Wednesday, October 31, 2012

LADC a CEM in,Mizoram State Boxing Championship Aizawl a neih a hawng

34th Mizoram State Boxing Championship chu nimin khan  Aizawl a Hawla Indoor Stadium ah tan a ni a, He championship hi  Pu C. Ngurlianchhunga CEM Lai Autonomous District Council  chuan khuallian niin a hawng a, LADC a CEM chuan Sorkar in infiammite hmasawn nan a ruahmanna hrang hrang a kalpuite chu chhuanawm a tih thu te, Boxing chu khawvel huap pawh a Mizoram pholangtu langsar tak a nih thu leh infiammi ten tihtakzetna te, insumtheihna leh tumruhna nen ke an pen a pawimawh thu a      sawi. Chief Minister       leh        Sport Minister   te hmalakna chu chhuanawm a tih thu CEM chuan sawiin,District tin a Boxing Ring dah a ni chuan Boxing lam ah hmasawnna a thlen nasa hle a ni a ti. Catch Them Young Policy chu kumthar lam ah chuan District tin ah chak taka kalpui theih a beisei thu a sawi a, kum 2013 a Mizoram State Boxing Championship chu Lawngtlai a nghat turin thuneitute a ngen nghal bawk.He Championship ah hian Sub Juniour       ah Mipa 134 leh Hmeichhia 44 te tel thei in Seniour Mipa ah 55 leh Hmeichhia 12 te an in lan bawk        in Bozer 245 in lan theiin Bouts 203 ah then a ni, Pu Ngurlianchhunga chuan MIZBA hruaitute hnen ah Rs20000 a hlan bawk.

Lai Students Hostel sakna tur First Instalment Release a ni tawh.

Aizawl a Lai Students  Hostel sakna tur a LADC Sorkar hruaituten hma an lakna kalzel ah Hostel sakna tur Cheng         Nuai 632 ruahman atangin  First Instalment ah cheng Nuai 214.82 Release a ni tawh tih LADC a CEM Pu C.Ngunlianchunga   chuan The Lawngtlai Post a hrilh a, CEM chuan zirlai naupang 400 atanga 500 vel awmtheihna turin Hostel hi saktum a ni a ti a, Lai District in kawng hrang hrang a hmasawnna rap a, State leh central sorkar duhsakna a dawn ah ram mipuite chu Pathian hnen ah lawmthu sawi turin CEM chuan a sawm.

DoNER Minister lokal dawn


     DoNER Minister Paban Singh Ghatowar chuan ruahmanlawk ang chuan thlathar Ni 6 hian Lawngtlai a rawn tlawh dawn a,DoNER Minister hian  Lawngtlai khawpui By-Pass Road laih tur a ruahman, cheng  Vaibelchhe 12 sen na tur lungphum a phum ang

CJM thar



       Chief Judicial Magistrate Lawngtlai Pu Liansangzuala chu hmundang ah sawn a ni a, CJM Lawngtlai atan Vanlalena dah niin,  naktuk atang hian mawhphurhna a la nghal dawn a, CJM thar hian Lunglei nen a kawp hrih ang.

Oil man thar


    Lawngtlai ah MS Litre 1 Rs. 67.10 chu Rs. 67.39.a tihsan a ni a, XP Rs.76.10 chu Rs. 76.39. niin HSD litre 1 Rs.46.22 chu Rs..46.39 niin XM Rs.60.56 chu Rs.60.74 a ni tawh.

Power that beisei


    Dan pangngai angin  Mizoramin Phai lam atangin Power MW 58 vel a hmuh leh theih beisei a ni a, Mizoram atanga siam chhuah Power MW 11 vel nen mumal zawkin Power neihtheih a nih leh tawh beisei a ni.

Ar lakluhin harsatna siam

 All Mizoram Poultry Farmers & Dealers Association (APFADA)  chuan Mizorama ar vulhtute harsatna chi hrang hrang zingah state pawn atanga ar puitling lolut thin leh khuahkhirhna mumal awm si lo chuan tualchhung ar vulhtute harsatna a siamsak nasa tih an sawi.

Monday, October 29, 2012

LADC Chairman Car chesual ah Driver a thi

Inrinni zan dar 7:30 vel a Lawngtlai a Lai Autonomous District Council, Chairman Pu F.Rohnuna Motor kawllai Swift Car MZ-07 / 1117 chesual ah Motor khalhtu B.Lalhumliana kum 25, B.Cheuvunga(L) fapa Pangkhua chu a boral ,Lai Autonomous District Council Chairman Pu F.Rohnuna, Aizawl a zin haw chu Lawngtlai a thlen hnu ah Aizawl a Driver a hruai chu, Chairman driver tho B.Lalhumliana hian an In lam ah a thlah a, a haw lam chu Lawngtlai Council Veng leh Lawngtlai Vengpui inkar kawng ah kawngthlang lam ah tlanliam in, feet 300 vel a lum a, kawnghnuai a Pu Vanlalkima te In kawt ah a tla thla a, motor hi a chhe hne hle a, Motor ah hian midang chuang an awmlo. Motor khalhtu B.Lalhumliana hi mitlawmngai ten Christian Hospital Lawngtlai an panpui hnu ah a thi. Chetsualna thlen chhan hi hriat a ni hrih lo, B.Lalhumliana ruang hi a zan la la in an khua Pangkhua panpui nghal a ni a, ruang phurhna tur leh tulpawimawh dangte LADC Chairman Pu F.Rohnuna hian a ngaihtuahsak a, chetsualna an tawh vanga chhanchhuahna leh chhawmdawlna hna chi hrang hrang thawktu mitlawmngai te chung ah LADC Chairman Pu F.Rohnuna chuan lawmthu a sawi.

