Tuesday, January 31, 2012

Lawngtlai ah a thlawna thisen pek kum kalta chhungin Unit 491 a tling

Nimin khan Association for Blood Donation, Lawngtlai leh District Hospital Blood Bank tangkawpte buatsaihin Awareness Campaign-cum-Advocacy Meeting, Lawngtlai Blood Bank ah neih a ni, he hun hi Rev.V.Lalhmingsanga President AVBD in a kaihruai a, Dr.H.Lalrinfela Blood Bank Officer chuan a kum tela tlawmngaia thisen pe an pun chhoh hret hret thu sawiin lawmawm a tih thu a sawi a, kum kalta 2011 chhung khan thisen Voluntary a dawn Unit 442 (90%) a ni a, Replecement Unit 49 (10%) niin thisen dawn pek zawng zawng chu Unit 491 a nih thu a sawi a Kum 2011 chhungin Blood Donation Camp tum 14 neih a nih thu a sawi bawk. kum 2011 chhung a Pawl hrang hrang a huho a thisen pete hnen ah lawmthu sawina thuziak chu Pu Thangkima CMO Lawngtlai in a hlan a. CMO hian thusawiin AVBD leh Blood Bank ten thawhhona tha tak an neih vangte, Pawl leh mimal te inpekna vangin a mamawhtute hnen ah thisen pek mai tur a awm thei thin chu lawmawm a tih thu a sawi.

Road Safety Week Pu Beila Khithie-an a hawng

Nimin zing dar 8 khan Feb Ni 3 thleng awh tur Road Safety Week chu Election Officer Pu Beila Khithie-an lawngtlai Bazar a Taxi Stand ah a hawng DTO T.Vanlalmalsawm sanga kaihhruaina hnuai ah neih a ni a, Week hawngtu Beila Khithie, Election Officer, lawngtlai chuan Department te, Driver te, Traffic Police te hmalakna vangin Drivers te an hawihhawm sawt viau tawh a, hma erawh sawn deuh deuh a tul a ni a ti a, Lirthei neitu leh khalhtuten Sawrkar in Lirthei enkawl na dan a siam te tha taka zawm hi himna atan a pawimawh hle a ni a ti. Road Safety week hawn a nih hnu hian Car Flag zawrh nghal a ni, Week hman chhungin Lawngtlai khawpui chhung ah Mobile Court, Enforcement leh Traffic lam ten an nei dawn a, Fimkhur a ngaih thu inzirtirna kawng hrang hrangin neih a ni bawk ang. Week hi Feb. Ni 3 ah YLA Hall Lawngtlai-III ah DC ho in khar a ni ang.

Chenna In neilo Electric Veng khawtlangin an sak sak

Nimin khan lawngtlai Electric Veng khawtlang chuan Pu Khawlianhmunga te chhungkua chenna tur In an sak sak,Pu Khawlianhmunga te chenna tur in sak nan a senso zawng zawng leh In hmun tur thleng in DC Pu B.Lalhmingthanga chuan a ngaihtuahsak a, Electric veng khawtlang hruaitute DC chungah hian an lawm hle a ni. An In sak hi a dung feet 24 a vang feet 12 niin, Assam type a sak a ni. Vawiin a hnatlang chhuak hi mi 80 vel an ni.

Samson Thanruma leh a Pa lehkhabu ziak tumkhat ah tlangzarh a ni

Nimin Thawhtanni khan Lawngtlai a SSA, BRC Hall ah Mizo Academy of Letters ten kum 2010 chhung a Mizotawng lehkhabu chhuak zinga thaber, Book of the Year atan a an thlan Beiseina Mittui tih ziaktu Lawngtlai College Veng a cheng Samson Thanruma lehkhabu thar PRIYA LEH KEI tih leh a Pa Major, Dr. J.Thanruma lehkhabu buatsaih, Zawlnei Lalthlamuana Inlarna tih chu LADC a CEM Pu C.Ngunlianchunga'n a tlangzarh. He hun hi Pu K. Hre-Kung, President Lawngtlai Academy of Letters chuan a kaihruai a, tlangzarhtu Pu C.Ngunlianchunga chuan Pafa a lehkhabu ziak, a rual a tlangzarh hi a awm khat viau awm e tiin, Major J.Thanruma te pafa chhuanawm a tih thu a sawi a, ram hmasawnna chungchang sawilangin, Lawngtlai District ah malsawmna tamtak lo luanglut mek hi mipui ten kan dawn thiam loh chuan ramin a la chhiatpui thei a ni tiin, diklo taka thil ti duhte hi ram leh hnam anga kan do a ngai a, ram a than mek laiin thutak ah pawh kan thang tur a ni a ti. Major Thanruma te pafa lehkhabu ziak tlangzarhna ah hian Zawlnei Lalthlamuana Inlarna tih ziaktu Major Dr.J. Thanruma chuan Lehkhabu kamkeuna a nei a, Zawlnei Lalthlamuana hrilhlawkna tamtak lo thleng dik tawh te avang a, Zawlnei Lalthlamuana a rin em em thu a sawi. Priya leh Kei tih Samson Thanruma ziak chu H.C.Lalnunthara Asst Professor, Gov't Lawngtlai College chuan a Preview a, he lehkhabu hi chhiar chakawmtak a nih thu sawiin, he lehkhabu chhungah hian thawnthu hrang hrang sawm(10) a awm a, Phek 292 a chhah anih thu te, lehkhabu chhung chu la chhiarlo te tan chhiar chakawm tak in hneh takin a hun a hmang in, Pu HC lalnunthara chuan- Priya leh kei tih thawnthu danglam
tak mai ah hian i rin ang reng rengin thil a thlenglo a nih pawhin,lunghnur vak lo mai rawh, Nature mawizia leh khawvel awmtirh ata, la tihdanglam miah loh hlut zia leh duhawmzia tarlan niin, a thawnthu phena zirtur tamtak awm hi i tuipui phalo ang tih hlau zawk la a tha tiin a sawi. Priya leh kei tih ziaktu Samson Thanruma pawhin thusawiin, a lehkhabu lo ziak tawhte Mizo mipuiten nasataka an hlutpui vang leh Book of The Year 2010 hauhtu Beiseina Mittui ziak thei a awm vanga lawmawm a tih thute sawiin, a lehkhabu ziah thar Priya leh kei tih pawh Mizo mipuite tan a lehkhabu chhenfakawm tak chhiar manhla tak a nih a beisei thu a sawi bawk.

