Friday, November 30, 2012

Multi Modal kawng laihmek a harsatna sutkian dan tur DC ho in ngaihtuah a ni.

Lawngtlai atanga Myanmar ramri Zochachhuah inkar kawngpui laih mek, Kaladan Multi Modal Transport Transit Project a harsatna awmte sutkiandan tur ngaihtuahin nimin khan Lawngtlai DC, Pu B.Lalhmingthanga ho in DC Conference Hall, Lawngtlai ah Meeting neih a ni .meeting ah hian , LADC a CEM, Pu C.Ngunlianchunga,Lawngtlai SP, Pu MH Meena, Malsawmdawngliana SE PWD(Multi Modal) bak ah LADC a Executive Member Forest enkawltu leh  Revenue changtu bak ah DC Office a he Project khawihtute,LADC sorkar a Forest leh Revenue Officer te bak ah PWD Officer  te  an tel.

Kum 1953 a PLRC Member te thlalak CEM kut ah Pu Sapliana’n a hlan

Nimin khan  Pu Sapliana Vandir,Ex- MLA.Lawngtlai Bazar chuan Kum 1953 a Pawi-Lakher Regional Council hun laia  Member te Thlalak a vawn that chu LADC CEM Pu C.Ngunlianchunga hnenah a hlan.He Thlalak hlanna Pu C.Ngunlianchunga CEM Office Chambera neih ah Pu Sapliana chuan he thlalak hi Ni 23.April 1953 a Pu Ch.Saprawnga, MLA,Parliament Secretary,Assam in,Lunglei Dhubi mual,tuna C.Thuamluaia mual an tihtaka Pawi-Lakher Autonomous Regional Council a hawn ni a Pawi-Lakher  Regional Council term hmasabera Roreltu te leh Hruaitute thlalak anih thu sawiin

Chawngte ah Meeting



      Naktuk Inrinni a Union Minister of State for DoNER in Chawngte a tlawh hun a lo dawnsawn dan tur leh tul pawimawh te ngaihtuahin nimin khan Pu L.Rinliana SDO(C) ho in Chawngte ah Meeting an nei. DoNER Minister hian Chawngte College leh Kamalanagar tihchangtlunna tur lungphum a nga, Rest House tual ah Public Meeting a neih bawk ang.

Lei nghetlo enfiah


    Mizorama kawng pawimawh laia lei tlahniam leh lei nghet lo awmte   Central Road Research Institute-a mi thiam pahnih, Dr. Kishore Kumar leh Dr. Prasad-a te chuan an enfiah mek , Lengpui bula Pukpui khama lung tlak thinna hmun te, Hunthar Venga lei tlak hniamna hmunte  Aizawl-Thenzawl-Lunglei World Bank Road-a lei tlak hniamna lai hmun te an tawh a, Lawngtlaia National Highway-a lei tlak hniamna lai hmun te, Multi Modal Transport Project hnuaia  kawng laih meka lei thawl leh lei tla hniam te an en bawk dawn.

Tuesday, November 27, 2012

Multi Modal kawngpui laihmek ah chak zawka hmalakdan tur Chief Minister ho in sawiho a ni.

Kaladan Multi Modal Transit Transport Project kawngpui, laihmek ah chak zawka hmalak dan tur ngaihtuahin nimin zing khan Lawngtlai Circuit House ah Chief Minister Pu Lalthanhawla ho in mipawimawhte an thukhawm .He hun ah  hian Lawngtlai DC Pu B.Lalhmingthanga, Er.Malsawmdawngliana SE, PWD(Multi Modal) bak ah LADC a CEM Pu C.Ngunlianchunga,  Executive member Forest Pu H.Chhuanawma leh Revenue changtu Pu H.Vanlalthaliana ten , Multi Modal kawnglaih mek a hna kalpui dan te, harsatna tawh te an sawi a,

Lairam Gospel Centenary lawmna chu zanin hian a tiak ang.

Lairam a Chanchintha a thlen kum 100 na lawmna kalmek ah, Gospel Centenary lawmna CYLA Playground a hulhliap ah inkhawm    an thahnem thei hle a, hlim takin Pathian fakin thu leh hla lam inpawl hona hlawk tak neih chhoh mek a ni a, nimin lam khan vatlang inkhawm neiha  nih bak ah chawhnu lam ah Gospel & Cultural Programme hlawktaka hman niin, nizan khan inkhawm neih zui leh a ni a, vawiin Gospel Centenary lawmna tawpni tur a ruahman ah chawhma dar 10 ah inkhawm tan a ni anga,

Office Chawl



       Lairam Gospel Centenary lawmnapui ber neih chhungin LADC Sorkar chuan a hnuaia hnathawkte tan chawlh a puang.

HSLC Exam hun ruatfel

MBSE chuan kum 2013-a HSLC Examination Exam hun tur atan nakum February ni 22 leh March ni 15 inkar a ruat.
Theory Exam chu February ni 22-ah tanin March ni 8-ah zawh a ni ang a, chumi hnu, March ni 11 leh 15 inkarah Practical Exam neih zui a ni ang.

Monday, November 26, 2012

Lairam Gospel Centenary lawmna puiber C.M in Banner pawtpharh in a hawng.

Lairam Gospel Centenary lawmna neih mek ah Inrinni zan khan Chief Minister Pu Lalthanhawla'n Centenary lawmnapuiber Central YLA Playground Lawngtlai a neih chu centenary banner pawtpharh in a hawng.C.M chuan centenary lawmna huaihawttu LIKBK ten an member anga tel tura an sawm chu lawmawm a tih thu a sawi a. Kristian vek kan nih angin kohhran dang memberte hi mahni kohhran mi anga kan pawm thiam a pawimawh a, hei hian kohhran inzawmkhawmna tha a thlen thei a ni a ti. Zofate hi thingbul lungbul be thin, khawvela sakhua lian   Hindu, Buddhist leh Islam ten min karcheh chung pawhin Pathianin Chanchintha hmangin min zawng chhuak a  chuvangin mihringte hnenah chauh nilo, A thil siam zawng zawng, te hnenah chanchintha hril tura koh kan ni a ti.  Malsawmna kan dawn te hi midangte tana malsawmna thlentu ni tura pek kan ni a, tam leh zual kan dawn theih nan ringtu kan nih angin tih tur tam tak kan nei a ni a ti.Pu Hawla chuan ringtu kan nih angin khawvela hrisel ber nih tumte, ei leh bara intodelh te, sum ngaina mi kan ni em tih ngaihtuahte leh kan  nunah kristian dik tak kan ni em tihte inenchian nan hmang turin kohhranmi kalkhawmte chu a chah a ni.Kum 1912 ah Khamchungbuk,  Mampui   ah Lairam a Biak In hmasa ber din niin heta tang hian meimit lovin Chanchintha chu a cham hlen ta a ni.Chanchintha kum 100 tlin lawmnaah hian Myanmar atangin Global Chin Christian Fellowship palai te, Asia Pacific Baptist Federation, Shillong atangte, Manipur atanga Meitei, Vaiphei leh Lamka Baptist kohhran  palaite bakah Presbyterian Church of India aiawh, BSI, Aizawl, Baptist Church of Mizoram, Evangelical Church of Maraland atang tein palai an tel a. Mizoram sorkar atangin Pu H.Zothangliana, Parliamentary Secretary leh Pu PL Thanga, Member Secretary, State Planning Board leh MLA Pu C.Ramhluna te an tel bawk a, MADC leh LADC hotute an tel bawk a ni.Lairam Gospel Centenary thupui atan hian Matthaia 10:8 thu “A thlawnin in hmu a, athlawnin pe ang che u” tih hman a ni.