LIKBK Pastor Bial khawmpui neih a ni

Oct 25 atanga tan LIKBK Bial Inkhawmpui chu Pastor bial hrang hrang ah neih niin nizan khan a tiak Inrinni khan Rorel ani a.Bial khawmpui hi Pastor Bial hrang hrangah neih niin,Lawngtlai Khawpui ah chuan AOC Pastor Bial chuan Electrict Veng Biakin ah an nei a,Vengpui Pastor Bial in Bethel Lawngtlai-I ah neiin Chanmari Pastor Bial chuan El-Bethel Kohhran ah an nei a.College Veng Pastor Bial chuan Penniel Lawngtlai-IV Biakin ah an nei bawk.Rorelna hunah hian Kohhran inrelbawlna chi hrang hrang ngaihtuah ani a, Political Education neih chungchangte, Chanchintha Puandarh kawnga Khawvel Huap Rawngbawlna zauzawk a hmalak thar chungchangte an ngaihtuah a,Bial tinah Upa Thlan dil Kohhran an awm deuh vek bawk.He Bial Khawmpuiah hian 'A thlawnin in hmu a, a tlawnin pe ang che u" tih chu Pastor bial tin ah hman a ni.Tun dinhmunah LIKBK ah hian Kohhran ( Local Church) 97 a awm mek a,Kohhran Member hi Singhnih leh Sangnga bawr vel niin thudawnna chuan a sawi.

ABC khawmpui

Baptist Church of Mizoram, rorelna sangber dawttu Area Baptist Council, Zirtawpni atanga tan chu nizan khan a tiak. Baptist Church of Mizoram hnuai ah hian Area 12 awmin Inrinni khan rorel a ni a, thu passed zing ah rorelna sangzawk Assembly a thlen tur a tih a awm nual. Lawngtlai Area Baptist Council chuan khawmpui hi Lawngtlai Bazar BCM Biak In ah an hmang a, Nimin Pathianni chawhma khan Rev.K.Lalbiakchhawna'n Upa 12 a nemnghet a, chawhnu lam ah Lalpa zanriah sacrament an kilho, Lawngtlai Area Baptist Council khawmpui ah hian thupui atan Rinawmna tih hman a ni.a, nizan khan Rev.Lalhmunsanga hnen atangin thuchah ngaihthlak a ni,LABC ah hian Palai kal an thahnem hle.

A.Lalhlimmawia, Final a lut

LPS Comedian Search neih mek ah Lawngtlai District atanga tel A. Lalhlimmawia, Thingkah chu Final Round a inlan turin a tling;Final a tling dangte chu Lalhmingmawia, Tuahzawl, Lalduhawma, Aizawl Dinthar te; H. Malsawmtluanga, Serchhip Sailiam te; Laljoela, West Phaileng leh Lalnunsanga, Ramhlun North, Aizawl te an ni.

MNF ah lawmlut dawn

Lok Sabha MP hlui Dr. H Lallungmuana chuan MNF party zawm dawn a, ruahman lawk ang chuan vawiin hian Mizo Hnam Run-ah MNF President Zoramthanga'n a lawmlut ang. Vawiin vek hian Pu Lalhmingthanga, Ex-MLA kaihhruai PC party chu MNF-ah lawmluh an ni dawn bawk

CJM thlah dawn

Vawiin chawhnu hian Pu Liansangzuala CJM thlahna hun DC Conference Hall ah Lawngtlai DC Pu Hmingtea ho in neih a ni dawn.

Gas Connection sing 2 vel suspend

Indian Oil Corporation Ltd. chuan Gas neitu hriatchianna tur (Consumer verification) a kalpui mekah connection sing 2 vel chu a dik tawklo nia hriain a suspend tawh a, heng a suspend te hi dan pangai anga pe leh turin Food, Civil Supply & Consumer department chuan IOC hotute an ngen mek.

Mizoram Journalist dem

London Olympic boxing-a Bronze Medal latu MC Mary Kom chuan Mizoram Press mite chu a thusawi a dik lova ziakah puhin, Mizoram press mite an insawifiah a phut a, Mizorama kal a tum tawh loh thu Manipur press mite hnenah a sawi. Hetih lai hian, Aijal Club-a Press Conference a neiha tel press mite chuan Manipur press mite a demna thu Mary Kom hian a sawi ngei tih leh a sawina video pawh hmuh tur a awm ngei thu an sawi thung.

MPCB in phalna pe

Oil India Limited-in Maubuang leh Thenzawl inkara Oil emaw Gas emaw a awm leh awm loh an laih chhinna tur atan Mizoram Pollution Control Board chuan kum khat atan phalna a pe.Helai biala oil leh natural gas zawnna atana a hmunhma buatsaih hna hi thawh mek a ni a. Oili leh Gas lo awm ta sela a laih chhuah hna thawhna atan Pollution Control Board hian a tul angin phalna hi a pe chhunzawm thei dawn a ni.

Kawng siamthatur in Sorkar phut

Mizoram Truck Owners Association chuan Inrinni khan Bawngkawna an pisa-ah General Assembly an nei a, an thu pass zingah Mizoram chhunga National leh State Highway-te chu a chhiatna a rei lutuk tawh avangin lirthei leh mipuiin an tuar niin an sawi a, kawng a chhiat avanga lirthei chesual-ah mi an thi nual tawh nia sawiin, kawngpui chhe lutuk chu sorkar-in rang takin siam nghal se an duh thu an sawi bakah, lei tam tak chhe lutuk leh zawh ngam mang lohte pawh siam tha turin sorkar an phut.