Martar Day hmang

Nimin chawhma dar 11 khan rampum hmundang rualin Lawngtlai DC leh a Saff te chuan Martar te Ni an hmang a, DC Conference Hall ah Minutes hnih chhung ngawireng in an ding, SP Office ah pawh Pu Dinesh Kumar SP ho in hetiang hun hi hman a ni bawk.

Saiha MJA Conference

Vawiin hian Saiha District MJA chuan Annual Conference an hmang dawn a, Pu Thangchem Zathang Project Director DRDA Lawngtlai chuan khuallian niin a hmanpui ang.

Training mek

Naktuk thleng awh tur SIRD Mizoram ten BRGF hnuai a an buatsaih VC te pualin Basic Funstional Course for ER’s and Functionaries Training chu nimin atang khan Lawngtlai Press Club ah neih a ni.

Monday, January 30, 2012

Lawngtlai Future Group (LFG) ten kawngpui siammek a hmun ah an tlawh

Facebook a Group pakhat Lawngtlai Future Group te chuan Inrinni tlailam khan 71 RCC Camp piah deuh a National Highway, Blacktopping hna kalmek chu a hmun ah an tlawh a, tun a kawngpui siam hna kalpui mek chu an duhkhawplo hle tih a hmun a tlawhtute chuan The Lawngtlai Post an hrilh , kawngpui awmsa chu tihfai ni mahse, kawng chhuat chu tih chik a nih loh vangin a inman nghet hleithei lova, heihian kawngpui cheithat mek chuan rei a daih an rinloh thu te, Blacktop an thawh mek chu a chungber ah tui luh loh nan a balu leh alkatra chawhpawlh a luan thin (Seal Coated)chu tihve a nih loh vangin kawngpui chu furpui tuar tlak ah Lawngtlai Future Group te chuan an ngailo bawk a ni. He kawngpui cheithat hna hi Bengal Prakalpa Company ten thawk in, Lawngtlai Futurte Group lo dawngsawngtu Company lam chuan Seal Coated hi an thawhtur a a telloh thu te, Lunglei AOC atanga Saiha District a Zero khua thleng tur in cheng vaibelchhia 7.66 ruahman a nih thute an sawi a LFG te chuan pawisa ruahman leh kawngpui siamtur chu inphulo lutuk ah ngaiin kawngpui thuitak pawisa ruahman tlem bawk si ah chuan thiltha a chhuak tak tak thei a an rinloh thu an sawi. Kawngpui siammek hi nguntak a enzui a, theihtawp chhuah a hmalakzui zel LFG te hian an tum.

Thlanmual sawntur vangin Chandmary mipui an in rawnkhawm

Multi Modal Transport Road- in Lawngtlai Chandmary veng thlanmual a sut chhiat dawn vangin Inrinni khan Chandmary mipui leh Chandmary thlanmuala chhungte lo phum tawh te Chandmary Indoor Stadium ah an inhmukhawm a, Branch YLA President Pu Lalhimnakulhpuia chuan thlanmual sawn tur chungchang leh zangnadawmna sawrkar lam a kalpui a nih dan te a sawi a, mipui lam atangin mi thahnem takin thu an sawi bawk, tun dinhmun ah an veng thlanmual ah hian thlan 300 a awm mek a sawnchhuah a nih a, zangnadawmna tur sorkar a an thlen zat chu cheng Nuai 97 niin, sawrkar lam chuan an beiseizat an pek theih loh thu leh cheng Nuai 55 an ruahman thu te, lakchhuah mai theihin DC Office lam chuan an peihfel tawh thu te mipuite chu hrilh hriat an ni a, kalkhawmte hian sawrkar in zangnadawmna a siam chu lungawithlak loh a an hriatrual in, DC thahnemngaihna leh mipuite a ngaihsakna zahawm an tih vangin cheng Nuai 55 chu lak phawt tha an ti a, DC chu khawtlang hruaituten dawr zui se an ti. DC hnen a thlentur thu pawh a kalkhawmte hian an siamfel nghal a ni.