Direct Funding Sorkar in tha a ti

Sorkar in kan vaia kan than rual a duh  vangin  District Council ten Direct Funding an dil pawh kan recomend a, a tul angin a bawhzuih hna pawh kan chhunzawm ang C.M Pu. Lal Thanhawla'n a ti C.M hian Inrinni chawhnu khan Lawngtlai lutin Circuit House tual a amah lo hmuaktute hma ah thusawiin     chhimlam chu an hnufualna a rei tawh vangin sorkar chuan midang ten lo thik deuh pawh nise theih ang angin a duhsak a, tuten emaw chibing zawnga kal hi a thalo ti mahse, Mizote chu chi bing ang a chhiatni thatni a in unauna lantir tir hnam kan ni a, amaherawhchu heihian inthendarhna thlen lose, tanrualna tha zawk hringtu ni se kan awmna a kilkhawr vang a inkiltawih mai lovin, ram leh hnam siam that hna hi kan vaia mawhphurhna a ni a ti tute pawh kan intluktlang vek a ni  a ti.

MCS 4 IAS ah


     MCS Officer pali Pu, V.Lalremthanga DC, Mamit, Pu Lalthangpuia Sailo DC,Champhai, Pu Biaktluanga Secretary LAD leh Pu P.Lalchhuanga Director School Education te chu IAS ah hlankai(Conferred) an ni a, IAS a Conffer tur zing ah Lawngtlai DC  Pu B.Lalhmingthanga pawh telh niin,  DC hian IAS a hlankai tumna hi a hnawl.Pu Hmingtea hian IAS chu tha a tih vangin tum hnih lai a lo exam tawh a, Service tenau zawk pawh pek a lo ni tawh a, hetihlai hian   MCS ah inziaktlingin   MCS a nih hnu hian IAS nih tumna a nei tawh lova, MCS chu Pathianin ram leh mipuite tan,  a rawngbawlna tur a a dahna ah ngaiin IAS a hlankai tumna chu a hnawl niin thudawnna chuan a sawi.

LNS Passenger thi


    LNS Bus  Inrinni tlai a Aizawl atanga Lawngtlai pan ah Passenger pakhat Vanthangliana, S/O Chawnbilthanga, Tiau a khawsa thin chu thi a hmuh a ni.nimin zing   khan Bus in Lawngtlai AOC Veng  a thlen in  Passenger chhuktur ten an hmu a, Seat No.3 a thu niin, a tir ah tunge a nih hriat a ni mai lova Lawngtlai Police ah hriattir niin, a ruang hi   Areopagy ah dah a ni a, District Hospital  ah    Postmortem niin  Bazar Veng YLA ten ruang hi hlawmin      Lawngtlai Bazar veng thlanmual ah phum a ni.

Saturday, November 24, 2012

YLA Hall ah Leadership Training-cum-Awareness Campaign on NLUP Lawngtlai District neih a ni.


He hun hi nimin khan neih niin, Lawngtlai DC Pu.B.Lalhmingthanga leh LADC a Chief Executive Member Pu C.Ngunlianchunga ten kaihruaiin inlawmna thu leh heteiang hunpawimawh Lawngtlai District tana buatsaih a ni chu lawmawm an tih thu an sawi a, Pu P.L.Thanga Vice Chairman NLUP Implementing Board chuan Power Poni Presentation hmangin kalkhawmte zirtirna pein, Congress sorkar in Mizoram dawmkan a nih theih nan a hmalakna a kalpui dan tlangpui a sawi a,Pu PL Thanga chuan Mirethei te dinhmun siam a nih mek thu leh ram leilung hauhsakna tuihna leh thing leh mau humhalh leh venhim hna bak ah chhawrtanglehzual dan te pawh NLUP hmanga thawh a nih mek dan te, NLUP vang hian Mizoram chu tunhma zawng aia dinhmun tha ah a ding chho mek a ni a ti. Hnam Chhantu Pawl President Pu R.Ramhmangaiha pawhin thusawiin Kuthnathawktu ten hma an sawnna atan NLUP chu a tangkai takzet a ni tiin, Mizoram a Hmunphiah te chu khawi hmun ah pawh a hralhna ah harsatna a awmloh thu leh chhungkaw tinten an mamawh reng a nih vangin NLUP a hmunphiah Trade thlangtu zawng zawng ten hlawhtling nbgei tur a tanla turin a fuih a, NLUP Trade dang thlangtu te pawh tihtakzet na nen mahni intodelh ngei tur a tan la turin a chah bawk.NLUP Leadership Training leh Awareness Campaign ah hian Lawngtlai Diustrict chhung a VC te bak ah Lawngtlai DC Office a NLUP lam a mawhphurtute leh Lai Autonomous District Counciul a Executive Mermber leh MDC engemawzat bak ah LADC hnuai a Sorkar Department, NLUP kaihhnawih Department a thawkte an tel.

Ningani khan mampui ah Gospel Centenary lawm a ni


Ningani khan  Mampui khua chuan Chanchintha thlen kum 100 na khawtlang huapin Kohhran hrang hrang ten a huho in an lawm. He hun hi LADC a CEM Pu C.Ngunlianchunga chuan hmanpuiin Gospel Centenary Lungphun a hawng a, thusawiin Pu C.Ngunlianchunga chuan Lairam a Chanchintha thlen hmasakna hmun, Biak In hmasa ber dinna mampui khua chu  vanneih a tih thu a sawi a, mampui hming chu engtiklaimahin a reh tawh dawnlo a ni a ti a, Sakhuana ah Lairam in bul a tanna hmun khua a nih avngin khawtlang mipuite paWh an fimkhur a sualna chio hrang hrang lak ah khawdangte tan entawn tlak a anb fihlim a ngai a ni a ti. Lungphun hawn zawh hnu hian Lairam Isua Krista Baptist Kohhran mampui Biak In ah Kohhran hrang hrang ten a huho in Pathian hnen a lawmthu sawina hun an hmang a, Pathian thuchah leh Fakna hla a inpawlkhawm in nileng in hun an hmang a tlailam ah Gospel Centenary ruai an kilho nghal.

Lairam Gospel Centenary lawmna puiber neihna tur Pandal, Ningani zan khan Pathian hnen ah hlan a ni.



Lairam a Chanchintha thlen kum 100 na lawmna neih chhoh mek ah  Inrinni zan hian a lawmna pui ber Central YLA Playground Lawngtlai ah neih tan a ni dawn a, Gospel Centenary Pandal chu nizan (Ningani zan) khan Pathian hnen ah hlanna hun hman niin, Pandal hlanna inkhawm hi Rev. E.S.Sangchem, Chairman Lairam Isua Krista Baptist Kohhran Assembly in a kaihruai a, Rev. Dr.L.H.Lalpekhlua'n Pathian thuchah Gospel Centenary Thupui "A Thawnin Pechhuak rawh u" tih  a sawi a, Pandal hlanna a tel te chuan Pathian hnen ah Tawngtai rualin Gospel Centenaryu hmanna tur Pandal hi Pathian hnen ah an hlan. Pandal Hl;anna inkhawm ah hian LIKBK Assembly Choir ten Halleluia Chorus an rem bawk. Pandal hi mi 4000(sangli) vel leng tur a ngaih niin Pandal sak nan Cheng Nuai thum chuang senral a ni.