MPC Thalai ten Thudik leh awihawmlo an an ngai

MPC thalaite chuan tun thla ni 18-a Tanhril a Parl. Secretary, Pu Lal Thanzara thusawi nia an sawi, “Mizoram hi North East-ah kawng leh power-ah kan tha lawr lak” a tih chu thil dik lo leh awihawm lo niin an sawi. Thuchhuah an siamah hmarchhak state hrang hrangah Mizoram mite zin veivakin an kal reng a, state dang kawng leh Mizorama kawngte chu an khaikhin reng niin a sawi a, kawlphetha siam chhuah zatah pawh Mizoram chu a dinhmun chhe ber niin an thuchhuah ah an tarlang a ni.

PHE Minister in MSO Gen.Conference a hmanpui

Laki khua a nghah 25th MSO General Conference nithum awh tur ( 24 - 27, October, 2012) chu Pu S.Hiato, Minister chuan khuallian niin a hman pui.Minister chuan General Conference Silver Jubilee lungphun hawngin, MSO Gen.Hqrs buatsaih“ Vyphao Magazine” a tlangzarh nghal bawk.Conference hman zawh hian Palak bial khaw hrang hrang Khopai, Ahmypi, Zawngling, Tuipang, Theiri leh Theiva te tlawh nghalin, mipuite chu sawrkar hmalakna tawiawm tha a, kutdawh rilru paih a, mahni intodelh tum ngei turin a chah.

Thuampui ah tharum thawhna a thleng

Inrinni tlai khan Aizawl Thuampui Veng ah BRTF (Pioneer) motor-in naupang Suraj Karki s/o Bhola Kari chu a chil a, Aizawl Civil Hospital panpui a ni a, FirstAids peka chhuahtir a ni a, a nu leh pa te an ngaithat loh vangin Greenwood Hospital ah admit a ni.Hemi chungchangah hian a chiltu Phillips Soren chu BRTF Camp ah a tlanlut a, Traffic Police hnenah an pe lawk duh loh a, mipui thinur vangin Gypsy soft top pakhat leh Bolero pakhat chu a kang a; Gypsy hard top pakhat a chhe nual a tui phur motor darthlalang a keh bawk. Wet Canteen chu a kang ral ral vek a, BRFT Clothing store, thawmhnaw thahnem tak an dahna leh Ration store pawh a kan bakah building dang pakhat a kang bawk. Mipui pungkhawm leh Police te nasa takin an innawr buai hnuah Police te hnenah naupang chiltu hi hlan a ni.

Monday, October 15, 2012

Vawiin hian V.C 5 ah By-Election neih a ni dawn

State Election Commission in ruahmanna a siam angin Lawngtlai District a VC 5 a By-election neih tur atan tukin zing dar 7 atang hian Vote thlak tan a ni ang. CADC a VC pahnih ah chuhtum a hmingpe 25 awmin LADC a VC pathum ah chuhtuma hmingpe 18 an awm a, inhuhdawkhun tawp ah hmingpelut atangin inhnukdawk an awmlo a. VC panga ah hian Congress in Candidate 20 neiin MNF in 11 an nei a, Independent Candidates 12 an awm bawk.CADC huamchhung a Nalbonya Voters 227 awm in VC Seat 5 a awm a,VC thiah vanga inthlan ngai Jamersury ah Voters 327 VC Seat 6 LADC huamchhung a VC thiah Lungpher Voters 965 Seat 7, Member boral vanga hmunruak hnawh khah nan a inthlan ngai Siachangkawn ah Voters 621 an awm, member pakhat thih vanga bawk a thlan ngai Saizawh ‘E’ ah Vote neithei 165 an awm bawk. Venhim uluk ngaizual Polling Station a awm lo. District Election Officer Pu B.Lalhmingthanga chuan hriattir a tihchhuah ah, Vote thlak hun hi tlai dar 4 thleng a ni dawn a, vote thlak zawh hian chhiar zui nghal a ni dawn a, engemaw vanga inthlanthat ngai a awm a nih chuan naktuk ah vote thlak a ni ang. Tuntum a VC inthlanna neih tur hi State Election Commission hnuai a Council Area a VC Election neih hmasak ber tur niin kan hria.

LCMC a Deluxe Cabin CEM in hawng

Oct, ni 12 khan LCMC a Deluxe Cabin tur a ruahman chu CEM PU C.Ngunlianchunga’n a hawng.He Deluxe Cabin hawnna inkhawm hi Rev. Dr.LH.Lalpekhlua Associate Gen. Secretary i/c Missions LIKBK chuan a kaihruai a, Pathian ropuinan leh Damlo ten damna an lo channa hmun ni turin LADC CEM Pu C.Ngunlianchunga chuan Ribbon chep chat in a hawng. CEM chuan mi inpe te avanga Building thar hawng thei a kan awm hi a lawmawm a, kan ram ah mahni in bul leimin pawh sawrkar kan pun a, keimahni tihtheih rengah pawh kan sum sen kan hreh avangin a theih ang ang a sawrkar nawr in hma kan la thin a, chutiang nilova midang phutna tel hauh lova Pu H.Tuma te pafa inpekna hi a ropui tak zet ani, engkimah a petu ni lova a dawngtu nih duh vek ram ah kan awm a, chutiang kar a malsawmna LIKBK Kohhran in a dawng hi a lawmawm hle ani ati.Pu C.Ngunlianchunga chuan kan ram ah malsawmna tamtak lo kal mek ah hian a ram neitute hian Dikna, Rinawmna leh Thianghlimna nen a kan lo hmachhawn a tul tak zet ani ati bawk. He hun ah hian Rev. C. Hrangzuala Executive Secreatry, LIKBK chuan report pe in, He Building hi Pu H.Tuma tuna Australia a awm mek chuan a nupui Diana Grace hriatrengnan a Pawisa a thawh atang a sak ani a, a len zawng hi a dung 60 ft, a vang 28 ft niin, LCMC Deluxe Cabin tur a ruahman ani a, Room Paruk (6) a awm dawn thu tar lang a, a vai a senso chu Rs. 17.00 lacs anih thu a sawi. Pu H.Tuma te chhungkua hian he Diana Grace Tuma Building hi LIKBK Assembly kutah an hlan nghal ani.