Lalnghenchhana ruang chhar a ni.

Lawngtlai College Veng a Pu Lalramchhana fapa Lalnghenchhana Kum 21, ruang chu nimin Pathianni zing dar 4 vel khan Forest Complex chhung ah chhar a ni. Lalnghenchhana hi Inrinni tlailam khan Forest Complex chhung a thingkung ah a lawn a,zan dar 9:30 vel ah pawh a thiante pahnih Issac Lalrinchungnunga leh Lalhmunsiama te lui kal haw pawh in Lalnghenchhana hi Thingkung a a awm chu an hmu a, hun engemawchen an inbiak thu Issac ah hian a sawi a, an inbiak hnu hian an hawsan mai niin a sawi. Nimin zing dar 4 vel khan Pu Thangchuta College Veng tuichawi tur chuan Lalnghenchhana ruang hi a hmu ta a, ruang hi kawng vang tan zawnga lo awmin a taksa pawh a lo khawng vek tawh a ni. Lalnghenchhana hi a lawnna thing atanga tla ni a rin a ni a, mit a hmutute sawidan chuan a lawnna thing hi a san hle niin an sawi a, a taksa ah hian pawnlam atanga hmuh maitheih hliam lian tham a awm lova, a tukhum a duk a, a ka leh hnar ah te thi a chhuak bawk. Lalnghenchhana ruang hi nimin khan College veng thlanmuala ah vuiliam nghal a ni.

LIKBKTP Day pualin Thisen Unit 67 pe

Jan 27 kha Lairam Isua Krista Baptist Kohhran Thalai pawl (LIBKTP) din champha vawi-12 na a ni a, he Ni denchhen hian LIKBKTP Unit hrang hrang te chuan midang tana thiltha tih nan an hmang a, Paithar LIKBK biak In ah Paithar Pastor bial te chuan Lawngtlai District hospital Blood Bank a dah turin thisen Unit 47 an pe a, thisen petute hi mipa 40 leh Hmeichhia 7 an ni, Paithar Pastor bial ten thisen Unit 40 an pek hi Lawngtlai District ah tumkhat a thisen pe tamber tum a ni. Paithar bial ah hian Paithar, Rulkual, Saikah 'U; te an awm a ni, LIKBKTP Day denchhen vek hian Inrinni khan Lawngtlai Chandmary a LIKBKTP Penial Unit te chuan an Biak In ah Lawngtlai District Hospital Blood Bank a dah tur in thisen Unit 20 an pe a, thisen petute hi Mipa 17 leh Hmeichhia 3 an ni, Paithar leh Penial Kohhran a thisen pek te hi avaiin Unit 67 niin District Hospital Blood Bank Officer Dr.Lalrinfela leh a thawhpui ten a hmun ah panin an laksak.

Charge inhlan dawn

MJA lawngtlai District hruaitu thlan tharte hnen ah vawiin dawr 11 ah hian Press Club ah hruaitu hlui ten charge an hlan ang. Charge inhlan zawh hian O.B Meeting neih nghal an tum.

Road Safety Week hawng dawn

Vawiin atanga hmantan tur Road Safety Week chu tukin zing dar 8 hian Lawngtlai Bazar ah hawnna inkhawm buatsaih a ni dawn. Week hi February Ni 3 ah khar a ni ang.

Martyr’s Day hmang dawn

Kum tinin India zalenna suala nun chanta te hriatreng nan ram pumah January 30 hian Martyr’s Day hman thin a ni a. Mizoram sorkar chuan urhsun takin he ni hi hman turin ruahman na a siam. Aizawl ah chuan chawhma dar 10:59 - 11:00 inkarah Siren tihrik a ni ang a, hna kal lai dahtha in ngawi rengin minute 2 chhung din tur a ni ang. District dangah chuan Day hman dan tur ruahmanna hi DC te kutah dah niin Sub Division, Block leh Village Level Office ah pawh he hun hi hmang ve tura hriattir an ni tawh tih sawrkar thuchhuah chuan a tarlang

Saturday, January 28, 2012

Kumdang ai a changtlung zawkin Lawngtlai ah Republic Day hman a ni.