Lawngtlai District a NLUP changtlung zawka kalpui dan tur NLUP IMplementing Board Vice Chairman Pu PL Thanga ho in an ngaihtuah


Nimin Zirtawpni  tlai khan NLUIP Implementing Board Vice Chairman Pu PL Thanga ho in Lawngtlai DC Conference Hall ah, Lawngtlai District chhung a NLUP changtlung zawka kalpui a nih dan tur Line Department leh District Council;(LADC) aiawh te nen an sawi ho. NLUP hnuai a Vawk leh Ar vulh thlangtu ten Vawk note leh Arnote an dawn tur chu hmundang atanga chawlut lova intodelh a nih theih nan Mampui a AH &Vety Farm chu a tul anga tih changtlunjn nise an ti a, Sangha chi pawh Ngengpui a Fisheries Fish Seed Farm chu tihchangtlun nise an ti a, naktuk Inrinni hian Mampui Vety Farm leh Ngengpui a Fish Seed Farm te hi Pu PL Thanga hian a tlawh dawn a, heng tihchangtlun dan tur ruahmantur hian DC Chairman na hnuai ah committee din nise an ti. NLUP dawngtu zing ah ram leilung behchhan a Trade thlangtu zing ah mahni a ram neilote chu LADC ah inreport in, Council sawrkar in lo bawhzui se an ti a, NLUP dawngtu ten awlsam zawk a pawisa an dawn theih nan ruahmanna pawh an siam a, NLUP Trade thlangtu te tan a an huan lo ram kawng  laih chungchang pawh  an sawi ho. Heng bawhzui ngaite bawhzui tur hian DC Chairman na hnuai ah hmalak zui nise an ti. Meeting ah hian lawngtlai DC Pu B.Lalhmingthanga leh LADC a CEM Pu C.Ngunlianchunga bak ah DC Office a NLUP buaipuitute leh LADC Sawrkar a mipawimawh te an tel.

Friday, November 23, 2012

District Council ten thuneihna sangzawk leh hmasawnna an neih theih nan C.M in hma an lakzel tur thu a sawi.

10th MADC sorkar thar lawmna nimin a Saiha a neih  hmanpuitu khuallian Chief Minister Pu Lal Thanhawla chuan District Council hmasawn zelna te, thuneihna sang zawk an neih theihna turin keini chuan hma kan la zel dawn a, tute emaw dona avangin kan tihtur kan thulh dawnlo, a ti.Chief Minister chuan hnam hnufualbik anga inngaihna chu tha a tih loh thu sawi a, Mizoram leilung fate vek kan ni a, kan mawhphurhna leh chanvo a in ang vek a, tumah inla hrang tur bik kan awmlo a ni, a ti bawk. Kumin 2012 May thla a sawrkarna siamtu Mara Autonomous District Council (MADC) Sawrkar chuan nimin khan an office  tualzawlah  sorkar lawmna vantlang  an buatsaih ah,Chief Minister chuan democracy rama kan hruaitu tur kan thlan thinte hi mipuite chuan kan tawiawm tur a ni tiin, duhkhawploh kan neih laite chu a tha zawngin kan sawisel ngam tur a ni, a ti. Mipui ten hotu tha leh dik kan duh ang bawk hian hotute hian mipui tha, dik leh taima an duh ve bawk a ni, a ti a. Inthlana tling ten thuneihna an neih hi mahni leh lainate sahmim tih puarna tur a ni lova, midangte tana malsawmna thlentu a ni zawk tur a ni, a ti.Chief Minister chuan  Thalaite tana khawvel thar siam mek anih thu sawi bawk.
infiamna, zirna ah te nasa taka hmalak a ni a, sipai ah awlsam zawka an luh theihna turin hmalak mek zel anih thu a sawi a. Eifukna, corruption umbo kawngah Sawrkar chu tuma fuih a ngailo        tiin, puih erawh an hniallo a ni, a ti a. Corruption hian sorkar sum eiruk chauh a huam lova, zawmthawtna te, thatchhiatnate, dawngdahnate, mahni hnaa tui lohna te,   kuttling lova sum lak duhnate a huam vek a ni, a ti. Chuvangin a chhelai siam tha turin koh vek kan ni a ti.

E/Roll siam mek ah harsatna tawh a awm lo

Electoral Roll siam hna thawh mek ah Lawngtlai District a hmalakna kalpui mek ah harsatna sawitur a awm lo tih nimin tlai khan District Election Officer Pu B.Lalhmingthanga chuan  Lawngtlai District a E/Roll siammek rawn en tu Election Observer Pu K.Lalnghinglova chu a hrilh. Election Observer hian nimin tlai thimhlim khan Lawngtlai lutin, DC Conference Hall ah Lawngtlai DC, leh Election lam a hotute nen      Meeting nei nghal in  E/Roll kalpui mek chungchang an sawiho a, tunlai hian E/Roll  Hearing neih mek a nih thu te leh khawi hmun atang mahin E/Roll buaipuina ah harsatna tawh a awm loh thu Meeting ah hian sawilan a ni.

Hnambil Zirlaipawl din pawina hrelo


    MZP chuan thuchhuah siamin,Tun hnai ah MZP thawhpui tlawmngai pawl pakhat in MZP Dan Bu hnuaia in ziaklut thlap tawh hnam bil zirlai pawl hrang hrangte din zel thalo a tih thu thuchhuah meuh siama a puangchhuak chu  pawi an tiih thu an tarlanga, heng hnam bil zirlai pawl hrang hrangte hi MZP kaihhruaina leh ngaihdan anga Mizo hnam tana him chin zel a kal thin an nih avangin MZP chuan an din zui zel hi a pawina leh a that lohna a hre lo a. Heng zirlai pawl hrang hrangte hi Zohnahthlak te kan insuihkhawm theih nana theihtawpa hma lo la tawh thin tu leh a tul ang apianga tha thawh mektu te an ni tih an tarlang.

NLUP Campaign



       Vawiin hian YLA Hall ah NLUP kalpuimek ah lawngtlai District tan Training-cum-Awareness Campaign neih a ni dawn a, Pu P.L.Thanga Vice Chairman NLUP Implementing Board in he nhun hi a hmanpui dawn.

Pandal hlan


         Lairam Gospel Centenary lawmna pui ber neihna tur Pandal,   Central YLA Playground ami chu nizan khan Pathian hnen ah hlanna hun hman a ni.

National Tribal Meet ah DBS Lawngtlai te Pakhatna an ni

National Level Scouts & Guides Tribal Meet, Nov.18-22 chhunga Chhatisgarh a neih ah Mizoram    aiawh a kal Don Bosco     School Lawngtlai te   chuan intihsiakna chi hrang hrang neih ah an ti tha hle a, India         ram pumpuiah    Pakhatna an ni.Folk Song, Folk Dance, Physical     Display, Village  Festival ah te lawmman  pakhatna an dawng a, Village Fair leh Traditional Food Plaza ah te Pahnihna dinhmun an hauh bawk.

Thursday, November 22, 2012

Lawngtlai a 100 Watt F.M Transmitter chu Kumin Krismas hmain hawn tum a ni.

Pu C.Lalrosanga IBPS, Additional Director General North East Region, AIR & Doordarshan chuan     nimin khan Lawngtlai tlawhin 100 Watt,           F.M Transmitter chu  kumin Krismas hma in hmantheih a hawnfel tum a nih thu a sawi.Pu C.Lalrosanga hian nimin chhun khan Lawngtlai lutin Lawngtlai Vengpui a Doordarshan Low Power Transmitter hmun a tlawh a, helai hmun a F.M 100 Watt Transmitter bun fel tawh chu en in,Saiha a mi nen  kumin Krismas thilpek atan   hmantheih a hawn (Commission) hman beisei a nih thu a sawi a, Lawngtlai a FM Transmitter hi bunfel vek tawh niin, ennawn a hmantheih mai tur a ni tawh a ni. Pu C.Lalrosanga hian Doordarshan Low Power Transmitter(LPT) pawh    a en nghal a, thawktute chuan harsatna hrang hrang an neih te  lo thlenin, an harsatna neihte chu a sutkian dan tur lo dap a tum thu a sawi. Pu,C.Lalrosanga hian nimin vek khan Tuipang panin Lawngtlai a chhuahsan a,      naktuk  hian ruahmanlawk ang chuan Aizawl a thleng leh ang.