Inkhawmpui

Presbyterian Kohhran Rorelna sangber dawttu Presbytery chu nimin Pathianni hmang khan neih a ni a, Chhimtuipui Presbytery chu Saiha ah neih a ni. LIKBK Naupang Pawl Sangau Bial inkhawmpui pawh nimin Pathianni hmang khan neih niin He Inkhawmpui ah hian Speaker atan Rev.A. Khawlrimawia (Sangau LIKBK Bialtu Pastor) hman a ni a, Thupui atan ‘Naupang dinhmun - Lalpa ah’ tih hman a ni.

Hnatlangpui ko

Lairam Gospel Centenary lawmna atan CYLA Playground a Pandal sak hna tan turin naktuk hian Hnatlangpui koh a ni. Centenary lawmtur hian kawng hrang hrangin inbuatsaihna kalpui mek a ni.

Journalists Meet

Tunkar Zirtawpni khian Chhimbial Journalists Meet, Saiha ah neih tur a ruahman niin, Saiha,Lawngtlai,Lunglei leh Hnahthial a Chanchinbumite kimtaka telturin an inhriattir.

YLA Games zo ang

YLA Games 2012 chu ruahsur vangin zawhhun tur a ruat ah zawh hman a nilo a, vawiin lam hian Games hi zawhfel hman beisei a ni

Friday, October 12, 2012

District Council Enquiry Commission leh LADC hotute inkawm

Nimin khan LADC hruaitute leh District Council Standing Inquiry Commission te chu CEM Pu C.Ngunlianchunga Office Chamber ah an inkawm.District Council Standing Inguiry Commission an Chairman T.Gupta leh Member Pu Zahre leh Member Secretary Pu Ringliana te chuan LADC a MDC leh mi pawimawhte in kawmna ho naah hian Inquiry Commission report te thlir lawk ani a,LADC hotute chuan Commission report lailawk chu tha an ti a,pawm theih tur anih thu an lo hrilh a,Pu Hmunhre Vice Chairman,Planning Board,LADC chuan India ram hmarchhak state pasarihte zinga Ram kilkhawr ber an nih thu sawiin, India sawrkar hriat phaka 6th Scheduled a khungluh annih chu lawm ngawih ngawih tur an nih thu a sawi a.6th Scheduled in a phal chin Developing Departments te chu Autonomous Dist.Council hnenah hian hlan vek nise a that thu a sawi a,hemi titur hian 6th Scheduled Amendment angai a,chu mi titur chuan Home Ministry in an buaipui mek chu lawmawm a tih thu asawi a. Lai,Mara leh Chakma District Council hruaituten Assam-a District Council Pakhat Bodoland Territorial Council thu neihna ang chiahin 6th Scheduled ah khung lut ve se tih an lo sawiho tawh thu a sawi bawk.CEM Pu C.Ngunlianchunga chuan Inquiry Commission ten thahnem ngai taka hma an laksak naah lawmawm atih thu a sawi a,LADC in hmasawnna tura hma a lakna tamtak te chu a hlawhtlinna an nghah mek thu leh,Ramin hma a sawn ngei theihna tura chaktaka hma lak an tum zel thu a sawi bawk.

Lawngtlai ah SIRD buatsaih, Workshop neih a ni.

Nimin khan DC Conference Hall Lawngtlai ah State Institute of Rural Development (SIRD) Kolasib bultum in District Level workshop on Lab- to -Land Initiative tih thupui hmangin District Level leh Block Level a Core-Group member te tan Sensitization Workshop neih ani,workshop ah hian Centrally Sponsored Scheme(CSS) hnuaia hmalakna te District Level leh Block Level a Core- Group member te mawhphurhna leh Plan tha zawk a siam leh kalpui dan turte zirtir anni a, Central Sawrkar in Planning Policy thar a mipui nawlpuite pawimawhna leh Planning a tih tur an neih te kalkhawmte hnenah hian an sawi bawk Pu Lalramnghaka Director SIRD Kolasib in zirtirna pe in, Workshop hi Pu Beila Khithie Addl. DC in a hawng a, Pu Thangchem Zathang, Project Director DRDA Lawngtlai in workshop kalphung a sawifiah bawk.

CADC thiatturin ngen

MNF President, Pu Zoramthanga’n ramri hung chungchanga dik lo taka zangnadawmna pek a nih dan, CBI-in a chhui theih loh tura lehkha pawimawh haltu-a a puh, CADC Executive Member-te chu thubuai siamsaka man tur leh, CADC chu thiat turin Larsap a ngen. Pu Zoramthanga chuan Larsap chu Bangladesh ramri hung avanga zangnadawmna pek chungchangah CADC hotute’n anmahni leh an chhungte tan pass lem siamin Rs. 11,00,00,000 zet an la niin a hrilh.