Republic Day lawngtlai District a hmanna pui ber Lawngtlai ah chuan January ni 26 zing dar 10 khan Central YLA Playground ah DC Pu B.Lalhmingthanga'n Hnam Puanzar pawtpharh in SSA Pipe Band ten Hnam Hla an rem a,Parade contingent te a endik hnu ah DC hian Parade Contingents 13 ten Hnam Puanzar Chibai an buk a chhanglet a, hemi hnu hian thusawiin Pu B.Lalhmingthanga chuan Republic Day chibai Lawngtlai District mipuite bukin Lawngtlai District in hmasawnna hrang hrang a neih te a sawi a, India ram in hmasawnna a neihte chu a chhuanawm takzet a ni a ti a, District Council leh State Sawrkar Department te, Bank leh Company hrang hrang te Tlamngaipawl leh Chanchinbumite,ram mipui ten tihtakzeta ram hmasawnna thinpung pu a an thahna ah lawmthu a sawi bawk. Nimin a Republic Day hmanna ah hian tumdang a la tih ngailoh Department 12 ten an hnathawhte Tableau hmangin an entir a, heihian mipuite hlut a hlawh hle a ni. Republic Day ah hian Lawngtlai District mi, ram pum huapa mihmingtha pahnih, Book of the Year 2010 Beiseina Mittui tih ziaktu Samson Thanruma leh World Women Jr. Champion Lalenkawli te hnen ah khuallian hian chawimawina a hlan a, Parade a tithate leh Republic Day pual a Voleyball Tournament buatsaih a tithate hnen ah lawmman a hlan bawk. chawhnu dar 1 khan sawmbikte Khuallian hian Lawngtlai Circuit House ah Thingpui a inpui. Republic Day pual hian khuallian hian Lawngtlai a Damdawiin pathum leh Motherless Home ah te thilpek a pe bawk

Lawngtlai ah National Voters’ Day hman a ni

January Ni 25 National voters Day chu Lawngtlai DC Conference Hallah hman ani. Chief Guest Pu B.Lalhmingthanga DC chuan thu sawiin Democracy ram kan nihna leh nihphung nemnghettu chu Voters te hi kan ni.India khua leh tui diktak ten kan aiawha ram roreltu tur thlan theuh theihna turin Vote thlak thei tura Electoral Roll-a kan in ziah luh vek hi sawrkar laipui chuan a ngai pawimawh hle a, Democracy ram kan nihna tinghet deuh deuh tur leh India Danpuiin mahni aiawh roreltu tur thlangchhuak thei tura duhsakna min pek Voter kan nih theihna hi ngaihlu thiam ila,India khua leh tui diktak,E/Roll a la inziak lutlo tepawh remchang hmasabera inziak lut theuh turin ka sawm che u ani ati.Khualllian hian Vote nei thar te hnen ah EPIC a hlan nghal. Pu Beila Khithie,Election Officer chuan report tawi pe in Lawngtlai Districta Voters awm zat hetiang hian a sawi.Tuichawng Constituency ah Voters Mipa 12665.Hmeichhia-12631. Lawngtlai West ah Voters Mipa-11041.Hmeichhia-10891 leh Lawngtlai East Constituency ah Mipa-9750.Hmeichhia-10436 a vaiin Lawngtlai District a Vote nei thei chu Mipa 33456.Hmeichhia-33958 an vaiin 67414 anih mek thu a sawi.Recognised Political Paryty Congress,MNF leh ZNP President ten thu an sawi bawk

Lehkhabu Relaese dawn

Priya leh Kei tih Samson Thanruma ziak chu Thawhtanni khian tlangzarh a ni dawn a, hemi rual hian Samson Thanruma a Pa Major, Dr.J.Thanruma ziak Zawlnei Lalthlamuana Inlarna tih tlangzarh tel a ni dawn. Heng lehkhabu pahnihte hi Pu C.Ngunlianchunga CEM in a tlangzarh ang. Lehkhabu tlangzarhna hi SSA, BRC Hall ah neih a ni dawn a, chawhma dar 11 ah tan a ni ang. Priya leh Kei tih ziaktu Samson Thanruma hi Beiseina Mittui tih leh Lehkhabu dang thahnem tak ziaktu a ni.

R-Day a lawmman latute

Parade ah Pakhatna Downtown Girls Contingent, Pahnihna GRHSS Girls Contingent, Pathumna MLJ Girls Contingent, Tableau show ah pakhat na Health & Family Welfare, Pahnihna LADC Art & Culture Department, Pathumna Power & Electricity leh DRDA te an ni. Volleyball ah Police Deparetment pakhatna pahnihna Highlander Blue College veng.

MJA hruiaitu thar

MJA Lawngtlai Dist. chuan kum hnih chhung atan President ah V.Lallianzuala Vice President ah Lalngheta Ralte,Treasurer ah H.Lalrinmawia te an thlang.

Journalist Workshop

February Ni 9 khian Information Department leh MJA tangkawpte buatsaihin Saiha ah Journalist Workshop neih a ni dawn a, District tin atangin Member panga tal he workshop a tel tur hian beisei an ni.

Nirman Campaign

Febrary Ni 7 atang khian Sangau tlang dung ah Bharat Nirman Campaign neih a ni dawn, Feb. Ni 7 ah sangau ah neih a ni anga, Siachangkawn leh Bualpui NG ah te neih chhunzawm a ni ang.