Lawngtlai District a NLUP dawngte NLUP Media Cell ten an enkual mek

Nimin Pu David L.Thangliana.Chief Media Officer NLUP ,ho in NLUP Media Cell te chuan  Lawngtlai khawchhunga NLUP dawngte eizawnna a hmunah kalin a enfiah.Mizoram Sawrkar Flagship Proggramme NLUP kalpui mekah,Lawngtlai khawpui chhunga NLUP dawngte,eizawnna hrang hranga NLUP an dawn hmang tangkai tute nimin khan Pu David L.Thangliana    Chief Media Officer.NLUP chuan an eizawnna hmunah tlawhin a kan kuala,NLUP Trade     hrang hrang a hmang tangkaite,Mizoram Sawrkarin a beisei ang taka hlawhtlinpui nana    an hmang chu   lawmawm atih thu Pu David L.Thangliana chuan a sawi a,  Lawngtlai khawpui chhungah NLUP dawn avanga chhungkua eizawnna mumal tak nei hmuh tur an awm ta chu he NLUP hlawhtlinna ataka hmuhtheih anih avangin lawmawm atih takzet thu a sawi.NLUP Media Cell te hi nimin chawhma khan DC Conference Hall ah DC Pu B.Lalhmingthanga chuan meeting neihpuiin hetah hian NLUP Line Department nhrang hrang te telin NLUP kalpui a nihdan tlangpui an sawiho.Vawiin hian Lawngtlai khawthlang lam Diltlangah kal lehin,Chawngte lam pawh tlawh an tum

Chief Minister lokal



        Nimin khan Chief Minister Pu Lal Thanhawla chuan Saiha a pan pahin Lawngtlai Circuit House ah Thingpui a in a, Chief Minister hi LADC a CEM leh E.M leh Lai DCC hruaitute, D.C leh Sorkar Department hotuten an lo dawngsawng a, nimin vek khan Saiha a pan nghal a, vawiin hian Saiha ah MADC Sorkar thar Pathian hnen a hlanna hun a hmanpui anga, naktuk ah Niawhtlang a tlawh anga, ruahmanlawk ang chuan Inrinni khian Lairam Gospel Centenary  lawmna Lawngtlai a neih hmanpui turin Lawngtlai a rawn thleng anga, Pathianni pawh Lawngtlai ah a cham ang.

SHG Training nei dawn

Vawiin chawhma dar 10 hian World Vision, India Chhimtuipui Area Development Programme   hnuai a Self Help Group te tan Ni khat awh Training YLA Hall ah buatsaih dawn a, SHG Member te chu kimtaka kalturin an hriattir

Centenary Pandal hlan dawn



       Lairam Gospel Centenary lawmna tur CYLA Playground a Pandal sak chu zawhfel tawh niin zanin hian Pathian hnen a hlanna hun hman a ni dawn.

Central YLA in ngen



    Central YLA chuan, Kolodyne Multi-Modal Transort-Transit Road kawngpui lai mektu  RDS Co. leh ARSS Co. te chu hun tiam chhunga an hna thawk zo ngei turin a nawr. He kawngpui hi tan  in nghahna ani tih hriain, Compensation chungchang leh thildang a vang pawhin Company-te hnathawh tithuanawp zawnga che lo turin mipuite CYLA chuan a ngen.

YMA in, sawifiah



       Nimin khan Central YMA chuan an Office ah  Chanchinbumite kawmin Nov.14, 2012 a YMA CCC Meeting in Autonomous District Council te thuneihna sang zawk an neih loh na tur a hmalakte, chibing Kohhran, Party leh Zirlai pawl awm tha an tih lohna chhan chu Mizoram ah hmasawnna a khairual zawk nan te, inlungrualna tha zawk a awm theih nan te ti an nih thu an sawi. YMA te hian nimin vek khan thuchhuah siamin Nov.14 a CCC Meeting in thutlukna a siamchhan an tarlang bawk.

CM LEH SECRETARY BORDER MANAGEMENT INKAWM



    Nimin zing khan Lunglei Circuit Conference Hall ah Chief Minister Pu Lal Thanhawla leh Pu AK Mangotra, Secretary Border Management, MHA Govt. of India chu Indo Border fencing chungchang ah an in kawm.

    Chief Minister hian Border area a chengten fencing vanga harsatna an tawh dan leh harsatna thenkhat sutkian dan tur te a lo sawipui a. Secretary hian International ramri hung chungchangah danfel tak a awm avanga thil tihtheih chin te leh ramri hrul a chengte tana harsatna lian deuh te sutkian theihdan te a sawi ve a ni. Secretary hian Chief Minister a kawm zawh hian Kawrpuichhuah a pan leh nghal a,Trade & Commerce Minister Pu Lalrinliana Sailo bak ah  Pu PL. Thanga, Member Secretary SPB  leh mipawimawh dang ten an tawiawm.

Home Minister in MSSA CONFERENCE a hmanpui


Nimin khan Mizoram Secretariat Service Association General Conference vawi 8-na, Tourist Lodge Chaltlanga neih chu Home Minister Pu R. Lalzirliana’n a hmanpui. Home Minister chuan Mizoram Secretariat Service (MSS) te chu ram inrelbawlnaa hnuk pawimawh ber pakhat, an tel lova sorkar inrelbawlna pawh kal theilo tiin an kutah sorkar hmasawnna, ram leh hnam than zelna thui tak a innghah avangin an lakah beisena sorkarin a nei sang hle a ni, a ti. Secretariat tihchak dan tur leh officer ten an hna theuhah hma an sawn theih dan tur chungchang an sawiho tur chuan rah tha tak a chhuah ngei a beisei thu Minister chuan a sawi a. A tu a mah thiam saa piang an awm lova, a inzir peih apiangin hma an sawn mai thin, a ti. Mi rintlak leh rin ngam, thiltih reng renga dik tak leh fel taka ti thin, mahni mawhphurhna a hun taka hlen thin mi, an rawngbawlsak mipui te ngai pawimawha rethei leh chan chhe zawk te tana belhfakawm ni turin a chah a. Thuruk vawng thei, sorkar thu kal vel a hun leh a chhuahna hmun dik taka chhuahtir thin tur leh hun vawng dik, inchei leh nungchang thleng pawha mi dang te entawntlak ni turin Home Minister Pu R Lalzirliana chuan a hrilh bawk a ni.

Wednesday, November 21, 2012

ADC ten thuneihna sangzawk an neih theih nan YLA,MTP leh YCA ten Central Sorkar ah ngen tha an ti.