C.M hoin E/Roll tha neihdan tur sawiho

Nimin khan Chief Minister Pu Lal Thanhawla chuan a office ah Lawngtlai, Lunglei, Mamit, Kolasib leh Aizawl District DC te leh Central YMA hruaitute meeting a neih pui. Meeting ah hian electoral roll revision chungchang an sawiho a. Ram laili hmun tam takah voters punna tlemte anih laia ramri hrul lama an pung nasa chu sawiho niin ramri hrula voter pung vak hian ram venhimna chungchangah pawh harsatna a thlen thei a, chuvangin Chief Minister chuan DC te chu an bialah fimkhur tur leh fet hle turin a chah. Hei hian inthlanna felfai leh thianghlim, MPF te duhdanin kan neih theih phah ang a ti.Chief Minister chuanMyanmar khua leh tui voter ni bawk, Bangladesh khua leh tui voter ni bawk te leh India State dang ami voter nilai te kan ramah electoral roll ah an chuang thiang lova, India Danin a khap a ni a ti. Electoral Roll thianghlim leh felfai siam tura fimkhur turin a chah a. Inphu lo taka electoral rolla pun hi ram tan leh India pumpui tan a hlauhawm a ni a ti.

SSASWA Gen.Conference

SSA Staff Welfare Asoociation Lawngtlai District chuan October Ni 17 khian YLA Hall ah General Conference an nei dawn, DC, Pu Hmingtea chu khuallian tur a beisei a ni.

Disaster Reduction Day

Vawiin hi International Disaster Reduction Day a ni a, chhun dar 1 ah DC Conference Hall ah Day pual hian inkhawm buatsaih a ni anga,CEM in a hmanpui ang.

Village Council By-Election atan inpeihfel

Lawngtlai District a VC 5 a By-election neih tur atan ruahmanna peihfel ni tawh in, karleh Thawhtanni khian Vote thlak a ni ang. CADC a VC pahnih ah chuhtum a hmingpe 25 awmin LADC a VC pathum ah chuhtuma hmingpe 18 an awm a, inhuhdawkhun tawp ah hmingpelut atangin inhnukdawk an awmlo. VC panga ah hian Congress in Candidate 20 neiin MNF in 11 an nei a, Independent Candidates 12 an awm bawk.

Thursday, October 11, 2012

MPF hruaitute leh MDC te an inkawm

Nimin khan Mizoram People Forum(MPF) Lai Autonomous District Forum hruaitute chuan LADC a MDC te an kawm. MDC te hi LADC CEM Pu C.Ngunlianchunga Office Chamber ah an kawm a, Rev. H.Lalsangliana President MPF Lai Autonomous District Forum chuan kaihruaiin, he an inkawmna ah hian in MPF lam atangin Point 10 MDC ten an chhan tur zawhna siam ani a, heng zawhna te hi MPF Member kalte atanga chanvo insem a zawh anni a,He hunah hian Sawrkar kallai mek Pu C.Ngunlianchunga kaihhruai Congress sawrkar chuan MDC inthlan hnunhnungber a an Manifesto mipui a an zawrh chu engchen nge tihhlawhtlin anih tawh tih te, Development mipui in an chanvo diktak an chang em tih te leh Zirna chungchang ah zirtirtu an awmna ah an awm tha em,Hlemhletna lak ah an fihlim em tih te bak ah Party mi leh sa chauh induhsakna in mipui chanvo sem ani em tih te anni a, Heng zawhna hrang hrang te hi CEM Pu C.Ngunlianchunga chuan, “Party mi leh sa chu chanvo tam zawk changtu an ni ngei a, amah erawh chu a vai vai in Party mi leh sa in an chang lo ani,tiin zirtirtu anmahni post a awm lote hi engtiklai pawhin Council sawrkar chuan a thlithlai reng thu leh hetiang mi awmte chu a dim dawn loh thu a sawi. Nimina inkawmhona ah hian sawrkar kalphung leh hmalakna tur te sawihona neih ani bawk

YLA Games-2012, CEM in a hawng.

October 9 dar sarih khan YLA Games 2012 chu LADC CEM Pu C Ngunlianchungan a hawng hawnna inkhawm CYLA Playground ah neih chu Pu T.Vanlalmalsawm-sanga Organising Committee Chairman in a kaihruai a,Pu LZ.Tluanga,President Central YLA chuan ,YLA Games atel Branch zawng zawngte chung ah lawmthu sawiin,C.Laltluangpuia Organising Secretary chuan Report tawi pe in,Gems hawngtu Pu C.Ngunlianchunga LADC CEM chuan Lai Dist a Pawl lian ber YLA in a buatsaih Games hmang tura Member kalkhawm zawng zawngte chu infiamna hmanga in unauna tichak thar leh tura sawmin,YLA chu tlawmngai pawl anih ang taka khua leh veng theuhah mite tana malsawmna an nih theih nan phut nei hauh lo leh mirethei leh hausa thliar hauh lo a tlawmngaihna lanchhuah tir zel tura sawmin,infiamna chu eizawnna tlak anih tawh thu sawiin mi in vawng fel,infiammi chu a hlawhtling thin,engkima hlawhtling tur chuan teirei peihmi,insum thei,ruihtheihthil chi hrang hrang laka inthiarfihlim an nih a tul ani a ti.Khuallianin thu a sawizawh hian Halmawi chi hrang hrang halin Zaithiam,he hun hmang tura sawm Van Dawt Cin,kum 2009 a World Melody Singing Competition a pahnihna Yongoon atanga kal chuan Zaiin mipuite a awi a,hlim takin YLA Games hawnna hun chu Zaithiam hrang hrangten zaina hun hmangin hun hman chhunzawm ani.YLA hian Branch 95 neiin,member 25000 vel an awm YLA Games hian Oct ni 12 thleng a awh ang.