Chawimawina hlan dawn

Thawhtanni khian Association for Voluntary Blood Donation, Lawngtlai te chuan midangte tan a an thisen, Pawl leh Kohhran hming a pe, Kohhran leh pawl te hnen ah Chawimawina hlan an tum, he hun hi District Hospital Blood Bank ah neih a ni ang.

Feb.2 ah School tan dawn

Lai Autonomous District Board of School Education chuan kumin 2012 a LADC hnuai a zirna In Primary leh Middle School te chu February Ni 2 ah School kai tan turin Order a siam.

Officer Club inthlang

Ningani tlai khan Lawngtlai Officers Club chuan hruaitu thar an thlang a,President ah T.Thangthuama, Vice President ah P.Lalrinmawia,Gen.Secretary ah Thathluna Chinzah, Fin.Secretary ah Lalngentluanga, Treasiurer ah Ngurhmingliani Chinzah, Jt.Secretary ah Remlalnghaka te an thlang

Wednesday, January 25, 2012

Lawngtlai a Road Safety Week hmandan tur nimin khan DC ho in duanfel a ni

Nimin khan DC B.Lalhmingthanga ho in a Office Chamber ah January Ni 30 atanga February Ni 3 chhung a lawngtlai a Road Safety Week hmandan tur relin an thukhawm. Kumin ah hian State Sawrkar chuan District thlanbik Aizawl, Saiha, lawngtlai leh mamit ah te Road Safety Week hi hmaturin ruahmanna a siam a, Meeting chuan Safety week hmang tur a Lawngtlai District than chhuah zing a tel vangin theihtawp chhuah a pawimawh thu leh hlawk taka week hman tha an ti a, January Ni 30 zing dar 8 ah Lawngtlai Bazar ah Week hi hawn nise an ti a, Week hman chhungin Lirthei chetsualna thleng thei laka fimkhur a ngaih thu uar leh a zauthei angber in zirtirna pekchhuah nise an ti a, helam hawi ziak uar turin tualchhung Chanchinbute pawh ngen tha an ti bawk. heibak ah hian Week chhung hian Lawngtlai Traffic Police leh MVI tangkawp ten Mobile Court Lawngtlai khawpui chhung hmun remchang lai ah neih nise an ti. Lawngtlai a Road Safety week hman tur hi Feb. Ni 3 ah Lawngtlai DC ho in khar a ni ang. Kumin a Road Safety Week Mizoram a District pali a hman tur ah hian thupui atan 'Accidents bring tears, Safety brings cheers' tih hman a ni dawn a ni.

Officers Club ten hruaitu thar an thlang dawn

Nimin chawhnu khan Lawngtlai Officers Club chuan an President Pu C.Zoramthanga Executive Secretary LADC Office Chamber ah Executive Meeting an nei. Meeing ah hian Hruaitu thar thlan chungchang relin Januray 26 Dar 3 ah Circuit House ah neih nise an ti a, inthlan buaipui turin MJA Lawngtlai District te sawm nise an ti a, Officer hmundang a sawnchhuah te Citation pek chungchang an rel bawk. Heng bak ah hian Lawngtlai Officers Club chak zawk a a kal theih nan ruahmanna hrang hrang te an saweiho bawk, tun dinhmun ah Lawngtlai Officers Club ah hian member 118 an awm mek a ni.

Inbuatsaihna zo

Naktuk a CYLA Playground a Republic Day ropui taka hmangturin inbuatsaihna peihfel a ni tawh a, tarlan tawh angin kumin hian kumdang a hlawk zawk in Republic Day hi hman a nih theih nan Day Celebration Committee chuan ruahmanna chi hrang hrang a siam a, chung zing ah chuan Department ten Tableau an show tur chu Lawngtlai tan thil thar pakhat a ni dawn a ni. Republic Day hi DC ho in hman a ni ang.

Voter’s Day

Vawiin hi National Voter’s Day a ni a, Lawngtlai ah chuan chawhma dar 11 hian DC Conference Hall ah he Ni pual hian hun hman a ni dawn.

Hun pawtsei

Sawrkar laipui Ministry of Home Affairs chuan Mizoram Chief Secretary hnenah lehkha rawn thawnin hmarchhak a State pathum,Mizoram, Manipur leh Nagaland State a Protected Area Regime thlahdul mek chu December 31, 2011 atang khan kum khat dang atan a pawhsei leh thu a rawn hriattir.

NLUP Media Cell

Mizoram Governor hriatpuinain I&PR Department-ah NLUP Media Cell din a ni a, hna thawk tan nghal tura tih a ni. I&PR Secretary thuchhuah tarlan danin Media Cell enkawl tur hian Pu David L. Thangliana, Deputy Director chu a ruat a, amah puibawm turin Pi PB Lianthangpuii, IPRO mawhphurhna pek nghal a ni.

MJA Conference

Vawiin hian MJA Lawngtlai District chuan Annual Conference, Press Club ah an hmang dawn a, DIPRO kaihhruaina hnuai ah kum hnih chhung a District MJA hruaitu tur an thlang nghal ang.

