Thudawnna in a tarlan dan in Borapansury-a Primary Health Centre chu hman theiha siam thuai turin President Secretariat-in Mizoram sorkar a hriattir.
IANS News Agency tarlan danin, he PHC hi kum 1992-a Mizoram sorkarin a sak, tun thlenga hman lohva awm a ni a, hman ve tawh an duh thu hi Mizoram Chakma Development Forum, MCDF invuah te chuan President Pranab Mukherjee hnenah ziakin an thlen a, he an thu thlen bawhzui hian, President chuan Mizoram Chief Secretary hnenah lehkha thawnin he PHC hi a hma thei anga hawng turin a hriattir.
MCDF President Hemanta Larma sawi danin, he PHC hi kum 20 chhung hluihlawn anih hnuah kum 2010 khan cheng vbc 1 sengin state sorkarin a thawm that hna a thawk a, amaherawhchu thawktu tun thlengin dah an la ni lo a, thawktu dah a PHC chu hman thuai an duh thu state sorkar hnenah vawi engemawzat an thlen tawh a, amaherawhchu awmzia a neih loh avangin President hnenah hian an thlen ta a ni.
MCDF General Secretary Paritosh Chakma chuan, an chenna bialah mipuite hriselna dinhmun ngaihtuahtu tur pakhatmah an awm loh avangin harsatna nasa tak an tawk tih a sawi a, mi sing 1 sang 2 vel helai bialah hian chengin, damdawi In pan mai tur an neih loh avangin inven theih natna hrang hrang avangin nunna an chan phah thin a ni. Damdawia inekawlna an neih loh piah lamah an chenna chhuntu kawngpui an neih that loh avangin harsatna an tawh belhchhah nasa hle tih a sawi bawk.