CEM Relief fund pe

CEM Relief Fund atan Pu Lalduhzuama Vathuampui Congress Unit Adviser chuan Rs.2000/- a pe a, Lai District Mahila ten CEM Relief Fund atan hian nimin piah khan Rs.2000/- an chhunglut bawk.

Cheural ah Gospel Camping

Upa.SR.Sanglura leh a rawngbawlpuite (Evangelistic Team) te chuan Cheural ah rawngbawlna neiin Gospel Camping chhawng 4 na an nei leh mek. Camping chhawng thum an neih zawh tawh ah Campers 200 chuang an awm a, chhawng 4 na an neih mek ah Campers 85 an an awm mek.

Sangau kawng la tlang lo

Sangau leh Saiha inkar Cheural khaw bulah lungtla in kawng a hnawh pinvangin October 4 atang khan helai kawng hi a ping tan a. Dt.5.10.2012 khan Motor te (LMV) reilote a kal tlang thei a Oct, ni 7 khan kawng chhak lam a lung a chim belh leh vangin nimin thleng khan lirthei engchimah akal tlang thei lo. Lung tla hi a tam tham vangin a thenfai chhung a rei deuh a rinawm niin thudawnna chuan a sawi.He lai hmun hi BRTF te lunglak thinna Quarry niin tunhma pawhin he laia lung an lak thin avang hian Motor kal tlang theih loin leimin leh lungtla a awm fo thin ni a sawi a ni.

Buddhist leh Hindu beih duhloh vangin Chawngte ah kawngzawh

October Ni 9 khan Mzoram Buddhist Association leh Mizoram Bhikku Sangha te chuan Kamalanagar (Chawngte) ah kawngzawhin tunhnaia Bangladesh a Buddhist leh Hindu ten beih an tawh chungchangah lungawihlohna an lantir a, Bangladesh Prime Minister hnenah New Delhi-a Bangladesh High Commission kaltlangin Memorandum an thehlut Sakhaw pawl hnihte chuan an Memorandum-ah chuan September ni 29 ah tum nei rana buaina chawh chhuah a niin Buddhist leh Hindu Temple te tihchhiat a ni a, Cox’s Bazar District Ramu a hnam tlem zawkte sawisak an niin tharum hmangin rahbeh an ni tiin thil thleng hian Budhist mipuite a thawng tak zet ani, an ti a. Bangladesh PM hnenah hian Buddhist leh Hindu Temple tihchhiat takte siam thaa pathian lem tihchhiat te siam ta leh turte, nunna chante te leh bungrua hlohtute zangnadawmna pe turte, he buaina avanga tlanchhia chhungkaw engemawzatte chhawmdawlna pe tur leh misualte chhui chhuaka hremna pe tur leh hnam tlem zawkte humhim turte in Bangladesh Prime Minister leh a sorkar chu an phut thu an tarlang a ni.

SSA Sum chhui zo

Kum 2009-2010 a SSA hnuaia school uniform leina tur cheng nuai 743.16 a lapse leh lapse loh chungchang Education Minister hlui Dr. R,Lalthangliana leh Education Minister nilai Pu Lalsawta te inhnialna chhui tura din Inquiry Committee chuan an an zo tawh a, report pawh Assembly Speaker hnenah thehluh thuai an tum.

Thursday, October 4, 2012

Faina Ni Lawngtlai ah hman a ni

Lawngtlai a Faina Hapta hmanmek ah nimin kha Faina Ni atan puan a ni a, hemi denchhen hian Lawngtlai veng hrang hrang ah hnatlang koh niin, vengtin ten vengchhung thenfai hna an thawk a, hnatlang chhuak an thahnem hle a ni. Faina Ni hman a nihdan hi Lawngtlai DC Pu B.Lalhmingthanga leh Official pawimawh ten a hmun ah thlirin Veng tin an tlawh a, hnatlang a chhuakten bawlhhlawh paihna tur leh Faina lam a hmalakna an kalpui mek a harsatna an neih te lo thlenin DC hian an harsatnate sutkian a nihtheih nan hma a lakpui nghal zel a ni. Kumin hian kumdang zawng aia uar zawkin Faina Hapta hi Lawngtlai ah hmanmek a ni a, Lawngtlai behchhan a awm RDS Company te, 71 RCC te PWD lam ten an hmanrua neih ang te an thawhchhuah pui bak ah LADC Sawr- kar pawhin Motor thawhchhuahtirin khawpui thenfai hna hi an thawk a ni. Veng hrang hrang tlawh a an chhuahma hian DC Office bik in Faina Hapta puala hnatlang an neih chu DC hian hmanpuiin, DC Office chu hmun hrang hrang atanga dawrtu chi hrang hrang awmreng a nih vangin faina lam a Office dawrtute zirtirtu ni theuh turin thawktute chu a chah.

YLA Games zan ah hawng dawn

YLA Games 2012 hawnna chu October Ni 9 zan dar 7:30 ah CYLA Playground ah neih turaruahman niin CEM Pu C.Ngunlianchunga’n Games hi a hawng ang.

MNF hruaitu thar

Thudawnmna in a tarlan danin MNF District Hqrs. Lawngtlai hruaitu thar tur General Hqrs. chuan a tifel tawh a, President atan Pu Lalramliana Colney Vice President nilai chu dah niin ,Vice President atan President nilai Pu N.C.Nguntlunga dah a ni a, Treasurer ah Pu V.Vanthawng dah a ni President dinglai Pu NC Nguntlunga hnen atanga thudawn danin October Ni 8, 2012 khian President thar hnen ah mawhphurhna hlan a tum.