Nimin a Lawngtlai a Tlawmngai Pawl Pathum CYLA, MTP leh CYCA thukhawm chuan , Central YMA hmalakna chu Ram danpui kalh a ni an ti a, Mizoram a Autonomous District Council ten thuneihna sangzawk an neih theih nan Tlawmngaipawl pathumte chuan a huhoin Sawrkar laipui ah ngen nise an ti.Nimin a Lawngtlai a DC Confenrence Hall ah CYLA, MTP leh CYCA chuan Joit Meeting neiin, November Ni 14 a  YMA CCC Meeting thurelthluk chungchang an sawiho a, Mizoram a Autonomous Distrioct Council ten thuneihna sangzawk an neih theih nan pawl pathumte chuan a huho in Sawrkar laipui ah ngen nise an ti a, hmalakzel dan tur ngaihtuahin Joint  Meeting neih zui zel tha an ti bawk. Thuchhuah intawm siam nghal in, YMA CCC  in Autonomous District Council ten thuneihna sang zawk an neihlohna tur leh hnam puala Political Party, Kohhran leh Zirlai pawl din loh nise ti a thutlukna an siam chu atthlak an tih thu leh Kristian Nundan mawi chawisan tum inti tan chuan thil inhmehlo tak a an ngaih thu leh an dem thu an tarlang a, YMA hmalaktumdan chu India Danpui kalh, mahni mihringpuite pawisawina, Unau an tihten an damkhawchhuah vena tura an hmalakna te chu midangtte hip nan Inpumkhatna tichhetu tih a phuahchhawpin an dodal hi India Danpui kalh a chetna Human Rights palzutna a ni an ti a, Dan hnuai a Political Party leh Kohhran din te, YMA in nuaibo a tum chu Sorkar pawisawina a nih thu  tarlangin mitupawh an rinna leh an saklhua chu Dan in a humhalhsak     tlat a ni an ti. Hnam hnufual zirlaite dikna leh chanvo humhim a nihtheih nan a hmalatu Zirlaipawl te leh zel YMA in a ngaimawh chu hriatthiam har an tih thu an tarlang a. YMA  chu Chibing an tih fo te hi tutenge tih zawtin, Lai,Mara leh Chakma te chu chibing niloin Hnam, India Danpui ah pawh chiangtaka tarlan an ni an ti a, Central YMA chu hetiang zawng rilru pu a nih chuan remna leh muanna  an duhlo ni a an ngaih thu te, District Council in thuneihna sangzawk a neih theih nan a hmalakna chu a tawp thleng a beihzel a nih tur thu leh dan hnuai a an chanvo tur thuneitute hnen ah an dil a ni tih an tarlang a,  mahni sahmim ringawt tihpuar tum a, unaute kuta vanneihna tla ve tur, thika an tana hekna awmsilova lo phi buai vak chu siam a hun thu te, Central YMA chu an thurel tawh sut tur a an phut thu leh an sut lo a nih chuan a tul anga hmalakzel an tum thu an thuchhuah chuan an tarlang.

Tuesday, November 20, 2012

YMA CCC thurel chu Central YLA leh LSA Gen.Hqrs ten tha an tilo

Autonomous District Council ten thuneihna sangzawwk an dil chungchanga YMA CCC thurel chu Central YLA in tha a tilo.YMA Central Co-Ordination Committee in tunhnai a an thutkhawm na an rel, Lai, Mara leh Chakma Autonomous District Council ten thuneihna sang zawk an neih theih loh na tur a hmalak ni rawh se tih chu Inrinni a        Central YLA Office Bearer Meeting, an President Pu L.Z.Tluanga ho a thukhawm chuan pawi an tih thu an sawi a, Hnam inpumkhatna tichhe thei a nih avangin hetiang thil hi thleng lo se an duh. Central YLA OB Meeting chuan YMA in Kohhran thil lehzel an rorelna sanga thutlukna atthlak tak a siam chu Central YLA chuan mak a tih thu an sawi. Autonomous District Council te thuneihna sang zawk petu tur chu Central Sorkar a ni a,  Hnam hnufual zawkte dawmkanna tur kawng a Central YMA in harsatna siam a tum hian               Zo Hnahthlak te inpumkhatna a tichhe thei thil hlauhawm tak niin Central YLA chuan an hriat thu an sawi a, Hemichungchang ah hian vawiin hian Lawngtlai       ah Central YLA, MTP leh YCA(Young Chakma    Association) ten Joint Meeting neih an tum thu YLA hruaitute chuan an sawi Inrinni vek khan LSA Gen.Hqrs.Lawngtlai  chuan thuchhuahsiamin YMA CCC Meeting in Autonomous District Council ten thuneihna sang zawk an neih belh zel lohna tur a hmalak an rel leh, hnambil Political Party dinloh an duhthute, Kohhran leh Zirlaipawl     an pawh chibing pawl awm lose an duh thu an sawi chu LSA Gen.Hqrs.Lawngtlai chuan pawi an tih thu te, Zofate rilru tina thei zawng leh inpumkhatna tichhe thei zawng a Mizorama Tlawmngai pawl lianber in ro a rel chu mak an tiin pawi an tih  thu an thuchhuah ah an tarlang a, Zofate inpumkhatna tichhe thei zawng a hmalakna chu Zoram chhung leh pawna awm zawng zawng ten thlawplo turin an ngen thu an  tarlang bawk.

MGNREGS hnuai ah Ni 50 inhlawhfakna pechhuak tawh

Central Sorkar hmalakna hnuai a Thingtlanga cheng ten kum khat ah Ni 100 tal inhlawhfakna an          neih theih nan ruahmanna kalpui       mek MGNREGS hnuai ah tun sorkar kum    chhungin Lawngtlai District chhung a RD Block pali, Lawngtlai, Sangau,Chawngte leh Bungtlang South Block ah te Job Card nei ten   Ni 50 inhlawhfakna         tur pekchhuah a ni    tawh a, ruahmanlawk ang chuan kumin December thla ral hma in Ni 10 dang inhlawhfakna tur pekchhuah leh tum a ni. MGNREGS hnuai ah hian Job card nei ten vantlang tan a hna tangkai hrang hrang an thawh thin bak ah, mimal huan lo ram ah pawh mipui ten hna thawh tul an tih chuan an thawk zel a, State Sorkar Flagship Programme NLUP hmalakna a chak zawk theih nan leh MGNREGS hnuai a hna tangkai tamzawk thawh a nih theih nan NLUP a      Trade thlangtu te tan tuilakna siamsak te, huan loram panna kawng chethat te pawh MGNREGS hnuai ah hian thawh niin, heibak ah hian Material Component hmangin mipui kut a thawh hleihtheih loh hna hrang hrang thawh mek a ni bawk.

Jail ah Volleyball pe


     Pu H.Lalramenga Court President & Recorder LADC leh Pu Thathluna Chinzah District Council Sport & Youth Officer,LADC te chuan Lawngtlai District Jail chu tunhnai khan tlawhin jail tangte infiamna turin Volleyball an pe a, an chungah Jail thuneituten lawmthu an sawi.

C.M dawnsawndan tur rel


        Lairam Gospel Centenary hmang tur a Chief Minister Pu Lal Thanhawla Lawngtlai a lo kaltur dawnsawn dan tur ngaihtuahin nimin khan Addl.DC Pu Beila Khithie ho in District Level Meeting neih a ni. Chief Minister dawnsawn leh lo thlenna tur ah ruahmanna hrang hrang te an siam nghal.Lairam Gospel Centenary hi tunkar Inrinni khian a lawmnapuiber tan a ni ang.

Journalist Pu Biakmawia a Boral


    MJA Champhai District President hlui, tuna General Secretary nilai mek Pu F Lalbiakmawia (49), Editor Dumde chuan nimin zing dar 6:30 khan Septicemia natna avangin Champhai ah a boral.Pu BMA hi Ningani (Nov 15) khan damlohna avangin Champhai Hospital ah dahluh a ni a. Septicemia natna a nei tih an hmuh hnuah   Aizawl panpui  tum a ruahmanna an neihlaiin a boral ta a ni.Pu BMA hian a nupui Lalthantluangi leh a fate 4 a kal san a. A upa ber Feli Fanai chu zaithiam a ni a. Nimin chhun dar 12:30 khan Champhai-a a chenna In-ah vuina hun hman a ni.