12th Five Years Plan a LADC hmalakna tur CEM ho in ngaihtuahho a ni

Jan 23 khan Lai Autonomous District Council sawrkar in Kum nga lo awm tur a hmasawnna hna a thawh tur te ruahmanna, LADC a Chief Excutive Member Pu C.Ngunlianchunga ho in LADC a mipawimawh ten an nei. He hun hi Pu H.Zothangliana Lawngtlai East bialtu MLA,Parliamentary Secretary pawhin a telpui. 12th Five Years Plan kum 2012-2017 chhung atan LADC a Department 18 te hmalakna tur a mal malin ruahmanna lo am tawhte an thlir ho a, paih ngai leh siamrem ngai lai thenkhatte an paihin an siamrem nghal, 12 Five Years Plan atan LADC Sawrkar in pawisa a ruahman zat hi a vaiin Cheng Vaibelchhia 55000 a ni. 12th Five Years Plan chhung ah ei leh bar a intodelhna te, zirna leh ram mipui ten hmasawnna nasa zawk an neih theihna tur lam hawi te LADC Sawrkar chuan a ngaipawimawh zual dawn a ni. Vawiin a thutkhawmna ah hian LADC a Executive Members te leh Planning & Development Department a hotute an tel a, he an ruahmanna hi Mizoram Sawrkar ah pawmpui turin thawn a ni dawn a ni.

Calendar la awm

Mizoram Calendar chu a duhtan I&PRO Office ah tlem leitur a rawn thlen belh e, a duhtan Office hunchhungin ngaihven theih a ni

Monday, January 23, 2012

District Level Fire Prevention Committee ten hmalakna tur hrang hrang an duang fel

Lawngtlai District Level Fire Prevention Committee chuan kumin chhunga kangmei ven kawng a hmalakna tur hrang hrang an duangfel, Addl.DC Pu Vanlalngena ho a Zirtawpni a Committee neih ah ram kang vengtha khua/veng te tan lawmman siam tha an ti a, Zirna In ah Awareness Campaign neih tha an tih bak ah Lawngtlai atanga chhuak khualzin phur lirthei ah te Kangmei venna lam hawi thuziak tar nise an ti a, Chanchinbu helam hawi ziaktha pawh thlan leh tha an ti bawk. loneiten March Ni 15 hma in hal vek se an ti a, thuzawmlote hrem leh V/C te hnen a puanzar ngaite puangzar a hma la turin LADC leh CADC te ngen tha an ti bawk. Kangmei chhuah duh hun laiin ram vak mi te atanga kangmei chhuak thei ven nan Police Station hnai ber ah Silai nei ten tung vek se an ti bawk.Kangmei venna ah Tlawmngaipawlte chu theihtawp chhuah a hmala chhunzawm zel tur a ngen remtih a niin, hemi chungchang ah hian Central YLA lam chuan Branch YLA tin ah hmalatur a hriattirna lehkha an sem chhuah mek thu Meeting ah hian sawilan a ni. Hei bak ah hian hmalakna tur hrang hrang Meeting ah hian rel a ni bawk a ni.

MGNREGS ah 2011-1012 chhungin Ni 100 thawh hman tum

Tun sawrkar kum kalmek ah MGNREGS hnuai ah Lawngtlai District chhung a Job Card nei te tan sawrkar lam chuan inhlawhfakna Ni 100 chhung pek hman tumin ruahmanna a siam a, kum 2011 December thleng khan Ni 50 thawh hman a ni tawh a, tun ah hian Ni 50 dang thawhna tur pawisa pawh Central lam chuan a rawn pe fel leh tawh a, DRDA Office lam chuan Lawngtlai District chhung a RD Block pali ah Ni 15 chhung inhlawhfakna tur a pechhuak fel tawh a, Ni 35 dang thawhtur la awm chu sawrkar kumthar hmain pekchhuah zawh hman an tum. MGNREGS hnuai ah hian mipuiten hnatangkai hrang hrang thawk a an inhlawh bak ah mipui kut a thawh hleihtheihloh, mipui tana tangkai tur hna hrang hrang Material Component a pawisa dah hmangin thawh a ni bawk thin a ni.
R-Day Trophy LDVA buaipuina hnuai ah Republic Day Volleyball Trophy Mipa tan a neih tur chu vawiin hian khelh tan a ni dawn a, Final hi Republic Day Jan.26 ah khelh a ni ang.

Channel thar

KT Vision ah Channel thar KT Ainawn pek thar a ni a, he Channel hi Pu Elvis Lalthangzuala Editor Rauthla chuan KT Vision behchhan a a pekchhuah niin, thlirtu pawh an tam sawt viau a,Programme kallai buai chuang lovin chanchin thar lang zual leh hriattur pawimawh te scroll hmangin tarlan thin a ni.