MJA ten pawisa lak tumlo

Kumtin a Faina Hapta hman thin ah inelna siam thin ah endiktur a ruat ten District level Committee ah an endikna senso an dil thin chu MJA Lawngtlai District chuan tha chiah lo deuh a an hriat vangin, kumin a Office, Hospital leh Jail te endik tur a ruat an nihna ah, an endikna senso chu District Committee atangin lakloh nise an ti.

Thisen Unit 603 pe tawh

Lawngtlai ah Kumin January atangin Thisen unit 603 blood bank ah pek ani tawh, unit 573(95%) hi voluntary a pek ani a, camp vawi 21 atangin Unit 535 hmuh ani tawh.

Wednesday, October 3, 2012

Faina Hapta, LADC a, CEM in a hawng

Nimin zing khan Lawngtlai ah Cleanliness Week hawnna hun hman niin,LADC CEM Pu C.Ngunlianchungan a hawng.Lawngtlai DC Pu B.Lalhmingthanga kaihhruaina hnuaiah Faina Hapta hawnna inkhawm hi Lawngtlai Bazar-a Areopagy ah neih ani a,Hapta hawnna thusawiin,Pu C.Ngunlianchunga LADC. CEM chuan Fai hi Zahawmna ani a, Vengfai te, Khawpui faite, Chhungkaw fai te, Office Faite, Mimal Nuna Fai te hi an zahawm a,Ngaihsan an hlawh thin.Faina Hapta hi kan hman chhung chauh ni lovin,khawvela kan dam chhung hian Fai hi kan thupui ni fo se ka duh ani tiin Faina Hapta chu a hawng a,Zaithiam zai ngaihthlak niin,Pu Vanlianhrin,Local Administration Officer,LADC chuan Sanitation Kickoff neiin,Zing kara Khawlai thenfai anih dan tur a sawi a,Lawngtlai khawchhung kawngpui dungah School naupang leh Department hrang hrang a thawktute te in kawp zelin,khawlaia bawlhhlawh thenfai zui ani. Faina Hapta hman chhung hian School ,Office te,Restaurant te,Thingpui Dawr te,Jail leh Damdawiin te, endik ani anga,Faina lam a tithate lawmman siamsak anni dawn ani.Lawngtlai Dist.MJA te chu Office,Jail leh Hospital te endik tura mawhphurhna pek anni bawk.Faina Hapta hi Oct 9.Thawhlehni ah khian kharna hun ropui takin YLA Hallah hman ani dawn ani.

Thisen Unit 36 pe

Nimin khan LIKBK Vengpui Bial Thalai pawl te chuan a mamawh apiangte hman atan thisen Unit 36 an pe a, thisen petute nhi Mipa 31 leh Hmeichhia 5 an ni, thisen hi LIKBK Bazar Sunday School Hall ah, District Hospital, Blood Bank a thawk ten an laksak.

YLA Games Oct’ Ni 9 ah

YLA Games 2012 chu October Ni 9 ah CYLA Playground ah tan a ni dawn a, a hawnna hi zanlam ah puitham tak a neih turin ruahmanna siam a ni a, Games a teltur hian Branch hrang hrang ten inbuatsaihna an kalpui mek.

VC Association ten hmalaknatur rel

Nimin khan Lawngtlai District Village Council Association te chuan Executive committee neiin LDVCA General Assembly in Memorundum a lo pass tawh, tuna Lawngtlai khawpui leh a chhehvel chawmtu 33KV station hi 133KV Station a upgrade anih theih nan a hmalak leh Lawngtlai hmuna P&E EE dah anih theih nan sorkar a thlen ni se tih leh tuna Kolodyne Hydel Project 460MW hna kal mek hi chak zawk a hmalak anih theih nan sorkar ah thlen nise an ti.

Tuesday, October 2, 2012

Lawngtlai Zirtirtu intelkhawmten General meeting an nei

Nimin khan All Teachers Association,Lawngtlai (ATAL) chuan General Meeting neiin,hruaitu thar an in thlang nghal.Lawngtlai khaw chhunga Zirtirtu in telkhawm All Teachers Assn.Lawngtlai ten YLA Hall,Lawngtlai-III a General Meeting an neih hi,LADC Chief Executive member Pu C.Ngunlianchungan a hmanpui.Chawhma lam hun Pu L.H.Mawia Hnialum,President ATAL chuan kaihruaiah,Pu C.Ngunlianchunga chuan Zirtirtute hi kan Ram leh Hnam tan a innghahna in ni a,in pawimawh hle ani tiin Zirlai Naupangte ah hian Taimakna,T umruhna,Hawihhawmna leh Insum theihna te hi kan tuh a pawimawh em em ani,Zirtirtu khawlaia Rui mai mai te an awm thin,a pawi em em ani tiin Zirtirtute chu an Nunah an Naupangten zirtur an hmu tur ani ati a,Hlawh hmuh nan mai a Zirtirtu hna hi an thawk anih chuan engtikah mah Ram hian hma a sawn dawn lo ani ati bawk. Meeting ah hian an member Boral Pi H.Lalronguri,Govt. Electrict Middle School Zirtirtu sunnan ngawirenga Minute khat an dinga,Zirtirtu Pension Pathum te hnenah Ngaihhruina thuziak leh Pawisa fai Rs 4000 chu Khuallian hian hlanin,Nikum 2011 leh Kumin 2012 a,Lawngtlai khawchhung school hrang hrang a HSLC Top 10 leh Distinction a passed te hnenah Chawimawina leh Pawisa Fai a hlan bawk. ATAL General meeting chawhnu lam ah hian Rorelna hun an hmang nghal a,an rorel tlangpui ah chuan Cleanliness Day hman nise tihte,LADC hiaan Best Teacher Award pe chhunzawm tura ngen nise tihte,High School chin tan Debate leh Quiz Competition buatsaih nise tihte ani a,Rorel zawh hian Kum 2012-2013 hruaitu thar turte an in thlang nghal.