    Pu F.Lalbiakmawia sunna hun hi nimin chhun dar 12 khan Lawngtlai Press Club ah MJA Lawngtlai District President Pu V.Lal Lianzuala ho a neih a ni a,  Pu Biakmawia sunnan ngawi rengin Minute khat din a ni a, Lawngtlai District MJA te chuan Pu Biakmawia boral chu thinlung taka an tuar thu leh a kalsan tak a nupui fanaute Pathian in awmpui se an duh thu an sawi bak ah Champhai District MJA kaltlangin tuarpuina thu an thawn nghal bawk. District hrang hrang a MJA te chuan Pu Biakmawia sunna hun hi nimin khan an remchan dan angin an hman thu kan dawng.

Friday, November 16, 2012

Taima taka beitute chu midangte hlawhchhamna ah pawh an hlawhtling thin- H.Liansailova

Finance Minister Pu H.Liansailova chuanTaima taka bei tlat te chuan midangte hlawhchhamna hmunah pawh an hlawhtling thin a ti a, chutiang mi tumruh te     tan chuan harsatna hi anmahni tibeidawngtu        ni lovin chona thar siam   sak tu a ni zawk thin a ti, he thu nimin a The Aizawl Post Chanchinbu kum 10 tlin lawmna a hmanpuina ah sawiin Minister chuan,Aizawl Post Editor leh Publisher Pu C Lalrambuatsaiha te chhungkua leh he chanchinbu a lo thawk tawh thin te leh         thawk mek te thinlung taka a lawmpui thu    sawiin kum 10 lek chhunga chanchinbu chhiarhlawh ber pawl dintu te chhungkaw thawhrimna leh inpekna chu midang te            tana entawntlak leh  zirtlak a ni, a ti. Ding chhuak tura chakna nei lova inngai, anmahni khaichhuak tura sorkar hmalakna reng reng a thawha thawh chhin    hmaa thil tihtheihloh       leh hlawhchhampui       tura inngai nghal     ringawt Mizo mipui zingah tam tak an awm tih     sawiin     Pu H Liansailova chuan hetiang rilru paih    hi a hun ta hle a ni, a ti a. Chanchinbu leh electronic media te hi mipui te thu thar hriatna beng an      nih avangin journalist     ten thudik leh belhchian      dawl an tihchhuah a       tul a, mipui te ngaihnawm tih zawng leh hralh a    tlak theihna tur ringawt    ai chuan a quality ngaipawimawh hmasa tura chahin hmasawn    zel tura tan an           lakna kawngah chanchinbu miten tha an thlah tur a ni lo, a ti a. A tha zawnga mipui thinlung kaihruaitu ah tang fo tur leh hriatna tha chawlut tu, mipui hmasawnna rawngbawltu ni zel        turin chanchinbumite a fuih a bawk.

MCS Main Exam ah tling




        Kan hriattheih chin ah Tunhnai a MCS Main Exam neih ah Lawngtlai atangin B.Malsawmtluangi D/o B.Sangkulha Chandmary leh Malsawmtluanga Fanchun S/O J.S. Fanchun Electic Veng te chu an tling, Main Exam a tlingte hian Interview an  la hmachhawn leh ang.

National Press Day hmang dawn

Directorate of Information & Public     Relations leh MJA General Headquarters tangkawp buatsaihin National Press Day        2012 chu vawiin hian Aizawl Press Club ah hman a ni dawn a.Chanchinthar puanchhuah leh lakkhawm hnaa in   hmang zawng zawng te chu tel vek tura       sawm an ni.National Press Day 2012 hmannaah hian ‘Freedom of Media towards Communal     Harmony’       tih            thupui     hmanga Pu K.L.Rochama,President, Former Legislators Association of Mizoram (FLAM) Paper buatsaih zirho a ni ang.Aizawl a National Press Day 2012 hmannaah hian I&PR Secretary Pi M. Zohmingthangi, IAS chu khualian a ni ang.

Gospel Camping



       BCM Kannan, AOC Veng chuan Pro Pastor V.L.Nithanga Speaker a hmangin November ni 3 atang khan Gospel Camping an nei a, tunah hian chhawng hnihna an nei mek a, chhawng hnihna ah hian Campers 87 an awm.

Rs.5000/- pe



        Tunhnai a Haryana a Engineer zirlai, Misual kuttuar, Lawngtlai Bazar veng ami Masthanga chhungte hnen ah CEM chuan tanpuina Rs.5000/- a hlan.Masthanga hi a tha chho zel a,ngaihtuahawm a nilo niin thu kan dawng.

CEM lo haw dawn


    LADC a CEM Pu C. Ngunlianchunga , Aizawl lam ah ram tana hna tulpawimawhte bawhzui a zin chu, naktuk Inrinni hian Lawngtlai rawn thleng tur a beisei a ni.

Inbuatsaih chho mek


      Nov.24 atanga Lairam Gospel Centenary lawmna puiber CYLA Playground a neih tur ah ngawrh takin inbuatsaihna kalchhohpui mek niin Pandal sak hna pawh zawhfel a ni tep tawh.

Lawmthu sawi



      LPS Comedian Search a pathumna A.Lalhlimmawia Thingkah chuan, amah duhsaktu zawng zawng te chung ah lawmthu a sawi.

Chief Minister leh M.P ten MJA Kum 40 tlin Lawmna an hmanpui



Mizoram Journalists Association kum 40 tlin, Ruby Jubilee lawmna Nov.14 a I&PR Auditorium a neihah MJA Founder President Chief Minister Pu Lal Thanhawla chuan a hmanpui.

Chief Minister chuan MJA in hun harsa tak, rambuai thim chhah lai ber su tlanga kum 40 a tling ta chu lawmpuina chibai hruaitu kal ta te leh MJA member tinte chu a buk a. Kum 40 ah chuan puitlin leh puitlin loh a lang tawh thin a, Mizoram chanchinbute pawh a ziak danahte a puitling tawh viau a ni a ti a. Kan ngaihpawimawh tur chu a tam lam aiin a hlutna (quality) zawk hi a ni a ti a. Media hi mipuite zirtirtu, an chanvo dik tak leh mawhphurhna an neihte hrilhhria a, thuam chaktu a ni a, a hna a kan luhchilh anih pawhin journalism ethics hre reng chunga kan thawh a tul a ni a ti. India Danpuiin zalenna min pek hi fimkhur tak leh thiam taka kan hman angai a, thudik tak auchhuahpui leh tarlan hi kan tih tur a ni a ti.

Chanchinbu hian mipuite thil min hriattir a zirin ngaihdan te a thlak sak thei a, chuvangin journalist te mawhphurhna hi a sang hle a ni a ti a. Saptawnga W panga Who (tunge), What (enge), Where (khawnge), When (engtikahnge) leh Why (engvangnge) te hi kan zawm tawk em tih kan inenfiah fo a tul a ni a ti, Sorkar Press Release ah kan innghat lutuk em tihte inngaihtuah a, mahni ngeia kala a hmuna thil va hriat kha a tha ber fo a ni a ti a. Phailamah pawh an mahni ngei kalin, an hriat duhte hriat tumin an nghal em em thin a ni a ti.

Chief Minister chuan tunlai media chak tawh takah hian keini pawhin hma kan sawnin, kan thang hle a. Phailam chanchinbu kan la an lohna ber chu nupui - pasal zawnna (matrimonial column) chauh hi a ni a ti a. Elecronics media chak tak avang hian tawng hrang hrang hriat a, kan Mizo tawng ngei pawh a ziak danah kan fimkhur hle a angai a ni a ti. Chief Minister chuan hmasawn tur kan ni a, hmun danga journalist welfare chungchang te, journalist pension thuah te, mite aia tha zawk neih theih dan kan ngaihtuah te pawh a tha hle ang a ti.