Nupa tuak 19 innei

Inrinni khan Salvation Army Lawngtlai Corp buatsaihin an kohhran chhung a Nupa a insiam tawh, dan anga la innei tha lo te tan a huho a inneih that na hun hman a ni a, Nupa tuak 19 dan angin an innei. Heng tuak 19 te hi Capt.K. Lalrinpuia Commanding Officer chuan a inneih tir a,an zing ah hian Local Officer tuak hnih an tel. He inneihna hi Kohhran mipui ten an hlut viauin a hriat a,C.O hian inneih thuchah a sawi bak ah SAY ten Innei te pualin Hla an rem a, inkhawm ban ah Kohhran ho ten inneite puala an buatsaih thing- pui ruai an kilho bawk.

KTP Khawmpui

Nimin Pathianni hmang khan KTP Pastor bial khawmpui neih a ni a,Lawngtlai Pastor bial chuan Thingkah ah khawmpui hi an nei a,Lawngtlai Chandmary bial ten Chawnhu ah khawmpui hi an nei bawk.

Passport dilte tan

Lawngtlai District chhung atanga Passport diltute chuan mahni Address chiang taka ziakin Phone No. tarlan ngei tur a ni a, mahni leh diltu chanchin hre tak nen Pu K.Zozamliana SO, CID/SB Lawngtlai District hnen ah in report thin nise, Passport diltu te tan harsatna an tawh loh nan a tangkai hle a ni tih thu kan dawng.

S.S.A C I R C U L A R

Sarva Shiksha Abhiyan (SSA) Mission, Lawngtlai District chuan heng a hnuaia tarlan Zirlaibu-te hi sawrkar School a kal zirlai naupangte hnen ah Kum 2012 Academic Session atan sem a ni leh dawn a, (hei hian Private Institution a kalte a huam lovang) heng kan tarlan bak zawng hi nu leh pa ten mahni fa/naute leisak turin kan in hriattir a ni. CLASS ZIRLAIBU SEMTURTE (Mizo Medium) I 1. MIZO - I By MBSE 2. MIZORAM ENGLISH READER -I (Adapted) 3. MATHEMATICS - I By MBSE II 1. MIZO -2 By MBSE 2. MIZORAM ENGLISH READER-2 (Adapted) 3. MATHEMATICS -2 By MBSE III 1. MIZO -3 By MBSE 2. MIZORAM ENGLISH READER -3 (Adapted) 3. MATHEMATICS -3 By MBSE IV 1. MIZO -4 By MBSE 2. MIZORAM ENGLISH READER -4 (Adapted) 3. MATHEMATICS -4 By MBSE 4. ENVIRONMENTAL STUDIES -4 By MBSE V 1. GLIMPSES OF ENGLISG GRAMMAR -5 2. MIZO - 5 By MBSE 3. ENVIRONMENTAL STUDIES -5 4. LANGUAGE OF ART - 5 5. FACT FINDER (GK) -5 VI 1. GLIMPSES OF ENGLISH GRAMMAR-6 2. MIZO - 6 By MBSE 3. SCIENCE(Frank Everyday Science)-6 4. FACT FINDER (GK)-6 VII 1. GLIMPSES OF ENGLISH READER -7 2. MIZO - 7 By MBSE 3. SCIENCE(Frank Everyday Science) -7 4. FACT FINDER (GK) -7 VIII 1. MIZO - 8 By MBSE 2. LET’S ENJOY ENGLISH (1) COURSE BOOK (2) LITERATURE READER (3) WORKBOOK 3. GLIMPSES OF ENGLISH GRAMMAR 4. SCIENCE - 8 (Adapted) Sd/- Dy.District Project Co-Ordinator SSA Mission,Lawngtlai District

Thursday, January 19, 2012

Thingkah khawtlang hruaituten Hauhuk, Forest Department hnen ah an hlan

Nimin khan Thingkah khawtlang hruaitu V/C leh YLA hruaitute chuan Hauhuk nu pakhat Deputy Conservator of Forest (Wildlife) hnen ah an hlan, he hun hi DCF Office Lawngtlai tual ah buatsaih niin Thingkah khawtlang hruaitute kut atang hian DCF NR Pradhan leh LADC a Executive Member, Forest changtu Pu H.Chhuanawma ten an dawng. Thingkah khawtlang hruaituten an sawi dan in he Hauhuk hi kumhlui August thla vel atang khan an khaw bul ah a inlar tan a, mipui ten duat taka an enkawl vangin naupang te nen an tualchhai ho thei ta hial a, nileng leng in khawchhung ah awmin, nunau leh tar chhaklo, ramchhuak thei lote awmhlim tu ber a ni ta hial a, Thingkah mipui te chuan an khaw mipakhat an chenpui ang hial ah ngaiin, an duatin, eitur an pek bak ah Tel (Oil) lam chi te an chulh thin tih an sawi. DCF chuan Hauhuk chu ramsa a nih vangin mihring te nen an inchenpawlh in natna te pawh inkaichhawng thei a ni a, duhsak taka eitur an pek te pawh a chhiatpui theih bak ah ran dang lak ah pawh a himlo theih vangin an enkawlna hnuaia dah a nih theih nan Thingkah khawtlang hruaitute nen an indawrna chu Thingkah khawtlang ten sawrkar duhdan hrethiam a harsatna engmah awmlova Forest kut a an hlan chu lawmawm a tih thu a sawi a, LADC a Executive Member Pu H.Chhuanawma chuan ramsa thian ah siam a, naupangte nen tualchhai ho thei hial a kawm nel thei Thingkah mipuite chu chhuanawm a tih thu leh entawn tlak an nih thu sawiin, hauhuk chu a enkawlzui na ah mitin ten mawh an phur a ni a ti. He Hauhuk hi Forest Department lam chuan a hriselna te endikin, ram hnuai a thlah zalen chi a nih leh nih loh hun engemawchen an zirchiangin an enkawl phawt dawn a, hemi hnu a chhuah zalen tlak a mithiam ten an ngai a nih chuan Ngengpui Wildlife Sunctuary ah chhuah a ni dawn a, mithiam ten sahuan lam a dah chi zawk a an ngai a nih chuan Aizawl Sahuan ah dah luh a nih tur thu DCF NR Pradhan chuan a sawi.

