LADC Session chu zawhna leh chhanna bak ah Budget sawiho nan hmang

LADC Budget Session nimin a chhunzawm ah Chairman Pu F.Rohnuna kaihhruaina hnuai ah hun hmasalam chu chu zawhna leh chhan hun atan hman niin, Chandmary bialtu MDC Independent member Pu C.Lalsawmzuala zawhna chhangin CEM Pu C.Ngunlianchunga chuan tuna DC Bungalow chu an hmun tur diktak Chawnhu ah sawnchhuak turin House a Resolution Passed a nih tawh angin sorkar lam chuan theihtawpin a bawhzui thu leh Mizoram Chief Minister bak ah Chief Secretary ah pawh hemi chungchang hi thlen a ni tawh thu te, an ni atanga chhanna an hmuh pawh bawhzui a nih leh mek thu a sawi a, tuna harsatna awm chu Chawnhu a DC Bungalow leh Quarters te chu State PWD ten an luah vang niin a sawi. Chawngte'P' Bialtu MDC Pu Duhsaka zawhna chhangin Executive Member i/c Rural Development Pu Lalchuangliana chuan miharsa zawk, inchung tur neilo te hnen a sem tur rangva lei nan cheng Nuai 16 leh sing 4 sen a nih thu a sawi. Sakeilui bialtu MDC Pu Tuturu Singh zawhna, Middle School changtu E/M Pu V.Zirsangan a chhanna ah UPS Zirtirtu hriselna thalo, khawpui a dah lailawk a nih chungchang a zawhbelhna awm, Zirtirtu hrisellote khawpui a dah an nihin, a hrisel zawkte thingtlang lam ah dah mai nise ti a rawtna chu Pu V,Zirsanga chuan sorkar in rilru a lo neih zui an tum thu House ahrilh.TuturuSingh zawhna vek chhangin E/M Lalneihkhuma chuan LADC Sorkar in Mid day meal a sem ngailoh thu sawiin SSA atang erawh chuan kar khat ah school kai ni apiangin Mid Day Meal hi sem a ni thin a ti. Zawhna leh chhan hun hman zawh a nih hnu hian LADC Budget House a a pharh taka chu sawihona hun hman a ni.