Khualzahawm Pu C.L.Ruala, MP (Lok Sabha) chuan chanchinbu hi mipuite kaihruaitu anih avangin a enkawltu tan ziah tur leh ziah loh tur thliar thiam a, fimkhur a tulzia a sawi a.Phailam mediate nena Mizoram journalistte khaikhin chuan Mizote chu an nghal lo hle a ni a ti a. Phailam mite chu an thil hriat duhah chuan an luhchilh hmiah zel a ni a ti. Mizo tawng ziahzawm chungchangah uluk turin journalist te chu a chah bawk a ni.

Thursday, November 15, 2012

Fisheries Department ten Pu H.Vanlalthaliana ho in NLUP nimin khan an sem

Nimin khan  Lawngtlai Town Area  a Fisheries Dept.hnuaia Mizoram   Flagship Programme    NLUP           Ist Phase  3rd Instalment dawngtu mi 40 te hnenah Rs. 27800/- theuh in sem ani.    Nimin a Pawisa sem zawng zawng hi Rs. 11,12,000/- ani a. Hemi pual a  huntawite District Agriculture Office Conference Hall Lawngtlai a neih      chu  Pu Zamlova DFDO,Lawngtlai chuan kaihruaiin ,hun hmanpuitu LADC a Fisheries dept changtu Executive   member Pu H.Vanlalthaliana chuan thusawiin," Eizawnna ngialnghet kan neih theihnan Sawrkar in hma min laksak ang ngei hian a hlawhtlinna tur in kan thawh ve angai ani ati a,District Council pawhin hmala tak tak tu tan chuan kawng a zawn sak reng ani tiin,  sangha khawitute pawh in in pawisa dawn hi a nihna leh in dawn chhan ang tak a in hman a, in tundin nan in hman ka duh in ka ngen che u ani ati .Fisheries dept Lawngtlai hian karleh lam ah  Lawngtlai khawthlang lam leh khawchhak lamah NLUP Beneficiaries te hnenah sem leh nghal an tum.

Thisenpe



    Nimin khan Govt. Region Higher Secondary School (GRHSS) a NSS Unit te chuan a mamawh apiangte hman tur in Thisen Unit 27 an pe. Thisen petu hi mipa 19 leh hmeichhia 8 an ni a.
District Hospital a thawktu Dr.H.Lalrinfela leh a thawhpui ten GRHSS Hall ah kalchilh in thisen hi an laksak ani. Kumin ah hian Blood Donation Camp hi Lawngtlai ah vawi 23 neih ani tawh ani.

DC in Meeting ko



        Naktuk chawhnu dar 1 hian tum dang a la awm ngai zen zen lo Meeting pawimawh tak Lawngtlai DC chuan ko in, Lawngtlai khawpui leh District in  harsatna hrang hrang a neih te sutkian dan tur ngaihtuah a ni dawn.

Centenary Ruai theh



      Vengchhungah chhiat tawk an awm vanga Tualchhung Kohhran dangten Centenary Ruai an theh rual a theh ve theilo LIKBK Centre Church te chuan nimin khan Pathian hnen ah lawmthu sawiin Gospel Centenary pual in ruai an theh.

V.C ten Quarry nei



       Paithar V.C chuan khawtlang tana hna tangkai thawhna tur atan a Lung an mamawhte lakna turin VC hmingin Quarry an nei a, he Quarry atang hian Vengchhak lam panna kawng Boulder phah tur lung an la mek.

Wednesday, November 14, 2012

Lairam GOSPEL CENTENARY lawmna kalmek ah LIKBK Local Church ten awmnikham in hun an hmang.

Nimin khan LIKBK Local church tinte chuan LIKBK Assembly ruat angin Local Church tinah Lairam a Chanchintha luh kum 100 na champha (1912-2012) chu ropui leh urhsun takin ruai nen an lawm.  Local church tinah Centenary lungphun hawn ani a,Kohhran thenkhat Centenary Hall sa te pawh in hawnna an nei nghal bawk. Centenary thupui " A thlawnin in hmu a, a thlawn in pe chhuak rawh u" Matthaia 10:8 chu thupui a hmang in Kohhran hrang hrang ah sermon ngaihthlak ani. zing inkhawm hi zaikhawm in chhunzawm ani a, Local church tinah ruai  buatsaih ani Lawngtlai Bazar Central Church ah erawh chhiattawk an awm avangin vawiin ah Ruai hi an theh ang. Gospel centenary lawmna pui ber hi November ni 24-27 hian  CYLA Playground ah neih ani dawn a. Centenary lawmna tur a inbuatsaihna hrang hrang pawh zawh fel thawkhat tawh niin, Baptist World Alliance General Secretary Rev. Dr. Neville Callam leh  Asian Pacific Baptist Federation a General Secretary Rev. Bony Resu leh Rev. Dr.Chhum-awi, Gen. Secretary, Global Chin Christian Fellowship, Rev. Kabi Gangmei, Director, Asian Pacific Baptist    Aid ten Lairam a chanchintha luh kum 100 na champha hi an rawn hman pui ang Lairam Gospel   Centenary  lawmna puiber        hi Chief Minister Pu        Lal Thanhawla'n a    hawng ang.

Engineer zirlai tawhsual tawk zing ah Lawngtlai mi 2 an tel


    Pathianni tlai 5:30  vel khan Shree Siddhivinak Engineering College, Shahpur-Bilaspur ,Yamuna Nagar, Haryana a Mizo Engineer zirlai mi pathum Masthanga Lawngtlai Bazar, Robin V.L Hrina Lawngtlai Electric Veng leh Gokul Pun(Gorkhali) Lunglei  te chu an bajar haw lam  Hmaituam tu tihhriatloh mi 9 vel in an suam a, Masthanga hian hliam natak a tuar a, a Pum ah chemte a vih a ni a, a Ril khawih a, Robina hian a Ban ah vih a ni bawk a, Gokul-a hi chu vanneihthlak takin hliam na lutuk a tuar lo.S.S.G.I College ah hian mizo 23 awm in, Diwalli chawlh hmang tura an thiante zawng zawng Delhi lam a an kal hnu a thil thleng a ni. Suam tawkte leh mizo dang 2 te chu Zinchhuaklo a College a chawlh hman tum an ni a, hliam tuar Masthanga hi a thianten theih ang ang a buaipuiin, Delhi a Mizo awm te nen inbepawp in theihtawp chhuah a hmalak a ni a, Nov.12 tlailam ah AIIMS Delhi thlenpui niin hemi zan vek hian zai nghal a ni a, chanchin ziaklai hi chuan a ngaihtuahawm em em loh niin thudawn a ni. Delhi lam a LIKBK Pastor bak ah Mizo Officer leh Zirlai awmten theihtawp chhuah a buaipuiin Lawngtlai  lam ah DC pawh in theih ang ang a hmalakpui a inhuam reng thu sawiin, inlengte thingpui lum nan Rs.2000/- a pe. Masthanga Nu leh Pa te chuan an fapa in tawhsual a tawh vanga an mahni lainat a buaipuitu zawngz awng te chung ah tihtakzet in lawmthu an sawi.

NLUP Semdawn



       Vawiin hian Fishery Department hnuai a NLUP dawngtur te hnen ah semchhuah a ni dawn a, Agriculture Confenerence Hall ah LADC a Executive Member Pu H.Vanlalthaliana  ho in semchhuah a ni ang.