Petrol mantlawm pechhuak tan

Lawngtlai a MIZOFED Pump chuan nimin atang khan Petrol manto Extra Premium chauh an hralhchhuah thin chu titawpin, Petrol pangngai Motor Sprit chauh an pe chhuak tan.

Faina Hapta vawiin atangin

Hmundang rualin lawngtlai ah vawiin atangin Faina Hapta hman tan a ni dawn a, naktuk hi Faina Ni atan puan a niin, faina lam ah uar zawk in hmalak a ni ang.

Monday, October 1, 2012

Lunglei a NGO te leh Lunglei,Lawngtlai leh Saiha MJA ten Power khaihlak thin ah Sawrkar in tan la tawklo ah an ngai.

Nimin chawhnu khan Lunglei Press Club ah MJA Lunglei chuan Lunglei NGO te te chuan Mizoram chhimlam Dist ten Power Supply a hmuhchhiat chungchnagah inrawn khawmna an nei a, Kumin hian Mizoram chhimlam District 4 Serchhip, Lunglei, Lawngtlai leh Saiha te hian Power Suply a hmuhna 132KV Line Zuangtui leh Bukpui, Serchip inkar chhiat zin avangin harsat na nasa tak a tawk thin a, hei hi thawktute inthlahdah vang niin a hria a, Tun hnaia Zemabawka daia chia leh Darlawng bual chhia ah pawh thawktuten a chhia tih an hriat hnu pawhin JE leh Labour ho mai che chhuak niin a hria in, mipui tawrhna leh harsatna hiatpui lo deuhva an ngai NGO hrang hrang Lunglei MJA huaihawt a inhmukhawmte hian Resolution pawh hetang hian an siam “ Zuangtui Aizawl atanga 132 KV Mizoram District 4; Serchhip, Lunglei, Lawngtlai leh Saiha Power Line hi a chhe zingin heng District 4 te hian Power Supply chungchangah harsatna an tawk zing thin hle a, Amaherawhchu a changtu Deptt P&E hmalakna avangin siamthat a ni leh thin a, lawmawm kan ti hle. Chutihlai erawh chuan Zuangtui leh Bukpui inkara chhiatna a thlen chang a beisei aia siam that mai a nih thin loh naah hian a changtu Division te an in sangmar tawk lo deuh niin hriat a ni. Hemi avanga mipui ten harsatna kan tawh thin dan min hriatpui a, chaktaka hma min laksak turin kan Sorkar chaktak hi kan ngen a ni.Hetihrual vek hian MJA Lunglei, Lawngtlai leh Saiha chuan thuchhuah intawm siamin Zuangtui to Aizawl inkar 132 KV Line a chhe zing lutuk leh siamthat thuai a nih loh avanga Mizoram District 4 in Power Supply kan hmu lo thin hi ngaimawhawm kan ti a. Helai hmun a chhe zing lutuk leh siamthat thuai a nih lohna chhan hi Sorkar-in enfiahin tun hnuah mipui te harsatna rei tak awm tawh lo turin hma min lak sak turin kan duh” tiin an thuchhuah ah an tarlang.

E/Roll Revision neihtur sawiho.

Election Commission ruahmanna a Electoral Roll Summary Revisions 2013 neih tur chungchang ah Zirtawpni khan Lawngtlai DC ho in Meeting neih ani He Meeting ,DC Conference Hall ah neih ah hian Electoral Roll dik leh felfai tak neih a nih theih nan a tan lakna tur hrang hrang te sawiho a ni a, hmundang aiin Lawngtlai District ah chuan ramdangmi E/Roll a luh tum an tam thin vangin helam ah hian Official leh Tlawmngaipawl te pawh fimkhur a ngaih nasat zual thu sawilan a ni bawk. E/Roll a thunthar tur ten an kum tihchian nan a Birth Certificate an neih thin chu District chhung hmun thenkhat ah dik manglo a pekchhuah a awmfo ni a hriat a nih thu sawilan niin, hemi chungchang ah hian DC Pu B.Lalhmingthanga chuan fimkhur zawk a Birth Certificate pekchhuah a nih theih nan Sawrkar lam chuan hma an lo lak tur thu Meeting ah hian a sawi. E/Roll Summary Revision 2013 neih tur ah hian Draft E/Roll chu October Ni.1, 2012 hian tarchhuah a ni anga, nakum January Ni 5 ah Final Publication of E/Rolls neih a ni ang.He meeting ah hian Lawngtlai District a Electoral Roll buaipui tur a ruat te, NGO aiawh leh Political Party aiawh te an tel.

Hapta hawng dawn

Kumtin a hman thin Mahatma Gandhi piancham October Ni 2 denchhen a Faina Hapta hman thin chu naktuk hian Areopagy ah hawn a ni dawn. tarlan tawh angin Hapta hman chhungin inelna hrang hrang buatsaih a ni leh dawn.

Rev.A.Lalchhuana boral

Rev.A.Lalchhuana chu Inrinni chhun khan Cancer natna in Lawngtlai Bazar a an In ah a thi a, a ruang hi tlaivarpui niin, nimin khan In lam leh LIKBK Bazar Biak In ah vuina hun hman a nih hnu ah bazar veng thlanmual ah vuiliam a ni. Rev.A.Chhuana hi Kohhran bak ah khawtlang leh ram tana a mitangkai, Lawngtlai mihlun, thilchikmi leh hnuhma chhuanawm tak tak nei niin, uitu leh vuitu pawh an thahnem hle a ni.