Kumdang aia ropuiin Republic Day hman tum a ni.

January Ni 26 a Republic Day lo thleng tur chu kumdang aia ropui leh changtlung zawkin lawngtlai ah hman tumin inbuatsaihna chak taka kal chhohpui mek a ni. Day Celebration Committee chuan tum dang a la tih ngai loh, Department ten an hnathawh, mipui te hmuh theih tur a pho lanna Tableau Show nise an ti a, Department 10 chuang in an show theih Committee chuan a beisei. Kumin Republic Day hi Central YLA Playground ah hman tur niin, zing dar 10 ah tan a ni anga, Deputy Commissioner in Hnam Puanzar pawtpharh in Parade Contingent ten Hnam Puanzar chibai an buk a chhang let ang

Thisen pe

Nimin khan Lawngtlai Chandmary TKP te chuan March Ni 3 a an Branch din champha lo thleng tur denchhenin Lawngtlai District Hospital Blood Bank a dah turin Thisen Unit 20 an pe, thisen petute hi Mipa 15 leh hmeichhia 5 an ni, Dr.Lalrinfela Blood Bank Officer ho in Chandmary BCM Biak In Hall ah kalchilh in thisen hi an laksak.

MJA Conference

MJA Lawngtlai District chuan January Ni 25 khian Annual Conference, Press Club ah neih an tum, he hun ah hian kum hnih chhung a District MJA Hruaitu tur an thlang ngha ang.

LDDVF Assembly

Lawngtlai Dist. Development Vigilance Forum chuan January 27 khian Assembly an ko a, hruaitu thlan tharna an nei nghal dawn.

Nirman Campaign

Thla thar February thla tir lam khian Sangau tlang dung ah Central Sawrkar hmalakna inhrilh hriatna hun Bharat Nirman Campign neih tum a ni.

Governor in Serchhip a tlawh

Mizoram Larsap Pu Vakkom Purushothaman chuan zan khat riakin Serchhip a tlawh a, vantlang puala Larsap lawmna inkhawm 14 Assam Rifles Auditorium ah neih a ni. Larsap chuan Mizoram chu ziak leh chhiar tamna State an ni chu chhuanawm tih thu sawiin, 98% aia sang ziak leh chhiar thiam nih hi thil namen lo tak a ni a ti a, hetih rual hian Sawrkarin mi zawng zawng tan hna a pe vek seng lo tih hriat a tul thu leh, mahni ke pawha ding thei tura inzir a pawimawh thu a sawi a, ziak leh chhiar mai a tawk lova, thiamna bik neih a tul a ni a ti bawk. Larsap chuan Mizo thalaite chona hmachhawn tura rilru huaisen pu an tam tawk lo ni a a hriat thu sawiin Kerala ah chuan lehkhathiamte chu khawvel hmun tinah an kal darh a, India ramah pawh hmun tinah an awm a ni tiin Mizoramah ngei pawh a tlawh chin khua ah chuan Kerala mi a hmuh deuh zel thu a sawi a, Mizo thalaite chu an thiamna chher hriam a India ram mai nilo khawvel ram hrang hrang dai darh turin a chah a ni. Larsap chuan Mizoram hmun tam takah chhungkawnu ber eizawnga hnathawka chhungkaw pa ber in a awm mai mai a hmuh hnem thu a sawi a, thatchhiatna leh rampawna eizawng tura chhuah ngamna Mizoten kan mamawh zia thu uar takin a sawi a ni.Larsap chuan Mizoramah Kohhran leh tlawmngai pawl hrang hrangte hnathawh dan chu fakawm a tih thu a sawi bawk Larsap hi a nupui Pi Lily Purushothaman, Pu K.Lalnghinglova IAS, Secretary to Governor bakah Pu Robert Lalchhuana, Editor Romei Daily Newspaper ten Aizawl atangin an tawiawm a ni.