MJA Hunpui Spl.Conf.&Jubilee


   
    Vawiin hi MJA Hunpui a ni a, chawhma lamah MJA Special Conference neih a ni ang a, chawhnu dar 1:30 atangin Information and Public Relations Dept. Auditorium-ah MJA kum 40 tlin, Ruby Jubilee lawmna inkhawm neih a ni ang a, MJA President hmasa ber, Pu Lal Thanhawla, tuna Chief Minister chu khuallian a ni ang a, Lok Sabha Member, Pu CL Ruala chu khual zahawm a ni bawk ang.

Mizoram aiawh tur a Chakma dah MSU in an duhlo


    Mizo Students' Union (MSU) General Headquarters chuan Hmarchhak mite sahimna tura Delhi Police in Special cell for North East a dinah Hmarchhak State hrang hrang aiawh a a ram mi leh sa diktak te an awm laiin Mizoram aiawh tur (Co-Ordinator)a Chakma mi pahnih Lokesh Chakma leh Binny Chakma te dah an ni chu hrethiam lo in Delhi Home Minister hnenah leh Commissioner of Police, New Delhi te hnenah a rangthei angber a Mizo ngei dah turin leh Chakma mi an lo dahte an nihna hlip rang turin ngenna a thlen. Hemi chungchang ah hian Delhi lama Zirlai hruaitute leh Mizo Police Officer liante pawh MSU hruaitute nen inbe pawh rengin DMZP pawhin Emergency Meeting a nei ve thuai dawn tih thulakna chuan a tarlang.

MNF Thalai ten enfiah ngaiin an hria



    MNF Thalaite chuan Thingdawl-a Nursing College (General Nursing and Midwifery ‘GNM’) sak danah thil felhlel a awm em tih, RTI hmangin zawhna kan siam a. He hna thawh nana sum sanction Rs. 24,941,800/-(vaibelchhe hnih nuai sawmli pakua singli sangkhat zariat) senna Nursing College, Thingdawl, Contractor - Pu F. Sangkunga, Class - I Contractor, Reg. 105/ENC/PWD, Venghlui, Aizawl tia Work Worder pekchhuah a nih laia, Health Minister Pu Lalrinliana Sailo U, Pu Lalnghaka Sailo S/o Sailothanga Sailo(L) -in he hna hi a ma tel vena leh, Contractor mi 4 zinga pakhat nia insawia, November ni 9, 2012 (Friday)-a MNF Thalaite min hrilh lawi si hi mak kan tiin, he hnathawh dan chungchang hi enchian ngai hlein kan hria tiin thuchhuah an siam.

Lengpui Airport ah Pawisa thahnem tak kengtu mi 2 man


    Nov 12 khan Air India thlawhna hmanga Lengpui Airport atanga Kolkata pan tur passenger 2 te chu Airport Security ten an rinhlelh vanga an flight cancel sakin, anmahni leh an pawisa ken te nen Sairang Police Station ah FIR theh lutin nimin vek khan man nghal an ni.Heng mi pahnih, R Zohmingthanga (42), leh Lalhmangaiha (51), Zokhawthar ve ve te hi Lengpui Airport atanga Air India thlawhna hmanga Kolkata pan tur an ni a, EPIC (Elector's Photo Identity Card) lem an hman avang leh pawisa fai Rs. 21,20,000/- (Nuaih sawmhnih pakhat leh singhnih) lai an ken chu an hmanna tur an sawi chian theih loh avang in Airport Security te hian an man a. An EPIC lem hman te hi a tualchher hle a, han en mai pawhin a lem a ni tih a hriat hle tih thudawnna chuan a sawi.

Thursday, November 1, 2012

Driver te chu an lakah mipuiin rinna an nghahngam nan ZDU Lawngtlai chuan hma a la thin

Nimin zing khan Lawngtlai Bazar a District Merchant Office ah Zoram Drivers Union(ZDU) Sub-Hqrs.Lawngtlai   Kum 2013-2014 chhung   hruaitu thar thlanna an nei a,he hun hi ZDU Hqrs.Aizawl a Hruaitute Pu F.Zakhuma leh Pu Zirkhuma leh Lunglei atangin Hruaitu 2 ten an hman pui a,Hruaitu thar   an thlante chu President- Pu J.Rohlupuia, Vice          President- Pu C.  Lallianchia,   Secretary-     Pu C.Lalliankhuma,Asst Secy- Pu H.Remmawia. Treasurer- Pu N.Lalropuia leh Finance Secretary- Pu P.Zohminga te an ni. Lawngtlai ah hian        ZDU Member 36 an awm mek a,Driver te inzirtirna kawngah theihtawpin hma an lola thin a,Driverte chu Mipui rawngbawltu pawimawh tak an nih avangin Rui chunga Mipui rawngbawl lo tura inngen in,an lakah mipui ten rinna an     nghat ngam tur ani        tiin tan an lak reng        thu Pu J.Rohlupuia President thlan thar chuan a sawi.ZDU.Hqrs    hruaitute hnen atanga report ngaihthlak anih danin,    tun dinhmunah Mizoram pumpuiah ZDU Member hi Sing chuang an awm mek a,Member 293 boralte Rs Nuaih   khat theuha an ral tawh thu ngaihthlak niin,      Sub-    Hqrs 7. Branch-4, leh Unit-6 an neih        mek       thu leh Ngawlveite enkawlna hmun Damna In,Zuangtui ah Ngawlvei 357 an enkawl mek thu ngaihthlaka ni a,Kumtin Road Safety Week hlawhtling taka an hman theih thin thu report ngaihthlak ani bawk.

Nov.8 ah MNF leh PC in chhunfin dawn

MNF, National Executive chuan, PC party  nen in chhunfinna tur a pawmpui a, November 8, 2012 hian Aizawl Vanapa Hall-ah party pahnihte hi an in chhungfin ang.Nimin a Mizo Hnam Run  Aizawla MNF National Exectuive Comtt. an President Pu Zoramthanga kaihhruai chuan, Pu Lalhming thanga kaihhruai PC Party in, MNF Party nena in chhunfinna tur rawtna lehkha an thehluh te  thlirin, a bo a bang awm lovin an pawmpui.MNF President chuan, PC Party nena an indawr dan report pe in, PC Party in Sixth Basic Need alo vahvaihpui tawhte chu MNF in a chhawmchho zel tur thu leh, Mipui  leh Pathian zara sorkarna an chan phawt chuan an tih tur tho tho anih tur thu a sawi a.PC Party a nihna nei te dinhmun tur pawh chiang taka sawiho a      nih thu sawiin,Pu Zoramthanga chuan ‘An inthlahrung mah mah a ni’ a ti .

Hun pawtsei


      Election Commission chuan E/Roll siam mek ah inthunluh dil tute tan Noverber Ni 20, 2012 thleng hun a pawtsei.

Saiha ah Office kang


    Kum 1996 a cheng nuai 4 chuang senga sak District Employment Office, Saiha chu nimin zing dar 3:00 vel khan a kang,  kangmei chhuah chhan hi hriat chian nilo mahse Electric Current kalsual ni ngeia hriat a ni a, Fire Department leh mi tlawmngai kalkhawm ten theihtawp chhuaha kangmei an thelh hnu-ah he kangmei hi thelh mih a ni ta a ni.He Office Building hi chhawng hnih niin a chung zawk hi Office a hman a ni a, a hnuai zawk hi Office Staff chhungkaw khatin an luah mek a.Office Bungrua engmah chuh hman a ni lova, Office bungraw kang zing ah hian I.T.I.Training Materials thleng thar Rs. 70,000/- man hu vel pawh a kang ral a ni.

Opium man


    Nimin khan District Excise & Narcotic Deptt. Saiha ten Indica MZ 01 D-2080  atangin Opium kg 2.50 leh Tualchher Silai pakhat an man.