizo pa, a thawh ang thawk thei an awm lai a hnamdang rawih nawn a ni fo mai chu MZP chuan pawm thiam harsa a tiin a tawp thlengin dodal tha an ti a, rawih nawn a nihna order chu sut leh a nih hma loh chuan vawiin atangin tiam chin awm lovin MZP chuan P. Chakraborty-a pisa kai tur dan an tum.

Petrol man thar

Nimin atang khan Petrol man bithliah thar a ni leh a, rate thar ang chuan Lawngtlai ah Petrol Litre khat M.S Rs. 64.36, XP, Rs. 66.86 a ni.

Manager zin

Mizoram Rural Bank manager Pu R.Zohmangaiha chu Bank lam thil ah Gauhati ah a Training mek, tunthla Ni 13 vel ah Lawngtlai a rawn thlen leh hman beisei a ni.

Sipai lak runpui

26 Assam Rifles bul tumin kumthar February 2012 hian AR Ground Aizawl ah Assam Rifles leh Para Military Force hrang hrang atan Sipai lak runpui (Recruitment Rally) neih tur a ni a, hna ruak 600(zaruk) vel zet hnawhkhah a ni ang Diltute tan an dilna form hian 4th January, 2012 ral hma in Assam Rifles hmunpui Shillong a thlen hman ngei ngei a ngai.

Thursday, December 1, 2011

Residential Special Training Centre Pu V.Zirsanga’n Chandmary-II ah a hawng.

Nimin khan SSA Misssion Lawngtlai chuan Naupang School kailote zirtirna hmun tur Residential Special Training Centre Chanmari II an din chu LADC a Education changtu Executive member Pu V.Zirsanga'n a hawng.Hemipuala inkhawm buatsaih ,Pu LZ.Tluanga,DPC,SSA kaihhruai ah Pu V.Zirsanga chuan Right To Education Act 2009 anga, naupang zawng zawng sikul luhtir tura sorkar laipui hmalakna chu kan ram tan malsawmna ani avangin,mipui ten kan tawiawm a tul takmeuh a.Engkim sorkar tih tura dah vek mai chu khua leh tuite tihtur ani lova, sorkar kan thawhpui a tul ani a ti a, Pu Zirsanga hian LADC Sawrkar in Primary School Mizo Medium a kalpui tumna awm chungchang sawilang in, Zirtirtu zing ah thiam tak tak an awm laiin a tam zawk chuan English Medium a kalpui chu an tlin loh vangin Mizo Medium a kalpui hi Sawrkar chuan tha zawk ah a ngai a, heihian Naupang School kallo leh Nu leh Pa ten Sawrkar School aia Private School a an fate an dah thin pawh a ziawm beisei a ni a ti.Lawngtlai District-ah RSTC 5 hawn tum niin, Sangau,South Lungpher,Vaseikai leh Kamalanagar ah hawn leh tum ani. RSTC hawnna ah hian chanmari II khawtlang hruaituten an tawiawm tha hle a,chanmari II VCP pawhin thu sawiin,an venga hetiang zirna hmun tha buatsaih ani chu lawmawm atih thu a sawi bawk. Residencial Special Training Centre atan hian mimal In luah hawh a ni a, Naupang 20 dahluh phawt an ni dawn a, an nitin Zirna hmarua a thlawnin SSA lam chuan an pek vek dawn bak ah, an ei leh In tur leh silhfel bak ah mutbu thlengin an tumsak vek dawn a, Centre ah hian naupang School kailo enkawl te chu Zirna pangngai an zawm theih nan mithiam ten an enkawl dawn a ni.

Central YLA in hmalakna tur hrang hrang an rel

Nov 29 khan Term thara Central YLA CEC meeting hmasaber chu Central YLA Office ah neih ani. He Meeting hi Pu LZ.Tluanga President CYLA chuan a kaihruai a,meetingah hian YLA Conference Niawhtlang a Nov ni 2-4 chhunga neih zawh taka Rorel thu passed thenkhatte bawhzui dan tur chungchang an ngaihtuah a, YLA Kumpuan "Khawtlang nun siamthat" tih chu YMA pawhin kumpuan a anlo hman tawh anih avangin YMA in an lokalpui tawh dan te zirchian a hmalak nise an ti a.Pu J.Lalrinawma chairman a ruatin Kumpuan Sub-Committee an din nghal bawk.YLA Danpui hman lai mek chu ennawna siamthat nise an ti bawk a, Christmas leh kumthar vuak vetah mipui ten thlamuang taka hun an hman theih nan dan kengkawhtute theihtawpa thawhpui tha an tih bakah hun remchang hmasaber ah meeting neihpui nise an ti a,he hun hi mipui ten hlim taka an hman theih nan Silai mu nei chi leh Halpuah lam chite kawl,zawrh leh hman khap nise an ti bawk.